Dirava ese Lauma Helaga Amo Ena Ura Ia Hagugurua
“Lau ese lau gwauraia hereva . . . Lau siaia totona gaukarana be do ia karaia momokani.”—ISA. 55:11.
1. Haheitalai ta amo oi hahedinaraia edena dala ai Iehova ena ura be taunimanima edia palani amo ia idau.
TAUNIMANIMA ese gau ta idia karaia totona palani idia karaia be gau badana, to Iehova be ena ura ia guguru totona, palani ia karaia be anina lasi. Mani inai oi laloa: Tau ta bona ena adavana idia ura ruma namona ta idia haginia bona edia ruma bese idia moale. Unai ia vara totona, palani idia karaia guna be gau badana. Momokani, nega bada lalonai palani idia karaia bona idia ura unai palani ia guguru be namo. To, reana gau haida hegeregere, tano mareremarere, ta be moni gaukara ia haboioa, gorere o mase ese edia palani idia hadikaia diba bona unai palani ena anina do idia hagugurua haraga lasi.
2, 3. (a) Iehova ena ura be dahaka? Adamu bona Heva idia kara dika murinai, Dirava be edena dala ai unai ia hamaoromaoroa? (b) Dahaka dainai Iehova ena ura ia guguru dalana ita laloa bada be namo?
2 To, Iehova be taunimanima bamona lasi. Gau ta be Iehova ena ura ia koua diba lasi. Iehova ese nega bada lalonai palani ta ia karaia be anina lasi, badina Iena aonega bona goada be idia hegeregere momokani ena ura ia hagugurua totona. (Efe. 3:11, NW ) Hegeregere, matamanai Ia be mai ena ura eiava gwauhamata ta taunimanima bona tanobada totona—inai tanobada ibounai be paradaiso ai do ia lao, bona goevadae taudia ese mai maino bona moale ida idia noholaia hanaihanai diba. (Gen. 1:28) Adamu bona Heva be kara dika idia karaia neganai, karaharaga Iehova be dala ia karaia Iena ura ia hagugurua totona. (Genese 3:15 duahia.a) Iehova be maoromaoro ia gwau Natuna o “garana” ta do ia vara, bona unai garana ese Satani bona gau dikadia ibounai do ia kokia.—Heb. 2:14; 1 Ioa. 3:8.
3 Iehova ena ura be do ia guguru bona guba o tanobada ena siahu gauna ta ese ia koua diba lasi. (Isa. 46:9-11) Dahaka dainai? Iehova be ena lauma helaga o ena gaukara siahuna amo ena ura ena “anina do ia havaraia.” (Isa. 55:10, 11) Unai dainai, Dirava ese ena ura ia hagugurua dalana ita laloa bada be namo, badina unai be mai anina bada ita dekenai. Danu, Iehova ese lauma helaga ia gaukaralaia dalana ita itaia neganai, unai ese eda abidadama ia hagoadaia. Unai dainai, namona be gunaguna, hari inai negai, bona vaira neganai lauma helaga ese Iehova ena ura ia hagugurua dalana ita itaia.
Gunaguna Lauma Helaga Ena Gaukara
4. Edena dala ai Iehova ese ena ura be sisina sisina ia gwauraia hedinarai?
4 Baibel negadiai, Iehova ese ena ura be sisina sisina ia gwauraia hedinarai. Matamanai, gwauhamata Garana be “hunia gauna.” (1 Kor. 2:7) Ela bona lagani 2,000 murinai, Iehova ese unai garana ia kikilaia lou. (Genese 12:7; 22:15-18 duahia.b) Ia ese Aberahamo dekenai ia gwauraia gwauhamatana be dala badana ai ia guguru. Inai hereva “oiemu garana dainai” ese ia hahedinaraia, unai Garana be Aberahamo ena bese amo do ia mai, anina be taunimanima bamona do ia vara. Reana Satani ia ura dikadika unai ia diba danu. Oibe, ia ura Aberahamo ena bese ia hadikaia, unai amo Dirava ena ura gauna do ia guguru lasi. To Satani ia laloa gauna ia vara diba lasi, badina Dirava ena lauma helaga ia gaukara. Edena dala ai?
5, 6. Edena dala ai Iehova ese ena lauma helaga amo Garana ena tubuna ta ta ia gimaia?
5 Iehova ese lauma helaga amo Garana ena tubuna ta ta ia gimaia. Iehova ese Aberamo (Aberahamo) ia hamaoroa: “Lau be oiemu kesi.” (Gen. 15:1) Unai gwauhamata ena anina ia guguru. Hegeregere: Lagani 1919 B.C.E. bamona ai, Aberahamo bona Sara be nega sisina Gerara ai idia noho neganai, ia vara gauna mani oi laloa. Gerara ena king Abimeleka ia diba lasi Sara be Aberahamo ena adavana, unai dainai ia ura Sara be iena adavana ai ia lao. Oi laloa Satani be hunia dalanai Abimeleka ia gaukaralaia, badina ia ura lasi Sara be Aberahamo ena garana ia havaraia, a? Baibel be unai ia gwauraia lasi. To ia gwau, Iehova be Abimeleka ia koua. Nihi lalonai, Abimeleka ia hadibaia Sara ia sihari henia lasi totona.—Gen. 20:1-18.
6 To, unai nega sibona lasi. Nega ma haida ai danu, Iehova be Aberahamo bona ena ruma bese taudia ia hamauridia. (Gen. 12:14-20; 14:13-20; 26:26-29) Unai dainai, salamo torea tauna ese Aberahamo ena natudia bona tubudia be inai bamona ia herevalaia diba: “[Iehova] ese Israela besena ia naria, dagedage bona dika momokani dekena amo ia ese ia gimadia. Bona Lohiabada ese king haida ia sisiba henidia, Israela taudia do idia hadikaia lasi totona. Lohiabada ia gwau, ‘Lau ese lau abia hidi bese taudia, be do umui hisihisi henidia lasi. Lauegu peroveta taudia do umui hadikaia lasi.’ ”—Sal. 105:14, 15.
7. Edena dala ai Iehova be Israela besena ia gimaia?
7 Iehova ese lauma helaga amo idaunegai Israela besena ia gimaia, badina gwauhamata Garana be unai bese lalonai do ia vara. Iehova be lauma helaga amo ena Taravatu be Israela taudia dekenai ia henia; unai ese Iuda taudia ia gimaia kara maoromaorodia idia karaia, edia tauanina ia goeva, bona tomadiho koikoi idia dadaraia to tomadiho momokani idia dogoatao totona. (Eso. 31:18; 2 Kor. 3:3) Hahemaoro Taudia edia negai, Iehova ese lauma helaga amo tatau haida ia durua, dagedage taudia amo Israela taudia idia hamauria totona. (Gun. 3:9, 10) Iesu ena negai, Dirava ese lauma helaga amo Ierusalema, Betelehema, bona dubu ia gimadia be namo, badina Iesu ese do ia hagugurua peroveta herevadia be unai gabudia dekenai do idia guguru.
8. Dahaka ese ia hahedinaraia Dirava ena Natuna ena mauri bona haroro gaukara lalonai, lauma helaga ese ia durua?
8 Iesu ena mauri bona haroro gaukara lalonai, Dirava ese lauma helaga amo ia durua. Lauma helaga be rami hebou kekenina Maria ena bogana lalonai ia gaukara bona gau ta ia hagugurua, guna o gabeai be unai bamona lasi. Goevadae lasi hahinena ta ia durua dainai Natuna goevadaena ia vara; unai dainai, Iesu ia mase be anina lasi. (Luka 1:26-31, 34, 35) Gabeai lauma helaga ese Iesu ia gimaia, ena beibi negana ai ia mase lasi totona. (Mat. 2:7, 8, 12, 13) Iesu ena mauri lagani be 30 neganai, Dirava ese lauma helaga amo ia horoa, ia abia hidi Davida ena terona ai do ia helai, bona ia hagania haroro gaukara do ia karaia totona. (Luka 1:32, 33; 4:16-21) Lauma helaga ese Iesu ia durua dainai hoa karadia ia karaia, hegeregere gorere taudia ia hanamoa, hutuma ia ubua, bona mase taudia ia hatorea isi lou. Unai bamona hoa karadia amo ita laloparara, vaira neganai Iesu ena lohia siahuna henunai unai bamona hahenamo idauidau do idia vara.
9, 10. (a) Iesu ena hahediba taudia ginigunadia dekenai lauma helaga be edena bamona ia gaukara? (b) Aposetolo edia negai dahaka ia vara Iehova ena ura gauna ia guguru totona?
9 Pentekoste 33 C.E. amo, Iehova be ena lauma helaga amo Aberahamo ena garana ena kahana iharuana ia horoa, to idia momo be Aberahamo ena bese taudia lasi. (Roma 8:15-17; Gal. 3:29) Lauma helaga ese Iesu ena hahediba taudia ginigunadia ia durua haroro gaukara idia goadalaia bona ia hasiahua hoa karadia idia karaia totona. (Kara 1:8; 2:1-4; 1 Kor. 12:7-11) Idia be lauma helaga amo hoa karadia idia karaia neganai, unai ese Iehova ena ura ia hagugurua dalana matamatana ia hahedinaraia. Iehova ia ura lasi taunimanima be lagani handred momo gunanai Ierusalema ai idia karaia tomadiho karana idia badinaia noho. Iena lalonamo be Keristani kongrigeisen matamatana dekenai ia noho. Unai nega amo, Iehova be unai horoa kongrigeisen ia gaukaralaia iena ura ia hagugurua totona.
10 Baibel negadiai, Iehova ese ena lauma helaga ia gaukaralaia taunimanima ia gimaia, hasiahua, bona horoa, to unai be dala haida sibona Iehova ese ena lauma helaga ia gaukaralaia iena ura ia hagugurua totona. Iseda nega be edena bamona? Hari edena dala ai Iehova be iena lauma helaga ia gaukaralaia iena ura ia hagugurua totona? Unai ita diba be namo, badina ita ura lauma helaga ena hakaua hegeregerena ita kara. Vadaeni, namona be hari inai negai lauma helaga ese ita ia hakaua daladia foa ita herevalaia.
Hari Inai Negai Lauma Helaga Ena Gaukara
11. Dahaka ese ia hahedinaraia lauma helaga ena hakaua dainai, Dirava ena taunimanima be idia goeva? Edena dala ai oi hahedinaraia diba lauma helaga ena hakaua dalana oi badinaia?
11 Namba 1: Lauma helaga ena hakaua dainai, Dirava ena taunimanima be idia goeva. Iehova ena ura lalonai idia noho taudia ese kara maoromaoro idia karaia be namo. (1 Korinto 6:9-11 duahia.) Keristani taudia momokanidia haida be guna matabodaga karadia idia karaia, idia heudahanai, bona tatau be tatau ida idia mahuta hebou. Kara dika havaraia urana be ia goada momokani. (Iam. 1:14, 15) To, Dirava ese unai bamona taudia edia kara dika “ia huria goeva vadaeni,” unai ese ia hahedinaraia idia be edia mauri idia haidaua bona Dirava idia hamoalea. Dirava ia lalokau henia tauna be dahaka ese ia durua kara dika havaraia urana ia dadaraia totona? Korinto Ginigunana 6:11 ia gwau: “Dirava ena Lauma.” Oibe, kara maoromaoro oi karaia noho neganai, oi hahedinaraia lauma helaga be emu mauri ia hakaua noho.
12. (a) Esekiela ena matahanai hegeregerena, Iehova be edena dala ai iena orea ia hakaua? (b) Edena dala ai oi hahedinaraia diba oi be lauma helaga ena hakaua dalana oi badinaia?
12 Namba 2: Lauma helaga be Iehova ena orea ia hakaua dainai, unai orea be Dirava ena ura sibona ia badinaia. Esekiela ena matahanai lalonai, Iehova ena guba oreana be kariota ta bamona ia heau noho bona Iehova ena ura ia hagugurua. Dahaka ese unai kariota o orea ia hakaua? Lauma helaga. (Ese. 1:20, 21) Namona be ita laloatao, Iehova ena orea be rua: Guba oreana bona tanobada oreana. Bema lauma helaga be guba oreana ia hakaua, anina be tanobada oreana ia hakaua danu. Dirava ese tanobada ai ia gaukaralaia oreana oi badinaia neganai, oi hahedinaraia oi be Dirava ena guba oreana ida oi gaukara hebou bona lauma helaga ena hakaua dalana oi badinaia.—Heb. 13:17.
13, 14. (a) Iesu ese ia gwauraia “inai uru” be daidia? (b) Lauma helaga be ita ia durua hereva momokanidia ita lalopararalaia totona; mani haheitalai ta oi gwauraia. (Maua ladana “Hereva Momokani Matamatadia Haida” itaia.)
13 Namba 3: Lauma helaga ese ita ia durua Baibel ena hereva momokanidia ita lalopararalaia totona. (Aon. 4:18) Ema bona hari, “hesiai tauna mai ena kamonai, bona mai ena kara maoromaoro” be Gima Kohorona amo hereva momokanidia ia halasia noho. (Mat. 24:45) Hegeregere, Iesu ena hereva, “inai uru” taudia ena anina ita lalopararalaia be hoa gauna. (Mataio 24:34 duahia.c) Iesu ena hereva, “inai uru” be daidia? Gima Kohorona ta ena kahana ta ladana, “Keriso Ena Noho Negana—Oi Lalopararalaia, A?” ia gwau, Iesu ena hereva (“inai nega idia noho taudia” o “inai uru”) be kara dika taudia ia gwauraia lasi to Iesu ena hahediba taudia ia gwauraia—idia be daudau lasi murinai lauma helaga ese do ia horoa taudia.d Aposetolo edia negai bona hari inai negai, Iesu ena murinai idia raka horoa taudia be toa idia itaia sibona lasi, to unai toa amo idia diba Iesu “ia kahirakahira vadaeni, iduara dekenai ia noho.”
14 Inai hereva, “inai uru” ena anina ita dekenai be dahaka? Ena be ita diba lasi “inai uru” ena noho negana be lagani hida, to nega momo inai hereva, “uru” be mauri lagani idauidau taudia ia herevalaia, bona idia ibounai—hegeregere, tamana ta bona ena natuna, o tubuna ta bona ena tubuna merona—be edia noho negana lalonai ia vara gauna ta idia itaia hebou; to unai nega ia daudau lasi bona mai ena dokona. (Eso. 1:6) Vadaeni, Iesu ese ia gwauraia “inai uru” be daidia? Unai uru be lagani 1914 ai idia vara matamaia toa idia itaia horoa taudia sibona lasi, to unai horoa taudia idia do noho lalonai hisihisi badana ena matamana do idia itaia horoa taudia danu. Unai uru be mai ena matamana, bona mai ena dokona. Toa idauidau idia guguru karana ese idia hahedinaraia goevagoeva, hisihisi badana be kahirakahira. Oi gima noho neganai, oi hahedinaraia oi be lauma helaga ena hakaua dalana oi badinaia, bona hereva momokani matamatadia oi kamonai bona unai hegeregerena emu lalohadai oi hamaoromaoroa.—Mar. 13:37, NW.
15. Dahaka ese ia hahedinaraia lauma helaga ese ita ia hasiahua sivarai namona ita harorolaia totona?
15 Namba 4: Lauma helaga ese ita ia hasiahua sivarai namona ita harorolaia totona. (Kara 1:8) Dahaka dainai sivarai namona be tanobada ibounai dekenai ita harorolaia? Mani inai oi laloa: Reana guna oi be haida bamona, oi hemarai o oi gari dainai oi gwau, ‘Ruma-ta-ruma-ta haroro gaukara do lau karaia diba lasi!’ To, hari oi be haroro gaukara oi karaia goadagoada noho.e Iehova ena Witnes taudia momo be dagedage idia davaria, to idia haroro noho. Ena be ita laloa unai bamona hahetoho ita hanaia be auka, to Dirava ena lauma helaga sibona ese ita ia hasiahua diba unai bamona gaudia ita hanaia totona. (Mika 3:8; Mat. 17:20) Hanaihanai haroro gaukara oi karaia neganai, oi hahedinaraia oi be lauma helaga ida oi gaukara hebou.
Vaira Neganai Lauma Helaga Ena Gaukara
16. Dahaka dainai ita diba, hisihisi badana lalonai Iehova be lauma helaga amo ena taunimanima do ia gimaia?
16 Vaira negana ai, Iehova be ena lauma helaga amo Iena ura do ia hagugurua. Taunimanima do ia gimaia dalana ita itaia guna. Ita herevalaia vadaeni, idaunegai Iehova be lauma helaga amo Israela besena taudia o idia ta ta ia gimaia. Unai dainai, ita diba, hisihisi badana lalonai Iehova be lauma helaga amo ena taunimanima do ia gimaia. Namo lasi inai nega dikana amo Iehova ese ita do ia naria dalana ita daradaralaia. To, ita abia dae momokani hanaihanai Iehova be ia idia lalokau henia taudia ia naridia bona ena lauma helaga amo idia ia durua.—2 Siv. 16:9; Sal. 139:7-12.
17. Edena dala ai Iehova be tanobada matamata lalonai ena lauma helaga do ia gaukaralaia?
17 Edena dala ai Iehova be tanobada matamata lalonai ena lauma helaga do ia gaukaralaia? Apokalupo karoa 20 ese ia gwauraia buka matamatadia torea gaukarana be lauma helaga ese do ia hakaua. (Apok. 20:12) Unai buka lalonai dahaka do idia noho? Unai buka ai be Iehova ia ura lagani 1,000 lalonai do ita badinaia taravatudia ia gwauraia. Oi ura unai buka lalonai idia noho gaudia oi diba, a? Vadaeni mai moale ida unai tanobada matamatana ita naria noho. Iehova ese lauma helaga amo inai tanobada bona taunimanima dekenai ena ura gauna ia hagugurua neganai, nega be do ia namo herea.
18. Emu lalona oi hadaia dahaka oi karaia totona?
18 Ita laloaboio lasi, gau ta ese Iehova ena lauma helaga o gaukara siahuna do ia koua lasi dainai, Iehova be ena ura do ia hagugurua momokani. Unai be mai anina bada oi dekenai. Unai dainai, emu lalona oi hadaia Iehova ena lauma helaga oi abia totona oi guriguri sibona lasi, to lauma helaga ena hakaua dalana oi badinaia danu. (Luka 11:13) Unai bamona oi karaia neganai, tanobada Paradaisona ai do oi noho ela bona hanaihanai—Iehova ena ura taunimanima dekenai be unai.
[Footnotes]
a Genese 3:15 (NW ) ia gwau: “Lau ese badu oi bona hahine ihuanai do lau atoa, bona oiemu garana bona iena garana ihuanai danu. Ia ese oiemu kwarana do ia botaia, bona oi ese ia aena geduna do oi haberoa.”
b Genese 22:17, 18 (BHğ) ia gwau: “Lau ese oi do lau hanamoa badabada bona oiemu garana do lau habadaia, guba ena hisiu bona kone ena miri bamona; oiemu garana ese do ia inai taudia edia tano do oi abia, oiemu garana dainai tanobada ena bese ibounai do lau hanamoa, badina be oi ese lau oi kamonai henia.”
c Mataio 24:34 (NW ) ia gwau: “Umui lau hamaoroa momokani, inai uru be do ia ore lasi ela bona inai gaudia ibounai idia vara.”
e Matamanai ia hemarai to gabeai ia haroro goadagoada taihu ta ena ekspiriens be Gima Kohorona, September 15, 1993, rau 19 dekenai oi itaia.
Oi Laloatao, A?
• Edena dala ai Iehova be Baibel negadiai lauma helaga amo ena ura ia hagugurua?
• Edena dala ai Iehova be hari lauma helaga ia gaukaralaia?
• Edena dala ai Iehova be vaira neganai lauma helaga amo ena ura do ia hagugurua?
[Box on page 10]
Hereva Momokani Matamatadia Haida
Iehova ese Baibel ena hereva momokanidia be ena taunimanima dekenai ia hadibaia noho. Gima Kohorona gunadia haida dekenai, unai bamona gaudia haida be dahaka?
▪ Paraoa hatubua muramurana ena parabole lalonai, kamonai tauna ena hetura karana Dirava ida ia goada ia lao be Keriso ese edena bamona ia hahedinaraia? (Mat. 13:33)—July 15, 2008, rau 19-20.
▪ Guba helarona idia abia Keristani taudia haboua karana be edena nega ai do ia ore?—May 1, 2007, rau 30-31.
▪ Mai “lauma” ida Iehova tomadiho henia ena anina be dahaka? (Ioa. 4:24)—August 1, 2002, rau 9.
▪ Hutuma bada taudia ese edia hesiai gaukara be edena kahana, dubu dekenai idia karaia? (Apok. 7:15)—November 1, 2002, rau 30-31.
▪ Mamoe bona nanigosi hapararaia gaukarana be edena negai ia vara? (Mat. 25:31-33)—October 15, 1995, rau 18-28.