Iesu be Ena Mauri Ia Gwauraia Hedinarai

“Iesu ia diba ia be daika, edeseni amo ia mai, dahaka dainai tanobada dekenai ia mai, bona gabeai dahaka do ia karaia.”​​—⁠AUTHOR HERBERT LOCKYER.

IENA hahediba herevadia ita do abia dae lasi bona ita do abidadama henia lasi neganai, gau ginigunana be ena mauri sivaraina ita diba. Iesu be daika? Edeseni amo ia mai? Ena mauri ena badina be dahaka? Evanelia Bukadia​​—⁠Mataio, Mareko, Luka, bona Ioane​​—⁠lalonai, Iesu sibona ese unai henanadai edia haere do ia henia.

Guna ia noho bena gabeai tanobada ai ia vara Iesu ia gwau: “Aberahamo do ia vara lasi, lau be lau noho.” (Ioane 8:​58) Aberahamo be ia noho guna bena gabeai lagani 2,000 murinai, Iesu be tanobada ai ia vara. To, Aberahamo ia do vara lasi neganai, Iesu be guna ia noho vadaeni. To, ia be edeseniai ia noho? Iesu ia gwau: “Guba dekena amo lau diho mai.”​​—⁠Ioane 6:​38.

Dirava ena Natuna Iehova be mai ena aneru natudia momo. To, Iesu be idau herea. Ia gwau, ia be “Dirava ena Natuna tamona sibona.” (Ioane 3:​18) Unai ese ia hahedinaraia Iesu be Dirava sibona ese ia karaia. Unai Natuna tamona sibona amo Dirava ese gau ibounai ia karaia.​​—⁠Kolose 1:​16.

“Taunimanima ena Natuna” Iesu be sibona ia herevalaia neganai, unai hereva ia gaukaralaia momo. (Mataio 8:​20) Ia hahedinaraia ia be taunimanima edia tauanina ia atoa aneru ta bamona lasi. To, ia be taunimanima korikorina ta. Dirava ese ena lauma helaga amo, Iesu ena mauri be guba amo ia abia bona tanobada haneulato rami-hebou kekenina ta ladana, Maria ena bogana lalonai ia atoa. Unai dainai, Iesu ia vara neganai, ia be goevadae tauna.​​—⁠Mataio 1:​18; Luka 1:​35; Ioane 8:​46.

Gwauhamata Mesiana Samaria hahinena ese Iesu ia hamaoroa: “Lau diba Mesia . . . be do ia mai.” Iesu ia gwau: “Tauna be lau inai, lau hereva noho oi dekenai.” (Ioane 4:​25, 26) Inai hereva “Mesia” o “Keriso” ena anina be “Horoa Tauna.” Dirava ese Iesu ia horoa o abia hidi Iena gwauhamata herevadia ia hagugurua totona.

Ena gaukara badana Iesu ia gwau: “Lau be Dirava ena Basileia ena Sivarai Namona . . . do lau harorolaia, Dirava ese lau ia siaia ena badina be unai.” (Luka 4:​43) Ena be Iesu ese heduru idia ura taudia dekenai kara namodia momo ia karaia, to ena mauri lalonai Dirava ena Basileia harorolaia gaukarana ia atoa guna. Ia ese Basileia ia herevalaia dalana be rau gabediai do ita duahia.

Ia hedinarai goevagoeva, Iesu be tau hereadaena.a Gabeai do ita itaia, Iesu be guna guba ai ia noho dainai, tanobada ai ia gwauraia herevadia be mai anina bada. Unai dainai, Iesu ena haroro herevana ese tanobada hegegemadai idia noho taudia edia mauri ia haidaua diba.

[Footnote]