Iesu Keriso​​—⁠Ena Hereva Bona Oi

“Lau mai vadaeni, mauri do idia abia, mauri mai anina momokani danu, do idia abia totona.”​​—⁠IOANE 10:⁠10.

IESU KERISO be tanobada dekenai ia mai, gau ta ia abia totona lasi to gau ta ia henia totona. Ia ese haroro gaukara ia karaia neganai, taunimanima dekenai inai dava bada harihari gauna ia henia: Iena hereva amo Dirava bona Iena ura ia gwauraia hedinarai. Ena hereva idia abia dae taudia be hari inai negai mauri namona idia moalelaia. Oibe, Keristani taudia momokanidia milioni momo be unai hereva idia hamomokania diba.a To, iena haroro herevana lalonai inai mai anina bada harihari gauna ia herevalaia​​—⁠iena mauri goevadaena be ita totona ia henia. Bema unai hereva ita abia dae, mauri hanaihanai do ita abia.

Dirava bona Keriso ese idia henia gauna Iesu ia diba, ena inai taudia ese do idia alaia mase. (Mataio 20:​17-​19) Ioane 3:​16 ai Iesu ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” Danu, Iesu ia gwau “ena mauri ia henia, taunimanima momo edia mauri davana karaia totona.” (Mataio 20:​28, NW ) Dahaka dainai Iesu ia gwau ena mauri ia henia bona ia gwau lasi do idia abia?

Dirava be taunimanima ia lalokau henia bada dainai, dala ta ia karaia kara dika bona mase amo taunimanima ia hamauria totona. Unai bamona ia karaia totona, Dirava ese iena Natuna tamona ia siaia mai tanobada dekenai bona boubou gauna ta bamona ia mase. Iesu be mai ena ura bada ida ita dainai ena mauri goevadaena ia henia. Unai mauri davana be Dirava ese taunimanima dekenai ia henia harihari gauna hereadaena.b Unai harihari gauna dainai, ita be mauri hanaihanai ita abia diba.

Dahaka oi karaia be namo? Oi laloa mauri davana be harihari gauna oi dekenai, a? Oi sibona ese unai henanadai do oi haerelaia. Inai haheitalai oi laloa: Ta ese harihari gauna ta ia kumia bona oi ia henia. Unai harihari gauna be oiemu lasi, ela bona emu imana amo unai harihari gauna oi dogoatao bona oi abia dae. Unai hegeregerena, Iehova be oi dekenai mauri davana ia henia, to unai harihari gauna be oiemu lasi, ela bona emu imana amo unai harihari gauna oi dogoatao bona oi abia dae. Edena dala ai?

Iesu ia gwau ia “idia abidadama henia taudia ibounai” be mauri hanaihanai do idia abia. Emu mauri dalana amo emu abidadama oi hahedinaraia be namo. (Iamesi 2:​26) Iesu oi abidadama henia ena anina be, emu mauri do oi haidaua bona iena hereva oi badinaia bona ena kara oi tohotohoa. Unai oi karaia totona, namona be Iesu bona ena Tamana oi diba namonamo. Iesu ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.”​​—⁠Ioane 17:⁠3.

Lagani 2,000 haida gunanai, Iesu Keriso be hereva ta ia harorolaia, bona unai hereva ese tanobada taudia milioni momo edia mauri ia haidaua. Oi ura unai hereva ma haida oi diba bona hari inai negai bona vaira negana ai oi bona emu ruma bese ia durua daladia oi diba, a? Iehova ena Witnes taudia be mai moale ida oi idia hadibaia diba.

Inai magasin ena hereva ma haida ese oi do ia durua Iesu Keriso oi diba namonamo totona, badina ia harorolaia herevana ese emu mauri do ia hanamoa ela bona hanaihanai.

[Footnotes]