Iehova ese Lauma Helaga be Idia Noinoi Taudia Dekenai Ia Henidia
“Umui laloa, umui be dika taudia, gau namodia emui natuna dekenai henia be umui diba, to emui Tamana guba dekenai ia noho ese Lauma Helaga be idia noinoi taudia dekenai do ia henidia lasi, a?”—LUKA 11:13.
1. Edena bamona negadia ia lauma helaga ena heduru ita abia be namo?
‘LAU be hegeregere lasi inai lau hanaia totona. To, lauma helaga ena heduru amo inai hisihisi do lau haheaukalaia!’ Oi be nega ta unai bamona oi hereva, a? Keristani taudia momo be unai bamona idia hereva vadaeni. Reana unai bamona oi hereva, badina doketa ta ese oi ia hadibaia, oi be gorere badana ta oi abia. O reana lagani daudau lalonai oi bamoa adavana ia mase neganai, unai bamona oi hereva. Eiava reana oi lalometau bada dainai oi moale lasi. Unai bamona negadia ai, reana oi gwau hisihisi oi haheaukalaia diba badina Iehova ena lauma helaga be oi dekenai “siahu badana” ia henia.—2 Korinto 4:7-9; Salamo 40:1, 2.
2. (a) Keristani taudia momokanidia be dahaka hekwakwanai idia davaria? (b) Edena henanadai haida do ita herevalaia?
2 Hari inai negai, Dirava idia dadaraia taudia be Keristani taudia momokanidia idia dagedage henia bona hametaua bada. (1 Ioane 5:19) Danu, Satani Diabolo be Keriso ena murinai idia raka taudia ia dagedage henia, badina idia ese “Dirava ena taravatu idia badinaia momokani. Bona Iesu ena hereva momokani idia gwauraia hedinarai.” (Apokalupo 12:12, 17) Unai dainai, ita laloparara hari be nega namona Dirava ena lauma helaga ena heduru ita abia totona. Dirava ena lauma helaga ena heduru bada ita abia noho totona, dahaka ita karaia be namo? Bona hisihisi idauidau ita davaria negadia ai, dahaka dainai ita diba Iehova be mai ena ura ida ita dekenai goada do ia henia? Iesu ena parabole rua ese ita do ia durua, unai henanadai edia haere ita diba totona.
Guriguri Loulou
3, 4. Iesu be edena parabole ia gwauraia, bona edena dala ai ia hahedinaraia guriguri karana be unai bamona?
3 Nega ta Iesu ena hahediba tauna ta ia noinoi, ia gwau: “Lohiabada e, guriguri oi hadibaia ai dekenai.” (Luka 11:1) Parabole rua amo, Iesu ese ena hahediba taudia edia noinoi ia haerelaia. Parabole ginigunana ai, ruma tauna ta ese ena vadivadi turana dekenai aniani ia henia, bona parabole iharuana lalonai, tamana ta be ena natuna ena hereva ia kamonai. Mani unai parabole rua ita herevalaia.
4 Iesu ia gwau: “Umui ta hanuaboi huanai momokani dekenai bema oi lao, oiemu turana dekenai bema oi noinoi, do oi gwau, ‘Egu turana e, aniani gaudia toi mani oi henia, lau abiatorehai, badina be egu turana ta ena laolao dekena amo ia mai vadaeni, to lau dekenai ia lau ubua gauna ta ia noho lasi.’ To ia be ruma ena lalona dekena amo do ia haere, do ia gwau, ‘Oi hekwarahi henia lasi lau, iduara lau koua vadaeni, bona lau be egu natuna danu ai hekure. Lau be do lau toreisi lasi, do lau henia lasi oi dekenai.’ Lau hamaoroa umui dekenai, do ia toreisi lasi, ena turana durua totona. To bema oi noia lou, noia lou neganai, ia be do ia toreisi, vadaeni oiemu ura gaudia ibounai do ia henia.” Bena, Iesu ese ia hahedinaraia unai parabole be mai anina bada guriguri karana dekenai, ia gwau: “Lau hamaoroa umui dekenai, do umui noinoi, do ia henia umui dekenai. Do umui tahua, do umui davaria. Do umui pidipidi, iduara do ia kehoa umui emui. Badina be idia noinoi taudia ibounai idia abia, idia tahua taudia ese idia davaria, pidipidi tauna dekenai iduara do idia kehoa.”—Luka 11:5-10.
5. Iesu ena parabole ese ita ia hadibaia ita guriguri neganai, dahaka ita karaia be namo?
5 Unai noinoi loulou tauna ena parabole ese ia hahedinaraia, ita guriguri loulou be namo. Mani oi laloa, Iesu ia gwau unai tau be ena “noia lou, noia lou” karana dainai, ia ura gauna ia abia. (Luka 11:8) Greek gado herevana idia hahanaia “noia lou, noia lou” be nega tamona sibona Baibel dekenai ia hedinarai. Unai hereva be Greek herevana ta amo idia hahanaia neganai, ena anina korikori be “hemarai lasi.” Nega momo bema ta idia gwauraia ia “hemarai lasi,” unai be hereva namona lasi. To, bema tau ta be gau ta abia totona ia hemarai lasi eiava ia noinoi loulou, unai be kara namona. Parabole dekenai, ia noinoi loulou tauna be unai bamona ia karaia. Badina ia ura gauna abia totona, ia hemarai lasi to ia noinoi loulou. Iesu be unai noinoi loulou tauna ena parabole amo ita ia hadibaia, ita guriguri neganai ita noinoi loulou be namo. Iehova ia ura do ita noinoi noho, do ita tahua noho, bona do ita pidipidi noho. Bona Ia ese “Lauma Helaga be idia noinoi taudia dekenai do ia henidia.”
6. Iesu ena negai, taunimanima ese vadivadi taudia abia dae karana be edena bamona idia laloa?
6 Iesu be guriguri dalana—o noinoi loulou karana—sibona ia hahedinaraia lasi, to ita guriguri ena badina ia gwauraia danu. Unai ita lalopararalaia namonamo totona, namona be inai ita tahua: Iesu ena parabole idia kamonai taudia ese vadivadi taudia abia dae karana be edena bamona idia laloa. Baibel ena sivarai momo ese idia hahedinaraia, Baibel negadiai Dirava ena hesiai taudia bona ma haida be unai kara idia laloa bada. (Genese 18:2-5; Heberu 13:2) Bema ta be ena ruma dekenai vadivadi tauna ia abia dae lasi, unai be hemarai karana. (Luka 7:36-38, 44-46) Vadaeni hari, mani Iesu ena parabole ita itaia lou.
7. Dahaka dainai ruma tauna be mai ena hemarai lasi ida ena turana ia hanogaia?
7 Parabole lalonai, ia noinoi loulou ruma tauna be hanuaboi momokani ai ena ruma dekenai vadivadi tauna ta ia abia dae. Ruma tauna ia laloa ena vadivadi tauna ia ubua be namo, to aniani “ia noho lasi.” Ia laloa kara ta ia karaia haraga be gau badana! Herevana dahaka, to aniani ia abia be namo. Unai dainai, ena turana ta dekenai ia lao, bona mai hemarai lasi ida ena turana ia hanogaia. Ia boiboi: “Egu turana e, aniani gaudia toi mani oi henia.” Ia noinoi loulou ela bona ena turana ese ena ura gauna ia henia. Unai aniani ia abia neganai, ia be heabidae tauna namona idia gwauraia diba.
Oi Ura Dikadika Gauna Totona Oi Noinoi Loulou
8. Dahaka dainai lauma helaga abia totona ita noinoi loulou be gau badana?
8 Ita guriguri loulou karana ena badina be unai parabole ese edena bamona ia hahedinaraia? Ruma tauna be aniani abia totona ia noinoi loulou, badina unai amo vadivadi tauna dekenai aniani do ia henia. (Isaia 58:5-7) Bema aniani ia abia lasi, vadivadi tauna do ia ubua lasi. Unai hegeregerena, ita Keristani taudia momokanidia ita diba Dirava ena lauma ita abia totona ita noinoi loulou be namo, badina unai amo iseda haroro gaukara do ita karaia namonamo diba. (Sekaraia 4:6) Bema unai lauma ita abia lasi, eda haroro gaukara do ita karaia namonamo lasi. (Mataio 26:41) Unai parabole amo mai anina bada gauna ta oi dibaia, ani? Bema ita laloa Dirava ena lauma helaga ena heduru ita abia be mai anina bada, vadaeni Iehova ita noia loulou be gau badana.
9, 10. (a) Dirava ena lauma helaga ita abia totona ita guriguri loulou ena badina, be haheitalai ta amo oi hahedinaraia. (b) Dahaka henanadai ita henia be namo, bona dahaka dainai?
9 Unai parabole hegeregerena ta be inai: Hanuaboi momokani lalonai emu famili tauna ta ia gorere. Oi be doketa ta do oi hanogaia, heduru ia henia totona, a? Bema ia be gorere maragina sibona, reana doketa do oi hanogaia lasi. To, bema ia be kudou gorerena (heart attack) ia abia, oi be doketa tauna oi boiria totona do oi hemarai lasi. Dahaka dainai do oi hemarai lasi? Badina gorere tauna oi durua haraga be namo. Oi laloparara, kudou gorere ia diba momo doketa ena heduru be gau badana. Bema doketa ena heduru oi noia lasi, gorere tauna do ia mase. Unai hegeregerena, ita gwau diba Keristani taudia momokanidia be dika badana idia davaria diba. Badina Satani be “laiona mai ena boiboi bada bamona” ia loaloa, ita ia ania totona. (1 Petero 5:8) Satani ese eda hetura karana Iehova ida ia hadikaia lasi totona, Dirava ena lauma helaga ena heduru ita abia be namo. Bema Dirava ena heduru ita noia lasi, dika bada do ita davaria. Unai dainai, Dirava ita noia loulou ena lauma helaga ita abia totona. (Efeso 3:14-16) Unai dala tamona sibona ese ita do ia hagoadaia, ita “haheauka ela bona dokona” totona.—Mataio 10:22; 24:13.
10 Unai dainai, nega haida ita sibona ita nanadaia be namo, ‘Lau guriguri loulou, a?’ Ita laloaboio lasi, bema ita diba Dirava ena heduru ita abia be namo, vadaeni lauma helaga totona do ita noinoi loulou be gau badana.
Dahaka Dainai mai Abidadama ida Ita Guriguri?
11. Edena dala ai Iesu ese tama ta bona ena natuna ena parabole be guriguri karana ida ia hahegeregerea?
11 Noinoi loulou tauna ena parabole ese guriguri tauna—abidadama tauna—ena kara ia hahedinaraia. To parabole iharuana be guriguri ia kamonai tauna—Iehova Dirava—ena kara ia kikilaia. Iesu ia henanadai: “Umui daika emu natuna . . . gwarume do ia noia neganai, gaigai do oi henia? O gatoi do ia noia neganai, doadoa do oi henia?” Iesu ma ia gwau: “Umui laloa, umui be dika taudia, gau namodia emui natuna dekenai henia be umui diba, to emui Tamana guba dekenai ia noho ese Lauma Helaga be idia noinoi taudia dekenai do ia henidia lasi, a?”—Luka 11:11-13.
12. Parabole iharuana ese edena dala ai ia hahedinaraia, Iehova be eda noinoi do ia kamonai?
12 Tama ese ena natuna ia kamonai henia hegeregerena, Iesu ese ia hahedinaraia Iehova be ia idia guriguri henia taudia ia kamonai henidia danu. (Luka 10:22) To, namona be parabole ginigunana bona iharuana edia idau ita laloa. Iehova be parabole ginigunana ese ia herevalaia tauna—ia ura lasi ena turana ena boiboi ia kamonai tauna—bamona lasi. To Iehova be parabole iharuana ese ia herevalaia tamana ta bamona, badina unai tama be ena natuna ena noinoi ia kamonai. (Salamo 50:15) Danu, Iesu ese unai parabole amo Iehova ena kara bona goevadae lasi tama ta ena kara ia hahedinaraia. Iesu ia gwau, bema goevadae lasi tama ta be ena natuna dekenai harihari gaudia namodia ia henia diba, ita gwau diba eda guba Tamana, hariharibada Diravana, be Ia idia tomadiho henia taudia dekenai lauma helaga do ia henia!—Iamesi 1:17.
13. Iehova ita guriguri henia neganai, ita abia dae momokani dahaka do ia vara?
13 Unai amo dahaka ita dibaia? Ita abia dae momokani bema eda guba Tamana dekenai lauma helaga abia totona ita noinoi, Iehova be eda noinoi gauna do ia henia. (1 Ioane 5:14) Bema ita noinoi loulou, Iehova be do ia gwau lasi: “Oi hekwarahi henia lasi lau, iduara lau koua vadaeni.” (Luka 11:7) Lasi, Iesu ia gwau: “Do umui noinoi, do ia henia umui dekenai. Do umui tahua, do umui davaria. Do umui pidipidi, iduara do ia kehoa umui emui.” (Luka 11:9, 10) Oibe, ita guriguri neganai, Iehova be ita do ia haere henia.—Salamo 20:9; 145:18.
14. (a) Hisihisi idia abia taudia haida be dahaka lalohadai kererena idia abia? (b) Hisihisi ita davaria neganai, dahaka dainai mai abidadama ida Iehova ita guriguri henia?
14 Danu, Iesu ese tama namona ena parabole amo ia hahedinaraia, Iehova ena kara namo be tanobada tamana ena kara namo ia hanaia. Unai dainai hisihisi ita abia neganai, ita gwau lasi Dirava be ita dekenai ia moale lasi dainai ita ia hisihisi henia. Lasi, iseda inai tauna badana, Satani, ia ura unai bamona lalohadai kererena ita abia. (Iobu 4:1, 7, 8; Ioane 8:44) Baibel be unai bamona hereva ta ia gwauraia lasi. Iehova be “kara dika” amo ita ia tohoa lasi. (Iamesi 1:13) Iehova be gaigai eiava doadoa bamona hisihisi gaudia amo ita ia tohoa lasi. Iseda guba Tamana be ia dekenai idia noinoi taudia dekenai “gau namodia” ia henia. (Mataio 7:11; Luka 11:13) Oibe, Iehova ena kara namo bona ita ia durua karana ita lalopararalaia dainai, mai abidadama ida Ia ita guriguri henia. Unai bamona ita karaia neganai, ita danu be Salamo torea tauna bamona do ita gwau: “Momokani Dirava ese ia kamonai vadaeni. Ia ese egu noinoi hereva ia abia dae vadaeni.”—Salamo 10:17; 66:19.
Lauma Helaga ese Ita Ia Durua Dalana
15. (a) Iesu ese lauma helaga ia herevalaia neganai, dahaka ia gwauhamatalaia? (b) Lauma helaga ese ita ia durua dalana ta be dahaka?
15 Iesu ia do mase lasi neganai, ena parabole lalonai ia gwauraia hagoadaia herevana ia gwauraia lou. Iena hahediba taudia dekenai lauma helaga ia herevalaia neganai, ia gwau: “Lau ese Tamana do lau noia, ia ese Durua Tauna ta do ia henia umui dekenai, umui dekenai do ia noho hanaihanai.” (Ioane 14:16) Iesu ia gwauhamata gabeai—iseda nega lalonai danu—ia be durua tauna ta, eiava lauma helaga, be ia murinai idia raka taudia dekenai do ia henia. Hari inai negai, lauma helaga be edena dala badana ta ai ita ia durua? Ia ese ita ia durua hahetoho idauidau ita haheaukalaia totona. Edena dala ai? Aposetolo Paulo—hahetoho ia davaria tauna ta—be Korinto taudia ia tore henidia neganai, Dirava ena lauma helaga ese ia ia durua dalana ia herevalaia. Ia torea herevana mani ita itaia.
16. Paulo bamona, dahaka ia vara diba ita dekenai?
16 Matamanai, Paulo be ena tadikaka ia hamaoroa ia be “ginigini ta” o hahetoho ta ia hisihisilaia. Bena ia gwau: “Nega toi Lohiabada [Iehova] dekenai lau guriguri, lau noia ia ese inai hisihisi do ia kokia.” (2 Korinto 12:7, 8) Ena be Paulo be Dirava ia noia goadagoada ena hisihisi ia kokia totona, to unai hisihisi ia ore lasi. Reana hari, oi danu oi abia hisihisina be ia ore lasi. Reana Paulo bamona, mai abidadama ida Iehova oi noia loulou unai hisihisi ia kokia totona. To, hisihisi ia ore lasi. Unai ena anina be Iehova be emu guriguri ia kamonai lasi bona ena lauma helaga amo oi ia durua lasi, a? Lasi, Iehova be emu guriguri ia kamonai diba! (Salamo 10:1, 17) Mani Paulo ena hereva gabena ita laloa.
17. Iehova be edena dala ai Paulo ena guriguri ia haerelaia?
17 Dirava ese Paulo ena guriguri ia haerelaia, ia gwau: “Lauegu hariharibada be oi dekenai ia hegeregere momokani vadaeni. Badina be lauegu siahu be manokamanoka tauna lalonai ia hedinarai momokani.” Paulo ia gwau: “Unai dainai, lauegu manoka do lau heagilaia mai moale danu, vadaeni Keriso ena siahu lau dekenai do ia noho [“vadaeni Keriso ena siahu be palai ruma ta bamona egu ataiai ia noho,” NW ].” (2 Korinto 12:9; Salamo 147:5) Momokani, Keriso ese Dirava ena siahu amo Paulo ia gimaia—unai siahu be palai ruma bamona Paulo ia koua. Hari inai negai, Iehova ese eda guriguri be unai bamona ia haerelaia. Ia ese ena hesiai taudia ia gimaia, bona idia be palai ruma ta henunai idia noho bamona.
18. Dahaka dainai hisihisi ita haheaukalaia diba?
18 Momokani, palai ruma be medu ena diho eiava lai ena toa ia hadokoa diba lasi, to dala haida ai ia ese tau ta ia koua eiava gimaia diba. Unai hegeregerena, “Keriso ena siahu” be ita davaria hisihisi o hekwakwanai ia hadokoa diba lasi. To, unai siahu ese ita—Iehova ita tomadiho henia taudia—ia gimaia diba, inai tanobada ena tohoa gaudia bona tanobada ia biagua tauna, Satani, ese ita ia hamorua lasi totona. (Apokalupo 7:9, 15, 16) Unai dainai, herevana oi abia hisihisina oi “kokia” diba lasi, to oi diba Iehova be emu hekwarahi ia diba bona emu “taitai” ia kamonai. (Isaia 30:19; 2 Korinto 1:3, 4) Paulo ia gwau: “Dirava be ia momokani. Ia ese umui do ia naria, emui goada ia hanaia dibagani ese umui do ia pidia garina. Bona dibagani ia mai neganai, emui dala ta do ia kehoa. Vadaeni inai dala dekena amo unai dibagani dekena amo do umui kwalimu diba.”—1 Korinto 10:13; Filipi 4:6, 7.
19. Emu lalona oi hadaia dahaka oi karaia totona, bona dahaka dainai?
19 Oibe, “nega ena dokona dekenai,” inai tanobada dikana ai be “metau dikadia momo do idia vara.” (2 Timoteo 3:1) To, Dirava ena hesiai taudia be unai metau dikadia idia hanaia diba. Dahaka dainai? Badina Dirava be ena lauma helaga amo ena hesiai taudia ia gimaia bona ia durua. Iehova be mai ena ura ida lauma helaga be idia noinoi loulou bona Ia idia abidadama henia taudia dekenai ia henia. Unai dainai, namona be iseda lalona ita hadaia dina ta ta ai lauma helaga abia totona ita guriguri loulou.—Salamo 34:6; 1 Ioane 5:14, 15.
Edena Bamona Do Oi Haere?
• Dirava ena lauma helaga ita abia totona, dahaka ita karaia be namo?
• Dahaka dainai ita abia dae momokani, Iehova be lauma helaga idia noia taudia dekenai lauma helaga do ia henia?
• Lauma helaga be edena dala ai ita ia durua hisihisi ita haheaukalaia totona?
[Picture on page 11]
Iesu ena parabole lalonai ia gwauraia noinoi loulou tauna amo dahaka ita diba?
[Picture on page 12]
Dirava ena lauma helaga oi abia totona oi noinoi loulou, a?
[Picture on page 13]
Tamana namona ena parabole ese ia hahedinaraia Iehova be edena bamona Diravana?