Duahia Taudia Edia Henanadai

Bema beibi ta be sinana ena bogana lalonai ia mase, do ia toreisi lou, a?

Sinana haida edia bogana lalonai natuna idia mase bona idia lalohisihisi, to sinana ma haida dekenai unai bamona ia vara lasi dainai unai hemami idia lalopararalaia be auka. Sinana ena bogana lalonai ia mase beibi dainai tama sina haida idia lalohisihisi bada. Sinana ta ena natuna be faiv bona idia ta ta be ena bogana lalonai idia mase. To ia moale bada badina ena natuna memero rua ia naridia. To, unai sinana be ena bogana lalonai idia mase natudia ta ta ia do laloatao noho. Ia laloa bema ena natuna faiv idia mase lasi, hari idia be natuna badadia ai do idia lao. Keristani taudia dekenai unai bamona ia vara vadaeni, to idia abia dae bogana lalonai idia mase beibi be do idia toreisi lou, a?

Ita gwau diba, unai henanadai ena haere be ita diba lasi. Baibel be maoromaoro ia gwau lasi bogana lalonai idia mase beibi be do idia toreisi lou. To, Baibel ena hakaua herevadia haida ese ita do idia durua unai henanadai ita lalopararalaia namonamo totona.

Mani inai henanadai rua ita laloa. Ginigunana be, Iehova ena matanai, ta ena mauri be edena negai ia matamaia​​—⁠sinana ena bogana lalonai o ia vara negana ai? Iharuana be, Iehova ese sinana ena bogana lalonai ia noho beibi​​—⁠be mauri souli ta bamona ia laloa eiava sel maragina ta bamona ia laloa? Baibel ena hakaua herevadia ese unai henanadai rua ia haerelaia goevagoeva.

Mose ena Taravatu ese ia hahedinaraia goevagoeva beibi ta ena mauri be ia vara negana amo ia matamaia lasi. Edena dala ai? Ia hahedinaraia, bema tau ta ese sinana ena bogana lalonai ia noho beibi ia hamasea, vadaeni unai tau idia hamasea be maoro. Taravatu ia gwau: “Mauri davana be mauri do umui henia.”a (Eso. 21:​22, 23, BHğ) Unai dainai, bogana lalonai ia noho beibi be mauri souli ta. Keristani taudia milioni momo idia laloparara ia do vara lasi beibi hamasea karana be kara dika badana ta Dirava vairanai.

Unai dainai, sinana ena bogana lalonai ia noho beibi be ia mauri, to Iehova ese unai mauri gauna be edena bamona ia laloa? Mose ena Taravatu ia gwau, bema tau ta be sinana mai ena bogana ia botaia bona bogana lalonai ia noho beibi be ia mase, vadaeni unai tau idia hamasea be maoro. Unai dainai, ita diba Dirava vairanai sinana ena bogana lalonai ia noho beibi ena mauri be mai anina bada. Bona danu, Baibel ena siri momo ese idia hahedinaraia Iehova ese sinana ena bogana lalonai ia noho beibi be mauri souli ta bamona ia laloa. Hegeregere, King Davida ese Iehova ia herevalaia neganai ia gwau: “Lauegu sinana ena bogana dekenai lau oi atoa vadaeni. . . . Lau be do lau vara lasi neganai, oi ese lau oi itaia. Lau be do lau vara lasi neganai, oi ese egu mauri dinadia oi torea vadaeni oiemu buka dekenai, unai dinadia be do idia hamatamaia lasi neganai.”​​—⁠Sal. 139:​13-​16; Iobu 31:​14, 15.

Danu, Iehova ese ia do vara lasi beibi ia itaia bona ia diba ia be mai ena kara namodia haida bona reana gabeai ia bada neganai gaukara badadia haida do ia karaia diba. Isako ena adavana Rebeka ena bogana lalonai hekapa memero idia noho neganai, Iehova ia gwau idia ruaosi be edia sinana ena bogana lalonai idia marere, bona unai ese ia hahedinaraia Iehova be edia kara haida ia diba vadaeni, bona edia kara ese vaira negana ai taunimanima momo do ia durua.​​—⁠Gen. 25:​22, 23; Roma 9:​10-​13.

Ioane Bapatiso dekenai danu be unai bamona ia vara. Evanelia bukana Luka ia gwau: “Elisabeta ese Maria ena hanamoa hereva ia kamonai neganai, iena natuna be iena bogana lalonai ia roho, vadaeni Elisabeta ena lalona be Lauma Helaga ese ia hahonua.” (Luka 1:​41) Unai ia herevalaia neganai, doketa tauna Luka ese Greek herevana ta ia gaukaralaia, bona ena anina be sinana ena bogana lalonai ia noho beibi o ia vara vadaeni beibi ia herevalaia. Iesu be boromakau ena aniani mauana ai ia hekure ia herevalaia neganai, unai hereva ma ia gaukaralaia lou.​​—⁠Luka 2:​12, 16; 18:⁠15.

Baibel ese sinana ena bogana lalonai ia noho beibi bona ia vara vadaeni beibi edia idau ia herevalaia, a? Reana lasi. Bona unai be hari inai negai saiens taudia ese idia dibaia gaudia ida idia hegeregere. Hegeregere, tahua gaukara idia karaia taudia idia diba sinana ena bogana lalonai ia noho beibi be murimuri ai idia vara gaudia ia kamonai bona ia mamia dainai, ia marere diba. Unai dainai, ita gwau diba, sinana be bogana lalonai ia noho beibi ida idia hetura namonamo diba.

Beibi be sinana ena bogana lalonai ia tubu bona sinana ese ia havaraia negana be idia idau. Mani inai haheitalai rua oi laloa: Sinana ta be beibi ta ia havaraia, to unai be ena nega korikori lasi bona dina haida murinai unai beibi ia mase. Sinana ma ta ena beibi be ena hua korikori ai ia vara, to ia do vara lasi neganai bogana lalonai ia mase. Sinana ginigunana be ena beibi ia vara, to unai be ena hua korikori lasi bona ia mase dainai, do ia toreisi lou, to oi laloa sinana iharuana ena beibi be do ia toreisi lou lasi, a?

Baibel ese ia hahedinaraia goevagoeva, beibi ta ena mauri be sinana ena bogana lalonai ia matamaia, bona Iehova ese unai beibi ia laloa bada. Unai Baibel hereva momokanidia dainai haida idia laloa sinana ena bogana lalonai ia mase beibi be do ia toreisi lou lasi. Bona reana idia laloa dahaka dainai ita Iehova ena Witnes taudia ese bogana lalonai beibi hamasea karana ita abia dae lasi bona ia be Baibel ena hereva ida idia hegeregere lasi.

Guna, inai magasin ese sinana ena bogana lalonai idia mase beibi do idia toreisi lou dalana dekenai henanadai haida ia herevalaia, bona reana unai ese taunimanima momo dekenai daradara ia havaraia. Hegeregere, Paradaiso ai Dirava ese ia tubu matamaia beibi be hahine ta ena bogana lalonai do ia atoa lou, a? To, Hakaua Oreana be unai idia stadilaia namonamo, idia gurigurilaia, bona idia laloa dobu dainai, idia laloa unai lalohadai be toreisi lou helarona ia herevalaia lasi. Iesu ia gwau: “Dirava ese gau ibounai ia karaia diba.” (Mar. 10:27) Unai hereva be Iesu dekenai ia vara gauna ese ia hamomokania, badina Dirava ese Iesu ena mauri be rami hebou kekenina ta ena bogana lalonai ia atoa​​—⁠taunimanima ta be unai bamona ia karaia diba lasi.

Unai ena anina be, Baibel ia gwau sinana ena bogana lalonai idia mase beibi be do idia toreisi lou, a? Namona be ita hahedinaraia Baibel be maoromaoro unai henanadai ia haerelaia lasi, unai dainai taunimanima idia gwau diba lasi sinana ena bogana lalonai idia mase beibi be do idia toreisi lou. Reana unai hereva dekenai taunimanima be henanadai momo do idia henia. Unai dainai, bema unai bamona henanadai edia haere ita diba lasi, namona be ita hereva kava lasi. To ita dibaia gauna be inai: Iehova Dirava be hebogahisi mai lalokauna bona hariharibada Diravana bona Ia sibona be unai ia diba. (Sal. 86:15) Momokani, Ia ura bada idia mase vadaeni taudia do idia toreisi lou bona unai dala amo mase ese ia havaraia gau dikadia ibounai do ia haorea vaitani. (Iobu 14:​14, 15) Ita diba momokani Iehova be hanaihanai kara namodia ia karaia. Iehova ese ita noholaia tanobada dikana lalonai ita abia hisihisi bona hekwakwanai ibounai ia haorea totona, Iena Natuna dekenai siahu do ia henia “Satani ena kara dika do ia haorea momokani totona.”​​—⁠1 Ioa. 3:⁠8.

[Footnote]

[Picture on page 13]

Iehova ese taunimanima idia abia hisihisi ibounai do ia haorea vaitani