Iesu Keriso—Ena Hereva ese Taunimanima Ibounai Ia Durua Bada
“Kaperanauma amo ia mai aonega tauna ena hereva namodia be hari taunimanima edia kudouna bona lalona ia do hamarerea noho.”a—AUTHOR GREGG EASTERBROOK.
HEREVA be mai edia siahu. Bema aonega hereva namodia oi abia hidi, ta ena kudouna oi hamarerea, helaro oi henia, bona ena mauri oi haidaua diba. Keriso sibona ena hereva dalana amo unai ia karaia diba. Iesu ena Ororo Harorona ia kamonai tauna be gabeai ia gwau: “Iesu ena haroro ia hadokoa, bona taunimanima ese iena hadibaia hereva dekenai idia hoa bada.”—Mataio 7:28.
Hari inai negai, tanobada hegegemadai, taunimanima be Iesu ena hereva momo idia diba. Unai hereva namodia haida mani ita itaia.
“Dirava bona kohu momo danu nega tamona edia hesiai gaukara do oi karaia diba lasi.”—Mataio 6:24.
“Unai dainai, gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai.”—Mataio 7:12.
“Kaisara ena gau, Kaisara dekenai umui henia, to Dirava ena gau be Dirava dekenai umui henia.”—Mataio 22:21.
“Henia kara ena moale be bada, abia kara ena moale be maragi.”—Kara 20:35.
To, Iesu be unai bamona hereva sibona ia gwauraia lasi. Ia harorolaia herevana be mai ena siahu badina ia be Dirava ia gwauraia hedinarai, taunimanima ia hadibaia edena dala ai mauri namona idia davaria diba, bona ia hahedinaraia goevagoeva Dirava ena Basileia be taunimanima edia hisihisi ibounai do ia haorea. Rau ma haida ai Iesu ese ia harorolaia herevadia ita duahia neganai, do ita itaia dahaka dainai iena hereva ese hari taunimanima milioni momo edia “kudouna bona lalona ia do hamarerea noho.”
[Footnote]
a Haida idia gwau, Iesu ena ruma be Galilea ena hanua ladana, Kaperanauma ai ia noho.—Mareko 2:1.