Ita Hekwarahi Lo Taudia ai Ita Lao, Badina Iehova Ena Dina Badana be Kahirakahira
“Namona be ita hekwarahi lo taudia ai ita lao totona.”—HEB. 6:1, NW.
1, 2. Edena dala ia kehoa Ierusalema bona Iudea dekenai idia noho Keristani taudia be “ororo dekenai do idia heau lao”?
IESU be tanobada ai ia noho neganai, hahediba taudia ese ia idia nanadaia: “Do oi giroa mai, bona tanobada dokona danu, ena toana be dahaka?” Iesu be peroveta herevadia amo edia henanadai ia haerelaia—idia haida edia anina be aposetolo edia negai idia guguru matamaia. Iesu be toa idauna ta ia herevalaia danu, unai ese do ia hahedinaraia dokona be ia kahirakahira. Iudea dekenai idia noho taudia be unai idia itaia neganai, namona be “ororo dekenai do idia heau lao.” (Mat. 24:1-3, 15-22) Iesu ena hahediba taudia be unai toa ena anina do idia lalopararalaia bona ororo dekenai do idia heau lao, a?
2 Lagani 61 C.E. ai, aposetolo Paulo be Ierusalema bona unai hanua kahirakahira ai idia noho Heberu Keristani taudia dekenai hereva badana ta ia siaia. To, Paulo bona ena tadikaka idia diba lasi gauna be inai: “Hisihisi badana” be lagani 5 murinai do ia matamaia. (Mat. 24:21, NW ) Lagani 66 C.E. ai, Cestius Gallus be Roma ena tuari oreana ia hakaua lao bona kahirakahira Ierusalema idia hadikaia ore. To hoa gauna be, Gallus bona ena orea be Ierusalema idia rakatania haraga, bona unai ese dala ia kehoa Keristani taudia be ororo dekenai idia heau lao totona.
3. Paulo ese Heberu Keristani taudia dekenai dahaka sisiba namona ia henia, bona dahaka dainai?
3 Gau badana be unai Keristani taudia idia laloparara Iesu ena hereva edia anina be idia guguru noho, bona ororo dekenai idia heau lao be namo. To, haida idia kamonai lasi, bona “hadibaia be auka.” Lauma dalanai idia be “rata” idia inua beibi bamona. (Heberu 5:11-13 duahia.) Haida be lagani momo lalonai hereva momokani ena dala dekenai idia raka, to gabeai ‘Mauri Diravana idia rakatania’ matamaia. (Heb. 3:12) Ena be “Lohiabada ena Dina be kahirakahira do ia ginidae,” to haida be Keristani hebou lao henia hanaihanai karana idia hadokoa. (Heb. 10:24, 25) Unai dainai, Paulo be inai sisiba namona ia henia, ia gwau: “Keriso ena hahediba hereva badana sibona ita dibaia lasi, to namona be ita hekwarahi lo taudia ai ita lao totona.”—Heb. 6:1, NW.
4. Dahaka dainai lauma dalanai ita gima noho be gau badana? Bona dahaka ese ita do ia durua hari inai nega ita laloa namonamo totona?
4 Hari, ita be Iesu ena peroveta hereva iboudiai idia guguru negana lalonai ita noho. Iehova ena “dina badana be ia kahirakahira vadaeni inai”—unai dina lalonai, Ia ese Satani ena orea ibounai do ia haorea. (Sep. 1:14) Hari be lauma dalanai ita noga o ita gima noho negana, guna bamona lasi. (1 Pet. 5:8) Ita be unai bamona ita karaia noho, a? Bema lo Keristani taudia ai ita lao, unai ese ita do ia durua hari inai nega ita laloa namonamo totona.
Lo Keristani Tauna ese Dahaka Ia Karaia be Namo?
5, 6. (a) Lo Keristani tauna ese dahaka ia karaia be namo? (b) Ita hekwarahi lo Keristani taudia ai ita lao totona, dahaka gau rua ita karaia be namo?
5 Paulo be aposetolo edia negai idia noho Heberu Keristani taudia ia hagoadaia idia hekwarahi lo Keristani taudia ai idia lao sibona lasi, to kara haida idia karaia danu be namo. (Heberu 5:14 duahia.) “Tau badadia” eiava lo Keristani taudia be “rata” sibona lasi to “aniani korikori” idia ura danu. Unai hegeregerena, lauma dalanai lo Keristani taudia be hereva momokani ena “diba hamatamaia gaudia” bona “dobu gaudia” idia diba. (1 Kor. 2:10) Ma danu, idia dibaia gaudia idia badinaia amo edia lalona idia hadibaia loulou, bona unai ese idia ia durua maoro bona kerere edia toana idia diba namonamo totona. Unai dainai, abia hidi ta idia karaia gwauraia neganai, idia be Baibel ena hakaua herevadia bona badinaia dalana idia lalohadailaia guna.
6 Paulo ia gwau: “Hereva momokani, ita kamonai vadaeni gauna, do ita dogoatao bona badinaia be namo. Namo lasi ita manokalaia, do ita boio garina.” (Heb. 2:1) Oibe, ita manoka o ita boio o hereva momokani ita rakatania diba bema ita naria namonamo lasi. To unai ia vara diba lasi, bema ruma o Keristani heboudia ai Baibel ena hereva ita stadilaia bona ita badinaia. Ita sibona ita nanadaia: ‘Lau be Baibel ena diba hamatamaia herevadia sibona lau stadilaia, a? Lau be hereva momokani lau laloa maragi dainai, stadi lau karaia kava, a? Edena dala ai hereva momokani lalonai lau goada lau lao diba?’ Ita hekwarahi lo Keristani taudia ai ita lao totona, gau rua ita karaia be namo. Baibel ena hereva bona Dirava badinaia karana ita diba namonamo be namo.
Baibel Ena Hereva Ita Diba Namonamo
7. Edena dala ai Baibel ita diba namonamo amo namo ita abia?
7 Paulo ia gwau: “Rata ia inua merona be kara maoromaoro herevana ia diba lasi, badina ia be do beibi bamona.” (Heb. 5:13, BHğ) Lo Keristani taudia ai ita lao totona, namona be Baibel ena hereva ita diba namonamo. Baibel be ita dekenai ia noho dainai, namona be Baibel bona “hesiai tauna mai ena kamonai, bona mai ena kara maoromaoro” oreana ese idia halasia bukadia ita stadilaia namonamo. (Mat. 24:45-47) Unai stadi karana ese ita do ia durua Dirava ena lalohadai ita abia bona eda lalomamina ita hadibaia namonamo totona. Taihu ta ladana Orchid ena ekspiriens ita laloa.a Ia gwau: “Baibel duahia hanaihanai ena hadibaia herevana ese egu mauri ia haidaua. Ena be lagani rua murinai Baibel ibounai lau duahia ore, to toana be unai nega lalonai lau be egu Havaraia Tauna lau dibaia matamaia. Iena kara, ia ura gaudia bona ia ura lasi gaudia, ena siahu bona aonega edia bada lau dibaia. Dina ta ta ai Baibel lau duahia dainai, unai ese lau ia durua hekwakwanai badadia lau haheaukalaidia totona.”
8. Edena dala ai Baibel be eda mauri ia haidaua diba?
8 Baibel ena kahana ta ita duahia loulou neganai, iena hereva be eda kudouna lalonai do ita laloatao. (Heberu 4:12 duahia.) Baibel duahia loulou karana ese eda lalona ia haidaua bona Iehova hamoalea karadia ita karaia diba. Oi be mai emu sediual, hanaihanai Baibel oi duahia bona laloa dobu totona, a?
9, 10. Baibel ita diba namonamo ena anina be dahaka? Haheitalai gwauraia.
9 Baibel ita diba namonamo sibona be hegeregere lasi. Paulo ena negai, haida be Dirava ena Hereva haida idia diba. To, idia dibaia herevadia idia gaukaralaia lasi o idia badinaia lasi dainai, idia be beibi bamona. Edia mauri lalonai abia hidi idia karaia neganai, idia be Dirava ena Hereva ena hakaua dalana idia badinaia lasi.
10 Baibel ita diba namonamo anina be ena hereva ita dibaia bona badinaia. Taihu ta ladana, Kyle ena ekspiriens be unai ia hahedinaraia goevagoeva. Nega ta ai, ia be ena gaukara turana ta ida idia hepapahuahu. Edena dala ai Kyle be unai hepapahuahu ia hamaoromaoroa? Ia gwau: “Unai neganai Roma 12:18 ena hereva lau laloatao, ia gwau: ‘Maino karaia daladia umui tahua dala idauidau ibounai dekenai, taunimanima danu mai maino danu do umui noho totona.’ Unai dainai, unai turana lau noia gaukara murinai ai kiki hebou totona.” Unai adorahi ai, edia hekwakwanai idia hamaoromaoroa, bona unai kara dainai Kyle ena turana ia moale. Kyle ia gwau: “Bema Baibel ena hakaua herevadia ita badinaia, gau ibounai do ita karaia namonamo.”
Dirava Badinaia Karana Ita Diba Namonamo
11. Dahaka ese ia hahedinaraia metau negadiai Dirava ita badinaia be auka?
11 Mauri ia auka negadiai, Baibel amo ita dibaia gaudia ita badinaia be nega haida ia auka. Hegeregere, ena be Iehova ese Israela taudia be Aigupito amo ia hamauria, to daudau lasi murinai idia be “Mose dekenai idia maumau” bona ‘Lohiabada dekenai idia dibagania.’ Dahaka dainai? Badina ranu be lasi idia inua totona. (Eso. 17:1-4) Matamanai, Israela taudia be Dirava dekenai gwauhamata idia karaia idia gwau, ‘idia be Lohiabada ena hereva ibounai do idia karaia,’ to hua rua murinai Iena taravatu idia makohia bona kaivakuku idia tomadiho henia. (Eso. 24:3, 12-18; 32:1, 2, 7-9) Taravatu idia utua badina Mose be Sinai Ororo dekenai Dirava ese hadibaia hereva ia henia bona idia ida ia noho lasi bona idia gari, a? Idia laloa Mose ia noho lasi dainai, bema Amaleka taudia be Israela taudia idia tuari henia lou, Israela taudia do idia lusi badina matamanai Iehova be Mose amo kwalimu ia havaraia, a? (Eso. 17:8-16) Herevana Israela taudia be dahaka lalohadai idia abia, to “idia ura lasi [Dirava ena] hereva idia kamonai.” (Kara 7:39-41) Unai dainai, Paulo ese Keristani taudia ia hamaoroa namona be ‘mai edia goada ibounai’ ida ‘Dirava ena hereva do idia utua lasi’—Israela taudia bamona do idia karaia lasi, idia be Gwauhamata Tanona ai idia vareai totona idia gari neganai, idia kamonai lasi.—Heb. 4:3, 11.
12. Edena dala ai Iesu be Dirava kamonai henia karana ia dibaia, bona dahaka hahenamo ia abia?
12 Ita hekwarahi lo Keristani taudia ai ita lao totona, gau badana be mai eda goada ibounai ida Iehova ita badinaia. Iesu Keriso be hisihisi ia abia, to unai amo Dirava kamonai henia dalana ia dibaia. (Heberu 5:8, 9 duahia.) Guba dekenai Iesu be ena Tamana ia badinaia. To, tanobada ai ena Tamana ena ura ia karaia totona, ia be hisihisi bona lalometau ia abia be namo. Unai hisihisi lalonai Iesu be Dirava ia badinaia dainai, Dirava ese King bona Hahelaga Tauna Badana ai ia halaoa.
13. Edena dala ai ita hahedinaraia diba ita be Dirava ita badinaia?
13 Ita be edena bamona? Hekwakwanai negadiai, ita be mai eda lalona ibounai ida Iehova ita badinaia, a? (1 Petero 1:6, 7 duahia.) Dirava ena sisiba—kara namodia, kara maoromaoro, malana gaukaralaia namonamo, Baibel duahia bona stadilaia karana, Keristani heboudia lao henia karana, bona haroro gaukara—ita badinaia be auka lasi. (Ios. 1:8; Mat. 28:19, 20; Efe. 4:25, 28, 29; 5:3-5; Heb. 10:24, 25) Hisihisi negadiai unai sisiba ita badinaia, a? Bema unai bamona ita karaia, ita hahedinaraia ita be lo Keristani taudia ai ita lao unai.
Dahaka Dainai Lo Keristani Taudia ai Ita Lao be Namo?
14. Ita hekwarahi lo Keristani taudia ai ita lao karana ese ita ia gimaia ena ekspiriens ta oi gwauraia.
14 Ena be tanobada taudia be “hemarai” karadia idia karaia, to bema Keristani taudia ese edia lalona idia hadibaia loulou ela bona maoro bona kerere edia toana idia diba namonamo, unai ese idia do ia gimaia namonamo. (Efe. 4:19, NW ) Hegeregere, tadikaka ta ladana, James be nega momo iseda buka bona magasin ia duahia bona stadilaia. Nega ta ia be moni gaukara ta ia abia dae, bona unuseniai hahine be momo. James ia gwau: “Hahine momo edia kara be namo lasi, to idia huanai hahine ta ena kara be namo herea bona toana be ia ura hereva momokani ma haida ia dibaia. To nega ta ai, gaukara gabunai, ai ruaosi sibona be opesi dekenai ai noho neganai, unai hahine ia ura lau ia rosia bona kisi henia. Matamanai lau laloa ia gadara sibona, to gabeai lau hekwarahi ia lau koua lau ia rosia lasi bona kisi henia lasi totona. Maoromaoro lau be Gima Kohorona ta ai tadikaka ese moni gaukara gabunai unai bamona hekwakwanai ia hanaia dalana lau laloa lou. Unai ekspiriens lalonai be Iosepa bona Potifara ena adavana ena sivarai ia noho.b Unai kekeni ia ura noho lau ia rosia bona kisi henia dainai, karaharaga ia lau doria siri bona ia be opesi amo ia heau raka-lasi.” (Gen. 39:7-12) James ia moale badina kerere ta ia vara lasi, bona ena lalomamina ia namo.—1 Tim. 1:5.
15. Edena dala ai lo Keristani tauna ese ena kudouna ia gimaia diba?
15 Lo Keristani tauna ai ita lao neganai, unai ese eda kudouna ia hamaoromaoroa bona ita ia gimaia namonamo, unai amo ‘hadibaia hereva idauidau ese dala maorona dekena amo ita idia hakaua kerere’ lasi. (Heberu 13:9 duahia.) Ita hekwarahi lo Keristani taudia ai ita lao neganai, eda lalona ai “gau namodia” o gau badadia sibona ita laloa. (Fili. 1:9, 10) Bona Dirava ita tanikiu henia badina ita totona gau namodia momo ia karaia. (Roma 3:24) “Tau badadia bamona” ia laloa Keristani tauna be unai bamona ia karaia, bona Iehova ia tura henia.—1 Kor. 14:20.
16. Dahaka ese taihu Louise ia durua ‘ena kudouna ia hagoadaia’ totona?
16 Taihu ta ladana Louise ia gwau, ‘Bapatiso lau abia murinai, lau laloa ma haida hamoalea totona Keristani gaukaradia lau karaia noho be namo.’ Ma ia gwau, “Ena be kerere ta lau karaia lasi, to lau mamia Iehova ena hesiai gaukara ura henia karana ia maragi ia lao. Lau laloparara gau haida lau haidaua be namo, unai amo do lau mamia lau be Iehova dekenai gau ibounai lau henia. Lau karaia gauna badana ta be inai: Mai egu kudouna ibounai ida Iehova lau tomadiho henia.” Louise be mai ena goada ibounai ida ‘ena kudouna ia hagoadaia’ dainai, ena be gabeai gorere badana ia davaria to ia haheaukalaia diba. (Iam. 5:8) Louise ia gwau, “Egu hekwarahi dainai, hari Iehova kahirakahira lau noho.”
Mai Eda Lalona Ibounai Danu Ita Kamonai
17. Dahaka dainai aposetolo edia negai Keristani taudia idia kamonai be gau badana?
17 Paulo ena sisiba—“ita hekwarahi lo taudia ai ita lao totona”—be aposetolo edia negai idia noho Ierusalema bona Iuda Keristani taudia ia durua dika badana ta idia hanaia totona. Unai sisiba idia badinaia taudia be Iesu ena peroveta hereva ena anina idia lalopararalaia, bona ‘ororo dekenai idia heau lao.’ Idia itaia “gabu ia hadikaia gau dika rohorohona . . . be helaga gabuna dekenai ia gini” neganai, anina be, Roma ena tuari oreana ese Ierusalema idia koua hegege bona idia ura idia vareai neganai, idia diba unai gabu heautania negana ia ginidae vadaeni. (Mat. 24:15, 16, NW ) Dubu ena histori ia torea tauna, Eusebius ia gwau, Keristani taudia be Iesu ena peroveta herevana idia badinaia bona Ierusalema idia do hadikaia lasi neganai, idia ibounai be Ierusalema idia heautania bona Gileada ena ororo gabuna ta ladana Pela ai idia noho. Unai bamona idia karaia taudia be Ierusalema dekenai ia vara hisihisi dika rohorohona amo idia roho mauri.
18, 19. (a) Dahaka dainai hari Dirava ita badinaia be gau badana? (b) Stadi gabena ai dahaka do ita herevalaia?
18 Bema ita hekwarahi lo Keristani taudia ai ita lao bona Dirava ita badinaia, ita be Iesu ese ia perovetalaia “hisihisi badana” amo do ita roho mauri. (Mat. 24:21) Vaira negana ai, “kohu naria tauna mai ena kamonai” ese hadibaia herevadia idia halasia neganai, ita be do ita kamonai, a? (Luka 12:42) ‘Mai eda lalona ibounai danu Dirava ena hadibaia hereva ita kamonai henia’ be gau badana!—Roma 6:17.
19 Lo Keristani taudia ai ita lao totona, eda lalona ita hadibaia loulou be gau badana. Unai bamona ita karaia diba bema ita hekwarahi Baibel ita diba namonamo bona ita dibaia gaudia ita badinaia totona. Matamata taudia be lo Keristani taudia ai idia lao totona idia hekwarahi. Stadi gabena ese idia do ia durua dahaka idia karaia totona.
[Footnotes]
a Ladana haida ai haidaua.
b Kahana ta ladana “Mai Goada ida Kara Dika Oi Dadaraia,” October 1, 1999, Gima Kohorona itaia.
Dahaka Oi Dibaia?
• Lo Keristani tauna ese dahaka ia karaia be namo?
• Dahaka dainai ita hekwarahi lo Keristani taudia ai ita lao bona Baibel ita diba namonamo be gau badana?
• Edena dala ai Dirava badinaia karana ita dibaia?
• Dahaka dainai lo Keristani taudia ai ita lao be namo?
[Picture on page 10]
Baibel ena sisiba ita badinaia karana ese ita ia durua hekwakwanai ita hanaia totona
[Picture on page 12, 13]
Aposetolo edia negai Iesu ena sisiba idia badinaia Keristani taudia idia mauri