Iesu ese Dirava Ia Harorolaia

“Tau ta be Tamana ia diba lasi, iena Natuna sibona. To bema Natuna ia ura tau ta dekenai Tamana ia hedinarai henia, be unai tau ese Tamana do ia diba.”​​—⁠LUKA 10:⁠22.

DIRAVA ena vara guna Natuna be tanobada dekenai ia do mai lasi neganai, ia be ena Tamana ida lagani momo idia noho hebou. (Kolose 1:​15) Unai dainai, Natuna be ena Tamana ena lalohadai, hemami, bona kara ia diba. Gabeai, unai Natuna​—⁠Iesu​—⁠be tanobada ai taunimanima ta bamona ia mai neganai, ia ura ma haida dekenai ena Tamana ia harorolaia. Unai Natuna ena hereva ita kamonai neganai, Dirava do ita dibaia namonamo.

Dirava ena ladana Iesu dekenai Dirava ena ladana, Iehova, be mai anina bada. Unai Natuna lalokauna ia ura ma haida ese ena Tamana ena ladana idia diba bona idia gaukaralaia. Iesu ena ladana anina be “Iehova be Hahemauri Tauna.” Ena hanuaboi ginigabena ai, Iesu be Iehova ia guriguri henia, ia gwau: “Oiemu ladana danu lau hadibaia vadaeni idia dekenai.” (Ioane 17:26) Ita itaia, Iesu be Dirava ena ladana ia gaukaralaia bona ma haida dekenai ia hadibaia. Oibe, bema Iesu ese Dirava ena ladana bona ena anina ia gwauraia hedinarai lasi, kamonai taudia be Iehova do idia diba namonamo lasi, ani?a

Dirava ena lalokau hereadaena Nega ta ai, Iesu be Dirava ia guriguri henia neganai, ia gwau: “Lauegu Tamana e, . . . tanobada do oi karaia lasi neganai, oi ese lau dekenai oi lalokau henia.” (Ioane 17:24) Guba ai Iesu be Dirava ena lalokau ia mamia dainai, tanobada ai ia mai neganai, ia ura unai lalokau be dala idauidau amo ia hahedinaraia.

Iesu ese ia hahedinaraia, Iehova ena lalokau be bada herea. Iesu ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:​16) Oibe, Dirava be tanobada taudia ibounai ia lalokau henia. Unai lalokau hereadaena dainai, Dirava ese ena Natuna hereadaena ia henia, unai amo abidadama taudia be kara dika bona mase amo ia ruhadia bona mauri hanaihanai do idia abia. Unai lalokau be bada herea dainai, ena matamana bona dokona be lasi.​​—⁠Roma 8:​38, 39.

Iesu be inai hereva ia hamomokania: Iehova be Ia idia tomadiho henia taudia ta ta ia lalokau henia bada. Iesu ia gwau, Iehova be mamoe naria tauna ta bamona, iena mamoe ta ta ia lalodia bada. (Mataio 18:​12-​14) Iesu ia gwau manu maragina ta be tano ai ia moru neganai, Iehova be ia diba. Ma ia gwau: “Umui emui kwarana huina ibounai be Dirava ese ia duahia haorea momokani.” (Mataio 10:​29-​31) Bema Iehova be manu rumana amo ia moru manu maragina ta ia laloa bada, anina be Ia ese ia idia tomadiho henia taudia ta ta ia itadia bona ia lalodia bada, ani? Bema iseda kwarana huina ibounai be Iehova ese ia itaia bona duahia diba, anina be eda mauri ibounai​—⁠eda dabu gaudia, eda lalometau, bona ita laloa momo gaudia​​—⁠ia diba, ani?

Guba Tamana Matamanai ita duahia hegeregerena, Iesu be Dirava sibona ese ia havaraia Natuna tamona. Unai dainai, nega momo unai Natuna lalokauna ese Iehova ia herevalaia neganai, ia gwau ena “Tamana.” Luka be Iesu ena hereva ginigunadia ia torea​—⁠unai negai, Iesu ena mauri lagani be 12 bona dubu helaga ai Iehova ia gwauraia “egu Tamana.” (Luka 2:49 ) Inai hereva “Tamana” be Evanelia Bukadia lalonai ia hedinarai momo, kahirakahira 190 bamona. Nega idauidau ai, Iesu ese Iehova ia gwauraia “emui Tamana,” “aiemai Tamana,” bona “lauegu Tamana.” (Mataio 5:​16; 6:9; 7:​21) Ia ese unai dala idauidau ai Tamana ia herevalaia karana ese ia hahedinaraia, goevadae lasi taudia be Iehova idia tura henia diba.

Ia hebogahisi bona ia ura dika ia gwauatao Iesu ia diba goevadae lasi taudia ese Dirava ena hebogahisi idia abia be gau badana. Boio merona ena parabole lalonai, Iesu ia gwau Iehova be mai ena hebogahisi tamana ta bamona, ena natuna ia helalo-kerehai bona ia giroa lou neganai, ena dika ia gwauatao bona ia abia giroa lou. (Luka 15:​11-​32) Unai hereva ese ita ia hadibaia gauna be inai: Iehova be kerere taudia edia kudouna ia itaia, bema edia kerere dainai idia sori, vadaeni hebogahisi karana do ia hahedinaraia diba. Iehova ia ura ia helalo-kerehai tauna ena dika ia gwauatao. Iesu ia gwau: “Lau hamaoroa umui dekenai, inai bamona dika tauna ta ena lalona ia giroa dainai, guba dekenai moale do ia bada. To kara maoromaoro taudia 99, edia lalona idia giroa lasi dainai, guba dekenai moale do ia maragi.” (Luka 15:⁠7) Ita ibounai ita ura unai bamona hebogahisi Diravana ita tura henia, ani?

Guriguri kamonai henia Diravana Iesu be tanobada dekenai ia do mai lasi neganai, guba dekenai ia itaia Iehova be “guriguri kamonai henia Diravana” bona Ia idia tomadiho henia goadagoada taudia edia guriguri ia moalelaia. (Salamo 65:​2, BHğ) Unai dainai, Iesu be haroro gaukara ia karaia neganai, kamonai taudia dekenai edena bamona do idia guriguri bona dahaka gaudia do idia gurigurilaia dalana ia hadibaia. Ia sisiba henidia: “Umui guriguri neganai, hereva kava momo do umui gwauraia lou, gwauraia lou lasi.” Ia ese kamonai taudia ia hamaoroa do idia guriguri Dirava ena ura be “tanobada dekenai do ia vara, guba dekenai ia vara bamona.” Danu, dina ta ta ena aniani totona, iseda kara dika ia gwauatao totona, bona hedibagani lalonai ita moru lasi totona do ita guriguri. (Mataio 6:​5-​13; NW ) Iesu ese taunimanima ia hadibaia Iehova be tamana ta bamona, Iena hesiai taudia edia guriguri ia kamonai namonamo, bona edia noinoi ia haerelaia.​​—⁠Mataio 7:​7-​11.

Momokani, Iesu ese taunimanima ia hadibaia Iehova be daika bona Ia be edena bamona Diravana. To, Iesu ia ura taunimanima dekenai ma gau badana ta ia hadibaia​—⁠Iehova be gau ta amo tanobada ibounai do ia haidaua, bena Iena ura inai tanobada bona taunimanima totona do ia hagugurua. Iesu ena haroro herevana ena sinado badana be unai.

[Footnote]