Iehova be Emu Tamana Bamona Oi Laloa, A?

“LOHIABADA e, guriguri oi hadibaia ai dekenai.” Iesu ena hahediba tauna ta be unai bamona ia noinoi neganai, Iesu ia gwau: “Umui guriguri neganai be umui gwau: ‘Aiemai Tamana e, oiemu ladana do ai hahelagaia.’ ” (Luka 11:​1, 2) Iesu be Iehova ia herevalaia neganai, inai dagi ladadia ia gwauraia diba, “Siahu Ibounai ena Dirava,” “Hadibaia Tauna Badana,” “Havaraia Tauna,” “Mauri Noho Hanaihanai Tauna,” bona “Noho Hanaihanai King.” (Gen. 49:25; Isa. 30:20; 40:28; Dan. 7:9; 1 Tim. 1:​17, NW ) To Iesu be unai ladadia ia gwauraia lasi, to Iehova ia gwauraia “Tamana.” Dahaka dainai? Badina reana ia ura atai herea momokani Tauna be iseda lalokau Tamana ta bamona ita hereva henia, natuna ta be iena tamana ia hereva henia bamona.

To, haida ese Dirava be edia tamana bamona idia gwauraia be auka. Taihu ta Atsukoa ia gwau, “Lau bapatiso bona lagani momo lalonai Iehova kahirakahira lau lao bona Tamana ta bamona ia lau hereva henia be auka.” Unai kara ena badina ia gwauraia, ia gwau: “Egu tamana be lau ia lalokau henia lasi.”

Inai nega dokona ai, tama momo be edia natudia idia “lalokau” henia lasi. (2 Tim. 3:​1, 3) Unai dainai momo edia hemami be Atsuko ena bamona. To, ita moale badina ita ese Iehova be lalokau Tamana bamona ita laloa ena badina idauidau ita diba.

Iehova​​—⁠Mai Lalokau ida Harihari Gaudia Ia Henia Tauna

Bema ita ura Iehova be iseda Tamana bamona ita laloa, namona be ia ita diba namonamo. Iesu ia gwau: “Tau ta lasi ese Natuna ia diba. Tamana sibona ese Natuna ia diba. Bona tau ta lasi ese Tamana ia diba. Natuna sibona ese Tamana ia diba. To bema Natuna ia ura tau ta dekenai Tamana ia hedinarai henia, be unai tau ese Tamana do ia diba.” (Mat. 11:27) Iehova be Tamana ta bamona ita dibaia totona, dala namona be Iesu ese Dirava momokanina ia hahedinaraia dalana ita laloa. Vadaeni, Iesu be edena dala ai Tamana ia hahedinaraia?

Iesu ese ia hahedinaraia Iehova be ena mauri ena Badina, ia gwau: “Tamana dainai lau mauri.” (Ioa. 6:​57) Ita danu be eda Tamana dainai ita mauri. (Sal. 36:9; Kara 17:28) Dahaka dainai Iehova ese ma haida dekenai mauri ia henia? Lalokau dainai unai bamona ia karaia. Unai harihari gauna dainai, iseda guba Tamana ita lalokau henia be namo.

Dirava ese taunimanima dekenai ia hahedinaraia lalokau hereadaena be inai: Iesu ena mauri davalaia boubouna ia henia. Unai boubou gauna dainai, kara dika taudia be Iena lalokau Natuna amo Iehova idia tura henia diba. (Roma 5:​12; 1 Ioa. 4:​9, 10) Bona iseda guba Tamana be ena gwauhamata ibounai ia hagugurua Tauna dainai, ita diba ia idia lalokau henia bona badinaia taudia ibounai be “Dirava ena natudia edia ura kwalimu hereadaena do idia abia.”​​—⁠Roma 8:​21.

Danu, iseda guba Tamana be hanaihanai ita “latanai dina ena diari ia henia noho.” (Mat. 5:​45) Unai dainai ita laloa dina ena diari totona ita guriguri be anina lasi. To, dina ena diari ita abia be namo bona ita moalelaia! Ma danu, iseda Tamana be ita dekenai gau momo herea ia henia bona ita do noinoi lasi neganai, iseda dabu gaudia ia diba vadaeni. Unai dainai, namona be nega ita atoa iseda guba Tamana ese ia havaraia gaudia ita itaia bona ita laloa dobu totona.​​—⁠Mat. 6:​8, 26.

Iseda Tamana​​—⁠Mai Lalokau ida Ita Ia Gimaia Tauna

Isaia ena peroveta herevana ese Dirava ena bese taudia ia hagoadaia: “Ororo badadia bona maragidia be do idia marere, bona idau gabu dekenai do idia lao, to egu lalokau oi dekenai be do ia doko lasi. Lau ese maino ena gwauhamata, be do lau badinaia noho ela bona hanaihanai. Oi ia lalokau henia Lohiabada be inai bamona ia hereva vadaeni.” (Isa. 54:10) Iesu be ena hanuaboi ginigabena ai, ena guriguri ai ia hahedinaraia Iehova be mai lalokau ida ita ia gimaia. Iesu be ena hahediba taudia totona ia guriguri, ia gwau: “Idia be tanobada dekenai do idia noho, to lau be oi dekenai do lau mai. Egu Tamana Helaga e, lau dekenai oi henia taudia be oiemu ladana ena siahu dekena amo do oi dogoatao.” (Ioa. 17:​11, 14) Iehova be Iesu murinai idia raka taudia ia naria bona gimaia.

Dirava ese Satani ena tarapu idauidau amo ita ia gimaia dalana ta be, “hesiai tauna mai ena kamonai, bona mai ena kara maoromaoro” amo nega korikori ai Dirava ena hereva ia henia. (Mat. 24:45) Bema ita ura ‘Dirava ese ia henia tuari dabua ibounai ita hahedokilaia,’ Dirava ena Hereva ita abia be mai anina bada. Hegeregere, mani ita laloa, “abidadama ena kesi badana” ita gaukaralaia diba ‘Dika Tauna ena peva ibounai mai ena lahi do ita habodoa’ totona. (Efe. 6:​11, 16, NW ) Iseda abidadama ese iseda hetura karana Iehova ida ia gimaia, bona unai ese ia hahedinaraia iseda Tamana ena siahu be bada ita ia gimaia totona.

Tanobada ai Iesu ese ia karaia gaudia ita stadilaia namonamo neganai, iseda guba Tamana ena lalokau karana do ita diba. Mareko 10:​13-​16 ai ia noho sivarai mani oi laloa. Iesu be ena hahediba taudia dekenai ia gwau: “Lau ura maragi idia mai lau dekenai.” Natu maragidia be Iesu dekenai idia lao neganai, idia ia rosia bona ia hanamodia. Reana unai natudia idia moale bada herea! Bona Iesu ia gwau: “Lau ia itaia tauna be Tamana danu ia itaia vadaeni,” unai hereva amo ita diba Dirava momokanina ia ura ia kahirakahira ita lao.​​—⁠Ioa. 14:⁠9.

Iehova Dirava be lalokau ena Badina. Ia ese ita dekenai gau momo ia henia bona ia be iseda Gimaia Tauna badana, ia ura ia kahirakahira ita lao. (Iam. 4:⁠8) Unai dainai ita abia dae momokani Iehova be iseda Tamana hereadaena!

Namo Bada Ita Abia!

Iehova be iseda lalokau bona hebogahisi guba Tamana dainai ita abidadama henia neganai, namo bada do ita abia. (Aon. 3:​5, 6) Iesu be ena Tamana ia abidadama henia momokani dainai, namo ia abia. Keriso be iena hahediba taudia ia hamaoroa: “Lau be sibona lasi, to lauegu Tamana, lau ia siaia Diravana, be lau danu ia noho.” (Ioa. 8:​16) Iesu be hanaihanai ia diba Iehova ese ia do ia durua. Hegeregere, ia bapatiso neganai, iena Tamana ese mai lalokau ida ia hereva henia, ia gwau: “Inai be lauegu Natuna, egu lalokau, lau moale bada ia dekenai.” (Mat. 3:​15-​17) Iesu ia do mase lasi neganai, ia boiboi: “Egu Tamana e, egu lauma be oiemu imana dekenai lau atoa inai.” (Luka 23:46) Iesu be iena Tamana ia abidadama henia momokani.

Ita danu unai bamona ita karaia diba. Iehova be iseda kahana ai ia gini dainai, do ita gari lasi, ani? (Sal. 118:⁠6) Ataiai ita herevalaia taihu Atsuko be hekwakwanai ia davaria neganai, nega momo sibona ena goada dekenai ia tabekau. To ia be Iesu ena mauri bona hesiai gaukara, bona ena hetura karana iena guba Tamana ida ia stadilaia neganai, ia dekenai dahaka ia vara? Atsuko ia gwau: “Lau dibaia gauna be Dirava be Tamana ai lau halaoa bona Ia dekenai lau tabekau karana be mai anina bada.” Ma ia gwau: “Maino bona moale korikori lau davaria. Momokani, gau ta dekenai ita lalohekwarahi lasi be namo.”

Iehova be iseda Tamana bamona ita kara henia neganai, edena dala ai unai ese ita do ia durua? Nega momo natudia be edia tama sina idia lalokau henia bona idia ura idia hamoalea. Iesu be ena Tamana ia lalokau henia dainai, nega ibounai ena ura ia karaia. (Ioa. 8:​29) Unai hegeregerena, iseda guba Tamana Iehova ita lalokau henia ese iseda lalona do ia veria mai aonega ida ita kara bona ‘taunimanima vairanai ia ita hanamoa’ totona.​​—⁠Mat. 11:25; Ioa. 5:​19, NW.

Iseda Tamana ‘ese Ita Ia Hagoadaia Noho’

Iseda guba Tamana ese “Durua Tauna”​​—⁠ena lauma helaga​​—⁠ia henia danu. Iesu ia gwau: Lauma helaga ese “hereva momokani ibounai dekenai umui do ia hakaua.” (Ioa. 14:​15-​17; 16:​12, 13) Dirava ena lauma helaga ese ita ia durua diba iseda guba Tamana ena kara ita lalopararalaia namonamo totona. Ita ia durua diba “goada momokani gaudia,” hegeregere lalohadai aukadia, o lalohadai kereredia ita dadaraia, unai amo ‘lalohadai ibounai ita guia noho, Keriso badinaia totona.’ (2 Kor. 10:​4, 5) Unai dainai, namona be Iehova ese ia gwauhamatalaia durua tauna totona ita guriguri, bona ita diba momokani “Tamana guba dekenai ia noho ese Lauma Helaga be idia noinoi taudia dekenai do ia henidia.” (Luka 11:13) Danu bema lauma helaga ena heduru totona ita guriguri, Iehova kahirakahira do ita lao.

Natu maragina ta be iena tamana ena imana ia dogoatao neganai, ia gari lasi. Unai hegeregerena, Iehova be emu Tamana bamona oi laloa neganai, inai hagoadaia herevana ese oi ia durua diba: “Lau be Lohiabada, emui Dirava. Lau ese umui lau hagoadaia noho, lau gwau, ‘Do umui gari lasi, lau ese umui do lau durua.’ ” (Isa. 41:13) Dirava ida oi “raka hebou” ela bona hanaihanai be hahenamo hereadaena. (Mika 6:⁠8) Iena ura oi karaia noho, bona Iehova be Tamana bamona oi laloa dainai oi abia lalokau, moale, bona noho namona do oi davaria.

[Footnote]