Dirava Kahirakahira Oi lao

Bema Tau ta be “Iena Kara Dika Dainai Ia Lalohisihisi Momokani,” Dirava Ia Noia Ena Dika Ia Gwauatao Totona

2 SAMUELA 12:​1-​14

ITA ibounai be nega momo ita kerere. Herevana iseda kerere dainai ita lalohisihisi bada, to reana ita laloa: ‘Lau helalo-kerehai bona mai momokani ida Dirava lau guriguri henia neganai ia kamonai, a? Egu kara dika ia gwauatao, a?’ Baibel ese inai hagoadaia herevana be ita dekenai ia hadibaia: Ena be Iehova ese kara dika ia inai henia, to mai ena ura ida Ia ese helalo-kerehai tauna ena dika ia gwauatao. Israela ena King Davida dekenai ia vara gauna ese unai ia hahedinaraia, unai sivarai be 2 Samuela karoa 12 ai ia noho.

Ia vara gauna mani oi laloa. Davida be kara dika badadia haida ia karaia. Ia be Bataseba ida ia heudahanai, bona ena kara dika hunia totona dala ia karaia Bataseba ena adavana idia alaia. Davida be ena kara dika ia gwauraia hedinarai lasi, bona hua haida lalonai ia be kerere lasi toana ia hahedinaraia. To, Iehova be Davida ena kara dika ia itaia. To danu, ia diba Davida be reana do ia helalo-kerehai. (Aonega Herevadia 17:⁠3) Iehova be dahaka do ia karaia?

Iehova ese peroveta tauna Natana be Davida dekenai ia siaia lao. (Siri 1) Natana be lauma helaga ese ia hakaua dainai, ena hereva ia abia hidi namonamo, unai amo mai aonega ida king ia hereva henia diba. Edena dala ai Natana ese ia hahedinaraia Davida be sibona ia koia? Bona edena dala ai Davida ia durua, unai amo do ia laloparara ia be kara dika badadia haida ia karaia?

Davida ese ena kerere ia gwauraia hedinarai totona, Natana be sivarai ta ia gwauraia, unai amo Davida ena kudouna ia hamarerea. Unai be kohu momo tauna bona ogogami tauna edia sivarai. Kohu momo tauna “ena mamoe bona nani be momo herea,” to ogogami tauna ena “mamoe natuna hahine” be tamona sibona. Kohu momo tauna ese vadivadi tauna ta ia abia dae bona ia ura aniani ia hegaegaelaia. To ia ura lasi iena mamoe ta ia alaia dainai, ogogami tauna ena mamoe natuna ia abia. Davida ia laloa unai sivarai be momokani, unai dainai ia badu dikadika bona ia gwau: “Unai bamona ia karaia tauna harihari do ia mase be namo!” Dahaka dainai? Davida ia gwau: “Badina ia be bogahisihisi ia henia lasi.”a​—⁠Siri 2-6.

Natana ena parabole anina ia hedinarai. Davida be ena kara amo sibona ia samania. Natana be Davida dekenai ia gwau: “Unai kohu momo tauna be oi!” (Siri 7) Natana be Dirava ia herevalaia neganai, ia hahedinaraia Iehova be Davida ena kara dekenai ia moale lasi. Davida be Dirava ena taravatu ia utua karana amo ia hahedinaraia, ia be Iehova, Taravatu Henia Tauna ia matauraia lasi. Dirava ia gwau: “Oi ese lau oi negea.” (Siri 10) Unai hereva ese Davida ena kudouna ia hamarerea dainai, ena kerere ia gwauraia hedinarai, ia gwau: “Lohiabada dekenai lau kara dika vadaeni.” Natana ese Davida ia hamaoroa, Iehova be ena kara dika ia gwauatao, to Davida be ena kara ena davana do ia abia.​​—⁠Siri 13, 14.

Davida ena kara dika ia hedinarai murinai, ia ese Salamo karoa 51 ia torea. Unai karoa lalonai, Davida be mai ena kudouna ibounai ida helalo-kerehai toana ia hahedinaraia. Davida be ia kara dika neganai Iehova ia dadaraia. To unai helalo-kerehai king be ia laloparara Dirava ese iena kara dika ia gwauatao neganai, Iehova dekenai ia gwau diba: “Dirava e, bema tau ta be iena kara dika dainai ia lalohisihisi momokani, bona ia manau momokani neganai, oi ese ia do oi negea diba lasi.” (Salamo 51:17) Unai hagoadaia hereva haida ese helalo-kerehai tauna ta ia durua Iehova ena hebogahisi karana ia tahua totona.

[Footnote]