Ruma Bese Baine Moale Daladia

Natumu E Badamu Dainai, Marağinai Ba Hadibaia Namonamo

“Guna natugu na hereva henidiava neganai, idia na e kamonai namonamova, bona maoromaoro karadia e karava. A hari idia na vada babada dainai, nega momo a hepapahuahumu. Vaevae a karamu tomadiho karadia danu asie uramu bae kara. Ai e nanadaimaimu, ‘Nega iboudiai Baibel baita herevalaia, a?’ Guna natugu do marağidiai, lau na laloava egu ruma bese lalonai unu na basie vara​​—⁠ena be na itaiava ruma bese haida lalodiai unu e varava.”​​—⁠Reggie.a

NATUMU e bada e laomu, a? Bema oibe, anina na ia e tubu daemu lalonai, oi na ena mauri lalonai e idaumu hoa ğaudia o itadiamu. Danu, natu e bada e laomu neganai, kwara e hahisimu. Henuai a tore sivaraidia mani a itadia; emu ai e varamu, a?

▪ Natumu merona marağinai, ia na bouti ta na heto, wof​​—⁠oi tama o sina​​—⁠emu ai e hekwatu kau. Hari ia vada eme bada neganai, e hekwarahimu varo baine ruhaia, sibona baine hure loaloa totona, bona o mamiamu ia na se uramu ia ida baola.

▪ Natumu kekenina marağinai, ia na oi vairamuai ğau iboudiai e gwauraiva. Hari ia vada eme bada neganai, ia sibona turana e abidia hidimu, bona o mamiamu ia na se uramu oi na ia turana ai baola.

Bema emu ruma bese lalonai natumu unu e kara tomamu, maoromaoro basioto natumu na e gwau-edeedemu bona ena kara na basine haidaua diba. Dahaka dainai natu na unu e kara tomamu? Una henanadai ihaerelaina totona, namona na natumu e bada e laomu lalonai e varamu ğau badadia haida aita herevalai.

Marağidia E Bada E Laomu Lalonai, Edia Noho Dalana E Idaumu

Beibi ta e varamu negana amo, ena mauri lalonai ğau ginigunadia na momo​—⁠raka ginigunana, hereva ginigunana, sikuli dinana ginigunana bona ma haida. Tama bona sina na unu e itamu neganai e moalemu. Unu ğau ese e hamomokanimu oi natumu na e bada e laomu.

Natu e bada e laomu lalonai danu, ena noho dalana na e idaumu​​—⁠ena be tama sina haida e gwaumu, una na lalohekwarahi negana. Oibe, tama sina e lalohekwarahimu badidia na dibada. Bema natu na marağidiai e kamonaimu to gabeai e badamu bona hereva asie kamonaimu neganai, tama sina na asie moalemu, ani? To, natu e bada e laomu negana na mai anina bada negana. Edena dala ai?

Baibel na e gwaumu dina ta “tau ese tamana sinana baine rakatanidia.” (Genese 2:​24)b Natumu merona bona kekenina e badamu lalonai ba hadibaia namonamo badina badana ta binai: Nega ta ia na ena ruma bese baine rakatanidia. Una neganai, ia na aposetolo Paulo ena hereva baine gwauraia diba; ia na ini gwau toma: “Merogu negana ai na herevava mero na heto, lalogu e urava mero na heto, egu lalo-hadai be mero ena lalo-hadai. A taugu e lo negana ai, mero ena kara vada na nege.”​​—⁠1 Korinto 13:⁠11.

Hari oi natumu marağinai, ia na unu e kara tomamu​​—⁠marağidia edia kara e rakatanimu bona e uramu lo tauna ena kara baine dibaia, unu amo tamana bona sinana baine rakatanidia neganai, ia na heğereğere sibona baine henari diba. Buka ta e gwaumu, natu e bada e laomu neganai ia na e heğaeğaemu tamana sinana baine rakatanidia totona.

Oi na mai dibamu nega ta be maimu, oi natumu marağina (merona o kekenina) na oi be rakatanimumu dainai, bo lalohekwarahimu. Reana bo henanadaimu:

▪ “Bema hari natugu merona na ena daiutu se hağoevaia namonamomu, gabeai ia sibona ena ruma be ede baine hağoevaia toma?”

▪ “Bema hari natugu kekenina na ai a gwauraiamu taimina se badinaiamu, gabeai moni ğaukarana baine davaria neganai, baine karaia hanaihanai, eiava?”

Bema emu lalohadai na unu bamona, ina ba laloatao: Natu ta sibona baine henari karana na lağani momo murinai baine manadalaia. Hari natumu edia kara amo o itaiamu “kavakava na meromero [o kekenikekeni] lalonai mia.”​​—⁠Hereva Lada-isidia 22:⁠15.

To, bema natumu ba hakaua namonamo o ba hadibaia namonamo, baine bada neganai ia na lo tauna eiava hahinena ai bainela bona ‘namo bona dika toadia na mai dibana.’​​—⁠Heberu 5:​14.

Dala Namodia Haida

Natumu marağidiai ba hadibadia namonamo dalana ta binai: Ia ba durua “namo bona dika toadia” baine diba namonamo totona, unu amo vaira negadiai ia sibona na abi hidi maorodia baine kara diba. Henuai e hetore Baibel siridia ese baine durumu diba unu ba kara toma totona.

Filipi 4:5: “Emui lalo-manau na taunimanima iboudiai bae diba.” Natumu na oi e noimumu: ‘Bema namo ruma bainama totona o heni taimina taina baina haidaua.’ Maoromaoro emu haere binai: ‘Lasi.’ Natumu be gwaumu, “Lau be ğaruğaru, a?” Ina hereva, “Oi be ğaruğaru edia kara doini o karamu,” do asio gwauraia neganai, ina mani a laloa: Matamata taudia na e laloamu ğau momo bae kara diba, ena be haida na dia heğereğere. Tama sina danu ena be ğau haida ai gwaumaoro bae heni diba, to idia na ğau momo e taravatumu. Reana nega ta ta ai gwaumaoro ba heni diba idia ese ğau ma haida bae kara totona. Natumu ena lalohadai ba laloa danu na ğau badana.

INA BA TOHOA: Natumu enai gwaumaoro o heniamu baine karaia diba ğauna ta o rua na pepa ai ba torea. Bema ba hamaoroa una gwaumaoro na nega kwadoğina mo o henimu dainai, bema una nega lalonai ena maduna baine huaia namonamo, reana gwaumaoro ma haida ba heni diba ena ura ğaudia baine kara totona. To bema una maduna basine huaia namonamo, ena ura ğaudia ma haida ai gwaumaoro na basio heni.​​—⁠Mataio 25:⁠21.

Kolose 3:​21: “Tama e, natumui basio turia riki henidia, lalodia bae hesiku na garina.” Tama sina haida na natudia e karamu ğau marağimğaridia iboudiai e biagumu. Heğereğere, tama sina ese natudia na ruma ai e lokadiamu, eiava idia ese turadia e abidia hidimu, eiava natu ese telefon e ğaukaralaiamu neganai idia na hehuni gabudiai e kamonaimu. To una kara ese dika bada baine havaraia diba. Bema tama sina ese natudia bae biagudia auka, idia na ruma bae heautania diba; bema nega momo idia na natudia turadia bae maumauraidia, natudia na tama sina basie ura henidia; bema tama sina na hehuni gabudiai natudia edia telefon herevadia bae kamonai, natudia danu hehuni gabudiai turadia ida bae herevahereva diba. Bema tama sina ese edia hebiagu karana bae habadaia, natudia danu edia gwau-edeede karana bae habadaia diba. Momokani, bema natumu na ruma ai e nohomu lalonai ğau ta baine abia hidi karana basio hadibaia namonamo, umui baine rakatanimui neganai baine hekwarahi bada herea.

INA BA TOHOA: Bema nega ta natumu ida ğau badana ta o herevalaiamu, namona na ba durua baine laloparara ia baine abia hidi ğauna ese ia be duruamu o lasi. Heğereğere, turana na basio maumauraidia, to ini ba gwau toma: “Bema [ladana ba gwauraia] na pulisi ese bae abia badina taravatu ta e utua be ede heto? Taunimanima ese oi be ede bae lalomu toma?” Natumu ba durua, unu amo baine itaia ia baine abia hidi ğauna ese ia ladana baine hanamoa o lasi.​​—⁠Hereva Lada-isidia 11:​17, 22; 20:⁠11.

Efeso 6:4: “Natumui basio habadudia, a Lohiabada ena hahediba herevadia bona ena sisiba herevadia ba ubulaidia.” Ina hereva “ubulaidia” anina na dia oi ese natumu ba hadibadia karana mo e herevalaiamu. Lasi, ia anina ta na oi na o uramu natumu o hadibaiamu herevana na ia ese baine abia dae bona ena kara baine haidaua. Natumui e bada e laomu lalonai, unu ba kara toma na ğau badana. Tama ta ladana, Andre na ini e gwau toma: “Natumu e bada e laomu lalonai, ihereva henina daladia ba haidau na ğau badana.”​​—⁠2 Timoteo 3:​14.

INA BA TOHOA: Natumu ida ğau badana ta o herevalaiamu neganai, reana ina ba tohoa: Natumu ba nanadaia, ‘Bema lau na oi natumu, oi tama emu lalohadai be dahaka?’ Ba hadibaia buka haida ai heduru herevadia haida baine tahu, iena lalohadai baine durua totona. Bena wiki ta murinai ba hebou lou bona una ğau ba herevalaia.

Galatia 6:7: “Taunimanima e hadomu ğaudia heğereğeredia mo bae abi.” Natu ta na matahakani amo ğau ta baine dibaia diba​​—⁠reana daiutu ai ba lokaia eiava e ura heniamu karana ta ba taravatua. Bema ta na doini mero o kekeni marağina, namona na ena kerere ahuna baine huaia.​​—⁠Hereva Lada-isidia 6:​27.

INA BA TOHOA: Natumu basio durua iena abitorehai ihalouna totona, eiava ena sikuli makadia na dia nanamo neganai ena tisa enai ekskius herevadia basio gwaurai. Ba rakatania ena kerere ahuna baine huaia totona, badina ia ese baine dibaia ğaudia ese ia bae durua ela bona hanaihanai.

Oi na tama ta o sina ta dainai, o uramu natumu e bada e laomu lalonai, hekwakwanai ta basine davaria to baine tubu ğoevağoeva mo ela bona tau o hahine badana ai bainela. To una lalohadai na nega ta ta ai mo anina e varamu. Una dainai, natumu e bada e laomu lalonai, una na nega namona natumu baine “rakalaia dalana na ba hadibalaia” totona. (Hereva Lada-isidia 22:⁠6) Baibel ena hahekau herevadia ese emu ruma bese baine durua diba baine moale totona.

[Footnotes]

SIBOMU BA HENANADAI . . .

[Picture on page 15]

Natugu na ruma baine rakatania neganai, ia be ini kara baine badinadia diba eiava?

▪ tomadiho karadia

▪ abi hidi maorodia

▪ ma haida baine hereva henidia namonamo

▪ tauanina baine naria namonamo

▪ moni baine ğaukaralaia namonamo

▪ ruma baine hağoevaia bona baine naria namonamo

▪ lalohadai ai ğau baine kara

[Picture on page 15]

Bema oi natumu na ğau e karadia namonamomu, o laloamu nega ba henia diba sibona ena ura ğaudia baine abi hidi o baine kara totona, a?