Tatau e, Keriso Ena Kwara Dagina Umui Matauraia, A?
“Tatau ibounai edia kwarana be Keriso.”—1 KOR. 11:3.
1. Dahaka ese ia hahedinaraia Iehova be gau ibounai ia karaia namonamo Diravana?
APOKALUPO 4:11 ia gwau: “Aiemai Lohiabada, aiemai Dirava e, oi be hegeregere momokani vadaeni, taunimanima ibounai ese hairai bona mataurai, be oi dekenai do idia henia, bona oiemu siahu henunai do idia noho. Badina gau ibounai be oi ese oi havaraia. Oiemu ura dainai oi karadia, bona oiemu ura dainai idia noho.” Iehova Dirava be gau ibounai ia havaraia dainai, ia be guba bona tanobada edia Atai Herea Lohiabadana bona biaguna. Ia ese ena aneru be edia orea ta ta ai ia atoa namonamo karana ese ia hahedinaraia, “Dirava be maino Diravana, bona ia ese gau ibounai ia karaia namonamo.”—1 Kor. 14:33, NW; Isa. 6:1-3; Heb. 12:22, 23.
2, 3. (a) Daika be Iehova ese ia havaraia guna? (b) Tamana bona ena Natuna edia dagi be edena bamona?
2 Dirava be gau ta ia do havaraia lasi neganai, lagani momo herea lalonai ia sibona ia noho. Bena aneru ginigunana ia havaraia, ena ladana idia gwauraia “Hereva,” badina ia be Iehova ena hereva ia Gwauraia Tauna. Ia dekena amo Dirava ese gau ibounai ia karaia. Gabeai, ia be goevadae tauna ta bamona tanobada dekenai ia mai, bona hari ena ladana ita gwauraia Iesu Keriso.—Ioane 1:1-3, 14 duahia.
3 Baibel ese Dirava bona ena Natuna edia dagi be edena bamona ia herevalaia? Aposetolo Paulo be Dirava ena lauma ese ia hasiahua bena ia gwau: “Lau ura umui diba, tatau ibounai edia kwarana be Keriso, hahine edia kwarana be edia tau, bona Keriso ena kwarana be Dirava.” (1 Kor. 11:3) Keriso be ena Tamana ena kwara dagina henunai ia noho. Kwara dagina matauraia bona badinaia karana ese aneru bona taunimanima ia durua, mai maino ida idia noho namonamo totona. Ma danu, ena be “Dirava ese Keriso dekena amo gau ibounai ia karaia,” to ia ese Dirava ena kwara dagina ia matauraia be gau badana.—Kol. 1:16.
4, 5. Iesu ese Iehova ena kwara dagina henunai ia noho karana be edena bamona ia laloa?
4 Iesu ese Iehova ena kwara dagina henunai ia noho bona tanobada dekenai ia mai karana be edena bamona ia laloa? Baibel ia gwau: “Keriso Iesu . . . be nega ibounai Dirava bamona ia noho. Oibe, Keriso be Dirava danu ia hegeregere, to ia laloa lasi unai bamona do ia noho, ia sibona do ia dogoatao gauna. Lasi, to ia ese sibona ena ura dainai, iena dagi badana ia negea, bona hesiai tauna momokani ia lao. Ia be taunimanima hegeregerena ia vara, bona taunimanima edia toana ia abia. Oibe, Keriso ese iena hairai ia laloa lasi, to ia manau momokani. Bona ia ese Dirava ia kamonai henia ela bona ia mase, oibe, satauro dekenai ia mase.”—Fili. 2:5-8.
5 Hanaihanai Iesu be mai manau ida ena Tamana ena ura ia badinaia. Ia gwau: “Lau be sibona gau ta do lau karaia kava lasi . . . bona egu kota henia gaukara be maoromaoro, badina lau sibona egu ura lau karaia lasi, to Dirava ena ura sibona lau karaia. Ia ese lau ia siaia.” (Ioa. 5:30) Ma ia gwau: “[Egu Tamana ena] ura be nega ibounai lau karaia.” (Ioa. 8:29) Iesu be kahirakahira tanobada do ia rakatania neganai, ena tamana ia guriguri henia, ia gwau: “Lau ese tanobada dekenai oi lau hanamoa vadaeni, lau dekenai gaukara oi henia danu be lau karaia haorea vadaeni.” (Ioa. 17:4) Momokani, Iesu ia laloparara bona ia abia dae ia be Dirava ena kwara dagina henunai ia noho.
Tamana Ena Henunai Noho Karana ese Natuna Ia Durua
6. Dahaka kara namodia be Iesu ese ia hahedinaraia?
6 Iesu be tanobada ai ia noho neganai, kara namodia ia hahedinaraia. Unai bamona kara ta be inai: Iena Tamana ia lalokau henia bada. Ia gwau: “Lau ese egu Tamana lau lalokau henia.” (Ioa. 14:31) Danu, taunimanima ia lalokau henia bada. (Mataio 22:35-40 duahia.) Iesu be ia hebogahisi, ia kara auka lasi, bona ta ia biagua auka lasi. Ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina lau be dagedage lasi bona manau tauna. Vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu hekwarahi lasi.” (Mat. 11:28-30) Mamoe bamona taudia badadia bona maragidia—lalometau taudia danu—be Iesu ena kara namodia bona hereva namodia amo goada idia abia.
7, 8. Taravatu ese rara moru gorere ia abia hahinena be edena bamona ia taravatua? Iesu be hahine dekenai dahaka ia karaia?
7 Iesu ese hahine ia matauraia dalana mani ita laloa. Idaunegai amo ema bona hari, tatau momo be hahine idia matauraia lasi. Idaunegai Israela ai, tomadiho gunalaia taudia be unai bamona. To Iesu be hahine ia matauraia. Hegeregere, ena be hahine ta be lagani 12 rara moru gorerena ia abia, to Iesu ese ia matauraia. Unai hahine be doketa momo edia heduru ia tahua to “hisihisi bada ia abia,” bona “ena moni ibounai ia haorea to namo ta ia davaria lasi.” Herevana unai ia karaia to “ena gorere be ia bada ia lao.” Taravatu dekenai, ia be miro. Unai dainai, unai hahine ia dogoatao tauna danu be do ia miro.—Lev. 15:19, 25.
8 Hahine ia kamonai Iesu be gorere taudia ia hanamoa neganai, Iesu badinai idia gini hutuma huanai ia vareai bona ia gwau: “Bema iena dabua sibona lau dogoatao, mauri do lau davaria.” Iesu ia dogoatao neganai, maoromaoro ena gorere ia ore. Iesu ia diba unai hahine ia karaia karana be kerere. To, ia ese unai hahine ia gwau henia lasi. To, ia kara namo henia. Ia laloparara unai hahine be lagani momo lalonai unai gorere ia hisihisilaia dainai ia ura dikadika ta ese ia durua. Iesu be mai hebogahisi ida hahine ia hamaoroa: “Lauegu natuna, oiemu abidadama dainai, mauri oi davaria vadaeni, oi lao mai maino danu, bona oiemu gorere do oi davaria lou lasi.”—Mar. 5:25-34.
9. Iesu ena diba tahua taudia ese natudia idia lulua neganai, Iesu be dahaka ia karaia?
9 Natudia danu be Iesu dekenai idia gari lasi. Nega ta ai, taunimanima ese natudia maragidia be Iesu dekenai idia mailaia neganai, ena diba tahua taudia ese idia lulua; reana idia laloa Iesu be natudia ia laloa maragi. To Iesu ena laloa dalana be idau. Baibel ia gwau: “Iesu [be unai] ia itaia [neganai], ia badu, [ena hahediba taudia] ia gwau henia, ia gwau, ‘Lau ura maragi idia mai lau dekenai, umui lulua lasi, badina idia bamona be Dirava ena Basileia taudia.’ ” Bena, “maragidia ia rosia, bona iena imana ia atoa edia latanai, ia hanamoa.” Momokani, Iesu be mai moale ida natudia ia abia dae.—Mar. 10:13-16.
10. Edena dala ai Iesu be kara namodia ia dibaia bena tanobada ai ia hahedinaraia?
10 Edena dala ai Iesu be kara namodia ia dibaia bona tanobada ai ia hahedinaraia? Iesu be tanobada dekenai ia do mai lasi neganai, lagani momo lalonai ena guba Tamana ena kara ia itaia bona dibaia. (Aonega Herevadia 8:22, 23, 30 duahia.) Guba ai, Iehova ese mai ena lalokau ida ia havaraia gaudia ia biagua namonamo dalana be Iesu ese ia itaia bona tohotohoa. Bema Iesu be Dirava ia badinaia lasi, reana unai bamona do ia karaia lasi, ani? To, mai moale ida ena Tamana ia badinaia, bona Iehova ia moale badina ena Natuna be unai bamona ia karaia. Tanobada dekenai, Iesu be ena guba Tamana ena kara ia hahedinaraia. Unai dainai, Dirava ena abia hidi guba Basileia ena King, Keriso, ita badinaia be hahenamo badana!
Keriso Ena Kara Tohotohoa
11. (a) Namona be ita hekwarahi daika ita tohotohoa totona? (b) Dahaka dainai kongrigeisen lalonai tadikaka idia gaukara goada Iesu idia tohotohoa totona?
11 Namona be kongrigeisen taudia ibounai—gau badana be tatau—idia hekwarahi Keriso ena kara do idia tohotohoa. Baibel ia gwau: “Tatau ibounai edia kwarana be Keriso.” Keriso ese Dirava momokanina, ena Kwarana unai, ia tohotohoa hegeregerena, tadikaka ese edia kwarana, Keriso idia tohotohoa be namo. Aposetolo Paulo be Keristani tauna ai ia lao neganai, unai bamona ia karaia. Unai dainai, Keristani taudia ia hagoadaia: “Lau karaia bamona do umui karaia, Keriso ena kara lau karaia bamona.” (1 Kor. 11:1) Danu, aposetolo Petero ia gwau: “Dirava ese umui ia boiria, unai bamona do umui hisihisi totona. Badina be Keriso ese umui dainai hisihisi ia abia. Vadaeni iena kara toana umui dekenai ia hedinaraia, iena murinai do umui raka totona. Iena aena gabudia dekenai do umui raka.” (1 Pet. 2:21) Tadikaka ese Keriso idia tohotohoa ena badina ma ta ia noho. Idia be gabeai elda bona hesiai taudia ai do idia lao. Iesu ese Dirava tohotohoa karana ia moalelaia hegeregerena, tadikaka ese Keriso ena kara idia tohotohoa karana idia moalelaia be namo.
12, 13. Edena dala ai elda taudia ese mamoe idia naria namonamo diba?
12 Elda edia maduna be inai: Keriso ena kara idia dibaia bona badinaia. Petero ese hakaua taudia o elda taudia ia sisiba henia: “Dirava ese umui ia henia mamoe orea do umui naridia namonamo. Do umui gunalaia, Dirava ena ura hegeregerena. Do umui maumau lasi, to mai emui ura namona inai dagi do umui karaia. Ta ese umui ia oda dainai do umui karaia lasi, to sibona emui ura dainai. Kohu do umui davaria totona do umui karaia lasi. Lohia mai hekokoroku danu bamona emui orea do umui gunalaia lasi, to emui kara namodia do umui hedinaraia, vadaeni emui kara bamona do idia karaia.” (1 Pet. 5:1-3) Namona be elda taudia idia kara auka lasi bona ta idia biagua auka lasi. To Keriso idia tohotohoa dainai, Dirava ena mamoe idia naria neganai, lalokau, hebogahisi, bona manau idia hahedinaraia be namo.
13 Kongrigeisen ai hakaua taudia be goevadae lasi taudia, bona hanaihanai unai idia laloatao be namo. (Roma 3:23) Namona be mai edia ura bada ida Iesu idia dibaia bona ena lalokau idia tohotohoa. Namona be Dirava bona Keriso ese taunimanima idia kara namo henia dalana idia laloa dobu bona idia hekwarahi idia tohotohodia totona. Petero ese ita ia sisiba henia: “Umui ibounai do umui laloa manau, vadaeni umui ta ta dekenai durua do umui henia. Badina be Buka Helaga ia gwau: ‘Dirava ese hekokoroku taudia edia dala ia koua, to manau taudia dekenai iena hariharibada ia henia.’ ”—1 Pet. 5:5.
14. Edena dala ai elda taudia ese idia hahedinaraia idia be ma haida idia laloa bada?
14 Namona be kongrigeisen ena hakaua taudia ese Dirava ena mamoe dekenai kara namodia idia hahedinaraia. Roma 12:10 ia gwau: “Umui ta ta do umui lalokau henia, tadikaka edia lalokau ta ta dekenai bamona. Umui ta ta dekenai danu do umui matauraia.” Elda bona hesiai taudia ese ma haida idia laloa bada be namo. Keristani taudia bamona, namona be elda bona hesiai taudia be ‘idia sibona edia ladana do idia habadaia gwauraia lasi, bona do idia hekokoroku lasi. To idia ibounai ta ta dekenai do idia manau. Idia ta ta nega ibounai inai bamona do idia laloa, “Haida be idia namo herea, to lau be namo lasi.” ’ (Fili. 2:3) Namona be hakaua taudia ese edia kara amo idia hahedinaraia ma haida be idia namo herea. Idia be Paulo ena sisiba idia badinaia, ia gwau: “Ita abidadama goada taudia be namo manoka taudia ita durudia edia abidadama do ia gini totona. Ita sibona iseda moale do ita tahua lasi. Ita ibounai ta ta ese iseda badibadinai ia noho tauna do ita hamoalea, iena namo bona iena goada havaraia totona, bona iena abidadama do ia goada totona. Badina be Keriso ese sibona ena namo ia tahua lasi.”—Roma 15:1-3.
‘Hahine Matauraia’
15. Edena dala ai tau ese ena adavana ia kara henia be namo?
15 Petero ese tatau dekenai ia henia sisiba mani ita laloa. Ia gwau: “Tatau e, umui danu, emui adavana danu umui noho hebou ena dala do umui laloa namonamo. Hahine ena tauanina be goada herea lasi, unai dainai do umui naria namonamo, bona matauraia.” (1 Pet. 3:7) Ta oi matauraia anina be ia oi laloa bada. Hegeregere, ena lalohadai, namo, bona ura oi laloa, bona oi badinaia bema unai be Baibel ena taravatu ta ia utua lasi. Tau ese adavana dekenai unai bamona ia karaia be namo.
16. Tau ese ena adavana ia matauraia karana dekenai, Baibel be dahaka ia gwau?
16 Petero ese tau ia hamaoroa adavana ia matauraia be namo, bona ena sisiba ma ta ia gwau: “Unai bamona do umui karaia neganai, emui guriguri haere dalana be gau ta ese do ia koua lasi.” (1 Pet. 3:7) Unai amo ita itaia, Iehova ena matanai tau ese hahine ia kara namo henia be gau badana. Bema lasi, Dirava be tau ena guriguri do ia kamonai henia lasi. To, tau ese ena adavana ia matauraia neganai, hahine be ena tau ia kara namo henia, a?
17. Edena dala ai tau ese adavana do ia lalokau henia?
17 Tau ese adavana ia lalokau henia karana dekenai Baibel ia gwau: “Namona be tatau ese edia adavana do idia lalokau henia, idia edia tauanina idia lalokau henia hegeregerena. . . . Badina be tau ta ese sibona ena tauanina ia badu henia diba lasi. To ia ubua noho, bona ia naria noho, Keriso ese ekalesia ia ubua bona naria noho hegeregerena. . . . Tau ese iena adavana do ia lalokau henia, ia sibona ia lalokau henia hegeregerena.” (Efe. 5:28, 29, 33) Edena dala ai tau ese adavana do ia lalokau henia? Paulo ia gwau, “Tatau e, emui adavana do umui lalokau henia, Keriso ese ekalesia ia lalokau henia bamona. Keriso ese danu iena mauri ia atoa diho ekalesia dainai.” (Efe. 5:25) Oibe, bema Keriso be ma haida totona ena mauri ia atoa diho, tau ese unai bamona ia karaia danu be namo. Bema tadikaka be ena adavana ia lalokau henia, kara namo henia, laloa bada, bona sibona ena ura haida ia dadaraia, vadaeni taihu be adavana ena kwara dagina do ia matauraia be auka lasi.
18. Dahaka ese tau ia durua diba ena adavana ia matauraia totona?
18 Oi laloa tau ese adavana ia matauraia be maduna metauna, a? Lasi, Iehova be tau ese ia karaia diba gauna sibona ia henia. Danu, Iehova idia tomadiho henia taudia be lauma helaga ese ia durudia diba—unai be tanobada bona guba ai ia gaukara siahu badana. Iesu ia gwau: “Umui laloa, umui be dika taudia, gau namodia emui natuna dekenai henia be umui diba, to emui Tamana guba dekenai ia noho ese Lauma Helaga be idia noinoi taudia dekenai do ia henidia lasi, a?” (Luka 11:13) Tatau be edia guriguri dekenai lauma helaga totona idia noinoi diba, unai amo Iehova be idia do ia durua ma haida bona edia adavana idia kara namo henia totona.—Kara 5:32 duahia.
19. Stadi gabena ai dahaka do ita herevalaia?
19 Momokani, tatau edia maduna badana be inai: Namona be idia itaia edena dala ai Keriso do idia badinaia bona ena kwara dagina do idia tohotohoa. To hahine be edena bamona? Stadi gabena ai do ita itaia hahine ese Iehova ia henia maduna be edena bamona idia laloa.
Oi Laloatao, A?
• Iesu ena kara namodia haida be dahaka?
• Edena dala ai elda taudia ese mamoe idia kara henia be namo?
• Edena dala ai tatau ese edia adavana idia kara henia be namo?
[Pictures on page 10]
Iesu ita tohotohoa dalana be ma haida ita matauraia