Emu Natuna Oi Durua Lalometau Negadiai

BUKA hoihoilaia sitoa ta lalonai, sina ta be ia lalohisihisi bada dainai sitoa naria hahine ia hamaoroa: “Emu sitoa dekenai buka momo idia noho, to egu natuna ia durua bukana ta lau davaria diba lasi!” Unai sinana ena natuna be ia lalometau badina ruma bese lalonai ta ia mase, unai dainai sinana be heduru ia tahua.

Unai sinana be badina ta dainai ia lalohisihisi. Ruma bese lalonai ta ia mase neganai, natuna be ia lalometau bada! Natudia be tama sina ida idia noho neganai, natudia idia moale, to bema idia lalokau henia tauna ta be ia mase, unai ese lalometau ia havaraia diba. Oi be tama o sina dainai, bema ta be kahirakahira do ia mase eiava ia mase vadaeni, edena dala ai emu natuna oi durua diba?

Momokani, bema emu lalokau tauna ta ia mase, oi lalometau bona oi laloa momo danu. To, emu natuna danu be heduru ia abia be gau badana. America ena tano ta, Minnesota ena hospital ena magasin ta ia gwau: “Natudia be haida amo hereva idauidau idia kamonai dainai, bema ita durudia lasi, lalohadai kereredia idia abia diba.” Ma ia gwau: “Natudia dekenai hereva momokani ita gwauraia be namo.” Unai dainai emu natudia edia diba hegeregerena mase oi herevalaia namonamo be aonega karana. Momokani, unai be auka badina ia vara gauna dekenai natudia edia laloa daladia be idauidau.​​—⁠1 Korinto 13:⁠11.

Mase Gwauraia Hedinarai Dalana

Tahua gaukara idia karaia taudia haida idia gwau, bema tama sina be natuna dekenai mase idia herevalaia, bona inai hereva “ia mahuta noho,” “ia boio vadaeni,” o “gabu ta dekenai ia lao” idia gwauraia, namona be idia gwauraia hedinarai namonamo, natudia idia laloparara totona. Iesu be ena kamonai taudia ia hereva henia neganai, mase be mahuta ida ia hahegeregerea. To, ia be natudia maragidia ia hereva henia lasi. Danu, unai haheitalai ena anina ia gwauraia. Iesu ese ena hahediba taudia ia hamaoroa: “Iseda turana Lasaro be ia mahuta noho.” Ena be Iesu ena hahediba taudia be taunimanima badadia, “to idia laloa ia be laga-ani ena mahuta ia herevalaia.” Unai dainai Iesu ia gwau: “Lasaro be ia mase vadaeni.” (Ioane 11:​11-​14) Bema Iesu ese taunimanima badadia dekenai ena hereva ena anina ia hahedinaraia, vadaeni natudia dekenai unai bamona ita karaia be namo!

Buka torea taudia Mary Ann Emswiler bona James P. Emswiler idia gwau: “Tama sina be edia natuna dekenai mase idia herevalaia neganai, namo lasi natuna hagaria herevadia idia gwauraia, bema unai bamona idia karaia, natudia be lalohadai kererena idia abia bona do idia gari.” Hegeregere, bema natuna ita hamaoroa mase tauna be ia mahuta sibona, vadaeni do ia laloa hanuaboi ai ia mahuta neganai, do ia noga lou lasi. Bema ita hamaoroa mase tauna be “gabu ta dekenai ia lao,” natuna do ia laloa unai tauna ese ia rakatania bona ia be sibona do ia noho.

Tama sina momo idia laloa, natuna dekenai mase idia herevalaia neganai, namona be edia laloparara hegeregerena idia hereva henidia. (1 Korinto 14:⁠9) Tahua gaukara idia karaia taudia idia gwau, namona be emu natuna oi hagoadaia ia henanadai bona ena lalohekwarahi gaudia ia herevalaia totona. Bema hanaihanai natuna ida oi herevahereva, unai ese oi do ia durua emu natuna ese ia daradaralaia gaudia oi hamaoromaoroa bona natuna durua daladia haida do oi dibaia.

Heduru Gauna Ta

Emu natuna ia lalometau neganai, ia ura ia daradaralaia gaudia dekenai ia do oi durua. Mase ena hereva dekenai heduru namona be edeseni amo oi abia diba? Taunimanima momo idia davaria Baibel lalonai hagoadaia hereva namodia idia noho. Baibel ese taunimanima idia mase ena badina, mase taudia dekenai dahaka ia vara, bona mase taudia edia helaro namona ia hahedinaraia. Bema ita gwau “mase taudia be gau ta idia diba lasi,” unai amo natuna do ia laloparara ia mase vadaeni tauna be hisihisi ia davaria noho lasi. (Hadibaia Tauna 9:⁠5) Danu Baibel lalonai, Dirava ia gwau tanobada paradaisona ai iseda lalokau mase taudia do ita hedavari henia lou.​​—⁠Ioane 5:​28, 29.

Bema Baibel amo emu natuna oi durua, do ia itaia Baibel lalonai hakaua hereva bona hagoadaia hereva namodia idia noho. Bona unai bamona oi karaia neganai, emu natuna do ia itaia oi be emu mauri lalonai Baibel ena hakaua herevadia oi laloa bada.​​—⁠Aonega Herevadia 22:6; 2 Timoteo 3:​15.

Oiemu Henanadai Haida Edia Haere

Emu natuna ia lalometau bona oi durua neganai, reana oi be gau haida dekenai do oi daradara. To, dahaka oi karaia be namo?a Mani inai henanadai haida ita herevalaia.

• Egu lalometau be egu natuna amo lau hunia be namo, a? Vaia, tama sina idia ura edia natudia idia gimaia. To emu natuna ese oi ia itaia oi tai be kerere, a? Tama sina momo idia laloa, edia lalohisihisi idia hahedinaraia be namo, bona unai ese natuna dekenai idia hahedinaraia idia lalometau be kerere lasi. Tama sina haida be edia natudia dekenai Baibel ese ia gwauraia taudia haida idia herevalaia, idia haida be idia tai danu. Hegeregere, Iesu ena turana namona Lasaro ia mase neganai, Iesu ia tai. Ia be ena lalohisihisi ia hunia lasi.​​—⁠Ioane 11:⁠35.

• Egu natuna be fineral hom, gara gabuna eiava fineral totona ia lao diba, a? Bema emu natuna do oi abia lao, vadaeni aonega karana be unai gabu dekenai do idia karaia gaudia bona unai hebou ena badina oi hadibaia guna. Oibe, nega haida, tama sina haida be badina namodia haida dainai edia natudia idia hakaua lao lasi unai hebou gabudia dekenai, eiava unai hebou ena kahana haida dekenai idia vareai lasi. Iehova ena Witnes taudia ese idia karaia fineral heboudia dekenai, natudia be Baibel ena hagoadaia hereva namodia amo heduru bada idia abia diba. Danu, unai hebou ai ta ta be “lalokau” idia hahedinaraia dainai, unai ese idia hebou taudia, natuna danu, ia hagoadaia diba.​​—⁠Roma 12:​10, 15; Ioane 13:​34, 35.

• Egu natuna dekenai ia mase tauna lau herevalaia diba, a? Tahua gaukara idia karaia taudia haida idia gwau, bema oi be natudia dekenai ia mase tauna oi herevalaia lasi, emu natuna do ia laloa oi be gau ta oi hunia eiava oi ura lasi unai mase tauna oi herevalaia. Buka torea hahinena Julia Rathkey ia gwau: “Namona be natudia ita durua ia mase tauna idia laloatao bona idia gari lasi totona.” Mase tauna be ena mauri lalonai ia karaia gau namodia bona kara namodia oi herevalaia neganai, unai ese natuna ena lalometau ia hamaragia diba. Witnes tama sina momo be Baibel ena hereva namodia amo natudia idia durua, hegeregere mase taudia be tanobada paradaiso ai do idia toreisi lou bona unuseniai gorere bona mase be lasi.​​—⁠Apokalupo 21:⁠4.

• Egu natuna ia lalometau neganai, edena bamona do lau durua? Emu natuna ia lalometau neganai, reana ia gorere diba. Reana natuna ia badu eiava ia lalohisihisi, badina ia laloa ia be gau ta ia karaia diba lasi. Bema emu natuna ia laloa ia be mai ena kerere, o ia ura oi kahirakahira ia noho, eiava leiti oi ginidae eiava oi gorere dainai ia gari, unai kara dekenai oi hoa lasi. Edena dala ai emu natuna oi durua diba? Namo lasi emu natuna ia laloa ia lalohisihisilaia gauna be oi laloa bada lasi. Namona be ia oi laloa bada bona oi hahedinaraia oi ura ia oi durua. Namo lasi oi laloa ta ena mase ese emu natuna dekenai hekwakwanai ta do ia havaraia lasi. Namona be nega ibounai ia oi durua daladia oi tahua, bona oi hagoadaia ia henanadai bona ia herevahereva totona. “Buka Helaga dekenai idia torea hereva” ese oi bona emu natuna ia hagoadaia diba.​​—⁠Roma 15:⁠4.

• Edena negai ruma bese ida ai karaia hebou gaudia haida ai karaia lou diba? Diba bada taudia idia gwau, namona be ruma bese taudia ese hanaihanai idia karaia hebou gaudia do idia karaia noho. Dina ta ta ai idia karaia hebou gaudia ese idia ia durua diba lalometau idia hanaia totona. Iehova ena Witnes taudia huanai, tama sina momo be hanaihanai ruma bese Baibel stadi idia karaia bona Keristani heboudia dekenai idia lao, unai ese ruma bese ia durua bada.​​—⁠Deuteronomi 6:​4-9; Heberu 10:​24, 25.

Ena be natudia be mase ese ia havaraia dika do idia davaria noho, to daudau lasi Iehova Dirava ese gorere bona mase do ia haorea. (Isaia 25:⁠8) Natudia ita hagoadaia bona durua neganai, idia be edia lalokau tauna ta ena mase ena lalohisihisi idia hanaia diba.

[Footnote]

[Blurb on page 29]

Emu natuna oi hagoadaia ia henanadai bona ena lalohekwarahi gaudia ia herevalaia totona

[Picture on page 30]

Ruma bese Baibel stadi ena sediual umui badinaia noho