King Keriso Badinaia Bona Hesiai Henia

“Badana ese siahu bona mataurai bona dagi bada be unai Tau dekenai ia henia, bese ibounai bona iduhu ibounai bona gado ibounai taudia ese iena hesiai gaukara do idia karaia. Iena siahu be do ia noho hanaihanai, bona iena basileia be do ia doko diba lasi.”​—⁠DANIELA 7:⁠14.

1, 2. Edena bamona ita diba Pentekoste 33 C.E. ai Keriso be Basileia siahuna ibounai ia abia lasi?

DAIKA be ena taunimanima totona ia mase, to ia mauri lou, bena king ai ia lao? Edena king be tanobada ai ia noho, ena taunimanima ia durua ia idia badinaia bona abidadama henia, bona gabeai, guba amo ia lohia? Iesu Keriso sibona be unai kara bona ma kara haida ia karaia. (Luka 1:​32, 33) Keriso be mase amo ia toreisi lou bena guba dekenai ia daekau murinai, Pentekoste 33 C.E. ai “Dirava ese gau ibounai Keriso ena aena henunai ia atoa, bona ia ese ekalesia ena kwarana momokani Keriso ia halaoa.” (Efeso 1:​20-22; Kara 2:​32-36) To Keriso ia lohia matamaia neganai, gau ibounai ia lohiaia lasi. Ia lohiaia taudia ginigunadia be horoa Keristani taudia​—⁠idia be lauma Israela eiava “Dirava ena Israela” taudia.​—⁠Galatia 6:16; Kolose 1:⁠13.

² Lagani 30 bamona murinai, aposetolo Paulo ese ia hahedinaraia, Keriso be Basileia siahuna ia do abia lasi, to ia be “Dirava ena idiba kahanai ia helai diho. Unuseni ia naria noho, ela bona Dirava ese ia idia tuari henia taudia be iena aena henunai do ia atodia.” (Heberu 10:​12, 13) To lagani 96 C.E. bamona ai, aposetolo burukana Ioane ese matahanai ta lalonai ia itaia, Guba bona Tanobada edia Lohia Badana Iehova ese Keriso Iesu be guba Basileia matamatana ena King ai ia halaoa. (Apokalupo 11:15; 12:​1-5) Hari inai negai, idia vara vadaeni gaudia ibounai amo ita hamomokania diba, lagani 1914 ai guba dekenai Keriso be Mesia ena King dagina ia abia.a

3. (a) Lagani 1914 amo Basileia ena sivarai namona dekenai dahaka hereva matamatana ia hedinarai? (b) Dahaka henanadai be ita sibona dekenai ita henia diba?

³ Lagani 1914 amo, Basileia ena sivarai namona dekenai hereva matamatana ta ia hedinarai. King Keriso be Dirava ena guba Basileiana ia lohiaia noho, ena be ena ‘inai taudia bogaragidiai ia lohia.’ (Salamo 110:​1, 2, NW; Mataio 24:14; Apokalupo 12:​7-12) Danu, Iesu idia badinaia taudia ese Baibel hadibaia gaukara badana be tanobada ibounai dekenai idia karaia noho, guna bamona lasi; unai ese ia hahedinaraia, idia be mai edia ura ida Iesu ena lohia siahuna idia abia dae. (Daniela 7:​13, 14; Mataio 28:18) Horoa Keristani taudia​—⁠“Basileia ena taunimanima” unai​—⁠be “Keriso ena hereva gwauraia hedinarai taudia.” Bona Keriso ena “mamoe idaudia” be unai horoa Keristani taudia idia durua Dirava ena Basileia sivaraina idia halasia totona. (Mataio 13:38; 2 Korinto 5:20; Ioane 10:16) To, namona be ita sibona iseda kara ita tahua, ita be Keriso ena dagi ita abia dae momokani eiava lasi. Ita be Iesu badinaia karana ita goadalaia, a? Edena dala ai ita hahedinaraia, ita be guba dekenai ia lohia noho King ita badinaia? Namona be Keriso ita badinaia diba daladia haida ita kikilaia guna.

King Ena Kara Namo Dainai Idia Badinaia

4. Iesu be tanobada ai ena hesiai gaukara ia karaia neganai, dahaka danu ia karaia?

⁴ Keriso ena kara namodia bona ia karaia gaudia ita laloa bada dainai ia ita badinaia. (1 Petero 1:⁠8) Tanobada ai ia noho neganai, Iesu be dala maragina ai ia hahedinaraia, Dirava ena nega korikorina dekenai, King Iesu be tanobada ibounai ia lohiaia neganai dahaka do ia karaia. Ia ese hitolo taudia ia ubua. Gorere taudia, matakepulu taudia, tauanina ena kahana ta ia dika taudia, taia kudima taudia, bona hereva diba lasi taudia ia hanamodia. Danu, ia ese mase taudia haida ia hamauria lou. (Mataio 15:​30, 31; Luka 7:​11-16; Ioane 6:​5-13) Ma danu, Iesu ena tanobada maurina ita diba neganai, vaira negana ai tanobada do ia Lohiaia tauna ena kara ita diba unai​—⁠ena kara hereadaena be, sibona ena ura dadaraia lalokauna. (Mareko 1:​40-45) Napoléon Bonaparte ia gwau: “Lau, Alesana, Kaisara, bona Charlemagne be basileia badadia ai haginia, to edena dala ai gaukara badadia ai karaia diba? Taunimanima ai doria dainai. To Iesu Keriso sibona be lalokau dainai ena Basileia ia haginia, bona harihari, taunimanima milioni momo be idia ura Iesu totona idia mase.”

5. Dahaka dainai taunimanima ese Iesu idia ura henia?

⁵ Iesu be dagedage lasi bona manau tauna dainai, ena hadibaia hereva bona kara namodia ese lalometau bona lalohekwarahi taudia ia durua. (Mataio 11:​28-30) Natudia be Iesu dekenai idia gari lasi. Manau bona laloparara taudia be Iesu ena diba tahua taudia ai idia lao. (Mataio 4:​18-22; Mareko 10:​13-16) Iesu be ma haida ia laloa bada bona matauraia dainai, Dirava gari henia hahine momo ese ia idia badinaia, bona edia nega, goada, bona kohu amo Iesu idia durua ena hesiai gaukara ia karaia totona.​—⁠Luka 8:​1-3.

6. Lasaro ia mase neganai, Iesu ena mamina be edena bamona?

⁶ Keriso ena turana namona Lasaro ia mase neganai, Keriso be hebogahisi karadia ia hahedinaraia. Maria bona Mareta idia lalohisihisi dainai, Iesu ena lalona ia hisihisi bada bona “ia tai.” Iesu be ia “daradoko”​—⁠ia lalohisihisi bada, herevana ia diba Lasaro do ia hamauria lou. Iesu be lalokau bona hebogahisi tauna dainai, Dirava ena siahu amo Lasaro be mase amo ia hatorea isi.​—⁠Ioane 11:​11-15, 33-35, 38-44.

7. Dahaka dainai Iesu ita badinaia be maoro? (Rau 31 ai ia noho maua itaia danu.)

⁷ Ita hoa badina Iesu be kara namodia ia ura henia bada, to koikoi bona kara dika ia inai henia. Nega rua, Iesu ese dubu amo mataganigani hoihoi taudia ia luludia. (Mataio 21:​12, 13; Ioane 2:​14-17) Ma danu, Iesu be tanobada ai hekwakwanai momo ia davaria dainai, ita davaria hekwakwanai bona metau ibounai be ia lalopararalaia. (Heberu 5:​7-9) Danu, Iesu be kara gageva bona inai henia karana edia hisihisi ia diba. (Ioane 5:​15-18; 11:​53, 54; 18:38–19:16) Dokonai, Iesu be mai gari lasi ida ia mase, unai amo ena Tamana ena ura ia hagugurua bona ena taunimanima dekenai mauri hanaihanai ia henia. (Ioane 3:16) Keriso ena kara dainai, oi ura ia oi hesiai henia bona badinaia noho, a? (Heberu 13:8; Apokalupo 5:​6-10) To King Keriso henunai ita noho totona, dahaka ita karaia be namo?

King Keriso Henunai Ita Noho Ena Taravatu

8. Keriso ena taunimanima ese dahaka idia karaia be namo?

⁸ Mani inai oi laloa: Bema ta ia ura tanobada ma ta dekenai ia sitisen eiava ia noho, namona be taravatu haida ia badinaia. Hegeregere, namona be edia kara be ia namo bona idia gorere lasi. Unai hegeregerena, namona be Keriso ena taunimanima ese kara maoromaoro taravatudia idia badinaia bona lauma dalanai idia gorere lasi.​—⁠1 Korinto 6:​9-11; Galatia 5:​19-23.

9. Edena dala ai ita hahedinaraia diba, ita be Keriso badinaia taudia?

⁹ Danu, Iesu Keriso ia ura ena taunimanima be ia bona ena Basileia idia badinaia be namo. Unai bamona idia karaia totona, Iesu ese tanobada ai ia hadibaia gaudia idia badinaia be namo. Hegeregere, kohu idia tahua guna lasi, to Basileia bona Dirava ena ura idia atoa guna. (Mataio 6:​31-34) Danu, herevana hekwakwanai momo idia davaria, to idia hekwarahi Keriso ena kara idia hahedinaraia totona. (1 Petero 2:​21-23) Ma danu, Keriso ena taunimanima be ena haheitalai idia tohotohoa dainai ma haida idia kara namo henidia guna.​—⁠Mataio 7:12; Ioane 13:​3-17.

10. Edena dala ai Keriso badinaia karana ita hahedinaraia diba? (a) ruma bese lalonai bona (b) kongrigeisen lalonai?

¹⁰ Danu, Iesu murinai idia raka taudia be Iesu idia badinaia dainai, ruma bese lalonai Iesu ena kara idia hahedinaraia. Hegeregere, tatau be edia guba King Keriso idia badinaia dainai, edia adavana bona natudia idia kara namo henia. (Efeso 5:​25, 28-30; 6:4; 1 Petero 3:⁠7) Hahine be edia kara namodia, “laloa manau, bona dagedage lasi” karadia amo idia hahedinaraia, idia be Keriso idia badinaia. (1 Petero 3:​1-4; Efeso 5:​22-24) Natudia be Keriso ena kamonai karana idia tohotohoa neganai, idia be Keriso idia badinaia unai. Iesu be mero maragi neganai, ena tama sina ia badinaia, ena be idia be goevadae lasi taudia. (Luka 2:​51, 52; Efeso 6:⁠1) Keriso ena taunimanima be ia idia tohotohoa totona, idia “durua” heheni, “lalokau henia, tadikaka bamona,” bona “bogahisihisi henia.” Keriso bamona, idia ura idia “manau,” bona ta be ‘idia dekenai ia kara dika neganai, davana idia henia lasi.’​—⁠1 Petero 3:​8, 9; 1 Korinto 11:⁠1.

Keriso Ena Taunimanima be Iena Taravatu Idia Badinaia

11. Edena taravatu be Keriso ena taunimanima ese idia badinaia?

¹¹ Idau tano ena sitisen ai idia lao taudia ese unai tano matamata ena taravatu idia badinaia hegeregerena, Keriso ena taunimanima be Iesu ena hadibaia herevadia bona oda idia badinaia neganai, idia be “Keriso ena taravatu” idia badinaia. (Galatia 6:⁠2) Mai anina bada gauna be, “Basileia ena Taravatu badana”​—⁠lalokau⁠​—⁠​idia badinaia. (Iamesi 2:⁠8) Unai taravatu edia anina be dahaka?

12, 13. Edena dala ai ita be “Keriso ena taravatu” ita badinaia?

¹² Keriso ena taunimanima be idia goevadae lasi bona nega haida idia kerere. (Roma 3:23) Unai dainai, ‘Keristani varavara lalokau henidia noho’ karana be mai anina bada, unai amo ‘idia ta ta do idia lalokau henia, mai edia lalona ibounai’ danu. (1 Petero 1:22) “Bema tau ta ese iena bamona tauna ia maumauraia,” Keristani tauna be Keriso ena taravatu ia badinaia dainai, unai tau ena “dika do ia gwauatao.” Idia be unai bamona idia karaia dainai, ma haida edia kerere idia laloa momo lasi, to dala idia tahua idia lalokau heheni totona. Eda lalokau King idia badinaia, bona lalokau​—⁠“hatamonaia gauna hereadaena” unai​—⁠idia hahedinaraia taudia huanai oi noho dainai oi moale, a?​—⁠Kolose 3:​13, 14.

¹³ Ma danu, Iesu ia gwau ena lalokau be taunimanima ese vaia ma haida dekenai idia hahedinaraia lalokau karana ia hanaia. (Ioane 13:​34, 35) Bema ita idia lalokau henia taudia sibona ita lalokau henia, “namo” ta do ita havaraia lasi. Iseda lalokau be anina lasi. To, Iesu ia gwau, namona be iena Tamana ena lalokau ita tohotohoa​—⁠anina be eda lalokau be hakaua hereva maorodia ese do idia biagua dainai, ita ese eda inai taudia bona ita idia dagedage henia taudia do ita lalokau henia. (Mataio 5:​46-48) Danu, unai lalokau dainai Basileia ena taunimanima be edia gaukara badana idia karaia goadagoada. Unai gaukara badana be dahaka?

Taunimanima Edia Badinaia Karana Ia Tohoa

14. Dahaka dainai haroro gaukara be mai anina bada?

¹⁴ Dirava ena Basileia ena taunimanima be inai gaukara badana idia karaia: ‘Dirava ena Basileia idia hadibaia bona idia harorolaia.’ (Kara 28:23) Unai be mai anina bada, badina Mesia Basileia be Iehova ena lohia siahuna ena maoro do ia hamomokania. (1 Korinto 15:​24-28) Sivarai namona ita harorolaia neganai, dala ita kehoa kamonai taudia be Dirava ena Basileia ena taunimanima ai idia lao totona. Danu, taunimanima be Basileia ena sivarai namona idia kamonai henia lasi neganai, King Keriso be idia do ia hahemaoro henia. (Mataio 24:14; 2 Tesalonika 1:​6-10) Unai dainai, Keriso ita badinaia dalana badana be, ena oda hegeregerena Basileia ena sivarai be ma haida dekenai ita harorolaia.​—⁠Mataio 28:​18-20.

15. Dahaka dainai Keristani taudia edia badinaia karana be Satani ese ia tohoa?

¹⁵ Satani ia ura bada haroro gaukara ia koua, bona tanobada ena lohia taudia be Dirava ese Keriso dekenai ia henia lohia siahuna idia laloa bada lasi. (Salamo 2:​1-3, 6-8) Unai dainai, Keriso ese ena diba tahua taudia ia hadibaia: “Hesiai tauna ese iena biaguna ia hereaia lasi. Bema idia ese lau dekenai idia dagedage henia, umui dekenai danu do idia dagedage henia.” (Ioane 15:20) Keriso murinai idia raka taudia be lauma tuarina lalonai idia noho dainai, edia badinaia karana ia tohoa bada.​—⁠2 Korinto 10:​3-5; Efeso 6:​10-12.

16. Edena dala ai Basileia ena taunimanima be ‘Dirava ena gaudia idia henia Dirava dekenai’?

¹⁶ To, Dirava ena Basileia ena taunimanima be King Keriso​—⁠ena be idia itaia lasi​—⁠idia badinaia noho, bona tanobada ena gavamani idia matauraia danu. (Tito 3:​1, 2) Iesu ia gwau: “Kaisara ena gaudia umui henia Kaisara dekenai, Dirava ena gaudia umui henia Dirava dekenai.” (Mareko 12:​13-17) Unai dainai, Keriso ena taunimanima be tanobada gavamani ena taravatu idia badinaia, bema unai taravatu be Dirava ena taravatu idia utua lasi. (Roma 13:​1-7) To, Iuda taudia edia kota badana ese Iesu ena diba tahua taudia ia oda henidia do idia haroro lasi neganai, idia be mai gari lasi bona hemataurai ida idia gwau, ‘Dirava idia kamonai henia be namo, taunimanima idia kamonai henia be dika.’​—⁠Kara 1:8; 5:​27-32.

17. Dahaka dainai mai gari lasi ida hahetoho ita haheaukalaia diba?

¹⁷ Momokani, Keriso ena taunimanima ese dagedage idia davaria neganai, namona be mai gari lasi ida edia King idia badinaia noho. Iesu ia gwau: “Bema egu murinai umui raka dainai idia hadikaia umui, bona idia hisihisi henia umui, bona hereva dika mai koikoi danu idia gwauraia loaloa umui totona lau dainai, umui danu namo.” (Mataio 5:​11, 12) Keriso ena murinai idia raka taudia ginigunadia dekenai unai hereva be ia momokani. Ena be Basileia idia harorolaia noho dainai hisihisi idia abia, to idia “moale badina be, Dirava ese idia ia abia hidi vadaeni Iesu ena ladana dainai hisihisi do idia abia. Bona dina ibounai, Dubu Helaga lalonai bona ruma lalonai, taunimanima idia hadibaia noho, bona Iesu Keriso ena Sivarai Namona idia gwauraia noho. Inai gaukara idia hadokoa lasi.” (Kara 5:​41, 42) Ai ura umui ai hanamoa badina umui ese metau, gorere, mase, bona dagedage umui haheaukalaia bona Iesu umui badinaia noho.​—⁠Roma 5:​3-5; Heberu 13:⁠6.

18. Iesu ena hereva Pontio Pilato dekenai ese dahaka ia hahedinaraia?

¹⁸ Iesu be King ai ia do lao lasi neganai, Roma Gavana Pontio Pilato dekenai ia gwau: “Lauegu Basileia be inai tanobada gauna lasi. Bema lauegu Basileia be inai tanobada gauna, egu hesiai taudia be do idia tuari, Iuda taudia edia imana dekena amo lau do idia hamauria. Gau tamona, lauegu Basileia be iniseni lasi.” (Ioane 18:36) Unai dainai, guba Basileia ena taunimanima be tuari gaudia idia abia lasi eiava kahana ta dekenai idia gini lasi. To “Maino ena Lohia” idia badinaia dainai, tanobada ena heiriheiri karadia amo idia gini siri vaitani.​—⁠Isaia 2:​2-4; 9:​6, 7.

Keriso Badinaia Taudia be Noho Hanaihanai Ahuna Do Idia Abia

19. Dahaka dainai Keriso ena taunimanima be mai moale ida vaira negana idia naria noho?

¹⁹ Keriso, “ King ibounai edia King,” badinaia taudia be mai moale ida vaira negana idia naria noho. Idia ura Iesu ese tanobada dekenai iena lohia siahuna do ia hahedinaraia karana idia itaia. (Apokalupo 19:11–20:3; Mataio 24:30) Iesu idia badinaia horoa orena taudia​—⁠“Basileia ena taunimanima” unai​—⁠idia naria noho, Keriso ida guba dekenai idia lohia totona. (Mataio 13:38; Luka 12:32) Keriso idia badinaia “mamoe idaudia” be mai edia ura bada ida edia King idia naria noho, inai hereva ia gwauraia totona: “Umui mai, egu Tamana ese ia hanamoa taudia e, Basileia [ena tanobada Paradaisona] umui abia, tanobada ia karaia neganai, ia ese ia karaia hegaegae umui emui.” (Ioane 10:16; Mataio 25:34) Unai dainai, namona be Basileia henunai do idia noho taudia ibounai be edia lalona idia hadaia, edia King Keriso do idia hesiai henia bona badinaia noho.

[Footnote]

Anina Oi Gwauraia Diba, A?

• Dahaka dainai Keriso ita badinaia be maoro?

• Edena dala ai Keriso ena taunimanima be ia idia badinaia?

• Dahaka dainai ita ura King Keriso ita badinaia?

[Box on page 31]

KERISO ENA KARA HEREADAEDIA MA HAIDA

Ta ena hanua o kopina ena kala ia laloa lasi​—⁠Ioane 4:​7-30.

Ia hebogahisi​—⁠Mataio 9:​35-38; 12:​18-21; Mareko 6:​30-34.

Sibona ena ura dadaraia lalokauna​—⁠Ioane 13:1; 15:​12-15.

Badinaia karana​—⁠Mataio 4:​1-11; 28:20; Mareko 11:​15-18.

Ma haida edia hemami ia laloa bada​—⁠Mareko 7:​32-35; Luka 7:​11-15; Heberu 4:​15, 16.

Ia laloa maoromaoro​—⁠Mataio 15:​21-28.

[Picture on page 29]

Ita lalokau heheni neganai, ita be “Keriso ena taravatu” ita badinaia unai

[Pictures on page 31]

Keriso ena kara dainai, oi ura ia oi badinaia, a?