Baibel Ena Hereva Momokanina Hadibaia
“Bese ibounai be diba tahua taudia do umui halaoa, . . . bona idia dekenai do umui hadibaia.”—MATAIO 28:19, 20.
1. Hari Baibel be gado hida dekenai idia halasia?
IEHOVA ena Hereva, Buka Helaga, be idaunegai bukana ta bona tanobada hegegemadai idia hariharilaia. Baibel ena kahana be gado 2,300 mai kahana dekenai idia hahanaia vadaeni. Anina be tanobada dekenai idia noho taudia 90 pesen bamona ese edia gado korikorina dekenai idia duahia diba.
2, 3. (a) Dahaka dainai taunimanima ese Baibel ena hadibaia hereva idia daradaralaia? (b) Edena henanadai do ita laloa?
2 Dina ta ta ai, taunimanima milioni momo ese Baibel ena kahana ta idia duahia. Taunimanima haida ese Baibel ibounai idia duahia bona nega momo unai bamona idia karaia vadaeni. Tomadiho orea tausen momo idia gwau edia hahediba herevadia be Baibel amo idia abia. To, unai tomadiho oreadia edia hahediba herevadia be idauidau. Bona daradara bada ia havaraia gauna ta be, tomadiho tamona taudia huanai lalotamona be lasi. Taunimanima haida ese Baibel, ena matamaia dalana, bona ena namo idia daradaralaia. Momo idia laloa ia be buka helagana ta sibona, bona aria ai gwauhamata idia karaia neganai, eiava kota ai hereva momokani gwauraia totona idia gaukaralaia.
3 Baibel lalonai Dirava ena hereva taunimanima totona ia noho. (Heberu 4:12) Ita be Iehova ena Witnes taudia dainai, ita ura taunimanima ese Baibel ena hadibaia herevana idia dibaia. Iesu ese ena murinai idia raka taudia dekenai ia henia haheganina ita badinaia: “Do umui lao, bese ibounai be diba tahua taudia do umui halaoa, . . . bona idia dekenai do umui hadibaia.” (Mataio 28:19, 20) Iseda haroro gaukara ai, ita davaria kudou-maoro taudia idia lalohisihisi, badina hari tanobada ai tomadiho lalonai daradara bada ia noho. Unai dainai idia ura iseda Havaraia Tauna bona Baibel ena hadibaia hereva, mauri ena anina dekenai idia diba. Mani taunimanima momo ese idia laloa bada henanadai toi ita laloa. Idia ta ta dekenai, tomadiho gunalaia taudia edia lalohadai kererena do ita herevalaia, bena Baibel ena hadibaia hereva do ita tahua. Henanadai be inai: (1) Dirava ese ita ia laloa, eiava? (2) Dahaka dainai inai tanobada dekenai ita noho? (3) Ita mase neganai dahaka ia vara ita dekenai?
Dirava ese Ita Ia Laloa, Eiava?
4, 5. Dahaka dainai taunimanima idia gwau Dirava ese ita ia laloa lasi?
4 Henanadai ginigunana mani ita laloa, Dirava ese ita ia laloa, eiava? Madi, taunimanima momo idia laloa unai henanadai ena haere be, lasi. Dahaka dainai unai bamona idia laloa? Badina ta be idia itaia inai tanobada be tuari, inai heheni karana bona hisihisi idauidau amo ia honu. Idia gwau, ‘Bema Dirava ese ita ia laloa, unai gaudia do ia koua bena do idia vara lasi.’
5 Taunimanima idia laloa Dirava ese ita ia laloa lasi ena badina ma ta be, tomadiho gunalaia taudia edia hadibaia herevadia dainai. Dika ia vara neganai, dubu gunalaia taudia be nega momo dahaka idia gwau? Hahine ta be motuka aksiden dekenai ena natuna rua ia haboioa neganai, ena pasto ia gwau: “Unai be Dirava ena ura. Dirava be aneru ma rua ia ura.” To momokani, dubu gunalaia taudia be unai bamona idia hereva neganai, idia gwau Dirava ese unai dika ia havaraia. To, hahediba tauna Iamesi, ia gwau: “Bema tau ta ese dibagani ia davaria, o dika ta ese ia veria noho neganai, inai bamona do ia hereva lasi, ‘Dirava ese lau ia dibagania noho.’ Badina be kara dika ese Dirava ia dibagania diba lasi momokani. Bona Dirava ese tau ta do ia dibagania lasi.” (Iamesi 1:13) Iehova Dirava ese dika ia havaraia lasi. Oibe, “Dirava be nega ta do ia kara dika diba lasi.”—Iobu 34:10.
6. Daika ese tanobada dekenai idia vara kara dika bona hisihisi ia havaraia noho?
6 Vadaeni, dahaka dainai kara dika bona hisihisi bada be tanobada dekenai ia vara noho? Badina ta be, taunimanima idia ura lasi Dirava ena lohia henunai idia noho, idia ura lasi ena kara maoromaoro taravatudia bona hakaua herevadia idia badinaia. Unai dainai, ena be taunimanima idia diba lasi, to idia ese Dirava ena Inai Tauna, Satani Diabolo ena lohia dalana idia abia dae, badina “tanobada taudia ibounai ia gunalaia noho.” (1 Ioane 5:19) Unai ita diba dainai, tanobada dekenai dika bada ia vara ena badina ita lalopararalaia. Satani be tau dikana, ia be badu, koikoi, bona dagedage tauna. Bona tanobada taudia ese edia lohia tauna ena kara idia tohotohoa. Unai dainai tanobada dekenai kara dika be bada herea!
7. Dahaka badina haida dainai hisihisi ita davaria?
7 Hisihisi ita davaria ena badina ma ta be, ita be kara dika taudia. Kara dika taudia idia hekwarahi ma ta idia biagua totona, unai dainai tuari, dagedage, bona hisihisi idia vara. Hadibaia Tauna 8:9 ia gwau: “Taunimanima haida ese ma haida idia biagua noho, bona idia hisihisi henidia noho.” To hisihisi ita davaria ena badina ma ta be Baibel ese ia gwauraia, ia gwau: “Ibounai ese nega dika idia davaria noho, bona inai dika ia vara kava noho.” (Hadibaia Tauna 9:11) Nega momo taunimanima ese dika idia davaria badina idia be nega bona gabu kererena ai idia noho.
8, 9. Edena bamona ita diba Iehova be ita ia laloa?
8 Iehova ese hisihisi ia havaraia lasi bona unai ita diba be hagoadaia gauna. To, Dirava be iseda mauri dekenai idia vara gaudia ia laloa, a? Ena haere be, oibe! Ita diba Iehova ese ita ia laloa, badina taunimanima ese dala dikana idia abia hidi neganai, Dirava ese ia koudia lasi ena badina be Baibel ese ia gwauraia. Unai badina rua be: Dirava ena lohia siahuna bona taunimanima edia kara maoromaoro. Iehova be siahu ibounai Havaraia Tauna dainai, ita dekenai dika ia koua lasi ena badina ia gwauraia be anina lasi. To, unai badina idauidau be ita dekenai ia gwauraia badina ita ia laloa.
9 Gau haida ese idia hamomokania Dirava ese ita ia laloa, unai gaudia haida mani ita laloa. Noa ena negai tanobada be kara dika amo ia honu neganai, Dirava ia ‘lalohisihisi bada momokani.’ (Genese 6:5, 6) Hari inai negai, ena kara do ia haidaua, a? Iehova ese ena kara do ia haidaua lasi. (Malaki 3:6) Ia ese kara gageva ia inai henia bona ia ura lasi taunimanima idia hisihisi. Baibel ia gwau, taunimanima edia lohia dalana bona Diabolo ena siahu dainai idia vara dika ibounai be Dirava ese kahirakahira do ia kokia. Unai ese ia hamomokania Dirava be ita ia laloa, ani?
10. Iehova ese taunimanima edia hisihisi be edena bamona ia laloa?
10 Tomadiho gunalaia taudia idia gwau, ita davaria dika be Dirava ese ia havaraia neganai, idia ese Dirava ena ladana idia hadikaia. To, Iehova ia ura bada taunimanima edia hisihisi ia haorea. Petero Ginigunana 5:7 ia gwau, “Ia ese umui ia naria [“laloa bada,” NW ] noho.” Baibel be unai ia hahedibalaia!
Dahaka Dainai Inai Tanobada Dekenai Ita Noho?
11. Taunimanima be tanobada ai idia noho ena badina dekenai, tomadiho taudia be dahaka idia gwau?
11 Taunimanima momo ese idia laloa henanadai ma ta mani ita laloa, Dahaka dainai inai tanobada dekenai ita noho? Nega momo tomadiho taudia idia gwau, taunimanima be tanobada dekenai nega daudau do idia noho lasi. Idia laloa tanobada be nega sisina lalonai do idia noholaia, bena gabu ma ta dekenai do idia lao. Dubu gunalaia taudia haida idia gwau, nega ta Dirava ese inai tanobada do ia hadikaia ore. Unai bamona hadibaia herevadia dainai, taunimanima momo idia gwau edia mauri idia moalelaia be namo, badina idia diba do idia mase. Tanobada ai ita noho ena badina dekenai, Baibel ena hadibaia hereva be dahaka?
12-14. Baibel ena hadibaia hereva be dahaka Dirava ena ura tanobada bona taunimanima totona?
12 Dirava ena ura tanobada bona taunimanima totona be namo herea. Dirava ese “tano do ia noho kava totona ia karaia lasi, to tano mai anina namona, taunimanima idia noholaia diba gabuna, ia karaia.” (Isaia 45:18) Ma danu, Iehova ese “inai tanobada [ia] karaia goada, ena gabu korikori dekenai, bona inai tanobada ia goada noho, ia marere sisina diba lasi, lasi momokani.” (Salamo 104:5) Dirava ena ura taunimanima totona ita dibaia karana ese ita do ia durua, inai tanobada dekenai ita noho ena badina, ita lalopararalaia totona.
13 Genese karoa 1 bona 2 idia hahedinaraia, Dirava ese tanobada ia karaia taunimanima idia noholaia totona. Gau ibounai ia havaraia murinai, ia itaia ia karaia gaudia ibounai be “namo herea.” (Genese 1:31) Dirava ese tau bona hahine ginigunadia, Adamu bona Heva, be uma mai hairaina dekenai ia atoa bona uma be aniani namodia amo ia hahonua. Dirava ese tau bona hahine ginigunadia ia hamaoroa: “Emui bese do umui havaraia, do umui momo herea. Tanobada ena gabu ibounai dekenai do umui noho, bona unai tano do umui biagua.” Oibe, goevadae natudia do idia havaraia bona tanobada ibounai be gabu hairaina ai do idia halaoa. Bona danu mai lalokau ida animal do idia naria.—Genese 1:26-28.
14 Iehova ena ura be goevadae taudia ese tanobada paradaisona do idia noholaia ela bona hanaihanai. Baibel ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.” (Salamo 37:29) Oibe, Dirava ese ita ia karaia tanobada Paradaisona dekenai do ita noho hanaihanai totona. Unai be Dirava ena ura, bona Baibel ese unai ia hahedibalaia!
Ita Mase Neganai Dahaka Ia Vara Ita Dekenai?
15. Tomadiho momo idia gwau ita mase neganai dahaka ia vara ita dekenai?
15 Taunimanima momo idia daradaralaia henanadai ihatoina mani ita laloa, Ita mase neganai, dahaka ia vara ita dekenai? Tanobada ena tomadiho momo idia gwau, ta ia mase murinai ia lalonai gau ta be do ia mauri noho. Tomadiho haida idia abia dae Dirava ese kara dika taudia ia panisia totona, hel lahi dekenai ia siaidia bona unuseniai hisihisi idia abia hanaihanai. Unai be momokani, a? Baibel ena hadibaia hereva mase dekenai be dahaka?
16, 17. Baibel ena hereva hegeregerena, mase taudia be edena bamona?
16 Baibel ia gwau: “Mauri taudia idia diba do idia mase, to mase taudia be gau ta idia diba lasi. Idia be mai edia ahuna lasi.” Mase taudia “be gau ta idia diba lasi” dainai, idia kamonai, itaia, hereva, bona laloa diba lasi, eiava gau ta idia mamia diba lasi. Bona ahuna idia abia lasi. Dahaka dainai? Badina idia be gaukara ta idia karaia diba lasi! Ma danu, “mase taudia edia lalokau, edia badu, bona edia mama be idia ore momokani,” badina edia hemami idia hahedinaraia diba lasi.—Hadibaia Tauna 9:5, 6, 10.
17 Baibel be auka lasi bona ita lalopararalaia dalanai ia gwau, mase taudia be gabu ta dekenai idia mauri noho lasi. Ita mase neganai, gau ta ese iseda tauanina ia rakatania lasi bona tauanina idauna lalonai ia vara lou lasi, haida ese idia laloa bamona. Haheitalai ta mani ita laloa: Ita moalelaia maurina be kandolo ena hururu bamona. Kandolo ena hururu ita habodoa neganai, unai hururu be gabu ma ta dekenai ia lao lasi. To ia boio.
18. Bema Baibel stiuden ta ia diba mase taudia be gau ta idia diba lasi, dahaka do ia lalopararalaia?
18 Unai siri ena hereva mani ita laloa lou. Bema Baibel stiuden ia diba mase taudia be gau ta idia diba lasi, do ia laloparara ena be ena tubudia idia mauri neganai idia be badu momo taudia, to hari ia do idia hahisia lasi. Bona danu ia laloparara ena lalokau mase taudia be gau ta idia kamonai, itaia, hereva, mamia eiava laloa diba lasi. Unai dainai, idia be hel lahina eiava gabu ma ta dekenai hisihisi bada idia mamia lasi. To Baibel ia hahedinaraia, Dirava ese ia laloatao taudia ibounai do ia hatorea isi lou. Helaro hereadaena unai!—Ioane 5:28, 29.
Do Ita Gaukaralaia Buka Matamata
19, 20. Ita be Keristani taudia dainai iseda maduna be dahaka, bona edena buka be haroro gaukara lalonai ita gaukaralaia diba?
19 Ita be taunimanima ese idia laloa henanadai toi sibona ita herevalaia. Idia ta ta dekenai ita itaia, Baibel ena hadibaia hereva be auka lasi bona ita lalopararalaia diba. Baibel ena hadibaia hereva idia ura diba taudia dekenai, unai bamona hereva momokani ita hadibaia be moale gauna! To mai anina bada henanadai momo idia do noho, bona kudou-maoro taudia ese edia haere idia diba be namo. Ita be Keristani taudia dainai, iseda maduna be taunimanima ita durudia unai bamona henanadai edia haere idia diba totona.
20 Baibel ena hereva momokani be auka lasi bona taunimanima ese idia lalopararalaia dalanai ita hadibaia be mai ena hekwarahi. Unai dainai ita idia durua totona, “hesiai tauna mai ena kamonai, bona mai ena kara maoromaoro” ese buka ta idia karaia, iseda Keristani hesiai gaukara lalonai ita gaukaralaia totona. (Mataio 24:45-47) Unai buka ena rau ibounai be 224 bona ena ladana be, Baibel be Dahaka Ia Hadibaia?
21, 22. Baibel be Dahaka Ia Hadibaia? bukana lalonai, edena kahana namodia haida idia noho?
21 Lagani 2005 ai, Iehova ena Witnes taudia edia “Dirava Badinaia” Distrik Hebouhebou dekenai unai buka idia halasia, bona ia lalonai kahana namodia haida idia noho. Hegeregere, unai buka ena matamana kahanai, rau 1 ia lao 5 ese momo ia durua Baibel stadi idia hamatamaia totona. Ia auka lasi unai rau ai idia noho laulau bona siri oi herevalaia totona. Danu, unai kahana lalonai idia noho hereva amo stiuden oi durua diba Baibel ena karoa bona siri idia davaria totona.
22 Unai buka ena hereva be auka lasi bona oi lalopararalaia dalanai idia torea. Bona henanadai momo idia noho, unai ese stiuden ena lalona do ia veria ena lalohadai ia gwauraia totona. Karoa ta ta ena matamana kahanai henanadai haida idia noho, bona dokona kahanai maua ta ena ladana “Baibel Ia Hadibaia Gaudia” ia noho. Unai maua lalonai, matamana kahanai idia noho henanadai be Baibel amo idia haerelaia. Laulau namodia, bona laulau badinai idia noho herevadia bona haheitalai ese stiuden do ia durua lalohadai matamatadia ia lalopararalaia totona. Ena be unai buka ena hereva momo be auka lasi dalanai idia torea, to ena apendiks dekenai mai anina bada hereva 14 idia noho, bema stiuden ia ura diba ma haida ia abia unai oi hahedinaraia diba.
23. Baibel Hadibaia bukana gaukaralaia namonamo karana dekenai, dahaka heduru herevadia idia noho?
23 Baibel Hadibaia bukana idia karaia ena badina be, ita idia durua edukeisen bona tomadiho idauidau taudia ita hadibaia totona. Bema stiuden be Baibel ia diba lasi, reana karoa ta be nega rua eiava toi lalonai oi haorea diba. Stadi ita karaia haraga lasi, to namona be ita hekwarahi stiuden ena kudouna ita hamarerea totona. Bema buka lalonai ia noho haheitalai ta ia lalopararalaia lasi, oi gwauraia hedinarai namonamo eiava haheitalai ma ta oi gaukaralaia. Oi hegaegae namonamo, oi hekwarahi unai buka oi gaukaralaia namonamo, bona Dirava ena lauma helaga totona oi guriguri, unai amo “hereva momokani do oi hadibaia maoromaoro, bona Dirava ena vairanai do oi hemarai lasi.”—2 Timoteo 2:15.
Oi Abia Hahenamo Oi Laloa Bada
24, 25. Iehova ese ena taunimanima dekenai dahaka hahenamo ia henia?
24 Iehova ese ena taunimanima dekenai hahenamo bada ia henia. Ia ese dala ia kehoa Ia ita dibaia namonamo totona. Namona be unai hahenamo ita laloa bada! Badina Dirava ese hekokoroku taudia dekenai unai hahenamo ia hahedinaraia lasi, to manau taudia dekenai ia hahedinaraia. Unai dainai, Iesu ia gwau: “Egu Tamana e, guba bona tanobada ena Lohia, lau hanamoa oi, badina be inai gaudia aonega taudia bona diba momo taudia dekena amo oi hunia vadaeni, to natudia matamata dekenai oi hedinaraia vadaeni.” (Mataio 11:25) Unai dainai, Guba bona Tanobada edia Lohia Badana, Iehova, idia hesiai henia manau taudia huanai ita noho, be hahenamo badana.
25 Ma danu, Dirava ese ita dekenai ma haida ita hadibaia ena hahenamo ia henia. Namona be ita laloaboio lasi, hereva koikoi idia hadibaia taudia ese Dirava ena ladana idia hadikaia. Taunimanima momo ese Iehova idia laloa kerere, idia laloa Ia be ita ia laloa lasi bona ia hebogahisi lasi. Oi ura unai lalohadai kererena oi hamaoromaoroa, a? Oi ura tanobada hegegemadai idia noho kudou-maoro taudia ese Dirava idia dibaia, a? Vadaeni, emu lalokau Dirava dekenai oi hahedinaraia totona, namona be haroro gaukara oi goadalaia bona Baibel ena hereva be ma haida dekenai oi hadibaia. Hereva momokani idia tahua taudia ese Baibel ena hadibaia hereva idia dibaia be namo.
Emu Haere be Dahaka?
• Edena bamona ita diba Dirava ese ita ia laloa?
• Dahaka dainai inai tanobada dekenai ita noho?
• Ita mase neganai, dahaka ia vara ita dekenai?
• Baibel Hadibaia bukana lalonai, edena kahana oi laloa bada?
[Pictures on page 4]
Baibel ena hadibaia hereva be hisihisi ibounai do idia ore
[Credit Lines]
Top right, girl: © Bruno Morandi/age fotostock; left, woman: AP Photo/Gemunu Amarasinghe; bottom right, refugees: © Sven Torfinn/Panos Pictures
[Picture on page 5]
Kara maoromaoro taudia be Paradaiso ai do idia noho ela bona hanaihanai