Keriso Bamona, Dirava Ita Kamonai Henia Bona Ita Gari Lasi

“Do umui goada noho, badina be lau ese tanobada lau halusia vadaeni.” ​​—⁠IOA. 16:⁠33.

1. Edena dala ai Iesu be Dirava kamonai henia karana ia hahedinaraia?

IESU KERISO be hanaihanai Dirava ena ura ia karaia. Nega ibounai iena guba Tamana ia kamonai henia. (Ioa. 4:​34; Heb. 7:​26) To tanobada ai ia noho neganai, ia dekenai idia vara gaudia ese ena kamonai karana idia tohoa. Iesu be ena haroro gaukara ia hamatamaia neganai, iena inai taudia​—⁠Satani danu​—⁠idia ura iena lalona idia ania, idia doria, o idia koia Iehova ia dadaraia totona. (Mat. 4:​1-​11; Luka 20:​20-​25) Iesu ena inai taudia ese Iesu ena lalona bona tauanina idia hahisia bada. Dokonai ia be satauro dekenai idia hamasea. (Mat. 26:​37, 38; Luka 22:44; Ioa. 19:​1, 17, 18) Unai hisihisi o hahetoho ibounai lalonai, Iesu be “Dirava ia kamonai henia ela bona ia mase.”​​—⁠Filipi 2:8 duahia.

2, 3. Ena be Iesu be hisihisi ia davaria, to Iehova ia kamonai henia karana amo dahaka ita dibaia?

² Iesu be tanobada ai ia noho neganai, Dirava kamonai henia dala matamatadia ia dibaia. (Heb. 5:⁠8) To ita gwau diba Iesu ese Iehova hesiai henia karana ia dibaia vadaeni. Badina lagani milioni momo lalonai ia be Iehova ia bamoa bona Dirava ese gau ibounai ia havaraia neganai, ia be Dirava ena gaukara karaia tauna namona. (Aon. 8:​30) To, tanobada dekenai ena abidadama idia tohoa gaudia ia haheaukalaia neganai, unai ese ia hamomokania ia be Dirava ia badinaia momokani. Iesu, Dirava ena Natuna, ena hetura karana Dirava ida ia goada ia lao. Iena haheitalai amo dahaka ita dibaia?

³ Ena be Iesu be goevadae tauna, to ia sibona ena goada dekenai ia tabekau lasi. Ia be Dirava ia guriguri henia, unai amo heduru ia abia Dirava ia badinaia totona. (Heberu 5:7 duahia.) Dirava ita kamonai henia noho totona, namona be ita danu ita manau bona guriguri karana ita goadalaia. Unai dainai, aposetolo Paulo be Keristani taudia ia sisiba henia: “Keriso Iesu ena laloa bamona umui danu do umui laloa be namo. . . . Ia manau momokani. Bona ia ese Dirava ia kamonai henia ela bona ia mase.” (Fili. 2:​5-8) Iesu ena haheitalai ese ia hahedinaraia, taunimanima be tanobada dikana lalonai Dirava idia badinaia diba. To ita goevadae lasi taudia be goevadae tauna Iesu bamona ita karaia diba, a?

Goevadae Lasi Taudia be Dirava Idia Badinaia Diba

4. Ita be mai eda ura kwalimu ena anina be dahaka?

⁴ Dirava ese Adamu bona Heva ia karaia neganai, idia dekenai aonega bona ura kwalimu ia henia. Ita be idia edia tubudia dainai, ita be mai eda ura kwalimu danu. Unai ena anina be dahaka? Unai ena anina be, kara namo o kara dika karaia ena abia hidi be ita sibona ese ita karaia diba. Eiava ita gwau diba, Dirava ese ita dekenai ura kwalimu ia henia, unai amo do ita abia hidi ia do ita badinaia eiava lasi. Bona ita abia hidi gauna hegeregerena ahuna do ita abia. Momokani, ita abia hidi gauna ese ita ia hamauria diba eiava ita ia hamasea diba. Danu, unai ese ita kahirakahira idia noho taudia ia durua diba eiava ia hadikaia diba.

5. Ita ibounai ita hekwarahi dahaka ita karaia totona? Edena bamona ita kwalimu diba?

⁵ Ita be goevadae lasi taudia dainai, Dirava ita kamonai henia be mai ena hekwarahi. Danu nega momo ita hekwarahi Dirava ena taravatu ita badinaia totona. Paulo danu be ia hekwarahi Dirava ia badinaia totona. Ia gwau: “Egu lalona dekenai taravatu idauna ta ia gaukara noho. Inai taravatu ese egu lalona ia ura henia Taravatuna ia tuari henia noho. Vadaeni inai taravatu, egu lalona dekenai kara dika ia havaraia gauna ese lau ia guia noho.” (Roma 7:​23) Momokani, bema metau o hisihisi ita davaria lasi, Dirava ita kamonai henia be auka lasi. To, bema ita ura Dirava ita badinaia, to “tauanina ena ura dikadia, matabodaga ena ura dikadia” be idia goada be edena bamona? Unai bamona kara dikadia idia vara badina ita be goevadae lasi taudia, bona “tanobada ena lauma” ena laloani karadia be momo bona mai edia siahu. (1 Ioa. 2:​16; 1 Kor. 2:​12) Unai gaudia ita dadaraia totona, iseda ‘kudouna ita hegaegaelaia’ guna be namo. Anina be hekwakwanai o hahetoho ta ia do vara lasi neganai, namona be iseda lalona ita hadaia Iehova do ita badinaia. (Sal. 78:⁠8) Baibel lalonai be edia kudouna idia hegaegaelaia dainai idia kwalimu taudia momo edia sivarai idia noho.​​—⁠Esr. 7:​10, NW; Dan. 1:⁠8.

6, 7. Edena dala ai sibona eda stadi karana ese ita ia durua diba abia hidi maorodia ita karaia totona?

⁶ Eda kudouna ita hegaegaelaia dalana ta be, Baibel bona iseda buka bona magasin ita stadilaia namonamo. Mani inai haheitalai oi laloa: Hari hanuaboi, oi be sibona emu stadi do oi karaia. Unai dainai Iehova oi noia ena lauma helaga amo oi ia durua Baibel amo oi dibaia gaudia oi badinaia totona. To danu, palani oi karaia kerukeru hanuaboi ai TV dekenai muvi ta oi itaia totona. Oi kamonai unai be muvi namona, to danu oi diba unai muvi lalonai matabodaga bona dagedage karadia haida do idia hedinarai.

⁷ Paulo ena sisiba Efeso 5:3 dekenai oi laloa, ia gwau: “Umui be Dirava ena taudia dainai, heudahanai, sihari kava karadia, bona matabodaga, bona kohu ura dikadika kara, be do umui karaia lasi momokani.” Danu, Paulo ena sisiba oi laloatao, unai be Filipi 4:​8 dekenai. (Duahia.) Unai sisiba rua oi laloa neganai, sibona oi nanadaia, ‘Bema egu lalona bona kudouna lau naria namonamo lasi bona unai bamona muvi lau itaia, lau be Iesu bamona Dirava lau badinaia momokani, a?’ Oi be dahaka do oi karaia? Unai muvi do oi itaia sibona, a?

8. Dahaka dainai Iehova ena taravatu ita badinaia be gau badana?

⁸ Reana ita laloa dagedage o matabodaga idia hahedinaraia gaudia ita itaia neganai, dika ta do ita davaria lasi. To bema Iehova ena taravatu ita badinaia lasi, dika ita davaria diba. Taunimanima be daihanai gorere dikana idia davaria lasi totona sibona edia tauanina idia naria namonamo, unai hegeregerena namona be ita bona eda natudia ita naria namonamo, Satani ena “koikoi karadia” ese ita idia hamorua garina.​​—⁠Efe. 6:​11.

9. Dahaka dainai iseda lalona ita hadaia dina ta ta ai Iehova ita badinaia totona?

⁹ Dina ta ta ai ita abia hidi gaudia amo ita hahedinaraia ita ura Iehova ena dala ita badinaia o lasi. To hahemauri ita abia totona, Dirava ita kamonai henia bona ena hakaua herevadia ita badinaia be namo. Keriso be Dirava ia kamonai henia ela bona ia mase, bona ia ita tohotohoa neganai, ita hahedinaraia ita be Dirava ita abidadama henia momokani. Iehova ita kamonai henia dainai, ia ese ita dekenai ahuna namona do ia henia. Iesu ia gwauhamata: “Ia haheauka ela bona dokona tauna be do ia roho mauri.” (Mat. 24:​13, NW ) Momokani, Iesu bamona do ita gari lasi.​​—⁠Sal. 31:⁠24.

Iesu​​—⁠Gari Lasi Karana Dekenai Haheitalai Namona Ia Hahedinaraia

10. Edena bamona hahetoho ita davaria? Dahaka ita karaia be namo?

¹⁰ Ena be ita be kara dikadia idia karaia taudia huanai ita noho, to namona be mai gari lasi ida kara mirodia ita dadaraia. Reana haida ese Keristani taudia idia doria kara dikana ta o tomadiho koikoi ena kara ta o kastom kara kererena ta idia karaia totona eiava moni ena hekwakwanai do idia davaria. Unai ese ita idia tohoa diba Iehova ena dala maorodia ita dadaraia totona. Momo be edia ruma bese amo dagedage idia davaria. Tano haida dekenai, sikuli momo be evolusen idia hadibaia goadagoada, bona taunimanima momo be Dirava ia noho lasi lalohadaina idia abia dae. Unai bamona hahetoho idia vara neganai, do ita gini sibona bona gau ta ita karaia lasi, a? Lasi, namona be kara ta ita karaia, unai amo unai hahetoho ita hanaia bona ita sibona ita gimaia. Iesu ena haheitalai ese ia hahedinaraia edena bamona ita karaia totona.

11. Iesu ena haheitalai ita laloa karana ese edena dala ai ita do ia durua ita gari lasi totona?

¹¹ Iesu be ena hahediba taudia ia hamaoroa: “Tanobada dekenai umui be hisihisi do umui abia. To, do umui goada noho, badina be lau ese tanobada lau halusia vadaeni.” (Ioa. 16:33) Iesu be mai ena goada ida tanobada ena lalohadai bona kara ia dadaraia. Ia be ena haroro gaukara ia karaia, tomadiho maorona ia badinaia, bona kara maorodia ia karaia neganai, ia ura lasi tanobada taudia ese ia idia koua o hakaua kerere. Ita danu be Iesu bamona ita karaia be namo. Ia ese ena guriguri lalonai ena hahediba taudia be inai bamona ia herevalaia: “Idia be tanobada ena lasi, lau hegeregerena, lau be tanobada ena lasi.” (Ioa. 17:16) Keriso ena gari lasi karana ita stadilaia bona laloa dobu neganai, unai ese ita do ia durua mai gari lasi ida inai tanobada ita dadaraia totona.

Iesu Ena Gari Lasi Karana amo Diba Ita Abia

12-14. Iesu ena gari lasi karana ena haheitalai ta oi gwauraia.

¹² Iesu be mai gari lasi ida ena hesiai gaukara ia karaia. Ia be Dirava ena Natuna dainai, mai gari lasi ida dubu Helaga dekenai “ia raka vareai, vadaeni unuseni idia hoihoi taudia ibounai ia luludia murimuri dekenai. Moni idia senisia taudia edia pata, bona pune manu idia hoia taudia edia helai gaudia ia bubua.” (Mat. 21:12) Iesu ena hanuaboi ginigabena ai tuari taudia be ia idia dogoatao gwauraia neganai, Iesu be ena hahediba taudia ia gimaia, bona mai gari lasi ida ia gwau: “Umui tahua tauna be lau inai, lauegu diba tahua taudia be inai, mani do idia lao.” (Ioa. 18:⁠8) Gabeai, Iesu ese Petero ia hamaoroa ena kaia be udaia gabuna dekenai ia atoa lou totona, unai amo Iesu ese ia hahedinaraia ia be tuari gaudia dainai lasi, to Iehova dekenai ia tabekau dainai ia gini goada diba.​​—⁠Ioa. 18:⁠11.

¹³ Iesu be mai gari lasi ida ena negai idia noho hadibaia koikoi taudia edia kara bona edia koikoi hahediba herevadia ia hahedinaraia. Iesu ia gwau: “Taravatu hadibaia taudia bona Farisea taudia, kara koikoi taudia, dika do umui davaria momokani! Badina Guba Basileia ena iduara be taunimanima edia vairana dekenai umui koua. . . . Taravatu ena hereva badadia, kota henia, bona bogahisihisi, bona abidadama, umui negea . . . kapusi bona mereki edia murina kahana sibona umui huria goevagoeva, to edia lalona kahana be dadia kara bona lebulebu kara dekenai idia honu momokani.” (Mat. 23:​13, 23, 25) Iesu ena hahediba taudia idia gari lasi be namo, badina gabeai koikoi tomadiho gunalaia taudia ese idia haida do idia dagedage henia bona hamasea.​​—⁠Mat. 23:34; 24:⁠9.

¹⁴ Iesu be demoni dekenai ia gari lasi. Nega ta, demoni ese idia biagua tauna ta ia davaria, unai tauna ena goada be bada dainai tau ta ese seini amo ia koua be hegeregere lasi. To Iesu be mai gari lasi ida unai tauna idia biagua demoni momo ia luludia. (Mar. 5:​1-​13) Hari inai negai, Dirava ese Keristani taudia dekenai siahu ia henia lasi unai bamona hoa karadia idia karaia totona. To, iseda haroro bona hadibaia gaukara lalonai, namona be abidadama lasi taudia edia lalona ia hadiburaia tauna Satani ita tuari henia. (2 Kor. 4:⁠4) Iesu ia karaia bamona, iseda tuari gaudia be “tanobada ena tuari gaudia bamona lasi. Lasi, to Dirava dekena amo ia mai siahuna” ita gaukaralaia “tanobada ena siahu”​​—⁠taunimanima ese idia abia dae tomadiho edia lalohadai koikoidia​​—⁠ita dadaraia totona. (2 Kor. 10:⁠4) Dirava ese ita dekenai ia henia tuari gaudia ita gaukaralaia namonamo neganai, ita be Iesu ena haheitalai ita tohotohoa unai.

15. Dahaka dainai Iesu be ia gari lasi?

¹⁵ Iesu be ena goada dekenai ia tabekau lasi, to Iehova ia abidadama henia dainai ia gari lasi. Iesu bamona ita karaia be namo. (Mar. 4:​40) Edena dala ai abidadama goadana ita abia diba? Iesu ena haheitalai ese ita do ia hakaua. Iesu ia hahedinaraia ia be Baibel ia diba namonamo bona Baibel ia abidadama henia momokani. Iesu ese Dirava ena Hereva be tuari kaia ta bamona ia gaukaralaia. Hanaihanai ena hereva be Baibel amo ia hamomokania. Nega momo ia gwau: “Buka Helaga lalonai ia torea vadaeni.”a

16. Edena dala ai iseda abidadama ita hagoadaia diba?

¹⁶ Bema ita ura iseda abidadama ia goada bona hahetoho ita haheaukalaia, namona be hanaihanai Baibel ita duahia bona stadilaia, Keristani heboudia dekenai ita lao, bona hereva momokani​—⁠abidadama ena badina​—⁠ita laloatao noho. (Roma 10:17) Namona be ita dibaia gaudia ita laloa dobu, unai amo iseda kudouna lalonai do ia vareai. Abidadama ese ita ia durua diba mai gari lasi ida kara maorona ta ita karaia totona. (Iam. 2:​17) Bona namona be lauma helaga totona ita guriguri, badina abidadama be lauma helaga ena huahua ta.​​—⁠Gal. 5:​22.

17, 18. Edena dala ai taihu Kitty be sikuli gabuna ai gari lasi karana ia hahedinaraia?

¹⁷ Taihu matamata ta ladana Kitty ia davaria Dirava ia abidadama henia momokani tauna be ia gari lasi. Ia maragi neganai, ia diba sikuli ai namona be ‘sivarai namona dekenai ia hemarai lasi,’ bona ia ura dikadika ena klas turadia ia haroro henidia. (Roma 1:​16) Lagani ta ta ai, ia ura ma haida dekenai sivarai namona ia harorolaia, to ia gari dainai unai bamona ia karaia be auka. Ia bada neganai, ena sikuli ia haidaua. Ia gwau: “Guna lau karaia lasi karana be hari do lau karaia momokani.” Kitty ia guriguri, unai amo Keriso bamona do ia gari lasi, do ia aonega bona nega namona ai do ia haroro totona.

¹⁸ Sikuli dinana ginigunana ai, stiuden ta ta be sibodia edia ladana bona mauri sivaraina do idia gwauraia hedinarai. Haida be edia dubu ladana idia herevalaia, to idia gwau edia tomadiho dalana idia badinaia lasi. Kitty ia laloparara ia gurigurilaia nega namona be ia ginidae inai. Iena nega ia ginidae neganai, mai gari lasi ida ia gwau: “Lau be Iehova ena Witnes kekenina ta, bona nega ibounai Baibel ese lau ia durua tomadiho maorona lau badinaia bona kara maorodia lau karaia totona.” Ia hereva noho lalonai, haida be edia vairana toana amo idia hahedinaraia Kitty be kavakava bona ena abidadama be anina lasi. To haida be idia kamonai namonamo bona gabeai henanadai idia henia. To tisa ia gwau Kitty be haheitalai namona, badina mai gari lasi ida ena abidadama ia gwauraia hedinarai. Kitty be Iesu ena gari lasi haheitalaina amo diba ia abia dainai ia moale.

Keriso Bamona Gari Lasi Bona Abidadama Hahedinaraia

19. (a) Iseda abidadama ia goada totona, dahaka ita karaia be namo? (b) Edena dala ai Iehova ita hamoalea diba?

¹⁹ Aposetolo taudia idia laloparara danu idia gari lasi totona abidadama idia hahedinaraia be namo. Iesu idia noia: “Aiemai abidadama oi habadaia.” (Luka 17:​5, 6 duahia.) Abidadama korikori be inai: Ita abia dae Dirava ia noho, bona eda hetura karana Iehova ida ia goada, natuna ta be ena lalokau bona hebogahisi tamana ida ia hetura namonamo bamona. Lauma helaga ena siahu amo Solomona ia gwau: “Egu natuna tau e, bema oiemu kudouna be mai ena aonega, unai neganai egu lalona do ia moale. Oi ese hereva maoromaoro do oi gwauraia neganai, egu laumana be do ia moale.” (Aon. 23:​15, 16) Unai dainai, mai gari lasi ida kara maoromaoro taravatudia ita badinaia neganai, Iehova ia moale bona unai ita diba dainai ita gari lasi. Unai dainai, namona be nega ibounai Iesu ena haheitalai ita tohotohoa bona mai gari lasi ida kara maoromaoro ita badinaia!

[Footnote]

Anina Oi Gwauraia Diba, A?

• Ena be ita be goevadae lasi taudia, to dahaka ese ita do ia durua Dirava ita badinaia noho totona?

• Abidadama korikori ena badina be dahaka? Edena dala ai unai ese ita ia durua diba ita gari lasi totona?

• Bema Dirava ita kamonai henia bona Keriso bamona ita gari lasi, dahaka ahuna namona do ita abia?

[Picture on page 13]

Emu ‘kudouna oi hegaegaelaia’ hahetoho oi dadaraia totona, a?

[Picture on page 15]

Iesu bamona, ita be mai eda abidadama dainai ita gari lasi