Baibel ese Taunimanima Edia Mauri Ia Haidaua

Tau ta be ia matamata neganai mariuana bona kuku ania karana ia manadalaia. Edena dala ai unai kara ia rakatania? Dahaka ese dagedage raskol tauna ta ia durua ena badu ia biagua, bona ma haida inai henia karana ia rakatania totona? Mani unai tatau rua edia hereva oi laloa.

INAI TAU

LADANA: HEINRICH MAAR

MAURI LAGANI: 38

TANO: KAZAKHSTAN

GUNA: MARIUANA BONA KUKU IA ANIA MOMO

EGU MAURI GUNANA: Lau be saut Kazakhstan dekenai lau vara, unai hanua ena daudau Tashkent ena siti amo be kilomita 120 bamona. Siahu negana ai unai gabu be ia kaukau bona ia siahu bada (45 degrees Celsius bamona), bona keru negana ai unai gabu be ia paraka momokani (minus 10 degrees Celsius bamona)​​—⁠unai be nega namona grapes bona mariuana hadoa totona.

Egu tama sina be German taudia. Idia be evangelical dubu taudia to edia dubu ena hahediba herevadia idia badinaia lasi. To, Lohiabada Ena Guriguri be lau dekenai idia hadibaia dainai lau gwauraia diba. Egu mauri lagani be 14 neganai, egu sinana bona egu taihuna badana be nega sisina lalonai Iehova ena Witnes taudia ida Baibel idia stadilaia. Nega ta, egu sinana idia stadi henia Witnes taudia rua ese Dirava ena ladana, Iehova, be egu sinana ena Baibel amo idia hahedinaraia, unai lau kamonai neganai lau hoa. To egu sinana be stadi ia rakatania, bona egu ura Dirava dibaia karana dekenai be ia boio. To, gabeai sikuli dekenai, emai tisa be hanaihanai Iehova ena Witnes taudia ia hadikaia totona ia kamonai sivarai koikoidia ia gwauraia. Guna lau be egu taihuna danu Iehova ena Witnes taudia edia hebou haida dekenai ai lao dainai, egu tisa lau hamaoroa ia herevalaia gaudia be koikoi.

Egu mauri lagani be 15 neganai, lau idia siaia hanua ta ladana Leningrad, hari ena ladana be St. Petersburg, Russia dekenai, unuseniai gaukara ta lau dibaia totona. Iehova ena kara haida lau diba dainai egu daiutu turadia dekenai lau herevalaia. To, kuku lau ania matamaia. Egu hanua, Kazakhstan dekenai lau giroa, bona unuseniai mariuana lau hoia be auka lasi, ena be gavamani ese unai ia taravatua. Danu kekero muramura lau inua momo.

Sikuli lau haorea murinai lau be lagani rua lalonai Soviet ami dekenai lau gaukara. To, lau matamata neganai Baibel amo lau dibaia gaudia haida lau do laloatao noho. Nega haida egu ami turadia ida lau herevahereva neganai, idia dekenai Iehova lau herevalaia. Bona haida ese Witnes taudia hadikaia totona koikoi herevadia idia gwauraia neganai, Witnes taudia edia maoro lau herevalaia.

Egu ami gaukara ia ore murinai, Germany dekenai lau lao. Edia tano idia rakatania taudia edia kamepa dekenai lau noho lalonai, Iehova ena Witnes taudia ese idia karaia Baibel stadi bukana ta lau abia. Mai egu ura bada ida unai buka lau duahia bona lau abia dae unai be hereva momokani. To, mariuana bona kuku ania karana lau manadalaia dainai, lau hadokoa diba lasi. Daudau lasi murinai, Karlsruhe ena siti kahirakahira ai ia noho hanua ta dekenai lau lao. Unuseniai Iehova ena Witnes tauna ta lau davaria, bona ia ida Baibel lau stadilaia matamaia.

BAIBEL ESE EGU MAURI IA HAIDAUA DALANA: Nega daudau lalonai lau laloa Baibel be Dirava ena Hereva. Bona kamepa ai lau abia Baibel stadi bukana lau duahia murinai, lau abia dae momokani Baibel ese mai anina bada henanadai ibounai ia haerelaia diba. To, nega daudau lalonai lau hekwarahi egu mauri dalana lau haidaua totona. Gabeai, 2 Korinto 7:1 ai ia noho Baibel ena sisiba ese lau ia hagoadaia, bona egu lalona lau hadaia “tauanina bona lauma hamiroa karadia ibounai” lau rakatania totona, anina be mariuana bona kuku ania karana lau rakatania be namo.

Unai neganai lau be mariuana ania karana lau hadokoa. To hua siks lalonai lau hekwarahi kuku lau rakatania totona. Dina ta lau ia stadi henia Witnes tauna ese lau ia nanadaia, “Emu mauri ena anina be dahaka?” Unai ese lau ia durua egu kuku ania karana lau lalohadailaia totona. Nega haida lau hekwarahi kuku lau ania lasi totona. To, egu lalona lau hadaia kuku ta lau do abia lasi neganai Iehova do lau guriguri henia guna, to kuku lau abia murinai Iehova lau guriguri henia be namo lasi. Lagani 1993 ai, dina ta lau makaia kuku do lau rakatania totona. Iehova ena heduru dainai, unai nega amo ema bona hari kuku ta lau do dogoatao lasi.

NAMO LAU DAVARIA DALANA: Hari lau be mariuana bona kuku dekenai moni bada lau negea lasi bona lau ania lasi dainai, egu tauanina ia goada. Bona Germany ai Iehova ena Witnes taudia edia brens opesi ai volantia gaukara lau karaia noho. Egu mauri lalonai Baibel ena sisiba badinaia karana lau dibaia dainai lau moale! Baibel ena hahediba herevadia lau diba dainai egu mauri be mai anina.

INAI TAU

LADANA: TITUS SHANGADI

MAURI LAGANI: 43

TANO: NAMIBIA

GUNA: DAGEDAGE RASKOL TAUNA

EGU MAURI GUNANA: Lau be Namibia ena not kahana ai ia noho hanua ta ladana Ohangwena dekenai lau tubu daekau. Lagani 1980 murinai ia vara tuarina lalonai, egu hanua taudia be tuari taudia ese idia dadabaia bona idia hamasedia. Egu hanua dekenai, bema mero ta be heatu ia diba namonamo bona memero haida ia dadabaia, taunimanima idia diba ia be tau goadana. Unai dainai lau be heatu dalana lau dibaia!

Sikuli lau haorea neganai, taoni ladana Swakopmund dekenai lau lao bona egu vavana danu lau noho. Unai taoni dekenai lau ginidae murinai, lau be gwau-edeede raskol oreana ta lau bamoa. Nega momo ai be kopi korema taudia idia abia dae lasi hotel o inuinu gabudia dekenai ai lao, heatu ai hamatamaia totona. Nega haida sekuriti bona pulisi taudia ida ai heatu. Lau be hanuaboi ibounai kaia ta lau dogoatao bona lau loaloa, unai amo ta be egu dala ia koua neganai ia lau heatu henia diba.

Hanuaboi ta ai raskol oreana ta ida ai heatu neganai, kahirakahira lau idia alaia. Unai raskol orea tauna ta be egu murina amo ia mai bona ia ura kaia amo egu kwarana ia utua neganai, egu turana ta ese unai tau ia botaia mase. Ena be kahirakahira lau mase, to egu dagedage karadia lau hadokoa lasi. Tau o hahine ta be lau ida ia hepapahuahu neganai, hanaihanai lau be ia lau botaia guna.

BAIBEL ESE EGU MAURI IA HAIDAUA DALANA: Nega ginigunana Iehova ena Witnes hahine ta ida lau hedavari neganai, unai hahine be lau dekenai Salamo karoa 37 ena siri haida ia duahia, bona lau ia hamaoroa Apokalupo bukana ese nega vaira totona gwauhamata namodia haida ia herevalaia. To lau dekenai karoa bona siri ia hadibaia lasi dainai, Baibel ta lau abia bona unai hanuaboi ai Apokalupo bukana ibounai lau duahia. Apokalupo 21:​3, 4 ena gwauhamata herevana lau ura henia, ia gwau: “Mase bona lalohisihisi, bona taitai, bona hisihisi be do idia ore momokani.” Unai Witnes hahine be lau dekenai ia giroa mai neganai, Baibel stadi lau abia dae.

Egu kara bona lalohadai lau haidaua be auka. To Kara 10:​34, 35 ena hereva amo lau diba “Dirava ese taunimanima edia toana ia laloa lasi. To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.” Danu, lau gaukara goada Roma 12:18 ena hereva lau badinaia totona, ia gwau: “Maino karaia daladia umui tahua dala idauidau ibounai dekenai, taunimanima danu mai maino danu do umui noho totona.”

Egu badu biagua karana lau dibaia sibona lasi, to kuku ania karana lau hadokoa danu be namo. Nega momo, mai matana ranu ida Iehova lau guriguri henia lau ia durua totona. Matamanai lau be dala maorona ai gau haida lau karaia lasi, hegeregere lau gwau, kuku orena lau ania bona gabeai do lau guriguri. To lau ia stadi henia Witnes hahine ese lau ia durua neganai, lau laloparara kuku ta lau do abia lasi neganai lau guriguri be namo. Bona kuku idia ania taudia lau bamoa lasi be namo. Danu, egu gaukara turadia dekenai kuku ania karana ena dika lau herevalaia. Unai ese lau ia durua bada, badina unai amo egu gaukara turadia ese lau dekenai kuku idia henia lasi lau ania totona.

Gabeai, kuku ania karana lau hadokoa bona egu mauri gunana lau rakatania. Hua siks lalonai Baibel ena hakaua herevadia lau dibaia bona badinaia murinai, bapatiso lau abia bona Iehova ena Witnes tauna ta ai lau lao.

NAMO LAU DAVARIA DALANA: Lau abia dae momokani Iehova ena Witnes taudia be tomadiho momokani ena kara idia badinaia, badina herevana idia be bese o kopina idauidau taudia, to ta ta idia lalokau henia. Lau do bapatiso lasi neganai, kopi kurokuro Witnes tauna ta ese lau ia boiria iena ruma dekenai ai aniani hebou totona. Unai nega ai lau laloa unai be nihi ta sibona. Badina nega ta lau be kopi kurokuro tauna ta ena ruma ai mai maino ida ai aniani hebou lasi. Hari lau be tanobada hegegemadai ai tadikaka oreana lalonai lau noho.

Guna, sekuriti bona pulisi taudia be lau idia doria toho egu kara bona lalohadai lau haidaua totona, to idia kwalimu lasi. To Baibel sibona ese lau ia durua egu kara lau haidaua bona moale tauna ai lau lao totona.

[Blurb on page 22]

“Nega momo, mai matana ranu ida Iehova lau guriguri henia lau ia durua totona”