Iehova be Kota Maoromaoro Do Ia Karaia
“Dirava ese ia abia hidi taudia, dina bona hanuaboi ia dekenai idia taitai taudia, be idia dekenai idia badu taudia edia davana do ia henia lasi, a?”—LUKA 18:7.
1. Daika ena kara ese oi ia hagoadaia diba, bona dahaka dainai?
TANOBADA hegegemadai, Iehova ena Witnes taudia huanai be lagani momo Iehova idia badinaia bona hesiai henia tadikaka bona taihu idia noho. Idia haida oi diba, a? Reana taihu burukana ta oi laloa, ia be lagani momo gunanai ia bapatiso bona Kingdom Hall ai idia karaia hebou iboudiai ia reaia lasi. Eiava reana tadikaka burukana ta oi laloa, ia be pura ibounai kongrigeisen ena haroro gaukara ia karaia goadagoada bona lagani momo lalonai unai bamona ia karaia noho. Momokani, reana hari idia momo idia laloa Aramagedono ia ginidae vadaeni. Bona ena be tanobada ai kara gageva ia do ore lasi, to unai buruka taudia be Iehova ena gwauhamata idia abidadama henia noho bona edia lalona idia hadaia do idia “haheauka ela bona dokona.” (Mataio 24:13, BHğ) Unai bamona hesiai taudia edia abidadama goadana ese kongrigeisen taudia ibounai ia hagoadaia bada.—Salamo 147:11.
2. Dahaka kara dainai ita lalohisihisi?
2 To nega haida kara idauna ma ta ita itaia. Witnes taudia haida be lagani momo lalonai haroro gaukara idia karaia, to metairametaira edia abidadama Iehova dekenai ia manoka ia lao, bena Keristani kongrigeisen bamoa karana idia hadokoa. Ita lalohisihisi badina unai tadikaka bona taihu namodia be Iehova idia rakatania, bona ita ura unai ‘boio mamoe’ ta ta ita durua idia giroa lou totona. (Salamo 119:176; Roma 15:1) To henanadai rua ita laloa be namo. Dahaka dainai Witnes taudia momo be Iehova ena gwauhamata idia abidadama henia noho, to ma haida be edia abidadama idia haboioa? Dahaka ita karaia diba unai amo ita hahedinaraia ‘Iehova ena dina badana’ be kahirakahira? (Sepanaia 1:14) Mani Evanelia bukana Luka ai ia noho parabole ta ita laloa.
Hadibaia Herevana—“Taunimanima Ena Natuna Do Ia Mai Neganai” Idia Noho Taudia Totona
3. Daika be vabu bona kota naria tauna ena parabole amo namo do ia davaria, bona dahaka dainai?
3 Luka karoa 18 ai, Iesu be vabu ta bona kota biaguna ena parabole ia gwauraia. Inai parabole bona vanegai ita stadilaia noinoi loulou tauna ena parabole be idia hegeregere. (Luka 11:5-13) To, vabu bona kota biaguna ena parabole bona ena badina siridia be mai anina bada “Taunimanima ena Natuna do ia mai neganai” idia noho taudia dekenai—unai nega be lagani 1914 dekenai ia matamaia.—Luka 18:8.a
4. Iesu be Luka karoa 18 ai ia noho parabole ia do gwauraia lasi neganai, dahaka ia herevalaia guna?
4 Iesu be unai parabole ia do gwauraia lasi neganai, ia gwau Basileia siahuna ai ia noho ena toa idauidau be momo ese do idia itaia goevagoeva, “kevaru” ena diari be “guba ena kahana dekenai ia abia isi ia lao bona guba ena kahana dekenai bamona.” (Luka 17:24; 21:10, 29-33) To, “dokona negana” lalonai idia noho taudia momo be unai toa do idia laloa bada lasi. (Daniela 12:4) Dahaka dainai? Noa bona Lota edia negai idia noho taudia bamona, idia be Iehova ena hadibaia herevadia idia laloa bada lasi. Noa bona Lota edia negai, taunimanima be idia aniani, idia inuinu, idia hoihoi, idia hadohado, ruma idia karaia ela bona dika badana ia ginidae. (Luka 17:26-29) Idia mase badina idia be dina ta ta lalonai idia karaia gaudia idia laloa bada to Dirava ena ura idia laloa bada lasi. (Mataio 24:39) Hari inai negai danu, taunimanima momo be dina ta ta ai idia karaia gaudia idia laloa bada dainai, idia laloaboio inai tanobada dikana ena dokona be kahirakahira vadaeni.—Luka 17:30.
5. (a) Iesu ena hadibaia herevana be daika dekenai ia gwauraia, bona dahaka dainai? (b) Dahaka dainai haida be Iehova idia abidadama henia karana idia rakatania?
5 Ia hedinarai goevagoeva, Iesu ia ura lasi ena murinai idia raka taudia be Satani ena tanobada ese ia veridia bena idia rakatania vadaeni gaudia dekenai ‘idia giroa lou.’ (Luka 17:22, 31) To, Keristani taudia haida be idia moru vadaeni. Lagani momo lalonai, unai bamona taudia be Iehova ese inai tanobada dikana do ia hadikaia dinana idia naria. To, idia laloa bada dinana ai Aramagedono ia ginidae lasi neganai, idia lalohisihisi bada. Unai dainai, Iehova ena kota dinana idia naria noho lasi. Idia be haroro gaukara idia karaia momo lasi to metairametaira, mauri durua gaudia idia laloa momo, unai dainai edia nega be hegeregere lasi Iehova idia tura henia totona. (Luka 8:11, 13, 14) Gabeai, idia rakatania vadaeni gaudia dekenai ‘idia giroa lou’—madi!
‘Nega Ibounai Do Umui Guriguri’ be Namo
6-8. (a) Vabu ta bona kota biaguna ta edia parabole mani oi gwauraia. (b) Iesu ese unai parabole be edena bamona ia herevalaia?
6 Edena dala ai ita hahedinaraia diba ita abia dae momokani, Iehova ese ena gwauhamata do ia hagugurua? (Heberu 3:14) Iesu be ena murinai idia raka taudia ia hadibaia Satani ena tanobada dikana dekenai idia giroa lou lasi be namo. Unai murinai, ia ese unai henanadai ia henia.
7 Luka ia gwau, “Iesu ese parabole ta idia dekenai ia hamaoroa, nega ibounai do idia guriguri, do idia hesiku lasi totona.” Iesu ia gwau: “Hanua ta dekenai kota biaguna ta ia noho. Ia be Dirava dekenai ia gari lasi, bona taunimanima danu ia matauraia lasi. Unai hanua ena vabu ta be nega ibounai inai kota biaguna dekenai ia lao, ia gwau, ‘Lau dekenai ia badu henia tauna ena davana do oi henia.’ Dina haida inai kota biaguna be ia kamonai lasi, to gabeai sibona ia laloa, ia gwau, ‘Lau be Dirava dekenai lau gari lasi bona taunimanima dekenai lau matauraia lasi. To inai vabu ese ia hereva momo dainai, iena kota do lau karaia, do ia giroa mai, lau dekenai hekwarahi do ia henia garina.’ ”
8 Iesu be unai parabole ia gwauraia murinai, ma ia gwau: “Unai kota biaguna dikana ena hereva do umui laloa. Unai dainai, Dirava ese ia abia hidi taudia, dina bona hanuaboi ia dekenai idia taitai taudia, be idia dekenai idia badu taudia edia davana do ia henia lasi, a? Dirava ese iena taudia do ia durudia haraga lasi, a? Lau hamaoroa umui dekenai, kota maoromaoro bona durua do ia henia haraga idia dekenai, to Taunimanima ena Natuna do ia mai neganai, tanobada dekenai abidadama do ia davaria o?”—Luka 18:1-8.
“Lau Dekenai Ia Badu Henia Tauna Ena Davana Do Oi Henia”
9. Vabu bona kota biaguna ena parabole amo dahaka hereva badana ita dibaia?
9 Inai parabole amo dahaka hereva badana ita dibaia. Parabole lalonai, vabu bona kota biaguna be unai gau idia hahedinaraia. Vabu ia noinoi: “Lau dekenai ia badu henia tauna ena davana do oi henia.” Kota biaguna ia gwau: “Iena kota do lau karaia.” Iesu ia gwau: “Dirava ese ia abia hidi taudia . . . dekenai idia badu taudia edia davana do ia henia lasi, a?” Iesu ma ia gwau, Iehova be “kota maoromaoro . . . do ia henia haraga idia dekenai.” (Luka 18:3, 5, 7, 8) Edena negai Dirava be kota maoromaoro do ia karaia?
10. (a) Edena nega ai kara dika taudia edia “davana karaia negana” ia ginidae? (b) Hari, Dirava be edena negai bona edena dala ai ena taunimanima idia hahisia taudia edia davana do ia henia?
10 Lagani 70 C.E. ai kara dika taudia edia “davana karaia negana” ia ginidae neganai, tuari oreana be Ierusalema bona ena dubu idia hadikaia. (Luka 21:22) To hari, Iehova be ena “dina badana” ai ena taunimanima totona, kota maoromaoro do ia karaia. (Sepanaia 1:14; Mataio 24:21) Unai nega lalonai, Iehova be ena taunimanima idia hahisia taudia dekenai “hisihisi do ia henidia,” bona Iesu Keriso ese “[Dirava] idia ura lasi taudia, bona Lohiabada Iesu ena Sivarai Namona idia abia dae lasi taudia dekenai davana metau do ia henidia.”—2 Tesalonika 1:6-8; Roma 12:19.
11. Iehova be kota maoromaoro do ia henia “haraga” ena anina be dahaka?
11 Iesu ia gwau Iehova be kota maoromaoro do ia henia “haraga”; unai ena anina be dahaka? Baibel ia gwau, ena be Iehova ia “haheauka,” to ia be nega korikori ai kota maoromaoro do ia karaia. (Luka 18:7, 8, NW; 2 Petero 3:9, 10) Noa ena negai, Abata ia ginidae neganai, kara dika taudia idia ore haraga. Danu Lota ena negai, lahi be guba amo ia diho neganai, kara dika taudia idia mase ore. Iesu ia gwau: “Taunimanima ena Natuna do ia hedinarai dina dekenai danu, unai bamona kara do ia vara.” (Luka 17:27-30) Unai ena anina be, kara dika taudia dekenai “karaharaga hisihisi dika momokani bona mase do ia ginidae.” (1 Tesalonika 5:2, 3) Oibe, namona be ita abia dae momokani Iehova ese Satani ena tanobada do ia kota henia dinana be do ia ginidae haraga.
Ia ese “Kota Maoromaoro . . . Do Ia Henia”
12, 13. (a) Vabu bona kota biaguna ena parabole ese dahaka ia hadibaia ita dekenai? (b) Dahaka dainai ita diba Iehova be iseda guriguri do ia kamonai bona ita do ia durua?
12 Vabu bona kota biaguna edia parabole ese mai anina bada hereva momokani ma haida idia hahedinaraia. Iesu ia gwau: “Unai kota biaguna dikana ena hereva do umui laloa. Unai dainai, Dirava ese ia abia hidi taudia . . . dekenai idia badu taudia edia davana do ia henia lasi, a?” Oibe, Iesu ia gwau lasi Iehova be unai kota biaguna bamona, bona ia gwau lasi Iehova be ia idia abidadama henia taudia do ia kara auka henidia. Lasi, to Iesu be ena murinai idia raka taudia ia hadibaia Iehova Dirava ena kara be idau bona kota biaguna ena kara be idau. Idia edia kara idia idau daladia haida be dahaka?
13 Iesu ena parabole lalonai be “kota biaguna dikana” ia gwauraia, to “Dirava be kota biaguna namona.” (Salamo 7:11; 33:5) Kota biaguna dikana be vabu ena namo ia laloa bada lasi, to Iehova be taunimanima ta ta edia namo ia laloa bada. (2 Sivarai 6:29, 30) Kota biaguna dikana ia ura lasi vabu ia durua, to Iehova ia ura bada Ia idia hesiai henia taudia ia durudia. (Isaia 30:18, 19) Unai amo dahaka ita dibaia? Bema kota biaguna dikana be vabu ena noinoi ia kamonai bona kota ia karaia, vadaeni Iehova danu be ena taunimanima edia guriguri do ia kamonai bona idia do ia durua!—Aonega Herevadia 15:29.
14. Dahaka dainai Dirava ena kota dinana ita naria noho be namo?
14 Unai dainai, Dirava ena kota dinana idia abidadama henia lasi taudia be kerere badana idia karaia. Dahaka dainai? Idia gwau ‘Iehova ena dina badana’ idia naria be anina lasi, eiava Iehova ena gwauhamata do idia guguru lasi. To namo lasi ta ese Dirava ena kara ia daradaralaia. (Iobu 9:12) Henanadai badana ta be inai: Lau be Iehova do lau badinaia noho o lasi? Unai bamona henanadai ta be Iesu ese vabu bona kota biaguna ena parabole ena dokona ai ia gwauraia.
“Tanobada Dekenai Inai Abidadama Do Ia Davaria O?”
15. (a) Iesu be dahaka henanadai ia henia, bona dahaka dainai? (b) Dahaka henanadai ita laloa be namo?
15 Iesu ese inai henanadai badana ia henia: “Taunimanima ena Natuna do ia mai neganai, tanobada dekenai abidadama [“inai abidadama,” NW ] do ia davaria o?” (Luka 18:8) Inai hereva, “inai abidadama” ese ia hahedinaraia, Iesu be abidadama idauna ta—vabu ena abidadama unai—ia herevalaia. Iesu be sibona ena henanadai ia haerelaia lasi. Ia ese unai henanadai ia henia, unai amo ena hahediba taudia do ia durua edia abidadama idia laloa totona. Edia abidadama be metairametaira ia manoka ia lao dainai, idia rakatania vadaeni gaudia dekenai idia giroa lou, a? Eiava edia abidadama be vabu ena abidadama bamona, a? Hari inai negai danu, namona be ita sibona ita nanadaia, ‘ “Taunimanima ena Natuna” ese egu abidadama be edena bamona ia laloa?’
16. Vabu ena abidadama be edena bamona?
16 Iehova ese ita idia inai henia taudia ia kota henia totona, namona be unai vabu ena kara ita tohotohoa. Vabu ena abidadama be edena bamona? Iena abidadama ia hahedinaraia dalana be inai: “Nega ibounai inai kota biaguna dekenai ia lao, ia gwau, ‘Lau dekenai ia badu henia tauna ena davana do oi henia.’ ” Unai vabu ia noinoi loulou, unai amo kota biaguna ese kota ia karaia. Unai hegeregerena, hari inai negai, Dirava ena hesiai taudia idia diba Iehova be idia do ia durua—ena be nega daudau idia do naria noho. Ma danu, idia ese Iehova ena gwauhamata idia abidadama henia dainai idia guriguri loulou—oibe, idia be ‘dina bona hanuaboi Iehova dekenai idia taitai.’ (Luka 18:7) Keristani tauna ta be Iehova ena heduru ia noia loulou lasi neganai, ia hahedinaraia ia be Iehova—Iena hesiai taudia totona kara ta do ia karaia Diravana—ia abidadama henia lasi.
17. Dahaka dainai ita guriguri loulou bona ita abia dae momokani Iehova ena kota dinana be do ia ginidae?
17 Vabu ena kara ia hahedinaraia, ita guriguri loulou ena badina ma haida idia noho. Vabu ena kara bona iseda kara edia idau haida mani ita herevalaia. Ena be vabu be ta ese ia hagoadaia lasi kota biaguna dekenai ia lao loulou totona, to Baibel be ita ia hagoadaia ‘guriguri do ita goadalaia nega ibounai.’ (Roma 12:12) Vabu ia daradara kota biaguna be ena noinoi do idia abia dae o lasi, to Iehova ia gwau ia be ita do ia durua. Iehova be ena peroveta tauna amo ia gwau: “Sedira oi laloa iena mai be haraga lasi, to do oi naria noho, ia be do ia vara momokani.” (Habakuku 2:3; Salamo 97:10) Vabu ena noinoi do ia durua tauna ta be lasi. To iseda noinoi do ia durua tauna badana be Iesu, “ia be Dirava ena imana idiba kahana dekenai ia noho, bona ita totona Dirava dekenai ia noinoi noho!” (Roma 8:34; Heberu 7:25) Unai dainai, bema vabu be hekwakwanai lalonai kota biaguna ia noia loulou, bona ia diba kota biaguna be heduru do ia henia, namona be ita danu ita abia dae momokani Iehova ena kota dinana be do ia ginidae!
18. Edena dala ai guriguri karana ese iseda abidadama do ia hagoadaia bona Dirava amo heduru do ita abia?
18 Vabu ena parabole be ita ia hadibaia, abidadama bona guriguri be idia gaukara hebou, bona guriguri loulou karana ese ita ia durua diba iseda abidadama idia hamanokaia diba gaudia ita koua totona. Oibe, ita gwau lasi bema taunimanima vairanai ita guriguri loulou kava, eda abidadama do ia goada noho. (Mataio 6:7, 8) Lasi, to bema ita laloparara Dirava dekenai ita tabekau dainai ita guriguri, vadaeni unai guriguri karana ese Dirava kahirakahira dekenai ita do ia hakaua lao bona iseda abidadama do ia hagoadaia. Bona hahemauri abia totona abidadama be mai anina bada dainai, Iesu be ena hahediba taudia ia hagoadaia “nega ibounai do idia guriguri, do idia hesiku lasi”! (Luka 18:1; 2 Tesalonika 3:13) Oibe, herevana ‘Iehova ena dina badana’ totona ita guriguri o lasi, to unai dina be do ia ginidae momokani. To Dirava ese ita totona kota maoromaoro do ia karaia bona Dirava ena tuari lalonai do ita roho mauri totona, iseda abidadama, guriguri, bona kara namodia be mai anina bada.
19. Edena dala ai ita abia dae Dirava be kota maoromaoro do ia karaia?
19 Iesu ena henanadai mani ita laloa lou, ia gwau: “Taunimanima ena Natuna do ia mai neganai, tanobada dekenai inai abidadama do ia davaria o?” Iena henanadai ena haere be dahaka? Ita moale badina hari inai negai, tanobada ibounai, Iehova ena Witnes taudia milioni momo herea be idia guriguri loulou, idia naria noho, bona edia haheauka karana amo idia hahedinaraia idia be unai abidadama idia abia. Unai dainai, Iesu ena henanadai idia haerelaia diba. Oibe, herevana Satani ena tanobada ese hari kara gagevadia amo ita ia hahisia, to ita abia dae momokani Dirava be kota maoromaoro do ia karaia.
[Footnote]
a Unai parabole ena anina oi lalopararalaia namonamo totona, Luka 17:22-33 oi duahia. Luka 17:22, 24, 30 be “Taunimanima ena Natuna” ia herevalaia, bona mani oi itaia edena bamona unai ese Luka 18:8 ena henanadai ia haerelaia.
Oi Laloatao, A?
• Dahaka dainai Keristani taudia ese Iehova idia rakatania vadaeni?
• Dahaka dainai ita diba Iehova ena kota dinana be do ia mai momokani?
• Dahaka dainai ita guriguri loulou be namo?
• Guriguri loulou karana ese edena bamona eda abidadama ia hagoadaia?
[Picture on page 16]
Vabu bona kota biaguna edia parabole amo dahaka ita dibaia?
[Pictures on page 19]
Hari, taunimanima milioni momo idia abia dae Dirava be kota maoromaoro do ia karaia