Emui Natudia Hadibaia

Nega Haida Oi Mama, A? Iosepa Ena Kakana be Iosepa Dekenai Idia Mama

MAMA ena anina mani ita herevalaia. Nega haida oi mamia ta oi ura henia be auka, badina haida idia gwau ia be tau (o hahine) namona, mai hairaina bona ena aonega be bada, a?a​​—⁠ Unai ia vara diba bema oi be ta dekenai oi mama.

Ruma bese lalonai mama ia vara diba, bema tama sina be edia natudia haida amo tamona idia ura henia. Baibel be ruma bese ta lalonai mama karana ese ia havaraia dika ia herevalaia. Unai kara ese ia havaraia dika bona ia amo ita dibaia gauna mani ita herevalaia.

Iosepa be Iakobo ena natuna ta, bona Iosepa ena kakana be ia dekenai idia mama. Oi diba dahaka dainai idia mama, a?​​—⁠ Badina edia tamana, Iakobo ese Iosepa ia ura henia bada. Hegeregere, Iakobo ese Iosepa totona kouti dabua latana ta mai hairaina ia karaia. Iakobo ese Iosepa “ia lalokau henia bada, badina ia be tau buruka neganai ia havaraia,” bona ia be Rahela, ia lalokau henia bada hahinena ena natuna ginigunana.

Baibel ia gwau, ‘Iosepa ena kakana idia itaia, edia tamana be Iosepa dekenai ia lalokau henia bada, vadaeni idia badu henia Iosepa dekenai.’ Dina ta, Iosepa be ena ruma bese taudia ia hamaoroa, iena nihi ta lalonai idia ibounai bona ena tamana, be iena vairanai idia tui diho. Baibel ia gwau, “iena kakana taudia be idia badu dikadika mai mama danu,” bona unai nihi dainai Iosepa be ena tamana ese ia gwau henia.​—⁠Genese 37:​1-​11.

Dina haida murinai, Iosepa ena mauri lagani be 17 neganai, iena kakadia be daudau gabuna ai edia ruma bese ena mamoe bona nanigosi idia naria. Unai dainai Iakobo be Iosepa ia siaia idia ia itaia totona. Iosepa ena kakadia be daudau amo ia idia itaia neganai, oi laloa haida be idia ura dahaka idia karaia?​—⁠ Idia ura ia idia alaia! To Rubena bona Iuda be idia ura lasi.

Hoihoi taudia haida be Aigupito idia lao henia lalonai, Iuda ia gwau: ‘Ita hoihoilaia.’ Bona unai bamona idia karaia. Bena nani ena natuna ta idia alaia bona ena rarana lalonai Iosepa ena kouti dabua idia atoa. Gabeai, edia tamana dekenai unai kouti dabua idia hahedinaraia neganai, edia tamana ia tai bona ia gwau: ‘Reana uda boroma ta ese ia koria mase vadaeni!’​—⁠Genese 37:​12-​36.

Gabeai, Iosepa be Aigupito ena king, Farao ese ia ura henia. Badina be Dirava ese Iosepa ia durua Farao ena nihi rua edia anina ia gwauraia hedinarai totona. Ena nihi ginigunana lalonai, ia ese kopina bada boromakau seven bona kopina maragi boromakau seven ia itaia. Ena nihi iharuana lalonai, ia ese uiti anina namodia seven bona uiti anina maragidia seven ia itaia. Iosepa ia gwau, unai nihi ruaosi edia anina be lagani seven lalonai aniani do idia momo herea, bona ma lagani seven lalonai hitolo bada do ia vara. Unai dainai, Farao be Iosepa ia abia hidi, aniani gogoa bona haboua gaukarana ia naria totona, unai amo hitolo bada neganai idia be mai edia aniani momo.

Hitolo bada negana ia ginidae neganai, Iosepa ena ruma bese taudia be gabu daudau ai idia noho bona edia aniani be bada lasi. Unai dainai, Iakobo ese Iosepa ena kakana 10 ia siaia Aigupito dekenai aniani idia hoia totona. Idia be Iosepa ena vairanai idia gini, to idia diba lasi unai be Iosepa. Iosepa be idia ia hadibaia lasi ia be daika, to ia tohodia, bona ia diba idia be ia dekenai idia karaia kara dikana dainai idia lalohisihisi. Bena idia ia hadibaia ia be Iosepa. Vadaeni idia ia rosia bona idia moale hebou!​—⁠Genese karoa 40 ia lao karoa 45.

Baibel ena sivarai amo mama karana dekenai dahaka oi dibaia?​​—⁠ Mama karana ese dika ia havaraia bona unai kara dainai ta do ia ura ena tadikaka ena lalona ia hahisia! Mani Kara 5:​17, 18 bona Kara 7:​54-​59 ita duahia bona do ita itaia, mama dainai taunimanima idia ura Iesu ena aposetolo taudia dekenai kara ta idia karaia.​​—⁠ Unai siri oi duahia murinai, namona be oi itaia dahaka dainai mama karana dekenai ita naria namonamo?​—⁠

Iosepa ena mauri lagani be 110. Ia ese ena natuna ia havaraia, bona ena natuna ese edia natudia idia havaraia, bona unai natudia ese natudia idia havaraia danu. Ita diba Iosepa be nega momo ena natuna bona tubuna ia hadibaia, mama karana idia dadaraia bona idia lalokau heheni be gau badana.​​—⁠Genese 50:​22, 23, 26.

[Footnote]

Henanadai:

○ Mama ena anina be dahaka?

○ Iosepa ena kakana be idia mama dainai, dahaka idia karaia?

○ Dahaka dainai Iosepa be ena kakana edia dika ia gwauatao?

○ Inai sivarai amo dahaka ita diba?