Duahia Taudia Edia Henanadai

Ena be Aonega Herevadia 8:​22-​31 be aonega ia herevalaia, to edena bamona ita diba unai be Iesu Keriso ena mauri gunana guba dekenai ia herevalaia?

Aonega Herevadia bukana ese aonega ia herevalaia neganai, ia gwau: “Lohiabada ese gau ibounai ia karaia neganai, ia ese lau ia karaia guna. . . . Bona ororo badadia be do lasi neganai, Dirava ese lau ia havaraia. Ororo maragidia be edia gabu dekenai idia do noho lasi, unai neganai lau be lau vara. . . . Guba be Dirava ese ia karaia neganai, lau be unuseni, . . . Unai neganai lau be Dirava ena badibadinai lau noho, gaukara karaia [“namonamo,” NW ] tauna bamona. Dina ibounai Dirava be lau dekenai ia moale, bona lau be iena vairana dekenai, lau moale noho nega ibounai. . . . Tanobada, mai ena noho taudia ibounai dekenai lau moale noho.”

Unai siri be Dirava ena aonega eiava lalohadai ta sibona ia herevalaia lasi. Dahaka dainai? Badina unai siri ese ia hahedinaraia bamona, Iehova ese gau ibounai ia do havaraia lasi neganai, Ia ese aonega ia “karaia” guna. To Iehova be noho hanaihanai Diravana dainai, Iena aonega danu be ia noho hanaihanai. (Salamo 90:​1, 2) Iehova ena aonega be mai ena matamana lasi; ia be ta ese ia karaia lasi eiava ia havaraia lasi. To unai siri ese ia herevalaia aonega be taunimanima ta bamona, ia hereva bona kara ia karaia diba.​​—⁠Aonega Herevadia 8:⁠1.

Aonega Herevadia bukana ia gwau, idaunegai aonega be Havaraia Tauna, Iehova, badinai ia noho, bona ia be “gaukara karaia [“namonamo,” NW ] tauna.” Unai be Iesu ia herevalaia. Iesu be tanobada dekenai ia do mai lasi neganai, ia be Iehova Dirava ida ia gaukara hebou dainai, Baibel ia gwau: “Gau ibounai idia do noho lasi neganai Keriso be ia noho. Iena siahu dekena amo, gau ibounai be edia gabu edia gabu dekenai idia noho, ia ese idia ia naria noho.”​​—⁠Kolose 1:​17; Apokalupo 3:​14, BHğ.

Aonega ese Dirava ena Natuna ia laulaulaia be maoro, badina Iesu be Iehova ena ura bona taravatu ia hahedinaraia tauna. Iesu be guba dekenai ia noho neganai, ia be Dirava ena Hereva eiava Hereva Gwauraia Tauna. (Ioane 1:⁠1) Baibel ese Iesu ia gwauraia “Dirava ena siahu, bona Dirava ena aonega.” (1 Korinto 1:​24, 30) Oibe, Baibel ese unai dala namona ai Dirava ena Natuna ia gwauraia; Iesu be taunimanima ia lalokau henidia bada dainai, iena mauri be idia totona ia atoa diho!​​—⁠Ioane 3:​16.

[Picture on page 31]

“Ororo badadia be do lasi neganai, Dirava ese lau ia havaraia”