Vara Lou Karana​​—⁠Dahaka Namo Ia Mailaia?

DAHAKA dainai Iesu be lauma helaga amo bapatiso karana ia gwauraia neganai ia gwau, “Lauma Helaga dekena amo . . . ia vara”? (Ioane 3:⁠5) Unai hereva “vara” be laulau dalanai idia gaukaralaia neganai, ena anina be “hamatamaia.” Unai dainai, laulau dalanai “vara” bona “vara lou” edia anina be, lauma helaga amo bapatiso idia abia taudia be Dirava ida hetura karana matamatana idia hamatamaia unai. Edena dala ai unai hetura karana matamatana ia vara?

Aposetolo Paulo be Dirava ese taunimanima ia abia hidi guba dekenai do idia lohia karana ia herevalaia neganai, ruma bese ena haheitalai ta ia gwauraia. Iena negai idia noho Keristani taudia ia tore henidia neganai ia gwau, idia be “Dirava ena natuna korikori” ai do idia lao, unai dainai Dirava ese idia “ia kara henia, iena natuna korikori dekenai ia kara henia hegeregerena.” (Galatia 4:5; Heberu 12:⁠7) Tau ta be lauma helaga amo ia bapatiso neganai, Dirava ese unai tau be ena natuna ai ia halaoa bona ena noho dalana ia idau danu. Unai ita lalopararalaia namonamo totona, idau hanua merona ena haheitalai mani ita laloa lou.

Natuna ai Ia Halaoa Karana ese Ena Noho Dalana Ia Haidaua

Unai haheitalai lalonai, unai mero be unai hanua merona lasi dainai, unai sikuli dekenai ia vareai diba lasi. To, mani oi laloa, dina ta gau idauna ta ia vara. Unai hanua tauna ta ese gavamani ena taravatu hegeregerena ai, unai mero be ena natuna ai ia halaoa. Unai ese mero ena noho dalana ia haidaua momokani, ani? Oibe, hari tama ese ena natuna ai ia halaoa dainai, unai mero be unai hanua amo idia mai natudia ese idia abia hahenamo idauidau ia abia diba​—⁠hegeregere ia be unai sikuli dekenai ia vareai diba. Unai tama ese unai mero be iena natuna ai ia halaoa dainai, mero be hahenamo idauidau ia abia diba.

Unai haheitalai ese idia vara lou taudia edia noho dalana ena idau karana ia haheitalaia namonamo. Idia hegeregere gaudia haida mani ita laloa. Unai mero be sikuli dekenai do idia abia vareai diba bema ia be sikuli ai ia vareai dalana ia hagugurua​—⁠unai hanua merona ta ai ia lao be namo. To, ia sibona ese unai ia hagugurua diba lasi. Unai hegeregerena, taunimanima haida be Dirava ena Basileia o guba gavamani lalonai do idia vareai diba, to namona be guba lao dalana idia hagugurua guna​—⁠idia “vara lou” be namo. To, idia sibodia ese unai idia karaia diba lasi, badina vara lou karana be Dirava ese ia havaraia gauna.

Edena dala ai unai idau hanua merona ena noho dalana ia idau? Gavamani ena taravatu hegeregerena ai, unai hanua tauna ta ese unai mero be ena natuna ai ia halaoa. Ena be unai ese mero ena kara ia haidaua lasi, to ena noho dalana ia idau. Ia be noho dalana matamatana ia hamatamaia​—⁠ia vara lou bamona. Ia be unai tauna ena natuna ai ia lao dainai, ia be mai ena maoro unai sikuli dekenai ia lao bona iena ubua tamana ena ruma bese taudia ida ia noho hebou diba.

Unai hegeregerena, Iehova ese goevadae lasi taudia be taravatu hegeregerena ai ena natudia ai ia halaoa neganai, edia noho dalana ia haidaua danu. Aposetolo Paulo be unai orea tauna ta, bona iena tadikaka ia tore henidia ia gwau: “Dirava ese umui ia henia Laumana ese Dirava ena natuna umui ia halaoa vadaeni. Unai dainai Lauma ena siahu dekena amo, Dirava dekenai ita hereva henia neganai, ‘Tamagu e, lauegu Tamana lalokau e!’ ita gwauraia diba. Dirava ena Lauma, bona iseda lauma danu idia hereva hebou, idia gwauraia, ita be Dirava ena natuna.” (Roma 8:​15, 16) Oibe, Dirava ese unai Keristani taudia be iena natudia ai ia halaodia dainai, Ia be edia Tamana.​​—⁠1 Ioane 3:1; 2 Korinto 6:​18.

Oibe, Dirava ese idia be iena natuna ai ia halaodia neganai, edia kara ia haidaua lasi​—⁠idia be do goevadae lasi taudia. (1 Ioane 1:⁠8) To, Paulo ia hereva bamona, Dirava ese ena natuna ai ia halaodia neganai, idia vara lou unai. Ma danu, Dirava ena lauma helaga ese ia hadibadia dainai, idia diba momokani idia be Keriso ida guba dekenai do idia noho. (1 Ioane 3:⁠2) Ita gwau diba lauma helaga ese idia dekenai noho dalana matamatana ia henia. (2 Korinto 1:​21, 22) Oibe, idia vara lou unai.

Baibel be Dirava ena natudia ia herevalaia neganai, ia gwau: “Idia be Dirava bona Keriso edia hahelagaia taudia. Bona lagani 1000 lalonai Keriso danu do idia lohia.” (Apokalupo 20:⁠6) Dirava ese iena natuna ai ia halaoa taudia be king ai do idia lao bona Keriso ida Dirava ena Basileia o guba gavamani lalonai do idia lohia. Aposetolo Petero ese iena tadikaka ia hamaoroa idia be “mauri ia noho hanaihanai, ia be goevagoeva, ia bodaga diba lasi” gauna do idia abia, bona ‘inai mauri be guba dekenai idia totona ia noho hegaegae.’ (1 Petero 1:​3, 4) Unai be hahenamo hereadaena!

To, edia lohia dagina dainai henanadai ta ia vara. Unai vara lou taudia be guba dekenai king bamona do idia lohia neganai, daidia do idia lohiaia? Unai henanadai be hereva gabena ai do ita herevalaia.

[Picture on page 10]

Dirava ese haida be iena natudia ai ia halaoa karana dekenai, Paulo be dahaka ia gwau?