Manu Tahua Tauna Ena Tarapu amo Ita Roho Mauri
“[Iehova] ese manu tahua tauna ena tarapu amo oi do ia hamauria.”—SALAMO 91:3, BHğ.
1. “Manu tahua tauna” be daika, bona dahaka dainai ia be lauma dikana ta?
KOIKOI karadia ia diba momo laumana ta ese Keristani taudia momokanidia ibounai ia koia noho. Salamo 91:3 ese ia gwauraia “manu tahua tauna.” Unai tauna be daika? June 1, 1883 ai idia halasia Watchtower ginigunana amo ema bona hari, unai tauna be idia gwauraia Satani Diabolo. Tau ta ese manu ia ura tarapua bamona, koikoi dalanai Satani ia hekwarahi Iehova ena taunimanima ia hakaua kerere bona ia tarapua totona.
2. Dahaka dainai Satani be “manu tahua tauna” bamona?
2 Idaunegai, taunimanima ese manu edia ane namodia bona edia hairai dainai idia abia. Aniani bona boubou karaia totona idia abia danu. To, manu be idia naria namonamo, bona idia roho haraga dainai, tarapua totona be auka. Unai dainai, Baibel negadia ai, manu tahua tauna be manu ena kara ia stadilaia namonamo guna. Bena koikoi daladia ia gaukaralaia unai manu ia tarapua totona. Baibel ese Satani be manu tahua tauna bamona ia gwauraia, bona ita ia durua danu Satani ena koikoi karadia idauidau ita dibaia totona. Diabolo be ita ta ta eda kara bona ura gaudia ia stadilaia namonamo bona hehuni dalanai tarapu ia atoa ita ia abia totona. (2 Timoteo 2:26) Iena tarapu amo ita ia abia neganai, iseda hetura karana Iehova ida ia hadikaia bona dika bada ita davaria diba. Unai dainai, dika ita dadaraia totona, “manu tahua tauna” ena tarapu idauidau ita diba be namo.
3, 4. Edena dala ai Satani ena kara be laiona eiava gaigai ena kara bamona?
3 Danu, salamo torea tauna ia gwau, Satani ena kara be laiona eiava gaigai edia kara bamona. (Salamo 91:13) Laiona hegeregerena, Satani ese dagedage karadia eiava gavamani oreadia ia gaukaralaia, Iehova ena taunimanima edia gaukara ia koua eiava dagedage henia totona. (Salamo 94:20) Unai laiona bamona dagedage karadia dainai, haida ese Iehova idia rakatania. To, nega momo unai bamona dagedage karadia dainai Dirava ena taunimanima idia goada bona unai ese lalotamona ia havaraia. To, edena dala ai Satani be gaigai bamona ita ia koia diba?
4 Gaigai be hehuni gabuna amo taunimanima ia koria hegeregerena, Satani be ena diba bada ia gaukaralaia koikoi dalanai taunimanima ia tarapua totona. Ia ese unai dala amo Dirava ena taunimanima haida ia koia vadaeni dainai, idia be Iehova ena ura idia karaia lasi, to Satani ena ura idia karaia bona dika idia davaria. To, ita moale badina ita be Satani ena koikoi karadia ita diba. (2 Korinto 2:11) Satani ese ia gaukaralaia tarapu foa mani ita herevalaia.
Taunimanima Gari Henia Karana
5. Dahaka dainai Satani be taunimanima gari henia karana amo haida ia hamorua?
5 “Manu tahua tauna” be ia diba taunimanima idia ura ma haida ese do idia abia dae bona idia lalonamo henidia. Keristani taudia be ma haida edia lalohadai idia laloa bada. Diabolo be unai ia diba dainai, unai ia gaukaralaia Keristani taudia edia hemami ia hadikaia totona. Hegeregere, taunimanima gari henia karana amo Satani ese Dirava ena taunimanima haida ia hamorua. (Aonega Herevadia 29:25) Bema Dirava ena hesiai taudia be taunimanima idia gari henia dainai, Dirava ena taravatu idia utua eiava Dirava ena hahegani idia badinaia lasi, idia be “manu tahua tauna” ese ia tarapua vadaeni.—Esekiela 33:8; Iamesi 4:17.
6. Edena dala ai mero matamata ta be “manu tahua tauna” ena tarapu lalonai ia moru diba?
6 Hegeregere, mero matamata ta be reana ena sikuli turadia ese idia doria dainai kuku ia ania. Unai mero be ia laloa lasi unai dina ai ia be kuku do ia ania. To, ia karaia gauna ese ena tauanina ia hadikaia bona Dirava ia habadua. (2 Korinto 7:1) Dahaka dainai ia moru? Reana turadia kereredia ia bamoa bona ia ura lasi idia kirikirilaia dainai, ia gari bona kuku ia ania. Matamata taudia e, namo lasi “manu tahua tauna” ese emui lalona ia veria bona umui ia tarapua! Satani be ena tarapu amo ita ia abia lasi totona, gau maragidia dekenai ita gini goada be namo! Bona Baibel ena sisiba hebamo karana dekenai ita badinaia be namo.—1 Korinto 15:33.
7. Satani ese edena dala ai tama sina edia laloa maoromaoro karana ia hadikaia diba?
7 Keristani tama sina namodia be Baibel ena hereva hegeregerena edia ruma bese be tauanina dalanai idia naria namonamo. (1 Timoteo 5:8) To, Satani ia ura Keristani taudia be unai maduna idia laloa maoromaoro lasi bona tauanina gaudia idia laloa bada. Reana, Keristani taudia haida be hanaihanai hebou idia reaia, badina edia gaukara biaguna ia ura ovataim idia karaia. Eiava, idia gari edia biaguna idia noia dina haida idia gaukara lasi totona, unai amo distrik hebouhebou dekenai edia tadikaka ida Iehova idia tomadiho henia diba. Unai tarapu amo sibona oi gimaia totona, namona be ‘Iehova oi abidadama henia.’ (Aonega Herevadia 3:5, 6) Danu, ita be Iehova ena ruma bese taudia bona ia ura ita ia naria, unai ita laloatao neganai, ita ia durua ita laloa maoromaoro totona. Tama sina e, oi abia dae momokani Iehova ena ura oi karaia neganai, Ia ese oi bona oiemu ruma bese do ia naria diba, a? Eiava, taunimanima dekenai oi gari dainai, Diabolo ena tarapu lalonai do oi moru bona iena ura oi karaia, a? Umui ai hagoadaia unai henanadai be mai guriguri ida umui lalohadailaia totona.
Moni Bona Kohu Momo Tahua Karana Ena Tarapu
8. Edena dala ai Satani ese moni momo tahua karana ia gaukaralaia taunimanima ia tarapua totona?
8 Satani ese ia gaukaralaia tarapu ta be kohu momo ura henia karana. Inai tanobada ena bisinesi oreadia ese moni momo abia haraga karadia amo Dirava ena taunimanima haida idia koia. Nega haida, ta do ia gwau: “Oi gaukara goada. Moni momo oi haboua murinai, oi laga-ani bona emu mauri oi moalelaia diba. Bena, reana painia gaukara oi karaia diba.” Kongrigeisen lalonai, haida be unai bamona lalohadai kererena amo edia Keristani tadikaka idia koia bona edia moni idia abia. Namona be unai bamona taudia edia hereva oi laloa namonamo. Edia hereva be Iesu ena parabole lalonai ia herevalaia taga tauna ena lalohadai bamona, ani?—Luka 12:16-21.
9. Dahaka dainai Keristani taudia haida be kohu ura henia karana ena tarapu dekenai idia moru?
9 Satani be inai tanobada dikana ia gaukaralaia taunimanima edia lalona ia veria kohu idia ura henia totona. Unai ura ese Keristani tauna ena mauri ia hadikaia diba, hereva momokani ena tubu dalana do ia koua bena ‘huahua do ia atoa lasi.’ (Mareko 4:19) Baibel ese ita ia sisiba henia, bema ita be mai eda aniani bona dabua, moni dekenai do ita laloa momo lasi. (1 Timoteo 6:8) To, momo be “manu tahua tauna” ena tarapu lalonai idia moru badina unai sisiba idia badinaia lasi. Reana, idia hekokoroku dainai idia ura kohu momo maurina idia noholaia, a? Ita be edena bamona? Kohu momo ita ura abia dainai, tomadiho momokani be ita laloa bada lasi, a? (Hagai 1:2-8) Hari inai negai, moni davaria dalana be auka bona haida be edia mauri dalana idia ura lasi rakatania dainai, edia hetura karana Iehova ida idia dadaraia. “Manu tahua tauna” ia moale bema ta be kohu momo ia ura henia!
Moale Karadia Ena Tarapu
10. Keristani taudia ta ta ese dahaka henanadai idia laloa be namo?
10 “Manu tahua tauna” ena tarapu ma ta be taunimanima edia lalohadai kara namo bona kara dika dekenai ia hadikaia. Sodoma bona Gomora dekenai idia karaia moale karadia be hari inai nega ai idia hedinarai danu. TV bona magasin edia niusi ese dagedage karadia bona matabodaga karadia idia hahedinaraia momo. Unai bamona moale karadia ese taunimanima edia laloa dalana ia hadikaia dainai, “maoro bona kerere edia toana” idia diba lasi. (Heberu 5:14) To, Iehova ese peroveta tauna Isaia amo ia gwauraia hereva mani oi laloa: “Momokani, do umui be dika! Umui ese dika umui gwauraia namo, bona namo umui gwauraia dika!” (Isaia 5:20) “Manu tahua tauna” be unai bamona moale karadia amo emu lalona ia veria, a? Sibona iseda kara ita tahua be gau badana.—2 Korinto 13:5.
11. Watchtower ese dahaka sisiba ia henia?
11 Lagani 25 gunanai, Watchtower ese Keristani taudia dekenai TV ena program haida edia dika ia herevalaia.a Televisen drama ese taunimanima momo edia lalona ia veria dainai, unai Watchtower ia gwau: “Idia gwau bema lalokau dainai kara ta idia karaia, unai be maoro ena be unai kara be kerere. Hegeregere, headava lasi rogorogo kekeni ta be ena turana dekenai ia gwau: ‘To lau be Victor lau lalokau henia. . . . Bona Victor ena beibi lau havaraia be mai anina bada gauna lau dekenai!’ Unai bamona ia hereva lalonai, miusiki namona ta idia gadaralaia bona unai televisen drama idia itaia taudia idia abia dae ia karaia karana be kerere lasi. Oi danu be Victor oi ura henia, bona unai kekeni dekenai oi hebogahisi. Iena hemami oi lalopararalaia. Unai televisen drama ia itaia hahine ta ia gwau, ‘Oi diba unai be kerere, to oi abia dae sibona. Ita diba matabodaga karadia be dika . . . to lau ese unai kara dikadia idia karaia taudia lau hebogahisi henia noho.’
12. Dahaka ese ia hamomokania televisen drama itaia karana ese dika ia havaraia?
12 Unai magasin idia halasia negana amo ema bona hari, unai bamona televisen drama momo herea idia hahedinaraia noho. Gabu momo dekenai, unai bamona program be dina ta ta ai hora 24 lalonai idia hahedinaraia. Hanaihanai tau, hahine, bona matamata taudia momo edia lalona be unai bamona moale karadia amo idia hahonua. Namo lasi koikoi lalohadaidia amo ita sibona ita koia. Namo lasi ita gwau unai bamona televisen drama be dika momokani lasi, bona idia be idia vara momokani matabodaga karadia hegeregerena. Keristani tauna ese matabodaga taudia be iena ruma dekenai do ia abia dae lasi, to unai bamona taudia televisen drama dekenai ia itaia be maoro, a?
13, 14. Edena dala ai haida be Watchtower ena sisiba idia badinaia dainai namo idia davaria?
13 Momo be “hesiai tauna mai ena kamonai, bona mai ena kara maoromaoro” amo ia mai sisiba idia badinaia neganai, namo idia davaria. (Mataio 24:45-47) Haida be unai Watchtower ai, Baibel ena sisiba idia duahia murinai, idia ia durua dalana idia herevalaia.b Ta ia gwau: “Lagani 13 lalonai lau be televisen drama lau itaia hanaihanai. Lau laloa Keristani hebou dekenai lau lao bona nega haida lau haroro dainai lau be hegeregere. To, lau be televisen drama lalonai idia hedinarai taudia edia lalohadai lau abia, hegeregere bema emu tau ese oi ia dagedage henia eiava oi mamia oi ia lalokau henia lasi, vadaeni heudahanai karana oi karaia be maoro—badina unai be emu tau ena kerere. Lau laloa unai lalohadai be maoro dainai, lau heudahanai bona Iehova bona egu tau lau kara dika henidia.” Unai hahine be kongrigeisen amo idia atoa siri. To gabeai, ia laloparara bona ia helalo-kerehai, bona kongrigeisen dekenai idia abia-vareai-lou. Unai magasin ena sisiba ese ia hagoadaia dainai, Iehova ese ia inai henia gaudia ia dadaraia.—Amosa 5:14, 15.
14 Ma ta ia gwau: “Lau be unai magasin lau duahia neganai lau tai, badina lau laloparara lau be mai egu kudouna ibounai ida Iehova lau lalokau henia lasi. Egu Dirava dekenai gwauhamata lau karaia unai televisen drama ena hesiai tauna ai do lau lao lasi.” Keristani hahine ta be unai magasin dainai tanikiu herevana ia gwauraia murinai, ia hahedinaraia ia be televisen drama ia raraia momo bona ia gwau: “Lau lalohekwarahilaia, badina egu hetura karana Iehova ida do ia dika garina. Edena bamona ‘idia’ be egu turadia ai lau halaoa bona Iehova danu be egu turana?” Bema lagani 25 gunanai, televisen program ese taunimanima edia lalohadai ia hakererea, hari be edena bamona? (2 Timoteo 3:13) Namona be Satani ese moale karadia, hegeregere televisen drama, dagedage vidio gadara, eiava matabodaga miusiki dikadia edia vidio, be tarapu bamona ia gaukaralaia dalana ita diba.
Hepapahuahu Ena Tarapu
15. Edena dala ai haida ese Satani ena ura idia karaia?
15 Satani ese tadikaka huanai hepapahuahu ia havaraia diba Iehova ena taunimanima ia hapararaia totona. Herevana dahaka hesiai gaukara ita karaia, to unai tarapu ese ita ia abia diba. Haida be hepapahuahu dainai Diabolo ena ura idia karaia bona iena tarapu lalonai idia moru, unai amo Iehova ena taunimanima huanai ia noho maino bona noho namona idia hadikaia.—Salamo 133:1-3.
16. Satani ese edena hehuni dalana amo lalotamona karana ia hadikaia?
16 Tanobada Tuarina Ginigunana lalonai, Satani be dagedage karadia amo ia ura Iehova ena tanobada oreana ia hadikaia, to ia kwalimu lasi. (Apokalupo 11:7-13) Unai nega amo, hunia dalana amo ia hekwarahi iseda lalotamona karana ia hadikaia totona. Bema ita be hepapahuahu dainai ita lalotamona lasi, “manu tahua tauna” ena dala ita kehoa Iehova ena orea ia hadikaia totona. Bona ita sibona iseda mauri bona kongrigeisen lalonai lauma helaga ena gaukara dalana ita koua diba. Bema unai ia vara Satani do ia moale, badina kongrigeisen lalonai maino bona lalotamona ia noho lasi neganai, haroro gaukara dalana do ia dika.—Efeso 4:27, 30-32.
17. Bema tadikaka huanai hepapahuahu ia vara, dahaka ese idia ia durua diba idia hamaoromaoroa totona?
17 Bema tadikaka ta ida oi hepapahuahu, dahaka oi karaia be namo? Hekwakwanai idia vara ena badina be idauidau. To, herevana dahaka dainai hepapahuahu idia vara, ita hamaoromaoroa be gau badana. (Mataio 5:23, 24; 18:15-17) Baibel lalonai idia noho sisiba herevadia be lauma helaga amo bona idia be goevadae. Bema ita badinaia unai ese ita do ia durua bona namo do ia havaraia!
18. Dahaka dainai hepapahuahu ita hamaoromaoroa totona, Iehova ita tohotohoa be namo?
18 Iehova be ia hegaegae ‘kara dika ia gwauatao’ totona. (Salamo 86:5; 130:4) Iehova ena kara ita tohotohoa neganai, ita hahedinaraia ita be iena natudia. (Efeso 5:1) Ita ibounai be kara dika taudia bona ita ura Iehova ese iseda dika ia gwauatao. Unai dainai, namona be ita naria namonamo, namo lasi ma ta ena dika ita gwauatao lasi. Ita be Iesu ena parabole lalonai ia gwauraia hesiai tauna bamona ita lao diba. King ese unai hesiai tauna ena abiatorehai bada herea ia gwauatao, to unai hesiai tauna be iena gaukara turana ena abiatorehai maragina ia gwauatao lasi. King be unai ia kamonai neganai, unai hesiai tauna be dibura ruma dekenai ia atoa. Iesu be unai parabole ia hadokoa neganai, ia gwau: “Egu Tamana guba dekenai ia noho be unai bamona do ia karaia umui dekenai, bema umui ta ta emui kudouna dekenai emui tadikakana edia dika do umui gwauatao lasi neganai.” (Mataio 18:21-35) Unai parabole ita laloa dobu bona Iehova ese nega momo iseda dika ia gwauatao karana ita laloa neganai, unai ese ita do ia durua iseda tadikaka ida hepapahuahu ita hamaoromaoroa totona!—Salamo 19:14.
“Atai Momokani Lohiabada” Ena Hehuni Gabuna Dekenai Ita Noho
19, 20. Inai nega dikana lalonai, Iehova ena “hehuni gabuna” be edena bamona ita laloa be namo?
19 Ita be nega dikana lalonai ita noho. Bema Iehova ese ita ia lalokau henia lasi bona ita ia gimaia lasi, Satani ese ita ia hadikaia vadaeni. Unai dainai, “manu tahua tauna” ena tarapu dekenai ita moru lasi totona, Iehova ena “hehuni gabuna” ai bona “siahu ibounai Dirava kahirakahira ita noho” be gau badana.—Salamo 91:1.
20 Namona be nega ibounai ita laloatao, Iehova ena hakaua herevadia be ita idia gimaia bona idia be auka lasi. Ita ibounai be dagedage bona koikoi karadia ia diba momo lauma tauna ese ia tohoa noho. Bema Iehova ena heduru ita abia lasi, Satani ena tarapu lalonai do ita moru. (Salamo 124:7, 8) Unai dainai, namona be Iehova ita noia ia ese “manu tahua tauna” ena tarapu amo ita ia gimaia totona!—Mataio 6:13.
[Footnotes]
a Watchtower, December 1, 1982, rau 3-7.
b Watchtower, December 1, 1983, rau 23.
Oi Laloatao, A?
• Dahaka dainai taunimanima gari henia karana be tarapu dikana ta?
• Edena dala ai Diabolo ese kohu momo ura henia karana ia gaukaralaia ita ia koia totona?
• Edena dala ai Satani ese moale karadia amo haida ia tarapua vadaeni?
• Diabolo be dahaka tarapu ia gaukaralaia iseda lalotamona karana ia hadikaia totona?
[Picture on page 24]
Haida be taunimanima idia gari henia dainai, Satani ena tarapu dekenai idia moru
[Picture on page 25]
Iehova ia inai henia gaudia oi moalelaia, a?
[Picture on page 26]
Dahaka oi karaia bema oi be tadikaka ta ida oi hepapahuahu?