Ena be Lau Gorere to Lau Moale

Paulette Gaspar ese ia sivarailaia

Ena be lau vara neganai egu metau be 3 kilogram bamona, to doketa ia diba lau dekenai gau ta ia kerere. Lau vara neganai egu turia haida idia manoka. Unai be gorere ta (osteogenesis imperfecta.) Maoromaoro opereisen rumana dekenai lau idia abia lao, to doketa idia gwau gau ta idia karaia diba lasi. Idia laloa lau be hora 24 lalonai do lau mase.

JUNE 14, 1972 ai, lau be Australia ena siti badana, Canberra dekenai lau vara. Ena be doketa idia laloa do lau mase, to unai dina ginigunana ai lau mase lasi. Bena nimonia gorere lau abia. Doketa idia laloa do lau mase dainai, muramura ta idia henia lasi, to idia gwau ‘ita naria sibona ela bona do ia mase.’ To, lau mase lasi.

Lau diba unai nega lalonai egu tama sina idia hekwarahi bada. Toana be do lau mase dainai, doketa bona nesi ese egu tama sina idia hamaoroa lau do idia laloa momo lasi. Danu, hua toi hospital dekenai lau noho neganai, egu tama sina be lau idia dogoatao lasi. Bema lau idia dogoatao loulou, egu turia do idia makohia. Doketa idia itaia toana be do lau mauri dainai, egu tama sina idia hamaoroa, natudia mai edia gorere idia naria hospital ai lau idia atoa be namo.

To, egu tama sina ese ruma dekenai lau idia abia lao. Egu sinana be Iehova ena Witnes taudia ida Baibel ia stadilaia matamaia. Bona ia dibaia gaudia amo ia laloparara lau ia naria karana be iena maduna. To reana lau ia tura henia be ia auka badina hospital dekenai iena goada bona nega bada ia henia vadaeni lau ia naria totona. Nega momo hospital dekenai lau idia abia lao be namo. Gau maragidia dekenai, hegeregere lau idia hadigua o kuru lau abia dainai lau asimana neganai egu turia idia makohia kava.

Lau Lalometau

Lau tubu daekau neganai, hanaihanai lau be uilisea dekenai lau helai dainai lau raka be auka. Ena be egu tama sina idia hekwarahi bada, to tauanina dalanai lau idia durua bona naria namonamo.

Danu, egu sinana ia gaukara goada lau dekenai Baibel ena hereva ia hadibaia totona. Hegeregere, lau ia hadibaia vaira neganai Dirava ese tanobada be paradaiso ai ia halaoa neganai taunimanima ibounai ese Dirava do idia tura henia namonamo, edia lalona do idia goevadae, bona gorere do idia ore. (Salamo 37:​10, 11; Isaia 33:24) To egu sinana ia gwau, unai mauri namona be hari do lau abia lasi to vaira negana ai do lau abia.

Matamanai, sikuli ta ai lau sikuli​—⁠unuseniai natudia momo edia tauanina ena kahana haida be idia dika. Egu tisa be lau totona tahua gaudia ia atoa lasi, bona lau sibona be tahua gaudia lau atoa lasi. Nega momo lau ura lasi sikuli dekenai lau lao, badina natudia momo ese lau idia dagedage henia. Gabeai lau be sikuli ma ta dekenai lau lao​—⁠unuseniai natudia momo edia tauanina ena kahana haida idia dika lasi. Mai egu goada bona lalona ibounai ida lau hekwarahi bada idia lau tura henia totona. To, egu lalona lau hadaia lagani 12 lalonai egu sikuli lau haorea totona.

Haisikuli ai lau sikuli noho neganai, lauegu lalohadai be egu sikuli turadia edia mauri be anina lasi. Danu, egu sinana ese Baibel amo lau ia hadibaia gaudia lau laloa. Lau diba unai gaudia be hereva momokani. To unai negai Baibel ena hahediba herevadia be mai egu kudouna ibounai ida lau abia dae momokani lasi. Unai dainai, lau laloa egu mauri lau moalelaia sibona be namo, bona kerukeru lau laloa lasi be namo.

Egu mauri lagani be 18 neganai, egu tama sina lau rakatanidia bona ruma ma ta ai lau noho​—⁠unuseniai be tauanina ena kahana haida idia dika taudia idia noho. Egu noho gabuna matamatana lau moalelaia to lau gari danu. Sibona egu ura gaudia lau karaia diba, egu turadia be momo bona pati ai karaia diba​—⁠unai mauri dalana lau ura henia. Egu turadia momo idia headava. Lau danu lau ura headava bona egu adavana ese lau do ia lalokau henia. To egu gorere dainai, adavana ta lau abia be auka. Unai dainai lau lalohisihisi.

To, lau gwau lasi unai be Dirava ena kerere. Lau dibaia gaudia ese lau idia hadibaia Dirava be kerere ta ia karaia diba lasi. (Iobu 34:10) Ena be egu mauri dalana lau moalelaia, to gabeai lau lalometau bada.

Metairametaira Goada Lau Abia

Egu sinana be egu noho dalana ia diba dainai, egu noho gabuna kahirakahira ai ia noho kongrigeisen ena elda ta ia hadibaia. Elda tauna ese lau ia rini henia bona lau ia boiria Iehova ena Witnes taudia edia Kingdom Hall ai idia karaia heboudia dekenai lau lao totona. Danu, kongrigeisen taihu ta be wiki ta ta ai lau danu Baibel ai stadilaia.

Egu sinana ese lagani momo gunanai lau ia hadibaia hereva momokanidia lau lalodia lou, bona egu mauri dalana ia namo ia lao. Keristani tadikaka taihu bamoa karana lau moalelaia. To, lau ura lasi egu hemami o hekwakwanai be haida dekenai lau herevalaia, egu lalona idia hahisia garina. Reana unai badina dainai Dirava lau lalokau henia be auka. To, lau diba Iehova dekenai egu mauri lau gwauhamatalaia be maoro. Unai dainai, December 1991 ai, egu gwauhamata hamomokania totona, bapatiso lau abia.

Egu ruma bona turadia lau rakatania bona ruma ma ta ai lau sibona lau noho. Ena be unai ese lau dekenai namo ia havaraia, to hekwakwanai lau davaria danu. Hegeregere, lau be sibona lau noho. Bona lau gari, dika tatau haida ese egu ruma idia makohia bona idia vareai. Daudau lasi murinai, lau lalometau lou. Ena be egu moale toana be egu kiri amo lau hahedinaraia, to egu lalona dekenai lau moale lasi. Lau ura dikadika turana namona ta lau davaria bona ia ese lau do ia durua bada.

Lau mamia Iehova Dirava be lau dekenai turana namona ta ia henia. Kongrigeisen elda taudia be dala idia karaia headava taihu ta, ladana Suzie, ese Baibel amo lau ia durua noho totona. Suzie be lau ia hadibaia taihu sibona lasi, to ia be egu turana namona ai ia lao.

Suzie ese lau ia hadibaia, edena bamona ruma-ta-ruma-ta haroro gaukara ai bona nega bona gabu idauidau ai ma haida dekenai, lau dibaia gaudia lau herevalaia totona. Hari lau be Dirava ena kara namodia lau laloa bada matamaia. Ena be lau bapatiso vadaeni, to Dirava lau lalokau henia momokani lasi. Nega ta, lau laloa Iehova tomadiho henia karana lau rakatania be namo. Suzie dekenai unai lau herevalaia, bona ia ese lau ia durua unai hekwakwanai lau hanaia totona.

Danu, Suzie be lau ia durua unai amo lau laloparara lau moale lasi ena badina badana be, lau be Iehova idia lalokau henia bada lasi taudia haida lau bamoa momo. Unai dainai lau be Iehova idia lalokau henia momokani taudia lau bamoa matamaia​​—⁠idia momo be buruka taudia. Danu, egu sinana ida ai hetura namonamo lasi; to lau gaukara goada egu sinana bona egu kakana ida ai hetura namonamo totona. Hari lau moale bada, guna bamona lasi. Egu Keristani tadikaka taihu, egu bese, bona Iehova dainai lau goada bona lau moale.​​—⁠Salamo 28:⁠7.

Gaukara Matamatana Ta

Hebouhebou badana ta lau lao neganai, tok ta lalonai tadikaka taihu momo be ful-taim haroro gaukara lalonai idia abia moalena idia herevalaia. Unai tok dainai lau gwau, ‘Unai gaukara lau karaia diba!’ Momokani, lau diba unai gaukara do lau karaia be auka. To, mai guriguri ida unai lau lalohadailaia murinai, painia gaukara ena aplikeisen pepa ta lau hahonua bona lau atoa, bona April 1998 ai painia gaukara lau hamatamaia.

Lau gorere dainai edena dala ai haroro gaukara do lau karaia? Lau be sibona naria karana lau manadalaia dainai, lau ura lasi ma haida lau hahekwarahia motuka amo lau idia abia lao bona dala ma haida ai lau idia durua totona. Unai dainai Suzie bona ena adavana, Michael, be lau dekenai unai hekwakwanai hanamoa dalana ta idia gwauraia: Motabaik ta lau hoia be namo! To edena bamona do lau taria? Egu motabaik be lau totona idia karaia​—⁠laulau dekenai ia hedinarai bamona. Egu tauanina ena metau be 19 kilogram sibona dainai, lau hekwarahi lasi uilisea amo lau diho bona guia totona!

Egu motabaik amo lau be taunimanima lau vadivadi henia diba bona idia bona lau dekenai idia hegeregere negadiai idia ida Baibel lau stadilaia diba. Motabaik taria karana lau ura henia badina egu vairana ai lai ena hodahoda lau mamia neganai lau moale!

Dala dekenai taunimanima lau hereva henia karana lau moalelaia, idia be lau idia kara namo henia bona matauraia. Danu, ma haida lau durua Baibel idia dibaia dainai lau moale. Lau laloatao, nega ta lau be ruma-ta-ruma-ta haroro gaukara lau karaia bona lau ia bamoa tadikaka be tau latana. Ia ese ruma hahinena ia hanamoa, bona unai ruma hahinena be lau ia raraia noho bona ia henanadai, “Ia hereva diba, a?” Bena ai kiri. Unai hahine lau haroro henia neganai, ia diba lau hereva diba!

Hari egu mauri lau moalelaia bona Iehova Dirava lalokau henia karana lau dibaia. Egu sinana lau tanikiu henia badina lau dekenai hereva momokanidia ia hadibaia, bona lau naria noho ela bona vaira negana ai Dirava ese ‘gau ibounai ia karaia matamata’ neganai, egu tauanina do ia hanamoa.​​—⁠Apokalupo 21:​4, 5.

[Blurb on page 30]

“Ena be egu mauri dalana lau moalelaia, to gabeai lau lalometau bada”