Duahia Taudia Edia Henanadai

Edena bamona negadiai ta be reana do ia laloa ia bapatiso lou be namo?

Nega haida ia bapatiso vadaeni tau o hahine ta be reana do ia laloa iena bapatiso karana be maoro lasi, bona do ia bapatiso lou be namo. Hegeregere: Ia bapatiso neganai reana ena mauri lalonai gau haida be hehuni dalanai ia karaia dainai ia be orea amo idia atoa siri diba. Bema ia be unai bamona ia karaia, oi laloa Dirava ia gwauhamata henia be maoro, a? Ia be Iehova ia gwauhamata henia momokani diba bema Baibel ena taravatu idia utua karadia ia karaia lou lasi. Unai dainai bema ta be ia bapatiso to unai kerere badana be ia do karaia noho, reana ia sibona ese abia hidi do ia karaia, do ia bapatiso lou be maoro o lasi.

Ta be bapatiso ia abia neganai kerere ta ia karaia lasi, to ia bapatiso murinai kerere haida ia karaia dainai hahemaoro komiti ese idia hahemaoro henia be edena bamona? Reana do ia gwau bapatiso ia abia neganai ia karaia gauna ia lalopararalaia momokani lasi bona ena bapatiso karana be maoro lasi. Elda taudia be kerere ia karaia tauna ida idia herevahereva neganai, namo lasi iena bapatiso karana idia henanadailaia momo. Eiava namo lasi ia idia nanadaia bema ia laloa ena gwauhamata bona bapatiso karana be maoro o lasi. Ia be tadikaka ta ese bapatiso ena anina be Baibel amo ia herevalaia neganai, ia kamonai. Ia be gwauhamata bona bapatiso totona idia henia henanadaidia ia haerelaia ia gwau, “Oibe.” Bena ena dabua ia haidaua bona ranu lalonai ia diho. Unai dainai, ita gwau diba ia bapatiso vadaeni tauna be bapatiso ia abia neganai ia karaia gauna ia lalopararalaia namonamo. Unai dainai elda taudia ese ia be ia bapatiso vadaeni tauna ta bamona idia kara henia.

Bema ta ia laloa ena bapatiso karana be anina lasi, elda taudia ese ia do idia hadibaia The Watchtower, March 1, 1960, rau 159 bona 160, bona February 15, 1964, rau 123 ia lao 126 dekenai bapatiso abia lou karana idia herevalaia kahadia do ia itaia totona. Nega haida ai ta be do ia laloa ia bapatiso lou be namo (hegeregere reana ia bapatiso neganai Baibel ena hereva be ia lalopararalaia namonamo lasi) to unai be ia sibona ese do ia abia hidi gauna.

Keristani taudia be ma haida ida ruma tamona ai idia noho neganai, dahaka gaudia idia laloa be namo?

Ita ibounai ita ura gabu ta ai ita noho. To, hari inai negai momo be sibona edia ruma ai idia noho lasi. Reana, haida be moni dekenai idia hegeregere lasi, idia gorere, o hekwakwanai ma haida dainai edia ruma bese taudia bona varavara ida ruma tamona ai idia noho hebou. Tano haida ai, varavara be daiutu tamona ai idia noho dainai, ta be sibona do ia karaia gaudia ia karaia diba lasi.

Tanobada hegegemadai ai idia noho tadikaka bona taihu ese noho gabudia maorodia idia abia hidi totona, Iehova ena orea be taravatu momo idia atoa lasi, badina unai be idia edia maduna lasi. To Keristani taudia idia ura noho rumana ta do idia abia hidi neganai Baibel ena hakaua herevadia idia laloa be namo, unai ese idia do ia durua idia laloparara Iehova matanai idia karaia abia hidi be maoro o lasi. Unai hakaua herevadia haida be dahaka?

Ita laloa bada gauna ta be inai: Bema ita be ma haida ida ita noho, unai ese iseda kara bona eda hetura karana Iehova ida do ia hanamoa o hadikaia diba. Ita be edena bamona taudia ida ita noho? Idia be Iehova idia tomadiho henia taudia, a? Edia mauri lalonai Baibel ena hakaua herevadia idia badinaia, a? Paulo ia gwau, “Umui laloa kerere lasi. Bema kara dika taudia danu umui turana karaia neganai, idia ese emui kara namona do idia hadikaia.”​​—⁠1 Kor. 15:⁠33.

Baibel ia gwau, Iehova be sihari kava bona heudahanai karana ia gwauraia dika. (Heb. 13:⁠4) Unai dainai, bema mero bona kekeni ta be idia headava lasi to ruma tamona ai idia noho hebou, Dirava vairanai unai be maoro lasi. Keristani tauna ta be do ia ura lasi matabodaga karadia idia karaia taudia ida ia noho hebou.

Danu, Baibel ese Dirava ena lalonamo idia ura abia taudia ia hagoadaia ‘heudahanai karadia idia rakatania’ totona. (1 Kor. 6:​18) Unai dainai, bema noho hebou gabudia haida ese dala ia kehoa diba Keristani taudia ese matabodaga karana idia karaia totona, aonega dalana be unai bamona noho gabuna idia dadaraia be namo. Hegeregere: Bema Keristani taudia haida be ruma tamona dekenai idia noho, oi laloa gau haida ese edia lalona idia veria diba maoro lasi karadia haida idia karaia totona, a? Ruma taudia be nega momo ruma ai idia noho lasi dainai, idia headava lasi mero bona kekeni ta be sibodia ruma dekenai idia noho be edena bamona? Unai hegeregerena bema mero bona kekeni ta be idia ura heheni bona ruma tamona ai idia noho, matabodaga karadia idia karaia diba. Aonega karana be unai bamona noho hebou karana ita dadaraia be gau badana.

Danu, edia headava idia hadokoa vadaeni taudia be ruma tamona ai idia noho be maoro lasi. Idia be guna idia mahuta hebou vadaeni dainai, bema idia be ruma tamona ai idia noho, unai ese idia do ia doria diba matabodaga karadia idia karaia totona.​​—⁠Aon. 22:⁠3.

Mai anina bada gauna ma ta be inai: Iseda gabu ai idia noho taudia ese ita abia hidi noho rumana be edena bamona idia laloa. Bema Keristani tauna ia laloa ia abia hidi noho gabuna be namo, to ena gabu ai idia noho taudia be unai idia maumauraia, vadaeni unai ia laloa namonamo be namo. Ita ura lasi iseda kara amo Iehova ena ladana ita hadikaia. Paulo ia gwau: “Umui ibounai do umui noho namonamo, vadaeni Iuda taudia, Iuda lasi taudia, bona Dirava ena ekalesia taudia ese emui kara namo do idia itaia, be do umui hakaudia kerere lasi. Lauegu kara bamona do umui karaia. Lauegu kara ibounai be, taunimanima ibounai ese lau do idia ura henia totona lau karaia. Lauegu namo lau tahua lasi, to ibounai edia namo lau tahua noho, mauri do idia davaria totona.”​​—⁠1 Kor. 10:​32, 33.

Momokani, Iehova ena kara maoromaoro taravatudia idia ura badinaia taudia ese nega haida noho gabuna maorona idia davaria be auka. To, Keristani taudia ese ‘Lohiabada ia ura henia karadia do idia tahua’ be gau badana. Namona be idia diba edia ruma taudia be kara mirodia idia karaia lasi. (Efe. 5:​5, 10) Unai idia karaia totona, namona be Keristani taudia ese guriguri amo Iehova ena heduru idia noia, bona idia gaukara goada idia ta ta be tauanina dalanai idia durua heheni, kara maoromaoro daladia idia badinaia, bona Iehova ena ladana namona idia hanamoa totona.