Hahemauri Totona Oi Hegaegae Vadaeni, A?
“Lagatoi lalonai oi guia, oi bona oiemu ruma taudia ibounai, badina be lau itaia, oi sibona be kara maoromaoro tauna inai taunimanima edia huanai.”—GENESE 7:1.
1. Noa bona ena ruma bese idia mauri totona, Iehova be dahaka ia karaia?
IEHOVA ese abata bada herea amo kamonai lasi taudia ia hamasedia, to danu dala ia karaia Noa bona ena ruma bese idia mauri totona. (2 Petero 2:5) Dirava momokani ese kara maoromaoro tauna Noa dekenai lagatoi haginia dalana ia gwauraia goevagoeva, unai amo abata badana amo idia roho mauri diba. (Genese 6:14-16) Noa be Iehova ia badinaia hesiai tauna dainai, ita diba “Noa ese unai bamona ia karaia, Dirava ena hereva ibounai hegeregere.” Noa ese Dirava ena hereva ia badinaia dainai, ita be hari ita mauri noho.—Genese 6:22.
2, 3. (a) Taunimanima momo be Noa ena gaukara dekenai dahaka idia laloa? (b) Noa be dahaka ia abidadama henia dainai, lagatoi lalonai ia vareai?
2 Lagatoi haginia gaukarana be gaukara badana. Toana be Noa bona ena ruma bese ese idia karaia gauna be taunimanima momo ese idia hoalaia. To unai ese edia lalona ia veria lasi roho mauri gabuna—lagatoi—lalonai idia vareai totona. Dokonai, Dirava ena haheauka ia ore dainai taunimanima dikadia ia haoredia.—Genese 6:3; 1 Petero 3:20.
3 Lagani momo lalonai Noa bona ena ruma bese idia gaukara goadagoada murinai, Iehova ese Noa ia hamaoroa: “Lagatoi lalonai oi guia, oi bona oiemu ruma taudia ibounai, badina be lau itaia, oi sibona be kara maoromaoro tauna inai taunimanima edia huanai.” Noa be Iehova ena hereva ia abidadama henia dainai, “Noa bona iena adavana bona ena natuna memero bona edia adavadia be lagatoi lalonai idia guia.” Iehova ese lagatoi ena iduara ia koua ena hesiai taudia ia gimaia totona. Abata badana be tanobada dekenai ia mai neganai, Dirava ese lagatoi amo dala ia karaia ena taunimanima ia hamauria totona.—Genese 7:1, 7, 10, 16.
Noa Ena Nega be Iseda Nega Hegeregerena
4, 5. (a) Iesu ese ena noho be edena nega ida ia hahegeregerea? (b) Edena dala ai Noa ena nega bona iseda nega idia hegeregere?
4 “Noa ena nega bamona, Taunimanima ena Natuna do ia mai neganai, be unai bamona gaudia do idia vara.” (Mataio 24:37) Unai hereva amo, Iesu ia hahedinaraia ena noho negana be Noa ena nega hegeregerena, bona unai be momokani. Noa ese ia gwauraia hadibaia herevana hegeregerena, lagani 1919 amo, unai hadibaia hereva be tanobada ena bese ibounai dekenai idia gwauraia noho. Bona taunimanima momo edia kara be Noa ena negai idia noho taudia bamona.
5 Iehova ese abata amo dagedage amo ia honu tanobadana ia hadikaia ore. (Genese 6:13) Taunimanima ibounai ese idia itaia Noa bona ena ruma bese be tanobada taudia edia dagedage karadia lalonai idia vareai lasi, to mai maino ida lagatoi idia haginia. Bona unai be iseda nega ida ia hegeregere. Kudou maoro taudia ese “kara maoromaoro tauna bona dika momokani tauna, Dirava ia hesiai henia tauna bona Dirava ia hesiai henia lasi tauna, edia idau do [idia] itaia.” (Malaki 3:18, NW ) Iehova ena Witnes taudia ese idia hahedinaraia kara momokani, hebogahisi, maino, bona edia gaukara goadagoada karana be taunimanima ese idia itaia bona idia laloa bada. Bona unai kara dainai Dirava ena taunimanima be tanobada taudia amo idia idau. Iehova ena Witnes taudia be dagedage karadia ibounai idia dadaraia, bona Iehova ena lauma ese idia ia hakaua. Unai dainai idia be maino idia davaria bona kara maoromaoro dalana idia badinaia.—Isaia 60:17.
6, 7. (a) Noa ena negai idia noho taudia be dahaka idia lalopararalaia lasi, bona hari iseda nega be edena bamona? (b) Edena ekspiriens ese idia hahedinaraia, Iehova ena Witnes taudia be tanobada taudia amo idia idau?
6 Noa ena negai idia noho taudia be idia laloparara lasi Dirava ese Noa ia durua. Unai dainai ena haroro gaukara idia laloa bada lasi bona edia kara idia haidaua lasi. Hari iseda nega be edena bamona? Ena be momo be Iehova ena Witnes taudia edia gaukara bona kara dainai idia moale, to idia momo ese sivarai namona bona Baibel ena sisiba idia laloa bada lasi. Dekena taudia, gaukara taudia, eiava varavara taudia be Iehova ena Witnes taudia idia ura henia lasi, to edia kara namodia dainai idia hanamodia. Unai taudia idia lalopararalaia lasi gauna be inai: Witnes taudia be Dirava ena lauma ese ia hakaua dainai, idia ese lalokau, maino, hebogahisi, kara maoromaoro, manau, bona sibona edia ura dadaraia karadia idia hahedinaraia. (Galatia 5:22-25) Edia kara namodia dainai, taunimanima ese edia haroro hereva idia kamonai be namo.
7 Hegeregere, Russia ai, Iehova ena Witnes taudia be Kingdom Hall ta idia haginia. Unuseniai tau ta ese gaukara tauna ta ia nanadaia: “Inai konstraksen gabuna be idau momokani—kuku idia ania lasi, hereva dikadia idia gwauraia lasi, bona ibounai be idia kekero lasi! Umui be Iehova ena Witnes taudia, a?” To unai gaukara tauna ese ia nanadaia, “Bema lau gwau lasi, egu hereva do oi abia dae, a?” Unai tauna ia haere, “Reana lasi.” Russia ena siti ma ta dekenai, siti naria tauna be Witnes taudia ese idia haginia Kingdom Hall matamata ia itaia neganai, ia hoa bada. Ia gwau, ena be guna ia laloa tomadiho orea ibounai be hegeregere, to Iehova ena Witnes taudia edia kara namodia ia itaia murinai, ena lalohadai ia haidaua. Unai be haheitalai rua sibona, to unai ese ia hahedinaraia Baibel ena taravatu idia badinaia lasi taudia be Iehova ena taunimanima amo idia idau.
8. Inai tanobada dikana ena dokona ai ita roho mauri totona dahaka ita karaia be namo?
8 Abata badana ia do vara lasi neganai, Noa be mai abidadama ida “kara maoromaoro ia harorolaia.” (2 Petero 2:5) Inai tanobada dikana ena nega dokona ai, Iehova ena hesiai taudia ese Dirava ena kara maoromaoro be taunimanima dekenai idia gwauraia. Bona tanobada matamata lalonai do idia vareai dalana ena sivarai namona idia harorolaia. (2 Petero 3:9-13) Noa bona ena ruma bese be lagatoi lalonai idia roho mauri hegeregerena, hari inai negai taunimanima idia roho mauri totona, abidadama idia hahedinaraia bona Iehova ena orea tanobada ai idia badinaia be gau badana.
Hahemauri Abia Totona Abidadama be Gau Badana
9, 10. Dahaka dainai abidadama be gau badana, bema ita ura Satani ena tanobada dikana amo ita roho mauri?
9 Bema ta ia ura Satani ese ia biagua tanobadana idia hadikaia negana ai ia roho mauri, dahaka ia karaia be namo? (1 Ioane 5:19) Gau badana be Iehova ena gimaia dalana ia abia dae bona ia badinaia. Noa ena negai idia noho taudia be dina ta ta ai idia karaia gaudia idia karaia, bona idia laloa ia mai noho dika amo tau ta ese idia ia gimaia be anina lasi. Idia be Dirava idia abidadama henia lasi.
10 To, Noa bona ena ruma bese idia laloparara, ta ese idia ia gimaia bona hamauria be namo. Danu idia be Siahu Ibounai Diravana Iehova idia abidadama henia. Aposetolo Paulo ia gwau: “Tau ta bema Dirava ia abidadama henia lasi neganai, ia hegeregere lasi Dirava ena ura do ia badinaia. Badina be bema tau ta be Dirava kahirakahira ia ura lao neganai, ia ese Dirava do ia abidadama henia guna, Dirava be ia mauri noho. Bona unai tau ena abidadama be inai bamona: Dirava idia tahua taudia ibounai, be davana namona Dirava ese do ia henidia.” Ma ia gwau: “Noa ese Dirava ia abidadama henia, vadaeni Dirava ese dohore idia vara gaudia Noa dekenai ia hadibaia guna. Vadaeni Noa ese Dirava ia kamonai henia, bona lagatoi badana ia karaia. Noa, mai ena hahine, bona mai edia natudia danu ese lagatoi dekenai idia mauri noho, dika idia davaria lasi. Noa ena abidadama ese tanobada taudia ibounai ia kota henia bamona. Bona Noa ena abidadama dainai, Dirava ese kara maoromaoro tauna ia gwauraia. Ma Dirava idia abidadama henia taudia ibounai, be Dirava ese maoromaoro do ia gwauraidia.”—Heberu 11:6, 7.
11. Idaunegai, Iehova ese taunimanima ia gimaia dalana amo dahaka ita dibaia?
11 Inai tanobada dikana ena dokona amo ita roho mauri totona, inai tanobada do ia ore karana ita abia dae sibona lasi, to namona be gau haida ita karaia danu. Abidadama ita hahedinaraia, bona Dirava ese roho mauri totona ia henia gaudia ita abia dae be namo. Oibe, Dirava ena Natuna, Iesu Keriso ena boubou gauna ita abidadama henia be gau badana. (Ioane 3:16, 36) To, namona be ita laloatao, lagatoi lalonai idia noho taudia sibona be Abata Badana amo idia roho mauri. Unai hegeregerena, idaunegai Israela ai, bema tau ta be aksiden amo ma ta ia alaia mase, ia roho mauri totona, gau badana be heau mauri hanuana ta dekenai ia lao bona unuseniai ia noho. Ia be unai hanua dekenai ia heau lao bona unuseniai ia noho ela bona hahelaga tauna badana ia mase. (Numera 35:11-32) Mose ena negai, Aigupito dekenai ia vara hisihisi namba 10 ai, Aigupito taudia edia vara guna natudia ibounai be idia mase, to Israela taudia edia natudia be idia mase lasi. Dahaka dainai? Iehova ese Mose ia hamaoroa: “Mamoe ena rara haida do umui [Israela taudia] abia, iduara ena au kahana kahana bona ataiai au dekenai rara do umui dahua, inai ubua gauna umui ania rumadia ibounai dekenai. . . . Tau ta ese iena ruma dekena amo do ia lao lasi murimuri dekenai, ela bona dabai.” (Esodo 12:7, 22) Dirava ese Israela taudia ia haganidia iduara ena au kahana kahana ai rara do idia atoa bona ruma lalonai do idia noho. Edena vara guna natuna do ia ura unai hahegani do ia utua?
12. Ita ta ta dekenai dahaka henanadai ita henia be namo, bona dahaka dainai?
12 Unai dainai sibona iseda mauri ita laloa namonamo be namo. Iehova ese lauma dalanai ita ia gimaia totona ia karaia dalana ita badinaia, a? Hisihisi badana ia vara neganai, unai gimaia dalana idia abia dae taudia be do idia moale bada herea dainai, mata ranu do idia diho bona Iehova do idia tanikiu henia. To, unai gimaia dalana idia abia dae lasi taudia be unai negai do idia lalohisihisi bona taitai.
Orea Ena Heau Dalana Dekenai Gau Haida Idia Haidaua Karana amo Ita Idia Hahegaegaea
13. (a) Dahaka dainai orea lalonai gau haida idia haidaua? (b) Idia haidaua gaudia haida mani oi gwauraia.
13 Iehova ese ena tanobada oreana lalonai gau haida ia haidaua noho. Unai amo Ia ese lauma dalanai ita ia gimaia totona ia karaia dalana ia hanamoa bona ia hagoadaia. Lagani 1870 amo ia lao 1932 ai, elda bona diakono taudia be kongrigeisen taudia ese vouti karana amo idia abia hidi. To lagani 1932 ai, vouti dalanai elda abia hidi karana idia hadokoa, bona kongrigeisen ese hesiai komiti ta idia abia hidi hesiai gaukara ia gunalaia tauna idia durua totona. Lagani 1938 ai, kongrigeisen lalonai hesiai taudia ibounai be tiokratik dalanai idia abia hidi. Lagani 1972 amo, Iehova ena Witnes taudia edia Hakaua Oreana ena hakaua henunai, elda eiava hesiai tauna ena maduna totona idia gwauraia hidi taudia edia ladana be brens dekenai idia siaia. Bena brens amo gwaumaoro idia abia neganai, unai abia hidi idia karaia. Lagani momo idia hanaia murinai, Hakaua Oreana ena gaukara ia bada ia lao dainai gau haida idia haidaua, unai amo unai gaukara idia karaia noho diba.
14. Lagani 1959 ai, edena sikuli idia hamatamaia?
14 Lagani 1950 ai, Salamo 45:16 ena anina idia tahua namonamo murinai, elda bona hesiai taudia totona sikuli ta idia hamatamaia. Unai siri ia gwau: “Oi ese natuna tau momo do oi abia. Idia ese oiemu tamana bona tubuna edia king dagi, be do idia abia, bona tanobada kahana ibounai dekenai, king taudia do oi halaodia.” Hari inai negai, kongrigeisen idia hakaua elda taudia be sikuli idauidau amo diba idia abia noho, unai amo hari bona Aramagedo murinai tiokratik gaukara idauidau idia karaia diba. (Apokalupo 16:14, 16) Lagani 1959 ai, Basileia Hesiai Gaukara Sikuli idia hamatamaia. Unai negai, dala idia karaia hakaua naria taudia—guna idia gwauraia kongrigeisen ena naria taudia—totona hua tamona lalonai unai sikuli idia karaia. Hari unai sikuli dekenai elda bona hesiai taudia ibounai idia lao diba. Gabeai unai tadikaka ese edia kongrigeisen ai idia noho tadikaka bona taihu ta ta idia hadibaia. Unai amo, lauma dalanai ibounai idia durua edia haroro dalana idia hanamoa totona.—Mareko 13:10.
15. Edena dala rua amo Keristani kongrigeisen be ia goeva noho?
15 Bema ta ia ura Keristani kongrigeisen lalonai ia noho, namona be hahegani ia badinaia. Idaunegai, Noa idia kirikirilaia taudia be lagatoi lalonai idia noho lasi hegeregerena, hari Dirava ena hesiai taudia idia kirikirilaia taudia be Iehova ena orea lalonai do idia vareai lasi. (2 Petero 3:3-7) Lagani 1952 amo, Iehova ena orea gimaia totona, idia helalo-kerehai lasi kara dika taudia be kongrigeisen amo idia atoa siri, bona Iehova ena Witnes taudia ese unai dala idia abia dae. To, idia helalo-kerehai momokani taudia be mai lalokau ida idia durudia ‘edia raka dalana idia hamaoromaoroa totona.’—Heberu 12:12, 13; Aonega Herevadia 28:13; Galatia 6:1.
16. Iehova ena taunimanima edia noho lauma dalanai be edena bamona?
16 Lauma dalanai Iehova ese ena taunimanima ia hanamodia bada. Iehova be peroveta tauna Isaia amo ia gwau: “Lau dekenai idia tomadiho bona kamonai henia taudia, be do idia aniani bona inuinu bada, to umui, be do umui hitolo bona ranu mase. Kamonai! Egu hesiai taudia be do idia moale, to umui, be do umui hemarai bada. Kamonai! Egu hesiai taudia ese ane do idia abia, edia moale be bada dainai, to umui, be emui lalohisihisi bada dainai, do umui taitai, mai boiboi bada danu, badina emui laumadia be do idia laloa hekwarahi momokani.” (Isaia 65:13, 14) Iehova be nega korikori ai lauma aniani namodia momo ia henia noho lauma dalanai ita ia hagoadaia totona.—Mataio 24:45.
Hahemauri Totona Oi Hegaegae
17. Dahaka ese ita do ia durua hahemauri totona ita hegaegae?
17 Guna bamona lasi, hari be nega namona “umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi, haida ese idia hadokoa bamona. To umui ta ta emui Keristani varavara taudia edia lalona do umui hagoadaia.” (Heberu 10:23-25) Iehova ena Witnes taudia edia kongrigeisen ibounai be 98,000 ia hanaia, bona unai kongrigeisen ta ida ita gaukara hebou ese ita ia durua hahemauri totona ita hegaegae. Mauri matamata ita atoa bona mai iseda kudouna ibounai ida ma haida ita durua Iehova ena hahemauri dalana idia dibaia totona. Iseda tadikaka ese ita do idia durua unai ita karaia totona.—Efeso 4:22-24; Kolose 3:9, 10; 1 Timoteo 4:16.
18 Satani bona ena tanobada dikana be idia hekwarahi bada Keristani kongrigeisen amo ita idia hakaua siri totona. To, ita be kongrigeisen lalonai ita noho bona inai tanobada dikana amo ita roho mauri diba. Iehova lalokau henia karana bona ia henia gaudia totona iseda tanikiu karana ita hahedinaraia be namo, unai ese ita do ia durua Satani ita dadaraia totona. Bema hari ita abia hahenamo ita laloa dobu, unai ese ita do ia hagoadaia. Unai hahenamo haida be stadi gabena ai do ita herevalaia.
Emu Haere be Dahaka?
• Edena dala ai iseda nega be Noa ena nega hegeregerena?
• Edena kara ita hahedinaraia be gau badana ita roho mauri totona?
• Iehova ena orea be dahaka gau haida ia haidaua, unai amo ita ia durua ita roho mauri totona?
• Edena dala ai ita ta ta be hahemauri totona ita hegaegae diba?
18. Dahaka dainai emu lalona oi hadaia Keristani kongrigeisen lalonai oi noho totona?
[Picture on page 4]
Noa ena negai idia noho taudia be Noa ese ia karaia gaukara idia laloa bada lasi
[Picture on page 5]
Dirava ena hadibaia hereva badinaia karana be mai ena namo
[Picture on page 6]
Basileia Hesiai Gaukara Sikuli idia karaia ena badina be dahaka?
[Picture on page 7]
Hari be nega namona Keristani kongrigeisen kahirakahira ita noho totona