Emu Natudia Oi Durua Idia Davaria Hahetoho Ibounai Idia Hanaia Totona

ISEDA matamata taudia be hahetoho momo idia davaria. Satani ena tanobada dikana ena lalohadai ese idia veria toho, bona “matamata taudia ese vaia idia abia ura idauidau” dainai idia hekwarahi. (2 Tim. 2:​22, NW; 1 Ioa. 5:​19) Danu, idia gaukara goada edia Havaraia Tauna Badana idia laloatao dainai, edia tomadiho idia inai henia taudia ese idia kirikirilaia​—⁠idia hereva dika henidia danu. (Had. 12:⁠1) Tadikaka ta ladana Vincent, be ena maragi negana ia laloa lou neganai, ia gwau: “Lau be Witnes merona dainai, nega momo haida be lau do idia hereva dika henia, hagaria, o idia ura lau idia heatu henia. Nega momo unai kara dikadia dainai, lau ura lasi sikuli dekenai lau lao.”a

Natudia be tanobada amo hahetoho idia abia sibona lasi, to reana idia sibona edia ura​—⁠edia turana ida idia hegeregere urana​—⁠idia tuari henia danu. Cathleen, ena mauri lagani be 16, ia gwau: “Ma haida amo lau idau be ia auka.” Matamata tadikaka ta ladana, Alan, ia gwau: “Wikeni ai nega momo egu sikuli turadia ese lau idia boiria idia lau bamoa totona, bona lau ura dikadika idia lau bamoa.” Ma danu, matamata taudia idia ura sikuli ena spot gadara idauidau lalonai idia vareai​—⁠unai ura be ia goada​—⁠bona unai ese haida ia veria hebamo dikana lalonai idia vareai haraga totona. Matamata taihu ta ladana, Tanya, ia gwau: “Spot gadara lau ura henia dikadika. Nega momo sikuli ai spot gadara hadibaia taudia be lau idia hagoadaia tim ta ai lau gadara totona. Unai lau dadaraia be auka.”

Edena dala ai emu natudia oi durua diba idia davaria hahetoho ibounai idia hanaia totona? Iehova be tama sina ia hagania edia natudia idia hakaua totona. (Aon. 22:6; Efe. 6:⁠4) Dirava idia gari henia tama sina edia tahua gauna badana be inai: Edia natudia edia kudouna lalonai Iehova badinaia urana idia atoa. (Aon. 6:​20-​23) Unai ese natudia do ia durua, tanobada ena laloani karadia bona herevadia idia dadaraia totona, herevana edia tama sina ese idia itaia lasi.

Tama sina dekenai, ia be auka nega tamona lalonai moni gaukara idia karaia, ruma bese idia naria bona kongrigeisen ena gaukara idauidau idia karaia totona. Unai bamona idia karaia tama o sina haida be adavana lasi eiava haida be edia Witnes lasi adavana ese idia dagedage henia. To, Iehova ia ura tama sina be nega idia atoa edia natudia idia durua bona hadibaia totona. Unai dainai, dahaka oi karaia diba, unai amo emu natudia oi durua dina ta ta ai edia turadia edia laloani karadia o herevadia, hahetoho, bona dagedage karadia idia dadaraia totona?

Iehova Oi Tura Henia

Gau ginigunana be inai: Namona be iseda matamata taudia idia diba Iehova be Dirava momokanina. Namona be idia ita durua unai amo “ita itaia diba lasi Diravana” do idia itaia bamona. (Heb. 11:27) Vincent, matamanai ita herevalaia merona, be ena tama sina ese idia durua, Iehova ia tura henia noho dalana ia laloatao. Ia gwau: “Idia ese lau idia hadibaia guriguri be mai anina bada. Lau laloatao, lau maragi neganai, hanuaboi ta ta ai Iehova dekenai lau guriguri murinai lau mahuta. Lau dekenai Iehova be Dirava momokanina.” Oi be emu natudia danu oi guriguri hebou, a? Idia guriguri neganai, Iehova dekenai idia gwauraia herevadia oi kamonai, a? Idia be hereva tamona idia gwauraia loulou, a? Eiava edia guriguri amo idia hahedinaraia idia be Iehova idia laloa bada, a? Bema edia guriguri oi kamonai henia, do oi laloparara idia be Iehova idia tura henia eiava lasi.

Gau iharuana be inai: Matamata taudia be Iehova kahirakahira idia lao totona, Baibel idia duahia hanaihanai be gau badana. Cathleen, matamanai ita herevalaia kekenina, ia gwau: “Lau matamata neganai Baibel duahia karana ese lau ia durua bada. Unai ese egu lalona ia hagoadaia dainai, ena be taunimanima ese lau do idia dagedage henia, to Iehova be lau ia durua.” Emu natudia be mai edia Baibel duahiduahi sediual, a?​​—⁠Sal. 1:​1-3; 77:⁠12.

Momokani, tama sina edia hakaua dalana dekenai, natudia edia lalohadai bona kara be idauidau. Danu, natudia be edia mauri lagani hegeregerena, orea lalonai idia goada idia lao haraga o metairametaira idia goada idia lao. To, bema tama sina ese natudia idia hadibaia lasi, natudia do idia diba lasi Iehova be Dirava momokanina. Tama sina be edia natudia dekenai Dirava ena hereva idia hadibaia goada, unai amo natudia be Iehova ena hereva idia kamonai bamona, herevana edeseniai idia noho. (Deu. 6:​6-9) Namona be emu natudia idia abia dae momokani Iehova be idia edia namo ia laloa bada.

Herevahereva​—⁠Mai Anina Gauna ai Oi Halaoa Dalana

Gau ihatoina be inai: Herevahereva karana amo emu natudia do oi durua. Oibe, herevahereva namonamo karana be emu natudia oi hereva henia sibona lasi. To herevahereva daladia haida be inai: Natudia dekenai henanadai haida oi henia bona edia haere oi kamonai namonamo​​—⁠ena be edia haere be oiemu lalohadai hegeregerena lasi. Anne be sina ta mai ena natuna memero rua, bona ia gwau: “Egu natudia dekenai henanadai idauidau lau henia ela bona edia lalohadai bona mauri dalana lau lalopararalaia.” Emu natudia idia itaia oi be edia hereva oi kamonai henia, a? Tanya, matamanai ia hereva kekenina, ia gwau: “Egu tama sina be lauegu hereva idia kamonai henia bona ai herevalaia gaudia idia laloatao. Egu klas turadia edia ladana idia diba. Idia bona gau ma haida totona idia henanadai.” Herevahereva namonamo karana lalonai, kamonai bona hereva laloatao karadia be mai anina bada.

Ruma bese momo idia davaria, aniani negana be nega namona idia herevahereva namonamo totona. Vincent ia gwau: “Emai ruma bese taudia idia aniani hebou be mai anina bada. Aniani negadiai, emai tama sina idia ura ai ibounai ai helai bona ai aniani hebou. Idia ura lasi aniani negadiai TV ai raraia, reidio ai kamonai henia, o buka ai duahia. Nega momo ai be anina bada lasi gaudia ai herevalaia hebou dainai, unai ese dina ta ta ai lau ia durua sikuli dekenai lau davaria hahetoho idauidau lau hanaia totona.” Ma ia gwau: “Aniani negadiai egu tama sina ida ai herevahereva karana lau manadalaia dainai, bema hekwakwanai badana ta ia vara bona edia heduru lau abia be namo, vadaeni ia auka lasi idia dekenai unai lau herevalaia totona.”

Oi sibona oi nanadaia, ‘Wiki ta lalonai, lau be nega hida egu ruma bese ida ai aniani hebou?’ Bema unai kahana oi hanamoa, unai ese dala do ia kehoa emu natudia ida umui herevahereva namonamo totona, a?

Dahaka Dainai Ruma ai Haheitalai Haida Ita Karaia be mai Anina Bada?

Danu, wiki ta ta ai, Ruma Bese Ena Tomadiho negana ese ruma bese ia durua idia herevahereva hebou totona, bona unai ese natudia do ia durua do idia davaria hekwakwanai idia hanaia totona. Alan, matamanai ita herevalaia merona, ia gwau: “Ruma Bese Ena Tomadiho negana ai, emai tama sina be ai idia hagoadaia emai lalohadai ai gwauraia totona. Idia ese ai davaria hahetoho gaudia idia herevalaia.” Alan ena sinana ia gwau: “Stadi negadia haida ai, haheitalai ai karaia. Unai haheitalai ese emai natudia ia durua edia abidadama do idia herevalaia dalana idia dibaia, bona do idia hamomokania idia abia dae gauna be momokani. Unai ese idia dekenai goada ia henia gabeai do idia davaria hahetoho idia hanaia totona.”

Momokani, natudia edia turadia ese laloani herevadia idia gwauraia neganai, idia dadaraia sibona be hegeregere lasi. Namona be henanadai haerelaia dalana idia dibaia, hegeregere dahaka dainai bona dahaka dainai oi ura lasi. Danu, namona be idia diba dahaka do idia karaia bema ma haida ese edia abidadama karadia idia kirikirilaia. Bema unai bamona idia karaia lasi, do ia auka tomadiho momokani lalonai idia gini goada totona. Ruma ai umui karaia haheitalai ese natudia do ia durua idia gini goada totona.

Rau 18 ena maua lalonai be Ruma Bese Ena Tomadiho negana ai umui haheitalaia diba gaudia haida ia herevalaia. Ia vara momokani gauna unai umui haheitalaia, hegeregere oi be henanadai oi henia bona natuna ese ia haerelaia toho. Ma danu, Baibel ese ia gwauraia taudia edia sivarai ese natudia do ia durua daladia haida umui herevalaia. Ruma dekenai unai bamona hadibaia dalana ese natudia do ia durua, sikuli o gabu ma haida ai idia davaria hahetoho ibounai idia hanaia totona.

Ruma​—⁠Gabu Namona

Emu ruma be gabu namona dainai, emu natudia idia ura sikuli ia ore dinadia ta ta murinai, maoromaoro ruma dekenai idia giroa, a? Bema emu ruma be gabu namona, vadaeni unai ese emu natuna do ia durua dina ta ta ai ia davaria hahetoho ia haheaukalaia totona. Taihu ta, hari Betele ai ia gaukara, ia gwau: “Lau tubu daekau noho neganai, lau ia durua gauna be, emai ruma be gabu namona. Herevana sikuli dekenai hahetoho dikadia lau davaria, to lau diba, ruma dekenai lau giroa lou neganai, gau ibounai be do idia namo.” Emu ruma dekenai dahaka kara umui hahedinaraia? Ia be “badu loulou, heiriheiri, [bona] hapararaia” gabuna, eiava “lalokau, moale, [bona] maino” gabuna, a? (Gal. 5:​19-​23, NW ) Bema nega momo maino ia noho lasi, namona be oi tahua dahaka gaudia oi haidaua, unai amo emu natudia do idia itaia emu ruma be gabu namona.

Emu natudia oi durua hahetoho idia hanaia dalana namba foa be inai: Dala oi karaia emu natudia ese taunimanima namodia idia bamoa totona. Hegeregere, emui ruma bese ida moale karadia umui karaia neganai, kongrigeisen amo lo tadikaka bona taihu haida umui boiria danu, a? Eiava ruma dekenai aniani oi hegaegaelaia neganai, loaloa naria tauna o ful-taim hesiai gaukara idia karaia taudia haida oi boiria danu, a? Oi laloa edena misinari o Betele tadikaka o taihu ese emu natudia ia bamoa, revareva idia torea heheni, e-mail idia siaia heheni, o nega ta ta ai telefon amo idia herevahereva totona? Unai bamona taudia edia hetura karana ese emui natudia do idia durua dala maorona idia badinaia bona Iehova ena orea lalonai tahua gaudia namodia idia atoa totona. Aposetolo Paulo ese matamata tauna Timoteo ia durua namonamo dalana mani oi laloa. (2 Tim. 1:​13; 3:​10) Paulo ena hebamo karana ese Timoteo ia durua mai anina bada gaudia ia laloa bada totona.​​—⁠1 Kor. 4:​17.

Emu Natuna Oi Hanamoa

Iehova ia moale badina ia itaia matamata taudia haida be idia gini goada bona kara maoromaoro idia karaia, herevana Satani ena tanobada ai lalona veria gaudia be momo. (Sal. 147:11; Aon. 27:11) Reana oi danu oi moale badina oi itaia eda matamata taudia be aonega dalana idia abia hidi. (Aon. 10:⁠1) Namona be emu natudia oi hadibaia oi be idia dekenai oi moale, bona hanamoa herevadia oi gwauraia. Iehova be tama sina dekenai haheitalai namona ia hahedinaraia. Iesu ia bapatiso neganai, Iehova ia gwau: “Oi be lauegu Natuna. Lau lalokau henia oi. Lau moale bada oi dekenai.” (Mar. 1:​11) Reana Iesu be ena Tamana ena hereva ese ia hagoadaia vaira neganai ia davaria hahetoho momo ia haheaukalaia totona! Unai hegeregerena, namona be emu natudia oi hadibaia oi be idia oi lalokau henia, bona edia gaukara namona dainai idia oi hanamoa.

Momokani, emui natudia be edia turadia ese do idia tohoa, dagedage henia, bona kirikirilaia noho. To, idia umui durua noho be namo. Edena dala ai? Idia umui durua edia hetura karana Iehova ida idia hagoadaia totona. Idia ida mai anina bada gaudia umui herevalaia hebou. Ruma Bese Ena Tomadiho negana ai idia umui durua namonamo, bona emui ruma be gabu namona ai umui halaoa. Unai bamona umui karaia neganai, unai ese emui natudia do ia durua idia davaria hahetoho ibounai idia hanaia totona.

[Footnote]

[Box/Picture on page 18]

HAHEITALAI ESE NATUDIA IA DURUA DIBA

Henunai be eda natudia ese idia davaria hahetoho haida idia noho. Namona be emui Ruma Bese Ena Tomadiho negana lalonai unai gaudia haida umui haheitalaia.

▸ Spot gadara hadibaia tauna ese emu natuna kekeni ia noia sikuli ena tim ta dekena ia vareai totona.

▸ Emu natuna merona be sikuli ia ore bona ruma dekenai ia giroa lou lalonai, ena turana ta ese kuku ia henia toho.

▸ Memero haida ese emu natuna idia hagaria, idia gwau do idia botaia bema ia ese haroro gaukara ia karaia lou.

▸ Emu natuna kekeni be ruma-ta-ruma-ta haroro gaukara ia karaia neganai, ena sikuli turana ta ia davaria.

▸ Klas taudia vairanai, tisa be emu natuna kekeni ia nanadaia dahaka dainai pepe ia saluti henia lasi.

▸ Mero ta ese emu natuna ia kirikirilaia badina ia be Witnes merona.

[Picture on page 17]

Emu natudia be mai edia Baibel duahiduahi sediual, a?

[Picture on page 19]

Emui moale karadia lalonai lo tadikaka taihu haida oi boiria danu, a?