Oi Ai Welkam Henia
REANA oi be Iehova ena Witnes taudia edia tomadiho rumana (idia gwauraia Kingdom Hall) oi itaia neganai, oi laloa unuseniai be dahaka idia karaia. Pablik be unai hebou ta ta dekenai idia lao diba. Vadivadi taudia be ai welkam henidia.
To, reana sibona do oi nanadaia. Dahaka dainai Iehova ena Witnes taudia idia hebou? Unai hebou ta ta dekenai dahaka idia karaia? Bona Iehova ena Witnes lasi taudia ese unai hebou be edena bamona idia laloa?
“Taunimanima Ibounai Do Umui Haboua”
Idaunega amo ema bona hari, taunimanima be idia hebou Dirava idia tomadiho henia bona idia dibaia totona. Lagani 3,500 gunanai, Mose be Israela taudia ia hamaoroa: “Taunimanima ibounai do umui haboua, tau bona hahine, memero bona kekeni, bona idau taudia, emui hanua dekenai idia noho danu. Vadaeni do idia kamonai, edia lalona be do idia kehoa, bona Lohiabada emui Dirava do idia gari henia. Bona inai Taravatu ena hereva ibounai do idia badinaia, bona edia kara do idia karaia.” (Deuteronomi 31:12) Unai dainai, Israela ai, taunimanima badadia bona natudia be Iehova Dirava tomadiho henia bona badinaia karana idia dibaia.
Lagani 1,500 bamona murinai, Keristani kongrigeisen idia haginia, bona unai nega amo taunimanima idia hebou karana be tomadiho momokanina ena kahana badana ta ai ia lao. Aposetolo Paulo ia gwau: “Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi, haida ese idia hadokoa bamona. To umui ta ta emui Keristani varavara taudia edia lalona do umui hagoadaia, oibe, inai kara do umui habadaia be namo.” (Heberu 10:24, 25) Ruma bese taudia ese gaukara idia karaia hebou amo edia hebamo karana ia goada, unai hegeregerena bema Dirava idia hesiai henia taudia be edia Keristani taudia ida idia hebamo, unai ese idia ia hagoadaia bada.
Iehova ena Witnes taudia be Baibel ena hereva idia badinaia dainai, idia momo be wiki ta lalonai nega rua edia Kingdom Hall ai idia hebou. Unai hebou dekenai idia lao taudia ia durua Baibel ena hereva idia laloa bada, idia lalopararalaia, bona idia badinaia totona. Tanobada hegegemadai, idia ibounai be program tamona idia badinaia, bona hebou ta ta be mai anina bada. Hebou ia do matamaia lasi bona ia doko murinai, idia hedavari bona edia herevahereva karana amo ta ta idia hagoadaia. (Roma 1:12) Unai hebou ta ta dekenai dahaka idia karaia?
Pablik Tok
Taunimanima momo ese idia lao henia hebou ginigunana be Baibel ena hereva badadia idia gwauraia, unai hebou ai gwauraia Pablik Tok ena hebou badina ia be pablik totona. Unai hebou be wikeni ai idia karaia. Nega momo Iesu Keriso be Baibel ia gaukaralaia pablik dekenai ia haroro totona—ena haroro hereva badana ta be Olive Ororona ai ia henia herevana. (Mataio 5:1; 7:28, 29) Bona aposetolo Paulo be Atena taudia ia hereva henia. (Kara 17:22-34) Iesu bona Paulo idia karaia bamona, Iehova ena Witnes taudia ese unai hebou idia karaia dalana be pablik totona, bona haida be nega ginigunana unai hebou dekenai idia lao.
Unai hebou idia hamatamaia totona, Ane amo Iehova Hanamoa bukana amo ane ta idia abia.a Bema ia hegeregere, oi gini diba bona ane oi abia danu. Guriguri kwadogina murinai, ia manada vadaeni hereva henia tauna ta be miniti 30 lalonai Baibel amo hereva ta ia henia. (Maua ladana “Pablik Tok Ena Hebou” itaia.) Baibel amo ena hereva do ia henia. Nega momo hereva henia tauna ese helai taudia ia noia edia Baibel amo siri idia kehoa totona, bona siri ta ia duahia neganai, helai taudia be edia Baibel amo idia itaia bona idia badinaia. Unai dainai, emu Baibel oi mailaia diba, o hebou ia do hamatamaia lasi neganai, Baibel ta totona Iehova ena Witnes tauna ta oi nanadaia diba.
Gima Kohorona Stadi
Iehova ena Witnes taudia edia kongrigeisen momo lalonai, Pablik Tok ena hebou murinai Gima Kohorona Stadi idia karaia, unai be hora tamona lalonai henanadai bona haere amo Baibel idia herevalaia. Unai hebou ese idia ia hagoadaia Paulo ena negai idia noho Berea taudia bamona idia karaia, Berea taudia be “Paulo ena hereva idia kamonai, bona idia ura henia danu. Dina ibounai Buka Helaga idia tahua.”—Kara 17:11.
Gima Kohorona Stadi be ane amo idia hamatamaia. Unai hebou ai idia herevalaia gaudia bona hebou ia naria tauna ese ia henia henanadai be Gima Kohorona magasin lalonai idia noho. Iehova ena Witnes tauna ta amo stadi Gima Kohorona magasin ta oi abia diba. Wiki gunadia ai idia herevalaia gaudia haida be inai: “Tama Sina E—Mai Lalokau ida Emui Natudia Umui Hadibaia,” “Ta Ena Kara Dika Davana Umui Henia Lasi,” bona “Hisihisi Ibounai Kahirakahira Do Idia Ore Ena Badina.” Henanadai bona haere dalanai unai hebou idia karaia dainai, helai taudia be idia haere diba bona haere idia henia taudia be Gima Kohorona magasin idia stadilaia namonamo guna be namo. Unai hebou be ane bona guriguri amo idia koua.—Mataio 26:30; Efeso 5:19.
Kongrigeisen Baibel Stadi
Wiki ta ta ai, Iehova ena Witnes taudia be Kingdom Hall ai hebou ta mai ena kahana toi idia karaia, bona unai hebou toiosi be hora tamona bona miniti 45 lalonai idia abia. Kahana ginigunana be, Kongrigeisen Baibel Stadi, unai be miniti 25 lalonai idia karaia. Hebou dekenai idia lao taudia ia durua Baibel idia dibaia namonamo, edia kara bona lalohadai idia hamaoromaoroa, bona Keriso ena hahediba taudia namodia ai idia lao totona. (2 Timoteo 3:16, 17) Unai hebou be Gima Kohorona Stadi bamona, henanadai bona haere amo Baibel idia herevalaia. Helai taudia be idia haere diba. Unai hebou ai idia be Iehova ena Witnes taudia ese idia karaia buka eiava buklet ta idia stadilaia.
Dahaka dainai Baibel idia herevalaia buka eiava buklet ta idia stadilaia? Guna Baibel idia torea neganai, Dirava ena Hereva duahia karana sibona be hegeregere lasi. “Idia ese taunimanima idia durua, bona Taravatu ena hereva ibounai ena anina idia hedinaraia namonamo.” (Nehemia 8:8) Lagani haida idia hanaia vadaeni, Isaia, Daniela, bona Apokalupo idia herevalaia bukadia idia stadilaia dainai, momo idia durua unai Baibel bukadia idia lalopararalaia totona.
Tiokratik Haroro Sikuli
Kongrigeisen Baibel Stadi murinai be Tiokratik Haroro Sikuli. Unai miniti 30 kahana ese Keristani taudia ia durua edia ‘hadibaia dalana’ idia hanamoa totona. (2 Timoteo 4:2, NW ) Hegeregere, nega ta emu natuna eiava emu turana ta be Dirava o Baibel totona henanadai ta ia henia bona haere namona ta oi henia diba lasi, a? Tiokratik Haroro Sikuli ese oi do ia hadibaia henanadai aukadia be Baibel amo oi haerelaia totona. Unai dala amo, ita be peroveta tauna Isaia ena hereva hegeregerena, ita gwau diba: “Lohiabada Dirava ese, dahaka do lau hereva gauna ia hadibaia lau dekenai, vadaeni unai dainai lau ese manoka taudia lau hagoadaia diba.”—Isaia 50:4.
Tiokratik Haroro Sikuli ia matamaia neganai, ta be Baibel ena kahana ta ia herevalaia, bona kamonai taudia ia hagoadaia unai wiki lalonai unai Baibel ena kahana idia duahia. Hereva henia tauna ese helai taudia do ia noia edia Baibel duahiduahi amo idia dibaia gaudia idia herevalaia totona. Unai hereva murinai, unai sikuli ena stiuden taudia be platfom dekenai edia kahana idia karaia.
Sikuli dekenai kahana idia abia taudia be platfom ai Baibel ena kahana ta idia duahia o idia hahedinaraia edena dala ai Baibel ena hereva be ma ta dekenai idia hadibaia namonamo diba. Hereva ta ta murinai, sisiba henia tauna be Tiokratik Haroro Sikuli amo Heduru Oi Abia bukana amo stiuden tauna ese ia karaia kaha namona ia hanamoa. Unai hebou murinai, unai sikuli ia naria tauna eiava ia manada sisiba henia tauna be stiuden tauna sibona ida hanamoa gaudia haida idia herevalaia diba.
Unai hebou ese sikuli dekenai kahana ia abia tauna bona helai taudia ia durua edia duahiduahi, hereva dalana, bona hadibaia dalana idia hanamoa totona. Tiokratik Haroro Sikuli ena hebou murinai, ane ta idia abia bona unai ane be Baibel ena kahana ta ia herevalaia, bona ane murinai Hesiai Hebou idia hamatamaia.
Hesiai Hebou
Kahana dokona be Hesiai Hebou. Tok, haheitalai, inteviu, bona helai taudia ida kiki karana amo hebou dekenai idia mai taudia ia durua Baibel be taunimanima dekenai idia hadibaia namonamo totona. Iesu ese haroro totona ena hahediba taudia ia do siaia lasi neganai, idia ia haboua bona idia dekenai haroro dalana ia hadibaia. (Luka 10:1-16) Iena hahediba taudia be haroro totona idia hegaegae namonamo dainai, ekspiriens namodia momo idia davaria. Gabeai, hahediba taudia be Iesu dekenai edia haroro ripoti idia gwauraia. (Luka 10:17) Nega momo unai hahediba taudia be sibona ta ta dekenai unai sivarai namodia idia gwauraia.—Kara 4:23; 15:4.
Hesiai Hebou ena miniti 35 program ena sediual be Iseda Basileia Gaukara pepana ai ia noho. Wiki gunadia ai idia herevalaia gaudia haida be inai: “Ruma Bese ida Iehova Tomadiho Henia,” “Ita Giroa Loulou Ena Badina,” bona “Haroro Gaukara Lalonai Keriso Tohotohoa.” Unai hebou be ane ta amo idia koua, bona kongrigeisen ai idia makaia tauna ta ese hebou koua gurigurina ia gwauraia.
Vadivadi Taudia Idia Herevalaia Gaudia
Kongrigeisen taudia ibounai idia ura taunimanima ibounai idia welkam henia. Hegeregere, Andrew be Iehova ena Witnes taudia idia hadikaia herevadia momo ia kamonai. To, nega ginigunana hebou dekenai ia lao neganai, unai hebou ai idia noho taudia ese ia idia welkam henia. Andrew ia gwau, “Lau moale badina unai gabu dekenai lau lao. Edia kara namodia lau ura henia bada bona idia ura bada lau idia hereva henia.” Ashel, Canada amo, ena mauri lagani be 17 kekeni matamata ta, ia gwau: “Unai hebou be namo herea! Hereva henia tauna ena hereva lau kamonai namonamo diba.”
José, Brazil ai ia noho tauna, be badu momo bona dagedage tauna. To, Iehova ena Witnes taudia ese hebou totona ia idia boiria Kingdom Hall dekenai ia lao. José ia gwau, “Ena be Kingdom Hall dekenai idia lao taudia be guna lau karaia kerere idia diba, to lau idia welkam henia.” Atsushi, Japan ai ia noho tauna, ia gwau: “Egu nega ginigunana Iehova ena Witnes taudia ida lau hebou neganai, lau gari. Ena be unai bamona lau mamia, to lau laloparara Iehova ena Witnes taudia be ma haida amo idia idau lasi. Lau idia kara namo henia dainai lau moale.”
Oi Ai Welkam Henia
Ataiai idia noho herevadia ese idia hahedinaraia Kingdom Hall dekenai idia karaia hebou dekenai oi lao neganai, do oi moale. Unai gabu ai Dirava bona Baibel amo hadibaia hereva namodia do oi dibaia, bona Iehova Dirava be emu “namo habadaia dalana” oi dekenai do ia hadibaia.—Isaia 48:17.
Iehova ena Witnes taudia edia hebou ai moni idia gogoa lasi. Oi noho gabuna ai, oi ura hebou totona Kingdom Hall dekenai oi lao, a? Oi ai welkam henia unai bamona oi karaia totona.
[Footnote]
a Inai atikol dekenai ai gwauraia buka ibounai be Iehova ena Witnes taudia ese idia karaia.
[Box on page 15]
Pablik Tok Ena Hebou
Pablik Tok idauidau 170 mai kahana edia sinado be Baibel amo idia abia, idia haida be inai:
◼ Taunimanima Idia Vara Dalana—Oi Abia Dae Herevana be mai Anina Bada, A?
◼ Dirava Ena Lalohadai Mahuta Hebou Karana Bona Headava Dekenai
◼ Dirava ese Tanobada Idia Hadikaia Taudia Edia Davana Do Ia Henia
◼ Mauri Ena Lalo-Hekwarahi Oi Haheaukalaia Diba Dalana
◼ Mauri be Inai Sibona, A?
[Picture on page 15]
Pablik Tok
[Picture on page 15]
“Gima Kohorona” Stadi
[Pictures on page 16]
Kongrigeisen Baibel Stadi
[Picture on page 16]
Tiokratik Haroro Sikuli
[Picture on page 17]
Hesiai Hebou