Tamana Namona Ena Maduna Ia Huaia Dalana

“Tamana bona sinana, emui natudia do umui habadua kava lasi, do idia hesiku garina.”​—⁠Kolose 3:​21.

EDENA dala ai tamana ese ena natuna do ia habadua lasi? Gau badana be tamana ia laloparara, iena maduna be mai anina bada. Magasin ta ia gwau: “Tamana ena maduna be bada bona mai ena hekwarahi​​—⁠bema tamana ese ena maduna ia huaia namonamo, natudia be taunimanima namodia ai do idia lao; to bema iena maduna ia huaia namonamo lasi, natudia be do idia hekwarahi taunimanima namodia ai idia lao totona.”

Tamana ena maduna be dahaka? Ruma bese momo idia gwau, tamana ena maduna be matahakani ia henia. Nega momo sinana be kamonai lasi natuna dekenai do ia gwau: ‘Oi naria! Tamana ia mai neganai hisihisi do oi ania!’ Oibe, natudia ese matahakani maorona idia abia bona hereva idia kamonai neganai, taunimanima namodia ai do idia lao. To, tamana namona ese gau ma haida ia karaia be namo.

Madi, tama haida ese haheitalai namona idia hahedinaraia be auka. Badina idia haida be tamana lasi, to sinana ese idia naria ela bona idia bada. To ma haida edia tamadia be kara auka taudia dainai, idia danu be edia natudia idia kara auka henidia. Edena dala ai unai bamona tamana ese unai kara idia dadaraia bona edia maduna idia huaia namonamo diba?

Buka ta ena sisiba namodia ese tamana ia durua diba, ena maduna ia huaia namonamo totona. Baibel lalonai be ruma bese durua herevadia idia noho. Iena sisiba bona hakaua herevadia be hanaihanai ita idia durua. Baibel ena sisiba ese Iehova​​—⁠Baibel Biaguna bona ruma bese maurina ia Havaraia Tauna​​—⁠ena aonega ia hahedinaraia. (Efeso 3:​14, 15) Tamana e, Baibel ena hereva oi tahua, unai ese oi do ia durua emu maduna oi huanai namonamo totona.a

Tamana namona ena maduna badadia haida be inai: Natudia edia tauanina durua gaudia ia henia, edia hemami ia laloa bada, bona ia durudia Dirava idia tura henia totona. Tamana idia hetura henia namonamo natudia be Dirava idia lalokau henia bona tura henia. Baibel ese ia hahedinaraia, Iehova be eda Havaraia Tauna bona eda Tamana. (Isaia 64:⁠8) Hari, gau siks ita herevalaia be namo. Unai gau siks amo do ita itaia edena dala ai Baibel ena hakaua herevadia ese tamana ta ia durua diba natuna dekenai unai gau siks ia hahedinaraia totona.

1 Lalokau

Iseda Tamana Iehova be haheitalai namona. Ia ese ena vara guna Natuna, Iesu, ia laloa dalana be Baibel ese inai bamona ia herevalaia: “Tamana ese iena Natuna ia lalokau henia.” (Ioane 3:​35; Kolose 1:​15) Momokani, Iehova be ena Natuna ia lalokau henia bona ia lalonamo henia. Iesu ia bapatiso neganai, Iehova be guba amo ia gwau: “Oi be lauegu Natuna, lauegu lalokau, lau be lau moale oi dekenai.” (Luka 3:​22) Iesu ia diba ia be ena Tamana ese ia lalokau henia. Dirava ena haheitalai amo dahaka oi dibaia?

Namona be emu natudia oi hamaoroa, idia oi lalokau henia. Kelvin, (ena natuna be 5) ia gwau: “Hanaihanai lau hahedinaraia egu natudia lau lalokau henidia, hegeregere, idia lau hamaorodia idia lau lalokau henia, bona danu, lau hahedinaraia idia ta ta lau laloa bada. Lau hadigudia bona edia napi lau senisia.” Danu, emu natudia idia ura idia diba idia oi lalonamo henia eiava lasi. Unai dainai, idia oi gwau henia momo be namo lasi. To, oi tanikiu henidia o hanamodia. Donizete, (ena natuna ta ena mauri lagani 14 bona ma ta be 16) ia gwau, “Namona be tamana be dala ia tahua ena natuna ia tanikiu henia o hanamoa totona.” Bema emu natudia idia diba oi be edia kara dekenai oi moale, unai ese idia do ia durua lalohadai maorona idia abia bona Dirava kahirakahira idia lao totona.

2 Haheitalai Namona

Ioane 5:19 ia gwau, Iesu ese “iena Tamana ena kara ia itaia noho, vadaeni unai kara sibona ia karaia.” Mani oi laloa: Iesu be ena “Tamana ena kara ia itaia” bona ia tohotohoa. Nega momo natudia be unai bamona do idia karaia. Hegeregere, bema tamana ese ena adavana ia matauraia bona kara namo henia, reana edia natuna memerodia be unai bamona do idia karaia danu. Memero sibona lasi, to kekeni danu be edia tamana ena haheitalai namona ese do ia durua diba tatau idia matauraia totona.

Emu natudia ese sori herevana idia gwauraia be ia auka, a? Tamana ese unai ia haheitalaia be gau badana. Kelvin ia gwau, nega ta ena natuna memerodia ruaosi be dava bada kamera ta idia hadikaia. Kelvin ia badu dainai, teibolo ia botaia bona ia parara. Gabeai, Kelvin ia laloa ia karaia karana be maoro lasi dainai, ibounai​​—⁠adavana danu​​—⁠ia sori henia. Kelvin ia gwau, ena natudia be unai idia tohotohoa; kerere idia karaia neganai, sori herevana idia gwauraia.

3 Moale

Iehova be “moale Diravana.” (1 Timoteo 1:​11, NW ) Unai dainai, ena Natuna, Iesu ia ura dikadika ena Tamana kahirakahira ia noho. Aonega Herevadia 8:​30 ese Iesu bona ena Tamana edia hetura karana be inai bamona ia gwauraia: “Lau be Dirava [eiava, Tamana] ena badibadinai lau noho, gaukara karaia tauna bamona. . . . Lau be iena vairana dekenai, lau moale noho nega ibounai.” Tamana bona Natuna idia hetura namo herea, ani?

Ruma bese lalonai natudia idia moale be namo. Bema nega oi atoa emu natuna ida oi gadara hebou totona, idia be do idia moale, bona oi do idia hetura henia namonamo. Felix, (ena natuna be ia do maragi) be unai hereva ia abia dae. Ia gwau: “Nega lau atoa egu natuna ida moale karadia haida ai karaia hebou dainai, ia be egu turana namona. Ai gadara hebou, turadia ai bamodia, bona gabu namodia haida ai vadivadi henia. Unai ese emai ruma bese lalonai moale ia havaraia.”

4 Dirava Dibaia Bona Hesiai Henia

Iesu be ena Tamana ese ia hadibaia. Unai dainai, Iesu ia gwau: “Ia [Tamana] dekena amo lau abia herevadia be taunimanima dekenai lau hamaoroa.” (Ioane 8:⁠26) Dirava vairanai, tamana ena maduna be, ena natudia ia durua kara namodia bona Dirava idia dibaia totona. Tamana e, emu natudia oi durua hakaua hereva maorodia idia laloatao totona. Emu natudia idia do maragi lalonai, unai bamona oi hadibaia be namo. (2 Timoteo 3:​14, 15) Felix ena natuna merona ia beibi neganai, Baibel sivaraidia be ena natuna dekenai ia duahia matamaia. Nega momo Felix be lalona veria bukadia, hegeregere Lauegu Baibel Sivarai Bukanab ia gaukaralaia. To, iena natuna ia bada neganai, Felix be Baibel idia herevalaia bukadia ma haida amo ena natuna ia durua bona hadibaia.

Donizete ia gwau: “Ruma bese ida Baibel ai herevalaia hebou be ia auka. Gau badana be tama sina ese idia hahedinaraia idia be Dirava tura henia karana idia laloa bada. Badina bema tama sina ese unai bamona idia karaia lasi, edia natudia be unai idia itaia diba.” Carlos, (ena natuna memero be toi) ia gwau: “Wiki ta ta ai egu ruma bese ida hebou ta ai karaia. Ta ta be gau ta idia abia hidi, unai hebou dekenai ai kikilaia totona.” Kelvin be nega ibounai natudia dekenai Dirava ena sivarai ia kikilaia, herevana edeseniai idia noho o dahaka idia karaia. Unai be Mose ena hereva bamona: “Inai Taravatu, hari dina umui dekenai lau henia gaudia do umui laloaboio lasi. Umui emui natudia dekenai inai Taravatu do umui hadibaia goada, ruma dekenai umui noho neganai, bona dala dekenai umui raka neganai. Bona umui hekure noho, o umui gaukara noho neganai, inai Taravatudia do umui herevalaia.”​​—⁠Deuteronomi 6:​6, 7.

5 Matahakani

Natudia ese matahakani idia abia be namo, unai amo idia bada neganai, taunimanima namodia ai idia lao diba. Tama sina haida idia laloa, matahakani ena anina be natuna idia kara auka henia, gwau henidia o hagaridia. To, Baibel ese matahakani be unai bamona ia herevalaia lasi. To ia gwau, tamana be mai lalokau ida ena natudia ia matahakani henia be namo, Iehova ia karaia bamona. (Heberu 12:​4-​11) Baibel ia gwau: “Tamana . . . e, emui natudia do umui habadua lasi, to Lohiabada ena hadibaia hereva idia dekenai do umui hadibaia.”​​—⁠Efeso 6:⁠4.

Nega haida, natuna ese kerere ia karaia neganai, tamana ese ia panisia be maoro. To, namona be natuna ia laloparara dahaka dainai panisi ia abia, bona namona be natuna ia itaia ena tamana be ia ia lalokau henia dainai, panisi ia henia. To, natuna botaia dikadika karana bona ta ese ena badu ia biagua lasi karana be Baibel ese ia taravatua. (Aonega Herevadia 16:⁠32) Kelvin ia gwau, “Natuna be kerere badadia haida dainai matahakani lau henia neganai, hanaihanai lau hahedinaraia ia lau lalokau henia dainai matahakani lau henia.”

6 Gimaia

Namona be natudia ita gimadia namonamo, turana dikadia edia laloani o gau ma haida ese idia hadikaia garina. Inai tanobada ai, taunimanima dikadia idia ura natu maragidia idia hadikaia. (2 Timoteo 3:​1-5, 13) Edena dala ai emu natudia oi gimaia diba? Baibel ena sisiba namona be inai: “Aonega tauna ese dika ia itaia noho, bona unai dika dekena amo ia raka siri, to aonega lasi tauna, be unai dika dekenai do ia raka lao, bona gabeai hisihisi do ia davaria.” (Aonega Herevadia 22:⁠3) Natudia oi gimaia bona hekwakwanai idia davaria lasi totona, namona be natuna idia hadikaia diba gaudia oi diba. Unai oi diba neganai, dala oi tahua natudia oi gimaia totona. Hegeregere, bema natuna dekenai gwaumaoro oi henia Internet ia gaukaralaia totona, namona be ia dekenai Internet gaukaralaia dalana maorona oi hadibaia. Danu, kompiuta be gabu maorona ta dekenai oi atoa, unai amo natuna ese kompiuta ia gaukaralaia neganai oi itaia diba.

Inai tanobada ai natuna sihari henia kava taudia momo idia noho dainai, namona be tamana ese ena natuna ia hegaegaelaia bona hadibaia unai dika taudia idia dadaraia totona. Bema oi noho lasi lalonai, idau tauna ta ia ura emu natuna ia hadikaia, emu natuna ia diba dahaka ia karaia be maoro, a?c Namona be emu natudia idia diba edia tauanina ena kahana (usina o kiona o ratana) gaukaralaia dalana maorona be dahaka bona dahaka dala be taravatu. Kelvin ia gwau: “Lau ura lasi tisa o ma haida be egu natuna dekenai unai gaudia idia hadibaia. Lau laloa ia be egu maduna, natudia dekenai seks ena anina lau hadibaia bona matabodaga taudia amo idia lau gimaia totona.” Kalvin ena natudia ibounai be idia bada vadaeni, idia headava bona idia moale.

Dirava Ena Heduru Tahua

Tamana ese natudia dekenai ia henia diba harihari gauna hereadaena be inai: Iena natudia ia durua Iehova idia tura henia noho totona. To tamana ese haheitalai ia hahedinaraia be gau badana. Donizete ia gwau: “Tamana ese Dirava tura henia karana ia laloa bada be namo. Hekwakwanai o metau idia vara neganai, namona be tamana ese ia hahedinaraia ia be Iehova ia abidadama henia. Tama ena guriguri lalonai Dirava ena kara namodia ia gwauraia loulou neganai, unai ese natudia do ia hadibaia Iehova tura henia karana be mai anina bada.”

Edena dala ai tamana ese ena gaukara ia karaia namonamo diba? Iehova Dirava ena sisiba o heduru ia tahua be namo, badina Iehova be natudia naria dalana ia diba momo. Bema emu natudia be Dirava ena Hereva hegeregerena oi hadibaia, Aonega Herevadia 22:6 ena anina do ia guguru, ia gwau: “Vadaeni ia buruka neganai, unai dala do ia rakatania lasi.”

[Footnotes]

[Picture on page 27]

Emu natuna dekenai haheitalai namona oi hahedinaraia

[Picture on page 28]

Emu natuna oi durua Dirava ia dibaia bona ia hesiai henia totona

[Picture on page 29]

Mai lalokau ida emu natuna oi matahakani henia