Idia be Dirava Ena Abia Hidi Besena Lalonai Idia Vara
“Dirava ese . . . umui ia abia hidi vadaeni, iena bese korikori do umui lao totona.”—DEUTERONOMI 7:6.
1, 2. Iehova ese Israela taudia totona dahaka kara badadia ia karaia, bona Dirava ida dahaka gwauhamata idia karaia?
LAGANI 1513 B.C.E. ai, Iehova ese dala ia karaia iena hesiai taudia tanobada ai be ia idia tura henia totona. Unai lagani ai, Iehova ese tanobada ena basileia badana ta ia hahemaraia bona Israela taudia be igui hesiai amo idia ia ruhaia. Unai bamona ia karaia neganai, ia be edia Hahemauri Tauna bona Biaguna ai ia lao. Dirava ese kara ta ia do karaia lasi neganai, Mose ia hamaoroa: “Israela taudia dekenai oi hamaoroa, lau inai Lohiabada, bona Aigupito taudia ese umui emui latanai gaukara metau idia atoa, be inai hisihisi dohore lau kokia. Idia guia umui, to lau ese umui do lau ruhaia, lauegu imana ena goada dekena amo, bona hoa karadia badadia dekena amo dohore lau hamauria umui. Lauegu bese do lau halaoa umui, bona lau be umui emui Dirava do lau lao.”—Esodo 6:6, 7; 15:1-7, 11.
2 Israela taudia be Aigupito idia rakatania bena daudau lasi murinai, idia be edia Dirava Iehova ida gwauhamata ta idia karaia. Iehova be tanobada ai tau ta, ruma bese ta, eiava iduhu ta ia abia hidi lasi ena taunimanima ai idia lao totona, to Ia ese bese ta ia abia hidi. (Esodo 19:5, 6; 24:7) Iehova ese ena taunimanima dekenai taravatu ia henia, unai ese edia dina ta ta maurina bona tomadiho lalonai idia ia hakaua. Mose be idia dekenai ia gwau: “Edena bese badana edia dirava ese iena bese dekenai ia noho kahirakahira, Lohiabada iseda Dirava ita kahirakahira ia noho bamona? Ita ese durua totona Dirava dekenai ita boiboi henia neganai, noinoi ibounai ia ese ia kamonai. Bona edena bese badana edia taravatu be maoromaoro, lau ese hari dina umui dekenai lau henia taravatu ibounai bamona?”—Deuteronomi 4:7, 8.
Witnes Besena Lalonai Idia Vara
3, 4. Dahaka dainai Iehova ese Israela besena ia havaraia?
3 Lagani handred haida murinai, Iehova ese ena peroveta tauna Isaia amo Israela taudia ia hadibaia, badina ta dainai idia be ena bese ai ia halaoa. Isaia ia gwau: “Israela e, Lohiabada, umui ia havaraia vadaeni Diravana ese ia gwau, ‘Do umui gari lasi, lau ese umui do lau hamauria. Lau ese umui emui ladana lau atoa vadaeni, umui be lauegu. Badina lau be Lohiabada, emui Dirava. Lau be Israela ena Dirava Helagana, lau ese umui lau hamauria noho. . . Lau ura egu bese taudia ese, daudau tanodia dekena amo do idia giroa mai, tanobada ena kahana ibounai dekena amo. Idia be lauegu bese korikori. Lau ese idia lau havaraia, idia ese lau do idia hanamoa, bona egu ladana do idia abia isi totona. Israela taudia e, umui be lauegu hereva hamomokania taudia [“witnes taudia,” NW ] . . . Bese be unai, lau karaia vadaeni, lauegu taudia inai, bona idia ese ane dekenai, egu ladana do idia hanamoa!’ ”—Isaia 43:1, 3, 6, 7, 10, 21.
4 Israela taudia be Iehova ena ladana idia abia taudia dainai, bese ma haida dekenai Iehova ena lohia siahuna idia gwauraia. Iehova ese idia ia havaraia ‘ia do idia hanamoa’ totona. Idia ese Iehova ia karaia hoa kara badadia do idia gwauraia bona unai amo ena ladana helagana do idia abia isi. Ita gwau diba, idia be Iehova ena witnes besena ta.
5. Dahaka dainai ita gwau diba Israela taudia be gwauhamata besena?
5 Lagani 1100 B.C.E. murinai, King Solomona ia gwau Iehova ese bese ibounai amo Israela besena sibona ia abia hidi. Guriguri amo Iehova dekenai ia gwau: “Oi ese tanobada bese ibounai dekena amo idia oi abia hidi, oiemu bese korikori do idia lao totona.” (1 King Taudia 8:53) Israela taudia ta ta danu be Iehova idia hetura henia. Nega sisina gunanai, Mose ese idia ia hamaoroa: ‘Umui be Lohiabada emui Dirava ena bese taudia, Dirava ena bese helagana.’ (Deuteronomi 14:1, 2) Israela taudia edia natudia be unai gwauhamata besena lalonai idia vara dainai, Iehova dekenai edia mauri idia gwauhamatalaia lasi. (Salamo 79:13; 95:7) Idia ese edia natudia dekenai Iehova ena taravatu idia hadibaia bona Iehova ida idia karaia gwauhamatana dainai, edia natudia be mai edia maduna unai taravatu idia badinaia totona.—Deuteronomi 11:18, 19.
Sibodia Edia Abia Hidi Idia Karaia Diba
6. Israela taudia ta ta be dahaka abia hidi idia karaia diba?
6 Ena be Israela taudia be gwauhamata besena lalonai idia vara, to idia ta ta ese abia hidi idia karaia be namo, Dirava idia hesiai henia totona. Gwauhamata tanona lalonai idia do vareai lasi neganai, Iehova ese idia ia hamaoroa: “Hari dina, guba bona tanobada dekenai lau boiboi noho, idia ese umui do idia uitnesi henia. Badina lau be mauri bona mase, hanamoa kara bona hadikaia kara, umui emui vairana dekenai lau atoa, do umui abia hidi totona. Unai dainai mauri do umui abia hidi, vadaeni umui bona emui natudia do umui mauri noho. Lohiabada emui Dirava do umui lalokau henia, bona iena hereva do umui kamonai henia, bona Lohiabada do umui badinaia namonamo. Unai neganai ia be emui mauri ena badina, bona ia ese mauri lagani momo herea umui dekenai do ia henia. Bona emui sene taudia Aberahamo bona Isako bona Iakobo dekenai Lohiabada ese ia gwauhamata henidia tano lalonai do umui noho daudau herea.” (Deuteronomi 30:19, 20) Unai dainai Israela taudia ta ta do idia abia hidi, Iehova do idia lalokau henia, ia do idia kamonai henia bona badinaia be namo. Idia ta ta be sibodia edia abia hidi hegeregerena, namo eiava dika do idia davaria.—Deuteronomi 30:16-18.
7. Iosua ia mase murinai, dahaka ia vara?
7 Hahemaoro taudia edia nega lalonai, abidadama taudia edia kara namona bona abidadama lasi taudia ese idia davaria dika ena sivarai ita itaia diba. Unai nega ia do matamaia lasi neganai, Israela taudia ese Iosua ena haheitalai namona idia tohotohoa bona hahenamo idia abia. “Iosua ena mauri dinadia ibounai lalonai, Israela taudia ese Lohiabada ena hesiai gaukara idia karaia. Bona Iosua ia mase murinai danu, idia ese Lohiabada idia badinaia. Unai bamona idia karaia, ela bona edia gunalaia taudia, Lohiabada ena kara badadia Israela taudia totona idia itaia taudia, idia mase vadaeni.” To Iosua ia mase murinai, “uru matamata taudia idia vara, idia be Lohiabada idia diba lasi, bona Lohiabada ena durua kara Israela taudia dekenai danu idia laloaboio momokani. Vadaeni Israela taudia ese Lohiabada ena vairanai kara dika idia karaia.” (Gunalaia Taudia 2:7, 10, 11) Unai uru matamata be gwauhamata besena lalonai idia noho ena hahenamo idia laloa bada lasi, ena be guna edia Dirava Iehova ese edia bese totona hoa karadia ia karaia.—Salamo 78:3-7, 10, 11.
Edia Gwauhamata Idia Hamomokania
8, 9. (a) Edena dala ai Israela taudia ese edia gwauhamata Iehova dekenai idia hamomokania diba? (b) Sibona edia ura hegeregerena boubou idia henia taudia ese dahaka namo idia abia?
8 Iehova ese ena bese taudia dekenai dala ia kehoa edia gwauhamata idia hamomokania totona. Hegeregere, iena Taravatu henunai boubou idauidau idia karaia, idia haida be taravatu hegeregerena idia karaia, bona ma haida be sibodia edia ura dainai idia henia. (Heberu 8:3) Idia haida be inai: gabua boubou, paraoa boubou, bona maino karaia bouboudia, unai boubou gaudia be sibodia edia ura dainai idia henia. Unai bamona boubou idia karaia badina idia ura Iehova ena lalonamo idia abia, bona edia tanikiu karana idia hahedinaraia.—Levitiko 7:11-13.
9 Unai boubou gaudia be Iehova ese ia moalelaia. Baibel ese ia hahedinaraia, gabua boubouna bona paraoa bouboudia “be mai ena bonana namona Lohiabada dekenai.” (Levitiko 1:9; 2:2) Maino karaia boubou lalonai, animal ena digara bona rara be Iehova dekenai idia bouboulaia, to vamu be hahelaga taudia bona boubou idia karaia taudia ese idia ania. Unai aniani hebou karana ese Iehova ida maino ai idia hetura karana ia laulaulaia. Taravatu ia gwau: “Maino karaia bouboudia Lohiabada dekenai umui henidia neganai, kara ibounai taravatu hegeregerena do umui karaia, vadaeni unai boubou do lau abia dae.” (Levitiko 19:5) Israela taudia be gwauhamata besena lalonai idia vara dainai, idia be Iehova dekenai idia gwauhamata vadaeni. To idia ura momokani Iehova idia hesiai henia taudia ese sibodia edia ura hegeregerena boubou gaudia idia henia diba, unai amo Iehova ena lalonamo bona hahenamo idia abia.—Malaki 3:10.
10. Isaia bona Malaki edia negai, Iehova ese edena bamona ia hahedinaraia edia boubou gaudia dekenai ia moale lasi?
10 To, idia gwauhamata Israela besena ese Iehova idia gwau-edeede henia. Iehova ese ena peroveta tauna Isaia amo, idia dekenai ia gwau: “Umui ese emui mamoe, be lau dekenai umui mailaia lasi, do umui gabua totona. Emui boubou gaudia dekena amo lau umui hanamoa lasi. Lau ese boubou karadia umui dekena amo lau noia lasi, unai be metau umui dekenai dainai.” (Isaia 43:23) Ma danu, bema ta be Iehova ia lalokau henia lasi bona mai ena ura ida boubou gaudia ia henia lasi, Iehova ena matanai unai boubou gauna be anina lasi. Hegeregere, Isaia ia noho bena lagani 300 murinai, peroveta tauna Malaki ena negai, Israela taudia ese animal dikadia idia bouboulaia. Unai dainai Malaki ese idia ia hamaoroa: “ ‘Lau be umui emui kara dekenai lau moale lasi. Bona lau dekenai umui mailaia boubou gaudia be do lau abia dae lasi.’. . . ‘Umui ese lau dekenai inai gaudia umui henia boubou totona: Boromakau o ubua gaudia mai edia bero, bona mai edia gorere, bona aena dika gaudia danu. Umui laloa lau ese inai gaudia do lau abia dae, a? Lasi momokani.’ ”—Malaki 1:10, 13; Amosa 5:22.
Dirava ese Gwauhamata Besena Ia Dadaraia
11. Israela taudia dekenai dala ia kehoa dahaka hahenamo idia abia totona?
11 Israela taudia be Iehova ena gwauhamata besena ai idia lao neganai, idia ia gwauhamata henia, ia gwau: “Bema lauegu hereva do umui kamonai henia, bona lauegu taravatu do umui badinaia neganai, umui be lauegu bese korikori do umui lao. Tanobada besedia ibounai be lauegu, to bese ibounai edia huanai umui be lauegu abia hidi besena. Lauegu helaga taudia do lau halaoa umui, bese helagana do umui lao. Lau sibona dekenai do umui helaga.” (Esodo 19:5, 6) Mesia be idia huanai do ia hedinarai bona dala ia kehoa idia be Dirava ena Basileia gavamanina ena lohia taudia ai idia lao totona. (Genese 22:17, 18; 49:10; 2 Samuela 7:12, 16; Luka 1:31-33; Roma 9:4, 5) To Israela taudia momo herea ese edia gwauhamata idia hamomokania lasi. (Mataio 22:14) Idia ese Mesia idia dadaraia bona gabeai ia idia alaia mase.—Kara 7:51-53.
12. Iesu ese dahaka ia gwauraia, unai amo ia hahedinaraia Iehova ese gwauhamata besena ia dadaraia?
12 Dina haida idia noho bena Iesu do ia mase neganai, ia ese Iuda tomadiho gunalaia taudia ia hamaoroa: “Inai Buka Helaga ena revareva umui duahia lasi, a? ‘Ruma haginia taudia ese idia ura henia lasi nadi be, ruma ena kona nadi ia halaoa vadaeni. Inai be Lohiabada ena kara. Ita itaia, ita hoa.’ Unai dainai umui lau hamaoroa, ‘Dirava ena Basileia be Dirava ese umui dekena amo do ia abia siri, bona Basileia ena huahua do ia havaraia besena dekenai do ia henia.’ ” (Mataio 21:42, 43) Iehova ese unai gwauhamata besena ia dadaraia karana be Iesu ese ia herevalaia, ia gwau: “Ierusalema e! Ierusalema e! Peroveta taudia oi alaia mase, bona oi dekenai Dirava ese ia siaia taudia be nadi dekenai oi hodoa. Nega momo lau ura oiemu natuna lau haboua, kokoroku hahine ese iena natuna iena hanina dekenai ia koua bamona, to oi ura lasi! Inai, umui emui ruma be do ia noho kava anina lasi.”—Mataio 23:37, 38.
Gwauhamata Bese Matamatana
13. Ieremia ena negai, Iehova ese dahaka ia perovetalaia?
13 Peroveta tauna Ieremia ena nega lalonai, Iehova ese ena taunimanima dekenai gau ta ia gwauraia. Ia gwau: “Nega be ia mai noho, lau ese Israela bona Iuda danu gwauhamata taravatu matamatana do lau karaia. Inai gwauhamata be edia sene taudia danu lau karaia gwauhamata taravatuna bamona lasi, unai be Aigupito dekena amo lauegu imana dekena amo idia lau hakaua neganai. Unai neganai lau be adavana bamona idia dekenai, to idia ese unai gwauhamata idia hamakohia. To gwauhamata taravatu matamatana, Israela taudia danu do lau karaia gauna be inai bamona: ‘Lau ese lauegu taravatu edia lalodia dekenai do lau atoa, bona edia kudouna dekenai do lau torea. Lau be edia Dirava do lau lao, bona idia be lauegu bese do idia lao.’ ”—Ieremia 31:31-33.
14. Gwauhamata bese matamatana be edena negai bona edena bamona ia vara? Bona daidia be unai bese matamata lalonai idia noho?
14 Lagani 33 C.E. ai Iesu ia mase bena ena Tamana dekenai iena rara ena davana ia henia neganai, unai gwauhamata matamatana ia karaia. (Luka 22:20; Heberu 9:15, 24-26) To Pentekoste 33 C.E. ai Iehova ese lauma helaga ia bubua neganai, unai bese matamatana—“lauma Israela”—ia vara. Bona unai nega amo gwauhamata matamatana ia gaukara matamaia. (Galatia 6:16; Roma 2:28, 29; 9:6; 11:25, 26) Aposetolo Petero ese horoa Keristani taudia ia tore henidia neganai, ia gwau: “Dirava ese umui ia abia hidi vadaeni, umui be iena bese, umui be King ena hahelagaia taudia, bese helagana, bona Dirava ena orea korikori taudia. Dirava ese umui ia abia hidi, iena hoa kara badadia do umui gwauraia hedinarai. Badina be ia ese dibura dekena amo umui ia boiria, vadaeni iena diari namo bada herea lalonai do umui noho. Gunaguna umui be bese lasi taudia, to harihari umui be Dirava ena bese.” (1 Petero 2:9, 10) Iehova ese Israela bese korikorina ida ia karaia gwauhamatana be ia doko. Lagani 33 C.E. ai, Iehova ese Israela bese korikorina ia dadaraia bona lauma Israela—“Basileia ena huahua do ia havaraia besena”—ia hanamoa.—Mataio 21:43.
Ta Ta ese Idia Karaia Gwauhamatana
15. Pentekoste 33 C.E. ai, Petero ese kamonai taudia ia hagoadaia dahaka idia karaia totona?
15 Pentekoste 33 C.E. murinai, taunimanima ibounai—Iuda bona Idau Bese taudia—be Dirava dekenai sibodia edia gwauhamata idia karaia bona “Tamana, Natuna, bona Lauma Helaga ena ladanai”a bapatiso idia abia. (Mataio 28:19) Pentekoste dinana ai, aposetolo Petero ese kamonai Iuda taudia bona Iuda tomadihona idia abia dae taudia ia hamaorodia: “Umui ibounai ese emui lalona umui giroa bona bapatiso umui abia, Iesu Keriso ena ladana dekenai, umui emui kara dika do idia gwauatao totona, bona Lauma Helaga do umui abia, Dirava ena harihari gauna.” (Kara 2:38) Unai taudia be bapatiso amo do idia hahedinaraia edia mauri be Iehova dekenai idia gwauhamatalaia, to unai sibona lasi, namona be idia abia dae Iehova ese Iesu Keriso amo edia kara dika ia gwauatao. Namona be idia laloparara Iesu be Iehova ese ia abia hidi Hahelaga Tauna Badana bona edia Hakaua Tauna, Keristani kongrigeisen ena Kwarana unai.—Kolose 1:13, 14, 18.
16. Paulo ena negai, edena dala ai kudou-maoro Iuda bona Idau Bese taudia be lauma Israela taudia ai idia lao?
16 Lagani haida idia ore murinai, aposetolo Paulo ia gwau: “Damaseko taudia dekenai lau haroro guna, gabeai Ierusalema taudia, gabeai Iudea kahana ibounai, bona inai murinai idau bese taudia danu dekenai lau haroro. Egu haroro be, idia edia lalona do idia giroa, Dirava dekenai do idia mai, bona kara do idia karaia, edia lalona giroa hamomokania totona.” (Kara 26:20) Paulo ena hereva amo Iuda bona Idau Bese taudia edia lalona ia veria bena idia abia dae Iesu be Keriso bona Mesia, unai murinai idia ia durua gwauhamata bona bapatiso idia abia totona. (Kara 16:14, 15, 31-33; 17:3, 4; 18:8) Unai hahediba taudia matamatadia be Dirava idia abidadama henia dainai, idia be lauma Israela taudia ai idia lao.
17. Edena gaukara be kahirakahira do ia ore, bona edena gaukara ma ta be ia heau haraga noho?
17 Hari, lauma Israela taudia oredia makaia gaukarana be kahirakahira do ia ore. Ia ore neganai, “aneru 4” ese lai do idia halasia, unai ese hisihisi badana dinana ai dika bada do ia havaraia. To hari, tanobada ai mauri hanaihanai do idia abia taudia gogoa gaukarana be ia heau haraga noho. “Mamoe idaudia” be “Mamoe ena Natuna ena rarana” idia abidadama henia bona Iehova dekenai edia gwauhamata idia hamomokania totona, bapatiso idia abia. (Apokalupo 7:1-4, 9-15; 22:17; Ioane 10:16; Mataio 28:19, 20) Idia huanai be matamata taudia, idia momo be Keristani ruma bese lalonai idia tubu. Bema oi be unai matamata mero eiava kekeni ta, reana do oi ura bada stadi hereva gabena do oi duahia.
[Footnote]
a May 15, 2003, Watchtower, rau 30-1 itaia.
Riviu
• Dahaka dainai Israela taudia edia natudia ese Iehova dekenai gwauhamata idia karaia lasi?
• Israela taudia be edena bamona idia hahedinaraia edia gwauhamata idia hamomokania?
• Dahaka dainai Iehova ese gwauhamata Israela besena ia dadaraia bona edena bese ese edia gabu ia abia?
• Pentekoste 33 C.E. murinai, Iuda bona Idau Bese taudia be dahaka idia karaia be namo lauma Israela taudia ai idia lao totona?
[Picture on page 21]
Israela taudia edia natudia be Dirava ena gwauhamata besena lalonai idia vara
[Picture on page 23]
Israela taudia ta ta be Dirava dekenai edia gwauhamata idia karaia be namo
[Picture on page 23]
Ta ena ura hegeregerena boubou gauna ia henia diba karana ese ia hahedinaraia, Israela taudia ese Iehova idia lalokau henia
[Picture on page 25]
Pentekoste 33 C.E. murinai, Keriso ena murinai idia raka taudia be Dirava dekenai gwauhamata idia karaia bona bapatiso amo unai idia hamomokania