Duahia Taudia Idia Henanadai . . .

Kingdom Hall be Dahaka?

▪ Kingdom Hall be tomadiho rumana ta, Iehova ena Witnes taudia ese idia gaukaralaia edia tomadiho heboudia idia karaia totona. Tanobada hegegemadai Kingdom Hall tausen momo idia gaukaralaia. Pura ta ta ai, Iehova ena Witnes taudia edia kongrigeisen 105,000 mai kahana be unai bamona Kingdom Hall lalodiai idia hebou.

Kingdom Hall lalodiai Baibel hadibaia program idia karaia bona hadibaia hereva idia henia. Kingdom Hall lalodiai idia noho platfom amo hebou idia hakaua diba. Nega momo, Kingdom Hall ai helai gabudia idia karaia taunimanima 100 ia lao 300 idia helai totona. Danu, Kingdom Hall lalonai be daiutu ta mai ena laiberi maragina ta ia noho, unuseniai Baibel idia herevalaia buka bona magasin idia atoa, kongrigeisen taudia ta ta ese edia tahua gaukara idia karaia totona.

Kingdom Hall ai, Kerisendom dubudia ai idia gaukaralaia kaivakuku idauidau edia laulau idia noho lasi. Unuseniai boubou patadia, laulau idauidau bona korosi be lasi. Dahaka dainai? Badina Iehova ena Witnes taudia idia abia dae unai bamona gaudia gaukaralaia karana ese Baibel ena taravatu ia utua, ia gwau, “kaivakuku dekenai umui tomadiho henia lasi.” (1 Korinto 10:14; Ioane 4:​24) Dubu momo lalonai be herahera o sitaelo gaudia momo idia atoa. To, Kingdom Hall be unai bamona lasi; idia haginia ena badina be Iehova ena Witnes taudia ese edia Keristani heboudia idia karaia totona. Kingdom Hall be hairai dalanai idia haginia be anina bada lasi, to mai anina bada gauna be unai ruma lalonai Baibel ena hadibaia herevadia idia henia.

Dahaka dainai inai ladana Kingdom Hall idia gaukaralaia? Kingdom Hall ai idia karaia hebou lalonai Baibel ena hereva bona “Dirava ena Basileia,” Iesu ese ia harorolaia hereva badana unai, idia hadibaia. (Luka 4:​43) Inai ladana Kingdom Hall be lagani 1930 murinai idia abia, unai ese Kingdom Hall idia karaia ena badina ia hahedinaraia​​—⁠tomadiho momokani ia abia isi bona “Basileia ena Sivarai Namona” harorolaia gaukarana ia durua. (Mataio 24:14) Unai dainai, Kingdom Hall be moale karadia eiava bisinesi karadia karaia totona idia gaukaralaia lasi. Taunimanima ese sibona edia ura hegeregerena kontribusen idia henia, bona unai moni idia gaukaralaia Kingdom Hall idia haginia, ranu bona paua edia davana idia henia, bona tanobada hegegemadai idia karaia haroro gaukara idia durua. Moni gogoa mereki ta idia siaia loaloa lasi. To kontribusen maua ta ia noho, bona ta ta be sibona edia ura hegeregerena moni idia henia.

Tanobada hegegemadai Kingdom Hall ai hebou idia karaia daladia be hegeregere, to Kingdom Hall idia haginia daladia be idauidau. Kingdom Hall idia haginia gwauraia neganai, inai gaudia idia laloa guna: Kongrigeisen ena moni, ia be edena bamona gabuna, bona do idia gaukaralaia kohudia idia noho eiava lasi. Kingdom Hall haida be biriki, au bona nadi amo idia karaia. Kingdom Hall ma haida dekenai reana haba be baubau amo idia karaia bona guhi be kurukuru amo idia karaia.

Vadivadi taudia be Kingdom Hall dekenai idia lao diba hebou totona. (Heberu 10:25) Pura ta ta ai pablik haroro ta idia abia, bona unai hebou lalonai Baibel ena sinado badana ta idia herevalaia, kongrigeisen taudia bona vadivadi taudia dekenai unai sinado be mai anina bada. Oiemu gabu ai ia noho Kingdom Hall dekenai oi lao diba.

[Picture on page 31]

Malawi, Africa

[Pictures on page 31]

England, Great Britain