“Lauma Helaga Bona Headava Matamata Hahine Idia Gwau, ‘Oi Mai’ ”
“Lauma Helaga bona Headava Matamata Hahine idia gwau, ‘Oi mai.’ . . . Ranu mase taudia, umui mai. Bona ranu umui ura henia taudia, mauri ranuna do umui abia dae, ia be davana lasi.”—APOK. 22:17.
1, 2. Iseda mauri ai Basileia gaudia be edena bamona ita laloa, bona dahaka dainai?
ISEDA mauri lalonai Basileia gaudia be edena bamona ita laloa? Iesu ese ena hahediba taudia ia hagoadaia ‘Dirava ena Basileia idia tahua guna’ totona. Unai bamona idia karaia neganai, Dirava ese edia dabu gaudia do ia henia. (Mat. 6:25-33) Dirava ena Basileia be hoihoi tauna ta bamona dava bada nadi ia davaria neganai, “iena gau ibounai ia hoia lao, unai nadi namo herea ia hoia” totona. (Mat. 13:45, 46) Ita ese Basileia harorolaia bona hahediba taudia halaoa gaukarana ita laloa bada be namo.
2 Stadi ginigunadia rua ai ita itaia bamona, haroro gaukara lalonai mai goada danu ita hereva bona Baibel ita gaukaralaia namonamo ese ia hahedinaraia ita be Dirava ena lauma helaga ese ia hakaua. Lauma helaga ese ita ia durua bada Basileia harorolaia gaukara ita karaia totona. Hari, lauma helaga ese ita ia durua dalana do ita itaia.
Taunimanima Ibounai Ia Boiria!
3. Edena bamona ranu inua totona taunimanima idia boiria idia “mai”?
3 Lauma helaga be taunimanima ibounai ia boiria. (Apokalupo 22:17 duahia.) Inai boiboi herevana be “oi mai” bona ranu mase tauna dekenai ranu idauna henia ia inua totona. Unai ranu be ranu korikorina lasi. Ranu be mai anina bada tanobada ai mauri gaudia durua totona, to Iesu be Samaria hahine dekenai ia herevalaia ranu be ranu idauna, ia gwau: “Lau ese do lau henia ranuna do ia inua tauna be do ia ranu mase lasi ia lao bona hanaihanai. Lau ese do lau henia ranuna be inai tau lalonai, sinavai bamona do ia heau noho, bona mauri ranuna do ia henia. Ma mauri hanaihanai danu do ia henia.” (Ioa. 4:14) Taunimanima idia boiria unai ranu idia inua totona be mauri hanaihanai ia henia.
4. Dahaka dainai unai mauri ranuna ita abia be mai anina bada, bona ranu ese dahaka ia laulaulaia?
4 Unai mauri ranuna ita abia be namo badina Adamu bona Heva be edia havaraia tauna, Iehova Dirava, idia gwau-edeede henia. (Gen. 2:16, 17; 3:1-6) Dirava ese Adamu bona Heva be unai uma namona amo ia lulua, unai amo Adamu be “kara namo bona kara dika ia diba. Mauri auna ena huahua do ia ania noho be ia dika, mauri hanaihanai ia abia garina.” (Gen. 3:22) Taunimanima ibounai be Adamu amo idia mai dainai, mase idia davaria. (Roma 5:12) Mauri ranuna be Dirava ese ia henia gaudia ibounai ia laulaulaia, unai amo kara maoromaoro taudia be kara dika bona mase amo ia ruhadia bona tanobada Paradaiso ai mauri hanaihanai idia abia diba. Dirava ese ia henia gaudia ibounai be Iesu Keriso ena mase davalaia boubouna dainai ita abia.—Mat. 20:28; Ioa. 3:16; 1 Ioa. 4:9, 10.
5. Inai boiboi herevana “oi mai” bona “mauri ranuna do umui abia dae” be daika amo? Gwauraia hedinarai.
5 Boiboi herevana “oi mai” bona “mauri ranuna do umui abia dae” be daika amo? Iesu ena amo idia mai mauri gaudia be Keriso ena Lagani 1,000 Lohia Negana ai do idia guguru, idia be “mauri ranuna ena sinavai . . . galasi bamona ia diaridiari.” Unai sinavai be “Dirava bona Mamoe ena Natuna edia helai gabuna badana dekena amo ia heau lao.” (Apok. 22:1) Unai dainai Mauri Henia Tauna, Iehova, be unai mauri ia henia ranuna ena Badina. (Sal. 36:9) Ia ese “Mamoe Natuna” amo dala ia karaia taunimanima ese unai ranu idia abia totona. (Ioa. 1:29) Unai sinavai ese ia laulaulaia gauna be Iehova ese Adamu ena kara dika dainai taunimanima ese idia davaria hisihisi ibounai do ia haorea. Oibe, Iehova Dirava be unai boiboi herevana “oi mai” ena Badina.
6. Edena negai “mauri ranuna ena sinavai” ia aru matamaia?
6 Ena be “mauri ranuna ena sinavai” be Keriso ena Lagani 1,000 Lohia Negana ai do ia aru badabada, to “Lohiabada ena dina” o lagani 1914 ai “Mamoe Natuna” be guba ai ia king neganai, unai ranu ia aru matamaia. (Apok. 1:10) Unai dainai, unai nega murinai mauri gaudia ita abia matamaia. Unai gauna ta be Dirava ena Hereva, Baibel, badina ena hereva be “ranu” bamona. (Efe. 5:26) Taunimanima ibounai ese inai boiboi herevana idia abia dae bona “mauri ranuna” idia inua dalana be, Basileia ena sivarai namona idia kamonai henia bona idia badinaia. To Lohiabada ena dina ai daika ese unai boiboi gaukarana do ia karaia?
“Headava Matamata Hahine” Ia Gwau, “Oi Mai”
7. Daidia be “Lohiabada ena dina” lalonai unai boiboi herevana “oi mai” idia gwauraia guna, bona daika dekenai?
7 Headava matamata hahine ena orea taudia—horoa Keristani taudia danu—be unai boiboi herevana idia gwauraia, “Oi mai.” Daika dekenai? Headava matamata hahine be sibona dekenai inai hereva, “Oi mai” ia gwauraia lasi. To, “Siahu Ibounai Diravana ena Dina Badana” ena tuari murinai, tanobada ai mauri hanaihanai do idia abia taudia dekenai unai hereva ia gwauraia.”—Apokalupo 16:14, 16 duahia.
8. Dahaka ese ia hahedinaraia, lagani 1918 amo ema bona hari horoa Keristani taudia be Iehova ena boiboi herevana harorolaia gaukarana idia karaia?
8 Keriso ena murinai idia raka horoa taudia be lagani 1918 amo ema bona hari unai boiboi herevana idia gwauraia noho. Unai lagani ai, pablik tok ladana “Hari Idia Mauri Noho Taunimanima Milioni Momo be Do Idia Mase Lasi” ese momo ia hagoadaia, Aramagedono murinai tanobada paradaisona dekenai mauri do idia abia totona. Lagani 1922 ai, Cedar Point, Ohio, U.S.A. dekenai, Bible Students taudia edia hebouhebou ai, idia henia tok ta ese kamonai taudia ia hagoadaia ‘king bona ena Basileia idia harorolaia totona.’ Unai ese headava matamata hahine ena orena taudia ia hagoadaia taunimanima momo idia boiria mai totona. The Watchtower, March 15, 1929, ena kahana ta ladana “Mai Hebogahisi ida Boiria Mai Herevana,” ena sinado be Apokalupo 22:17 amo idia abia. Inai magasin ena kahana ta ia gwau: “Kamonai orena taudia be unai boiboi herevana idia durua, idia gwau, ‘Oi mai.’ Gau badana be unai hereva be kara maoromaoro bona hereva momokani idia ura henia taudia dekenai idia harorolaia. Harihari idia karaia be gau badana.” Ema bona hari iseda negai, headava matamata hahine be unai boiboi herevana ia henia noho.
“Inai Hereva Idia Kamonai Taudia Danu, Namona be Idia Gwau, ‘Oi Mai’ ”
9, 10. Edena dala ai unai boiboi herevana idia abia dae taudia be idia gwau danu, “Oi mai”?
9 Inai boiboi herevana “oi mai” idia abia dae taudia be dahaka do idia karaia? Idia danu be do idia gwau, “Oi mai.” Hegeregere, The Watchtower, August 1, 1932, ena rau 232 ai ia gwau: “Namona be horoa taudia ese Basileia ena sivarai namona idia ura harorolaia taudia ibounai edia lalona idia hagoadaia. Lohiabada ena sivarai idia harorolaia taudia be horoa taudia sibona lasi. Hari, Iehova ena horoa witnes taudia idia diba, mauri ranuna be Aramagedono amo do idia roho mauri bona Iehova ena hariharibada dainai mauri hanaihanai tanobada dekenai do idia abia taudia dekenai do idia henia be namo.”
10 The Watchtower, August 15, 1934, rau 249 ai, unai boiboi herevana ia kamonai tauna ena maduna ia herevalaia, ia gwau: “Gau badana be Ionadaba oreana taudia be Iehu oreana taudia danu, anina be horoa taudia danu, idia gaukara hebou bona Basileia sivaraina idia harorolaia, ena be idia be Iehova ena horoa witnes taudia lasi.” Lagani 1935 ai, Apokalupo 7:9-17 ese ia herevalaia hutuma bada taudia idia gwauraia hedinarai. Unai ese taunimanima boiria gaukarana ia durua bada. Unai nega amo, hutuma bada taudia edia namba ia bada daekau—hari be 7 milioni mai kahana—be unai boiboi herevana idia abia dae. Sivarai namona idia kamonai murinai, Dirava dekenai edia mauri idia gwauhamatalaia, ranu bapatiso idia abia, bona headava matamata hahine oreana idia bamoa ma haida idia boiria, ‘idia mai bona mauri ranuna idia abia dae, ia be davana lasi.’
“Lauma Helaga” Ia Gwau, “Oi Mai”
11. Aposetolo edia negai, edena dala ai lauma helaga ese haroro gaukara ia durua?
11 Iesu be Nasareta ena dubu ai ia haroro neganai, Isaia ena lokua bukana ia kehoa bona ia duahia: “Lohiabada ena Lauma ese lau ia hahonua. Ia ese lau ia abia hidi vadaeni, Sivarai Namona ogogami taudia dekenai do lau haroro henia. Lau ia siaia vadaeni, idia guia taudia do lau ruhaia totona, bona matakepulu taudia edia matana kehoa hereva do lau gwauraia, bona mai edia bero taudia dekenai mauri do lau henia. Ma danu Lohiabada ese iena taunimanima do ia hamauria, ena nega do lau harorolaia.” Bena Iesu be sibona ia gwauraia, ia gwau: “Inai umui kamonaia herevana, be hari dina ia momokani vadaeni.” (Luka 4:17-21) Iesu be guba dekenai ia do daekau lasi neganai, ena hahediba taudia ia hamaoroa: “Umui be dohore siahu umui abia, Lauma Helaga umui dekenai ia diho neganai, bona lauegu ladana do umui gwauraia hedinarai . . . do ia lao bona tanobada ena kahana ibounai.” (Kara 1:8) Aposetolo edia negai, lauma helaga ese idia ia durua haroro gaukara idia karaia totona.
12. Edena dala ai Dirava ena lauma helaga be hari inai negai ita ia durua boiboi gaukarana ita karaia totona?
12 Hari inai negai, edena dala ai Dirava ena lauma helaga ese ita ia durua inai boiboi herevana taunimanima dekenai ita gwauraia totona? Iehova be lauma helaga ena Badina. Lauma helaga ese headava matamata hahine oreana taudia edia kudouna bona lalona ia kehoa Baibel idia lalopararalaia totona. Lauma helaga ese idia ia hasiahua dainai, tanobada Paradaisona ai mauri do idia abia taudia dekenai unai boiboi herevana bona Baibel ena hereva momokani idia gwauraia. Unai boiboi herevana idia abia dae, Iesu Keriso ena hahediba taudia ai idia lao, bona ma haida idia boiria taudia be edena bamona? Lauma helaga ese idia ia durua danu. “Lauma helaga ena ladana ai” idia bapatiso dainai, idia abia dae lauma helaga be idia ia durua bona idia gaukara hebou. (Mat. 28:19) Horoa taudia bona hutuma bada taudia ese idia harorolaia sivaraina mani oi laloa danu. Unai sivarai be Baibel ai ia noho bona Dirava ena lauma helaga amo idia torea. Unai dainai, lauma helaga ena siahu dainai unai boiboi herevana idia gwauraia. Ita be lauma helaga ese ia hakaua noho. Edena dala ai unai ese ita ia durua diba ma haida boiria gaukarana ita habadaia totona?
“Idia Hereva Noho: ‘Mai!’ ”
13. Inai hereva ena anina be dahaka, “Lauma Helaga bona Headava Matamata Hahine” idia gwau, “Oi mai”?
13 “Lauma Helaga bona Headava Matamata Hahine” idia gwau sibona lasi, “Oi mai.” Idia gaukaralaia Greek herevana ese ia hahedinaraia unai be idia karaia noho karana ta. Unai dainai, New World Translation Baibel ia gwau: “Lauma helaga bona headava matamata hahine idia hereva noho, idia gwau: ‘Mai!’ ” Unai ese ia hahedinaraia Dirava ena boiboi herevana be hanaihanai ita gwauraia. Unai boiboi herevana idia kamonai bona idia abia dae taudia be edena bamona? Idia danu idia gwau, “Oi mai.” Tomadiho momokani ena hutuma bada taudia be Baibel ese ia gwauraia “dina bona hanuaboi idia ese Dirava ena hesiai gaukara idia karaia noho.” (Apok. 7:9, 15) Edena dala ai ‘dina bona hanuaboi’ ai hesiai gaukara idia karaia? (Luka 2:36, 37; Kara 20:31; 2 Tesalonika 3:8 duahia.) Peroveta hahinena Ana bona aposetolo Paulo edia haheitalai ese ia hahedinaraia “dina bona hanuaboi” hesiai gaukara idia karaia anina be, mai goada ida haroro gaukara idia karaia hanaihanai.
14, 15. Edena dala ai Daniela ia hahedinaraia nega ibounai Dirava ita tomadiho henia be mai anina bada?
14 Daniela dekenai Dirava tomadiho henia hanaihanai karana be mai anina bada. (Daniela 6:4-10, 16 duahia.) Ena be hua ta lalonai guriguri karana idia taravatua bona Daniela be laiona ena magu lalonai idia negea diho diba, to ia be “dina ta nega toi” Dirava ia guriguri henia noho, hanaihanai ia karaia bamona. Iena kara ese taunimanima dekenai ia hahedinaraia, hanaihanai Iehova idia tomadiho henia be mai anina bada!—Mat. 5:16.
15 Daniela be hanuaboi ai laiona ena guri lalonai ia noho, king ia lao unuseni bona ia boiboi: “Daniela e, mauri Diravana ena hesiai tauna e! Oiemu Dirava, iena hesiai oi karaia namonamo Diravana ese laiona dekena amo oi ia hamauria, a?” Daniela ia haere: “Egu king, oi mauri hanaihanai! Dirava ese iena aneru ia siaia mai, laiona edia uduna ia koua, bona idia hadikaia lasi lau. Inai bamona ia karaia, badina ia diba lau be kerere lasi, bona oi danu lau hadikaia lasi, egu king e.” Iehova ese Daniela ia hanamoa badina “nega ibounai” Dirava ia tomadiho henia.—Dan. 6:19-22.
16. Daniela ena haheitalai dainai, iseda haroro gaukara dekenai edena bamona henanadai ita henia diba?
16 Daniela ia diba do ia mase, to Dirava tomadiho henia karana ia rakatania lasi. Ita be edena bamona? Dirava ena Basileia ena sivarai namona ita harorolaia hanaihanai totona, edena ura gaudia ita dadaraia? Namona be hua ta ta ai ma haida dekenai Iehova ita herevalaia! Bema hegeregere, wiki ta ta ai haroro gaukara ita karaia, a? Ena be iseda tauanina ia goada lasi bona hua ta lalonai miniti 15 sibona ita haroro diba, unai ita ripotilaia be namo. Dahaka dainai? Badina, lauma helaga bona headava matamata hahine ida, ita ura ita gwau noho, “Oi mai.” Oibe, namona be ita gaukara goada Basileia harorolaia gaukara ita karaia hanaihanai totona.
17. Edena dala haida ai Iehova ena boiboi herevana ita harorolaia be namo?
17 Namona be dala ita tahua edena dala idauidau ai Iehova ese ia henia boiboi herevana gwauraia gaukarana be gabu idauidau dekenai ita karaia totona, haroro negadiai sibona lasi. Nega ma haida, hegeregere sitoa dekenai, loaloa gabudiai, holide negadia, moni gaukara o sikuli ita lao negadiai, ranu mase taudia ita boiria ‘idia mai bona mauri ranuna idia inua davana lasi’! Bema gavamani ese haroro gaukara idia koua, mai aonega ida ita haroro noho—reana ruma haida sibona ita karaia diba o nega bona gabu idauidau ai haroro karana ita habadaia.
Oi Hereva Noho, “Oi Mai”
18, 19. Edena dala ai oi hahedinaraia oi be Dirava ena hesiai tauna ena hahenamo oi laloa bada?
18 Lagani 900 idia hanaia vadaeni, lauma helaga bona headava matamata hahine be ranu mase taudia dekenai idia gwau noho, “Oi mai.” Edia boiboi herevana oi kamonai vadaeni, a? Oi ai hagoadaia ma haida dekenai unai boiboi herevana oi gwauraia totona.
19 Ita diba lasi Iehova ena boiboi herevana do ita harorolaia ela bona edena nega, to ita abia dae bona ita gwau, “Oi mai” neganai, ita be Dirava ena hesiai taudia. (1 Kor. 3:6, 9) Unai be hahenamo badana! Namona be ita hahedinaraia unai hahenamo ita laloa bada bona hanaihanai ita haroro karana amo, “Dirava ita hanamoa karana be boubou gauna bamona.” (Heb. 13:15, BHğ) Namona be tanobada helarona idia abia taudia be headava matamata hahine oreana taudia ida idia gwau noho, “Oi mai.” Bona momo be ‘mauri ranuna idia abia dae, ia be davana lasi!
Dahaka Oi Dibaia?
• Inai boiboi herevana “oi mai” be daika dekenai idia gwauraia?
• Dahaka dainai ita gwau diba inai boiboi herevana “oi mai” be Iehova amo?
• Edena dala ai lauma helaga ese inai boiboi herevana “oi mai” ia durua?
• Dahaka dainai ita gaukara goada ita haroro hanaihanai totona?
[Chart/Picture on page 16]
(For fully formatted text, see publication)
Idia Gwau, “Oi Mai”
1914
Pablisa taudia 5,100
1918
Momo be tanobada Paradaisona ai mauri do idia abia
1922
“Haroro, haroro, haroro, Pavapava bona iena basileia umui harorolaia”
1929
Kamonai orena taudia idia gwau, “Oi mai”
1932
Inai boiboi herevana, “Oi mai” be horoa taudia sibona totona lasi
1934
Ionadaba oreana taudia idia boiria idia haroro totona
1935
“Hutuma bada” idia hahedinaraia
2009
Pablisa ibounai be 7,313,173