Iehova Ena Hereva be Ia Mauri Noho

Isaia Bukana Ena Hereva Badadia​—⁠2

ISAIA be mai kamonai ida ena peroveta gaukarana ia karaia. Israela ena basileia 10 dekenai ia perovetalaia herevadia be idia vara vadaeni. Bona ia be Ierusalema ena vaira negana totona, hereva haida do ia gwauraia.

Ierusalema hanua be do idia hadikaia, bona unai hanua taudia be igui hesiai taudia bamona idia abidia lao. Ena be Ierusalema idia hadikaia, to unai bamona do ia noho hanaihanai lasi. Daudau lasi murinai, tomadiho momokani do idia haginia lou. Isaia 36:1–​66:24a be unai ia herevalaia. Unai karoa ese idia herevalaia peroveta herevadia amo namo do ita davaria, badina unai hereva be iseda negai eiava nega vaira ai do idia guguru. Isaia bukana ena kahana 2 be Mesia ena peroveta herevadia ia gwauraia danu.

“NEGA IA MAI NOHO”

(Isaia 36:1–​39:⁠8)

King Hesekaia ena lohia laganina 14 lalonai (732 B.C.E.), Asuria taudia ese Iuda idia tuari henia. Iehova ia gwauhamata ia ese Ierusalema do ia gimaia. Asuria ena tuari taudia be Ierusalema idia hadikaia gwauraia, to Iehova ena aneru tamona ese Asuria ena tuari taudia 185,000 ia hamasedia.

Hesekaia ia gorere. Iehova ese ena guriguri ia haerelaia, ena gorere ia hanamoa, bona ena mauri dekenai ma lagani 15 ia atoa kau. Babulonia ena king ese ena hesiai taudia ia siaia Hesekaia dekenai hanamoa herevadia idia henia totona neganai, Hesekaia be ia laloa namonamo lasi bona ena kohu ibounai be idia dekenai ia hahedinaraia. Isaia ese Iehova ena hereva be Hesekaia dekenai ia henia, ia gwau: “Nega be ia mai noho, oiemu ruma dekenai kohu ibounai, oiemu sene taudia ese idia haboua vadaeni, ia mai bona hari dina, be Babulonia dekenai do idia abia lao.” (Isaia 39:​5, 6) Lagani 100 mai kahana murinai, unai peroveta herevana ia guguru.

Baibel Henanadaidia Edia Haere:

38:8​​—⁠Dina ena laulau be “vadavada ibounai 10” murina dekenai ia giroa lao. Unai vadavada be dahaka? Lagani 800 B.C.E. murinai, Aigupito bona Babulonia taudia be dina ena laulau idia gaukaralaia dina ena hora idia diba totona. Reana Hesekaia ena tamana, Ahasa be unai bamona ia karaia, dina ena hora ia diba totona. Eiava king ena ruma lalonai vadavada ta ia noho. Unai vadavada badinai du ta ia gini bona dina ia hedinarai neganai, du ena laulau be vadavada latanai ia hedinarai, unai dala amo dina ena hora idia diba.

Ita Dibaia Gaudia:

36:​2, 3, 22. Ena be Sebina be king ena ruma naria gaukarana amo idia kokia, to idia koua lasi ena gabu ia abia tauna ena seketere ai ia lao totona. (Isaia 22:​15, 19) Ena be Iehova ena orea lalonai ita amo maduna ta idia kokia, to Dirava ese ita dekenai ia henia maduna ma haida bema idia kokia lasi, namona be unai maduna ita huaia noho.

37:​1, 14, 15; 38:​1, 2. Lalohisihisi negadia ai, Iehova dekenai ita guriguri bona ita tabekau henia be gau badana.

37:​15-​20; 38:​2, 3. Ierusalema be Asuria taudia ese idia hadikaia gwauraia neganai, Hesekaia ia lalohekwarahilaia gauna badana be unai ese Iehova ena ladana do ia hadikaia. Hesekaia ia diba ia be ena gorere dainai do ia mase, to sibona ena mauri ia laloa lasi. Ia laloa bada gauna be edena bamona King Davida ena bese amo lohia tauna do ia mai, badina ia be natuna mero ta ia do havaraia lasi. Danu, ia laloa bada gauna be, Israela besena be Asuria taudia idia tuari henia neganai, daika ese do ia gunalaia. Hesekaia bamona, namona be ita laloa Iehova ena ladana hahelagaia karana bona ena ura do ia guguru dalana be mai anina bada gauna, bona iseda hahemauri dalana be anina bada lasi.

38:​9-​20. Hesekaia ena ane ese ita ia hadibaia, iseda mauri ibounai lalonai Iehova hanamoa karana be mai anina bada gauna, bona ma gau haida be anina bada lasi.

“IERUSALEMA DO IDIA HAGINIA LOU”

(Isaia 40:1–59:⁠21)

Isaia ese Ierusalema ena moru bona Israela taudia be Babulonia dekenai do idia abia lao karana ia perovetalaia murinai, hanamoa lou karana ia perovetalaia. (Isaia 40:​1, 2) Isaia 44:28 ia gwau: “Ierusalema do idia haginia lou.” Babulonia ena dirava idauidau edia kaivakuku be “doniki edia doruna dekenai idia kwatua” bona do idia abia lao. (Isaia 46:⁠1) Babulonia do ia ore momokani. Unai ibounai be lagani 200 murinai idia vara.

Iehova be ena hesiai taudia ia hamaoroa ‘idau bese taudia edia diari ai do idia lao.’ (Isaia 49:⁠6) Babulonia ena “guba,” anina be ena lohia taudia, be ‘do idia boio ore, kwalahu bamona,’ bona ena taunimanima be “do idia mase, lao idia mase bamona”; to ‘Siona ena guia taudia be idia ia guia seini do idia negea oho!’ (Isaia 51:6; 52:⁠2) Iehova dekenai idia mai bona ena hereva idia kamonai taudia dekenai, Iehova ia gwau: “Lau ese noho hanaihanai gwauhamata taravatuna umui danu do lau karaia. Bona Davida dekenai lau gwauhamata do lau henia hanamoa, be umui dekenai do lau henia.” (Isaia 55:⁠3) Bema Iehova ena kara maoromaoro taravatu oi badinaia, ‘moale do oi davaria.’ (Isaia 58:14) To, taunimanima edia kara dika ese ‘idia bona Dirava idia hapararaia.’​​—⁠Isaia 59:⁠2.

Baibel Henanadaidia Edia Haere:

40:​27, 28​​—⁠Dahaka dainai Israela taudia idia gwau: “Ita dekenai idia kota karaia maoromaoro lasi, be Lohiabada ese ia laloa lasi”? Babulonia ai, Iuda taudia haida idia laloa, idia davaria hisihisi be Iehova ese ia laloa lasi eiava ia itaia lasi. To namona be idia laloatao, tanobada ia Havaraia Diravana be ia manoka eiava ia hesiku diba lasi, Ia ese Babulonia amo idia ia hamauria diba.

43:​18-​21​​—⁠Dahaka dainai idia giroa lou Iuda taudia be ‘kara gunadia do idia laloa lasi’? Ia gwau lasi Israela taudia be guna Iehova ese idia totona ia karaia hamauria karadia do idia laloaboio. Lasi. To, Iehova ia ura ia ese ia karaia “kara matamata” dainai Ia do idia hanamoa, unai kara ta be, tano gagaena dalana amo Ierusalema dekenai idia giroa lou neganai, Iehova ese idia ia gimaia. Hisihisi badana amo idia roho mauri “hutuma bada” taudia danu be gau matamatadia dainai Iehova do idia hanamoa.​​—⁠Apokalupo 7:​9, 14.

49:6​​—⁠Edena dala ai Mesia be ‘idau bese taudia edia diari ai ia lao,’ ena be tanobada ai ia ese Israela taudia sibona ia haroro henia? Iesu ena mase murinai idia vara gaudia dainai, ia be idau bese taudia edia diari ai ia lao. Isaia 49:6 be Iesu ena hahediba taudia ia herevalaia. (Kara 13:​46, 47) Hari inai negai, hutuma bada taudia ese idia durua horoa Keristani taudia be ‘idau bese taudia edia diari ai idia lao,’ bona hereva momokani idia abia lao “tanobada taudia ibounai dekenai.”​​—⁠Mataio 24:14; 28:​19, 20.

53:10​​—⁠Edena dala ai Iehova ena Natuna ese ia davaria hisihisi be Iena ura? Iehova be hebogahisi bona ma haida ia laloa bada Diravana dainai, ena Natuna be hisihisi ia davaria neganai, ia lalohisihisi bada. To, Iesu be mai ena ura ida Iehova ia badinaia bona ia abia hisihisi bona mase be namo do idia havaraia dainai, Iehova be Iesu dekenai ia moale.​​—⁠Aonega Herevadia 27:11; Isaia 63:​9.

53:11​​—⁠Mesia be “taunimanima momo edia kerere davana do ia karaia” totona, dahaka diba ia abia guna be namo? Iesu be tanobada dekenai ia mai bona taunimanima bamona ia noho, hisihisi ia davaria bona ia mase, unai amo diba ia abia. (Heberu 4:​15) Unai dainai ia ese horoa Keristani taudia bona hutuma bada taudia edia kerere davana ia karaia totona, sibona ena mauri be boubou gauna bamona ia henia.​​—⁠Roma 5:​19; Iamesi 2:​23, 25.

56:6​​—⁠“Idau bese taudia” be daidia, bona edena dala ai “[Iehova ena] gwauhamata taravatuna idia kamonai henia”? “Idau bese taudia” be Iesu ena “mamoe idaudia.” (Ioane 10:16) Idia be gwauhamata matamata henunai idia noho, anina be unai gwauhamata ena taravatu do idia kamonai henia, unai gwauhamata henunai idia gaukara, horoa Keristani taudia ida Dirava amo hereva namodia idia abia, bona Basileia harorolaia bona hahediba taudia halaoa gaukarana idia durua.

Ita Dibaia Gaudia:

40:​10-​14, 26, 28. Iehova be mai ena goada bada, ia manau, ena siahu be bada herea, bona ena laloparara karana ita laloa be hegeregere lasi.

40:​17, 23; 41:29; 44:9; 59:⁠4. Politikol taudia tura henia karana bona kaivakuku tomadiho henia karana be anina lasi. Idia ese gau namona ta do idia havaraia lasi.

42:​18, 19; 43:⁠8. Dirava ena Hereva ita ura lasi itaia bona Iehova ese “hesiai tauna mai ena kamonai, bona mai ena kara maoromaoro” amo ia henia hakaua herevadia ita kamonai lasi neganai, ita be matakepulu bona taia kudima taudia bamona.​​—⁠Mataio 24:⁠45.

43:25. Iehova be ena ladana dainai kara dika ibounai do ia haorea. Kara dika bona mase amo ita ia ruhaia bona mauri ita abia karana be gau badana lasi, to Iehova ese ena ladana ia hahelagaia karana be mai anina bada.

44:⁠8. Iehova be nadi badana ta bamona ia gini, bona ia ese ita do ia durua. Namona be ita gari lasi Dirava ena lohia siahuna ita harorolaia totona!​​—⁠2 Samuela 22:​31, 32.

44:​18-​20. Bema tau ta be kaivakuku ia tomadiho henia, unai ese ia hahedinaraia iena kudouna be ia goeva lasi. Namo lasi iseda kudouna ai gau ta ese Iehova tomadiho henia karana ena gabu ia abia.

46:​10, 11. Iehova ena “palani, be do ia gini noho,” anina be Ia ese ia ura karaia gaudia ibounai ia karaia diba, bona unai ese Iena lohia siahuna ia hamomokania.

48:​17, 18; 57:​19-​21. Bema hahemauri totona Iehova ita tahua, ia kahirakahira ita lao, bona iena oda herevadia ita kamonai, iseda noho be do ia namo, iseda maino be do ia bada herea sinavai bamona, bona iseda kara maoromaoro be do ia goada, davara ena hurehure bamona. Dirava ena Hereva idia dadaraia taudia be “davara ena hurehure bamona, idia laga-ani diba lasi.” Idia dekenai maino be lasi.

52:​5, 6. Babulonia taudia be lalohadai kererena idia abia, idia gwau Dirava momokani be ia goada lasi. To idia diba lasi Iehova be ena taunimanima dekenai ia moale lasi dainai, igui hesiai taudia ai ia halaodia. Ma haida be dika idia davaria neganai, namo lasi lalohadai kererena ita abia.

52:​7-9; 55:​12, 13. Badina toi dainai ita ese Basileia harorolaia bona hahediba taudia halaoa gaukarana ita moalelaia diba. Ginigunana be hereva momokani idia ura kamonai manau taudia dekenai, iseda aena be mai edia hairai. Iharuana be Iehova be eda ‘matana dekenai ita itaia diba,’ eiava Ia ita tura henia diba. Bona ihatoina be ita moale badina ita be Dirava bona ena ura ita diba.

52:​11, 12. Ita hegeregere “Dubu Helaga ena kohu”​​—⁠hesiai gaukara helagana karaia totona ia henia gaudia​​—⁠ita huaia totona, namona be iseda hetura karana Iehova ida be ia goada bona iseda kara idia goeva noho be namo.

58:​1-​14. Bema koikoi dalanai Dirava badinaia karana bona kara maoromaoro ita hahedinaraia, unai be anina lasi. Namona be Keristani taudia be Dirava idia badinaia bona idia hahedinaraia edia tadikaka idia lalokau henia momokani.​​—⁠Ioane 13:35; 2 Petero 3:​11.

59:15b-​19. Iehova be taunimanima idia karaia kara dikadia ia itaia, bona ena nega korikori ai kara ta do ia karaia.

IERUSALEMA BE ‘KORONA MAI HAIRAINA DANU DO IA LAO’

(Isaia 60:1–​66:⁠24)

Isaia ese idaunegai bona hari iseda negai tomadiho momokani haginia lou karana ia herevalaia neganai, Isaia 60:1 ai ia gwau: “Ierusalema e, do oi toreisi, bona dina hegeregerena do oi diari, badina be Lohiabada ena hairaina, be oi dekenai ia diaridiari noho.” Siona be ‘korona mai hairaina danu do ia lao, Lohiabada ena.’​​—⁠Isaia 62:⁠3.

Isaia be Babulonia dekenai igui hesiai gaukara idia karaia bona idia helalo-kerehai Israela taudia totona, Iehova dekenai ia guriguri. (Isaia 63:⁠15–​64:12) Isaia be hesiai taudia momokani bona koikoina edia idau ia herevalaia murinai, ia hahedinaraia edena dala ai Iehova idia hesiai henia taudia be Iehova ese do ia hanamodia.​​—⁠Isaia 65:1–​66:⁠24.

Baibel Henanadaidia Edia Haere:

61:​8, 9​​—⁠“Noho hanaihanai gwauhamata taravatuna” be dahaka, bona “tubudia” be daika? Unai gwauhamata be Iehova ese horoa Keristani taudia ida ia karaia gwauhamata matamatana. “Tubudia” be “mamoe idaudia” taudia​​—⁠idia be horoa Keristani taudia edia hereva idia kamonai taudia milioni momo.​​—⁠Ioane 10:⁠16.

63:5​​—⁠Edena dala ai Dirava ena badu ese Ia hagoadaia? Dirava be ena badu ia biagua diba​​—⁠iena badu be mai ena kara maoromaoro danu. Iena badu ese ia hagoadaia mai kara maoromaoro ida ena hahemaoro karana ia karaia totona.

Ita Dibaia Gaudia:

64:⁠6. Goevadae lasi taudia be sibona idia hamauria diba lasi. Kara dika gwauatao totona boubou idia karaia neganai, edia kara maoromaoro be dabua mirodia bamona.​​—⁠Roma 3:​23, 24.

65:​13, 14. Iehova ese ena kamonai hesiai taudia ia hanamoa, bona ena Hereva amo idia ia hagoadaia noho.

66:​3-5. Iehova be koikoi karadia ia inai henia.

“Do Umui Moale Bada”

Ierusalema hanamoa lou ena peroveta herevadia ese Babulonia dekenai idia noho abidadama Iuda taudia ia hagoadaia momokani! Iehova ia gwau: “Lau ese lau karaia gauna dainai do umui moale bada ela bona hanaihanai. Ierusalema matamata, lau ese do lau karaia gauna, be moale gabuna momokani, iena taudia be mai moale danu do idia noho.”​​—⁠Isaia 65:⁠18.

Tanobada besedia be dibura ese ia koua negana ai ita noho. (Isaia 60:⁠2) Hari ita noholaia negana be “metau dikadia” amo ia honu. (2 Timoteo 3:⁠1) Unai dainai, Isaia buka lalonai Iehova ese ia henia hahemauri sivaraina ese ita ia hagoadaia bada.​​—⁠Heberu 4:​12.

[Footnote]

[Picture on page 13]

Hesekaia ia guriguri Iehova ese Asuria taudia amo do ia hamauria ena badina korikorina oi diba, a?

[Picture on page 15]

“Ororo dekenai idia raka mai noho taudia, edia aena be mai hairaidia danu. Badina be sivarai namona idia mailaia noho”