‘Lohiabada ese Oi Dekenai Ia Henia Gaukarana be Do Oi Karaia’
‘Lohiabada ese oi dekenai ia henia gaukarana be do oi karaia haorea momokani.’—KOL. 4:17.
1, 2. Keristani taudia edia maduna badana be dahaka?
EDA DEKENA taudia ita hadibaia gaukarana be maduna badana. Hari idia abia hidi gaudia dainai, “hisihisi badana” lalonai idia be mase o mauri do idia abia. (Apok. 7:14, NW ) Aonega Herevadia ia torea tauna ia gwau: “Bema kerere lasi tauna, be do idia hamasea gwauraia neganai, unai tau do oi hamauria haraga. Mase dekenai kahirakahira idia moru taudia, be do oi veria mauri.” Unai be hereva aukadia. Bema taunimanima ita hadibaia lasi dainai abia hidi kererena idia karaia bona idia mase, vadaeni Dirava be ita danu do ia kota henia. Aonega Herevadia torea tauna ma ia gwau: “Bema oi koikoi, oi gwau, ‘Lau be inai gau lau diba lasi,’ laloa ibounai Dirava ese, inai koikoi ia itaia lasi, a? Oiemu lauma ia naria noho Dirava ia diba lasi, a? Ia ese taunimanima edia davana, be edia kara hegeregerena do ia henia.” Oibe, Iehova ena hesiai tauna ta ia gwau diba lasi: ‘Taunimanima do idia mase herevana lau diba lasi.’—Aon. 24:11, 12.
2 Iehova be eda mauri ia laloa bada. Ia ese ena hesiai taudia ia hamaoroa, namona be idia hekwarahi taunimanima momo idia hamauria totona. Dirava ena hesiai taudia ta ta ese Baibel lalonai ia noho hahemauri sivaraina idia harorolaia be namo. Eda gaukara be gima tauna ena bamona, badina ia be dika ia itaia neganai, ma haida ia hadibaia danu. Ita ura lasi “hisihisi badana” lalonai idia mase taudia edia rara dainai ita kerere. (Ese. 33:1-7) Unai dainai, Dirava ena hereva ‘ita harorolaia’ noho be mai anina bada!—Timoteo Iharuana 4:1, 2, 5 duahia.
3. Edena stadi herevadia toi be hari bona gabeai do ita herevalaia?
3 Inai stadi amo do oi diba edena dala ai emu haroro gaukara idia koua gaudia oi hanaia bona edena dala ai taunimanima momo herea oi durua totona. Stadi iharuana ese oi do ia durua edena dala ai hereva momokanidia oi hadibaia namonamo totona. Stadi ihatoina amo tanobada hegegemadai Basileia idia harorolaia taudia edia sivarai namodia haida do oi itaia. To guna, namona be ita itaia dahaka dainai iseda nega be mai anina bada negana.
Dahaka Dainai Momo be Helaro Lasi?
4, 5. Taunimanima be dahaka hekwakwanai idia davaria noho, bona momo be dahaka idia karaia?
4 Tanobada ai idia vara gaudia ese idia hahedinaraia, ita be nega dokonai ita noho o nega be kwadogi. Iesu bona ena hahediba taudia ese idia hahedinaraia “nega ena dokona” ai gau dikadia do idia vara dainai, taunimanima be “hisihisi” do idia davaria. Hegeregere tuari, hitolo, tano mareremarere bona hisihisi ma haida be taunimanima edia mauri idia hadikaia. Gabu momo dekenai raskol karadia do idia bada, taunimanima be sibona edia namo idia laloa bada bona dika ma haida idia vara. Baibel ena taravatu idia badinaia taudia be “metau dikadia momo” idia davaria danu.—Mat. 24:3, 6-8, 12; 2 Tim. 3:1-5.
5 To, taunimanima momo be tanobada dekenai idia vara hekwakwanai idauidau edia badina idia diba lasi. Unai dainai, momo be idia sibona o famili ena namo idia laloa momo. Ma haida be edia lalokau taudia idia mase bona sibona edia mauri lalonai idia davaria dika idauidau ese idia ia hahisia bada. Idia be unai hekwakwanai idauidau idia vara ena badina bona hanaia dalana idia diba lasi dainai, idia be helaro lasi.—Efe. 2:12.
6. Dahaka dainai “Babulonia badana” be ena taunimanima ia durua lasi?
6 “Babulonia badana,” tanobada ena tomadiho koikoi ibounai unai, be taunimanima ia durua namonamo lasi. Danu, ia ese “matabodaga” karadia ia karaia dainai, momo be idia daradara Dirava idia tomadiho henia be namo eiava lasi. Danu, tomadiho koikoi be ariara hahine ta bamona “tanobada ena king” ia koia bona ia biagua, bona ia ese hahediba koikoi bona lauma dikadia edia heduru amo taunimanima momo idia doria edia politikol biagudia idia badinaia totona. Oibe, tomadiho koikoi be mai ena siahu bada, to danu, ia be Baibel ena hereva momokanina ia dadaraia vaitani.—Apok. 17:1, 2, 5; 18:23.
7. Momo be edena dala dekenai idia raka noho? Edena dala ai idia ita durua diba?
7 Iesu ia gwau, taunimanima momo herea be mase ia lao henia dala badana dekenai idia raka noho. (Mat. 7:13, 14) Unai dala dekenai idia raka lao taudia haida be mai edia ura ida Baibel ena hahediba herevadia idia dadaraia, to ma haida be dubu gunalaia taudia ese idia koidia bona Iehova ena ura idia dekenai idia hadibaia lasi. Bema Baibel amo unai bamona taudia ita hadibaia namonamo, reana idia haida edia mauri do idia haidaua. To Babulonia Badana idia rakatania lasi bona Baibel ena taravatu idia dadaraia noho taudia be “hisihisi badana” lalonai do idia mase.—Apok. 7:14, NW.
Haroro Gaukara “Hadokoa Lasi”
8, 9. Dagedage lalonai Keristani taudia ginigunadia be dahaka idia karaia, bona dahaka dainai?
8 Iesu ia gwau ena hahediba taudia be Basileia ena sivarai namona harorolaia bona hahediba taudia halaoa gaukaradia do idia karaia. (Mat. 28:19, 20) Unai dainai, nega momo Keristani taudia korikoridia idia laloa haroro gaukara idia karaia neganai, idia hahedinaraia idia be mai edia abidadama o Iehova idia badinaia. Unai dainai, Iesu ena murinai idia raka taudia ginigunadia be dagedage negana ai haroro gaukara idia karaia noho. Idia be Iehova dekenai heduru idia tahua, idia guriguri Ia ese idia do ia hagoadaia nega ibounai ‘hereva do idia gwauraia, gari lasi’ ida totona. Bona Iehova be ena lauma helaga ena siahu amo idia ia hagoadaia dainai, idia be mai gari lasi ida Dirava ena hereva idia harorolaia.—Kara 4:18, 29, 31.
9 Dagedage lalonai, Iesu ena hahediba taudia be sivarai namona harorolaia gaukarana idia hadokoa, a? Lasi vaitani. Iuda tomadiho gunalaia taudia be aposetolo taudia idia dogoatao, idia hagaria, bona idia botadia, badina aposetolo taudia ese idia karaia haroro gaukara dekenai idia moale lasi. To, aposetolo taudia be “taunimanima idia hadibaia noho, bona Iesu Keriso ena Sivarai Namona idia gwauraia noho. Inai gaukara idia hadokoa lasi.” Idia diba momokani ‘Dirava idia kamonai henia be namo, taunimanima idia kamonai henia be dika.’—Kara 5:28, 29, 40-42.
10. Hari Keristani taudia be dahaka hahetoho idia davaria? To edia kara namodia ese dahaka namo ia havaraia diba?
10 Hari, haroro gaukara dainai Dirava ena hesiai taudia momo be pulisi ese dibura ruma ai idia do atoa lasi o dagedage idia do davaria lasi. To, Keristani taudia momokanidia be hahetoho idauidau idia davaria. Hegeregere, reana Baibel amo oi hadibaia lalomamina be oi ia hadibaia kara namodia oi karaia totona, unai dainai emu kara be tanobada taudia ma haida edia bamona lasi. Reana Baibel ena hakaua herevadia hegeregerena abia hidi oi karaia neganai, emu gaukara turadia, sikuli turadia, bona dekena taudia idia gwau oi be kavakava. To, taunimanima edia hereva kavakavadia dekenai oi gari lasi. Namona be Keristani taudia be ‘diari bamona do idia hedinarai,’ herevana tanobada taudia be dibura bamona lalonai idia noho. (Fili. 2:15) Reana kudou-maoro taudia haida be emu kara namodia idia itaia bona moalelaia dainai, idia be Iehova do idia hanamoa.—Mataio 5:16 duahia.
11. (a) Iseda haroro gaukara dainai haida be dahaka idia karaia? (b) Paulo be dahaka hisihisi ia davaria, to dahaka ia gwau?
11 Basileia ena sivarai namona ita harorolaia noho totona, ita boga auka be gau badana. Reana taunimanima haida, emu varavara danu, be oi do idia kirikirilaia o hahetoho ma haida do idia gaukaralaia, oi idia hamanokaia totona. (Mat. 10:36) Paulo be ena haroro gaukara dainai, hisihisi momo ia davaria. To ia gwau: “Umui diba, guna Filipi hanua dekenai ai lao neganai, be ai dekenai idia dagedage, bona ai idia hisihisi henia. Umui dekenai ai mai neganai tau momo ese ai idia koua gwauraia. To Dirava ese ai ia hagoadaia, vadaeni Sivarai Namona, Dirava dekena amo ia mai gauna, umui dekenai ai gwauraia, mai gari lasi danu.” (1 Tes. 2:2) Momokani, Paulo idia dogoatao, au amo idia botaia, bona dibura ruma ai idia negea murinai, sivarai namona ia harorolaia be auka. (Kara 16:19-24) Dahaka dainai Paulo ia gari lasi? Badina ia ura bada Dirava ese ia henia haroro gaukara ena maduna ia huaia.—1 Kor. 9:16.
12, 13. Haida be dahaka hekwakwanai idia davaria, bona edena bamona unai idia hanaia diba?
12 Danu, bema eda teritori dekenai momo be ruma ai ita davaria lasi eiava Basileia ena sivarai idia kamonai lasi, reana ia auka iseda haroro gaukara ita karaia totona. To dahaka ita karaia diba? Nega bona gabu idauidau ai mai gari lasi ida taunimanima ita haroro henia be namo. Danu, reana eda haroro dinadia ita haidaua o taunimanima momo ita davaria gabudia ai ita haroro.—Ioa. 4:7-15 hahegeregerea; Kara 16:13; 17:17.
13 Ma haida be buruka eiava gorere ena hekwakwanai idauidau idia davaria dainai, haroro gaukara idia karaia momo lasi. Bema oi be unai bamona, namona be oi lalometau lasi. Iehova be emu goada ena hetoana ia diba bona oi karaia diba gaukaradia dekenai ia moale. (Korinto Iharuana 8:12 duahia.) Herevana dahaka hekwakwanai—dagedage, taunimanima idia kamonai lasi, eiava gorere—oi davaria, to emu goada hegeregerena ma haida dekenai sivarai namona oi harorolaia be namo.—Aon. 3:27; Mar. 12:41-44 hahegeregerea.
Haroro Gaukara Oi Laloa Bada
14. Edena dala ai Paulo be haheitalai namona ia hahedinaraia ena Keristani tadikaka totona? Ia be dahaka sisiba ia henia?
14 Paulo be ena haroro gaukara ia laloa bada, bona ena tadikaka ia hagoadaia unai bamona idia karaia totona. (Kara 20:20, 21; 1 Kor. 11:1) Paulo ese ia hagoadaia tauna ta be Akipo. Paulo be Kolose taudia ia tore henia neganai, ia gwau: “Akipo do umui hamaoroa, Lohiabada ese ia dekenai ia henia gaukarana be do ia karaia haorea momokani.” (Kol. 4:17) Baibel be Akipo ena mauri ibounai ia herevalaia lasi, to toana be ia ese haroro gaukara ena maduna ia abia dae. Bema oi be bapatiso tadikaka o taihu ta, oi be haroro gaukara oi abia dae danu. To unai gaukara oi karaia noho, a?
15. Keristani tauna ia gwauhamata ena anina be dahaka? Dahaka henanadai ita henia be namo?
15 Bapatiso ita do abia lasi neganai, ita be guriguri amo Iehova dekenai eda mauri ita gwauhamatalaia. Anina be ita gwau Iehova ena ura sibona do ita karaia. Unai dainai, ita sibona ita nanadaia, ‘Momokani, egu mauri lalonai Dirava ena ura lau atoa guna, a?’ Reana Iehova ia ura eda maduna haida, hegeregere famili do ita naria o ubua be namo. (1 Tim. 5:8) To, eda nega bona goada ma haida be edena bamona ita gaukaralaia? Iseda mauri lalonai, dahaka be mai anina bada?—Korinto Iharuana 5:14, 15 duahia.
16, 17. Keristani matamata taudia eiava maduna momo lasi taudia be dahaka idia karaia diba?
16 Bema oi be bapatiso oi abia merona o kekenina, oi be kahirakahira sikuli do oi haorea, a? Reana oi be famili maduna idauidau oi do huaia lasi. To, vaira negana ai dahaka do oi karaia? Dahaka abia hidi do oi karaia bena unai ese oi do ia durua Iehova ena ura oi hagugurua totona? Momo be edia sediual idia haidaua, unai amo painia gaukara idia karaia bona moale bada idia davaria.—Sal. 110:3; Had. 12:1.
17 Reana oi be matamata tadikaka ta o taihu ta dainai, emu maduna be momo lasi. To ful-taim moni gaukara oi karaia, oi sibona emu mauri oi durua totona. Bona reana kongrigeisen ena gaukara haida sibona oi durua bona oi moalelaia. To oi ura emu moale oi habadaia, a? Oi ura emu haroro gaukara oi habadaia, a? (Sal. 34:8; Aon. 10:22) Teritori haida ai, taunimanima momo herea be hereva momokani o hahemauri sivaraina idia do kamonai lasi. Ia namo emu noho dalana oi haidaua, bena unai bamona gabudia ai Basileia ena sivarai namona oi harorolaia, a?—Timoteo Ginigunana 6:6-8 duahia.
18. Kevin bona Elena be dahaka idia haidaua, bona dahaka ia vara?
18 United States ai, Kevin bona Elena edia sivarai mani ita laloa.a Idia be headava taudia matamatadia, bona idia ura ruma matamata ta idia hoia. Idia ruaosi be ful-taim moni gaukara idia karaia dainai, mauri namona idia noholaia diba. To, edia moni gaukara bona ruma ena gaukara idauidau dainai, haroro gaukara idia karaia momo lasi. Idia laloparara, kahirakahira edia nega bona goada ibounai be kohu o moni tahua karana dekenai idia halusia kava. To, Kevin bona Elena be edia noho dalana idia haidaua, badina idia itaia tadikaka ta mai ena adavana ida be painia gaukara idia karaia bona edia kohu be momo lasi to idia moale. Kevin bona Elena be Iehova idia noia abia hidi maorona idia karaia totona murinai, edia ruma idia hoihoilaia bona ruma maragina ta idia hoia. Elena be painia gaukara ia karaia totona, ena moni gaukara ena hora ia hamaragia. Kevin be Elena ena haroro gaukara ena ekspiriens namodia ese ena lalona ia hagoadaia dainai, ful-taim moni gaukara ia rakatania bona painia gaukara ia hamatamaia. Gabeai, Kevin bona Elena be South America ena hanua ta dekenai idia lao, badina unuseniai Basileia idia harorolaia taudia be momo lasi. Kevin ia gwau: “Nega ibounai emai headava ai moalelaia, to Dirava ena hesiai gaukara ai habadaia neganai, unai ese emai moale ia habadaia momokani.”—Mataio 6:19-22 duahia.
19, 20. Dahaka dainai sivarai namona ita harorolaia be gau badana?
19 Hari inai negai, tanobada hegegemadai, sivarai namona harorolaia gaukarana be mai anina bada. (Apok. 14:6, 7) Unai gaukara be Iehova ena ladana ia hahelagaia. (Mat. 6:9) Lagani ta ta lalonai, taunimanima tausen momo be Baibel ena hereva idia abia dae dainai edia mauri idia hanamoa, bona idia be mauri hanaihanai ena dala dekenai idia raka noho diba. Paulo ia henanadai: “Bema haroro tauna be lasi neganai, edena bamona do idia kamonai?” (Roma 10:14, 15) Oibe, ta do ia mauri lasi bema haroro tauna ese ia haroro henia lasi. Unai dainai, namona be emu lalona oi hadaia emu haroro gaukara oi hagugurua totona?
20 Bema oi ura taunimanima oi durua idia laloparara dahaka dainai hari nega be mai anina bada o abia hidi ena namo bona dika idia diba totona, namona be emu hadibaia karana oi hanamoa. Bona stadi gabena be unai do ia herevalaia.
[Footnote]
a Edia ladana ai haidaua.
Edena Bamona Do Oi Haere?
• Keristani taudia edia maduna badana be dahaka?
• Edena dala ai iseda haroro gaukara idia koua gaudia ita hanaia diba?
• Edena dala ai iseda haroro gaukarana ita hagugurua diba?
[Picture on page 5]
Dagedage lalonai boga auka be mai anina bada
[Picture on page 7]
Haroro gaukara lalonai taunimanima be ruma ai oi davaria lasi neganai, dahaka oi karaia be namo?