Hahine e, Dahaka Dainai Kwara Dagina Oi Matauraia be Namo?
“Hahine edia kwarana be edia tau.”—1 KOR. 11:3.
1, 2. (a) Iehova ese ia atoa kwara dagina dekenai, Paulo be dahaka ia gwau? (b) Inai stadi lalonai dahaka henanadai do ita herevalaia?
IEHOVA ese ia atoa kwara dagina dekenai, Paulo ia gwau: “Tatau ibounai edia kwarana be Keriso” bona “Keriso ena kwarana be Dirava.” (1 Kor. 11:3) Stadi ginigunana ai ita itaia bamona, Iesu ia laloa iena Kwarana, Iehova Dirava henunai ia noho be hahenamo ta bona moale gauna, bona Keristani tatau edia kwarana be Keriso. Keriso be ia manau, bona ma haida ia hebogahisi henia bona edia namo ia laloa. Kongrigeisen ai tatau ese ma haida—bona edia hahine—dekenai unai kara idia hahedinaraia be gau badana.
2 Hahine be edena bamona? Edia kwarana be daika? Paulo ia gwau: “Hahine edia kwarana be edia tau.” Hahine ese unai siri ena hereva be edena bamona ia laloa? Herevana tau be Dirava ena hesiai tauna lasi, to Keristani hahinena ese unai siri ia badinaia be namo, a? Hahine be adavana ena kwara dagina henunai ia noho neganai, ia hereva be maoro lasi, a? Edena dala ai hahine be ma haida amo hanamoa ia abia diba?
“Lau ese Durua Tauna Ia Bamona Do Lau Karaia”
3, 4. Dahaka dainai headava lalonai kwara dagina matauraia karana be mai anina bada?
3 Dirava be tau dekenai kwara dagina ia henia. Iehova Dirava ese Adamu ia karaia murinai, ia gwau: “Unai tau sibona ia noho be ia namo lasi, lau ese durua tauna ia bamona do lau karaia.” Dirava ese Heva ia karaia murinai, Adamu ia moale badina ia be mai ena turana bona durua hahinena, ia gwau: “Inai harihari lau bamona tauna ia noho.” (Gen. 2:18-24) Anina be Adamu bona Heva be goevadae taudia ibounai edia tamana bona sinana ai do idia lao, bena tanobada paradaisona do idia noholaia bona moalelaia ela bona hanaihanai.
4 To, idia ruaosi idia gwau-edeede dainai, kwara dagina matauraia karana be Eden umana ai ia boio. (Roma 5:12 duahia.) To, Dirava ia ura hahine edia kwarana be edia tau. Momokani, tau ese ena kwara dagina ia gaukaralaia namonamo bona hahine ese ia matauraia neganai, headava lalonai moale bona namo bada do ia vara. Iesu be ena Kwarana, Iehova ia matauraia neganai, unai bamona moale bona namo ia abia. Iesu be tanobada ai ia do mai lasi neganai, Iehova ena ‘vairana dekenai, ia moale noho nega ibounai.’ (Aon. 8:30) To tau bona hahine be goevadae lasi taudia dainai, nega haida tau be kwara dagina do ia gaukaralaia kerere, bona nega haida hahine be tau do ia matauraia lasi. To tau bona adavana idia gaukara goada Iehova ena dala idia badinaia neganai, inai nega dokonai edia headava lalonai moale bada do idia davaria.
5. Dahaka dainai headava taudia ese Roma 12:10 ena sisiba idia badinaia be gau badana?
5 Headava maurina do ia namo, bema headava taudia ese inai siri idia badinaia: “Umui ta ta do umui lalokau henia, tadikaka edia lalokau ta ta dekenai bamona. Umui ta ta dekenai danu do umui matauraia.” (Roma 12:10) Danu, namona be tau bona adavana idia hekwarahi ‘ta ta do idia durua, bona ta ta do idia bogahisihisi henia bona ta ta edia kara dika do idia gwauatao.’—Efe. 4:32.
Tau be Dirava Ena Hesiai Tauna Lasi Neganai
6, 7. Dahaka do ia vara bema taihu be adavana ia badinaia noho, herevana tau be Dirava ena hesiai tauna lasi?
6 Bema emu adavana be Dirava ena hesiai tauna lasi be edena bamona? Iseda taihu momo edia adavana be Dirava ena hesiai taudia lasi. Bema emu tau be unai bamona, vadaeni edena bamona oi kara henia be namo? Baibel ia gwau: “Hahine taudia e, emui adavana do umui kamonai henia. Badina be idia haida ese Dirava ena hereva idia badinaia lasi, to bema kara namodia umui karaia, bona umui emui hereva be momo lasi neganai, sedira do idia laloa namonamo. Vadaeni sedira edia lalona do idia giroa, bona Dirava do idia abidadama henia. Unai bamona do idia karaia, badina be emui kara goevagoeva, bona emui mataurai kara do idia itaia dainai.”—1 Pet. 3:1, 2.
7 Baibel ia gwau hahine ese adavana ia badinaia noho be namo, herevana ena tau be Dirava ena hesiai tauna lasi. Hahine ena kara namona ese adavana ena lalona ia veria diba, bena tau do ia laloa dahaka dainai ena hahine be kara namodia ia hahedinaraia. Reana tau be ena Keristani hahine ia abia dae herevadia do ia tahua matamaia, bona nega ta ai hereva momokani do ia abia dae.
8, 9. Bema tau be hereva momokani ia dadaraia, vadaeni Keristani hahine be dahaka ia karaia diba?
8 Bema emu adavana ese hereva momokani ia dadaraia be edena bamona? Baibel ese Keristani hahine ia hagoadaia hanaihanai kara namodia ia hahedinaraia totona, herevana nega haida unai be ia auka. Hegeregere, 1 Korinto 13:4 ia gwau: “Lalokau be ia dekenai ia kara dika tauna davana ia laloa lasi.” Unai dainai, hahine be ‘nega ibounai do ia manau, do ia manada, bona do ia haheauka,’ bona ena adavana ese metau ia henia neganai, do ia lalokau henia noho be namo. (Efe. 4:2) Danu metau negadiai, lauma helaga ese oi ia durua Keristani karadia oi hahedinaraia totona.
9 Paulo ia gwau: “Lau dekenai siahu ia henia tauna amo goada lau abia gau ibounai lau karaia totona.” (Fili. 4:13, NW ) Dirava ena lauma helaga ese headava taudia do ia durua gau ibounai idia karaia totona. Hegeregere, tau be hahine ia kara auka henia neganai, reana hahine ia ura ia kara auka danu. To, Baibel ese Keristani taudia ibounai ia hamaoroa: “Bema tau ta ese umui dekenai ia kara dika henia neganai, iena kara dika davana do umui henia lasi. . . . Badina be Buka Helaga ia gwau: Lohiabada ia gwau, ‘Dika ena davana be lau sibona ese do lau karaia.’ ” (Roma 12:17-19) Danu, 1 Tesalonika 5:15 be ita ia sisiba henia: “Umui ta ta dekenai kara dika ena davana do umui henia lasi, to nega ibounai umui ta ta dekenai bona taunimanima ibounai dekenai kara namo do umui karaia.” Lauma helaga ena heduru dainai, ita sibona eda goada dekenai ita hanaia diba lasi gaudia ita hanaia diba. Unai dainai, gau ibounai dekenai lauma helaga totona ita guriguri be maoro!
10. Haida ese Iesu idia hereva dika henia o kara dika henia neganai, Iesu be dahaka ia karaia?
10 Ena be haida ese Iesu idia hereva dika henia bona kara dika henia, to haheitalai namona ia hahedinaraia. Hegeregere 1 Petero 2:23 ia gwau, Iesu “idia hereva dika henia, to ia hereva dika henia lou lasi. Hisihisi ia abia neganai, ia dagedage lasi. To mai abidadama danu, sibona ena mauri be Dirava ena imana dekenai ia henia. Badina Keriso ia diba Dirava be Kota Biaguna maoromaorona.” Baibel ese ita ia hagoadaia Iesu ena haheitalai namona ita badinaia totona. Ma haida edia kara dekenai ita badu lasi. Baibel ese Keristani taudia ibounai ia hagoadaia: “Umui ta ta dekenai do umui bogahisihisi henia, do umui manau. Tau ta bema umui dekenai ia kara dika neganai, davana do umui henia lasi.”—1 Pet. 3:8, 9.
Hahine Do Ia Hereva be Maoro, A?
11. Keristani hahine haida be dahaka hahenamo badadia idia abia danu?
11 Herevana hahine be ena kwarana, tau ena henunai ia noho be maoro, to Iehova ia ura nega haida hahine ia hereva danu be maoro. Momokani, tau sibona lasi to hahine danu be Iehova amo hahenamo momo idia abia. Mani oi laloa: Keriso be inai tanobada ia lohiaia neganai, taunimanima 144,000 be ia ida king bona hahelaga gaukara do idia karaia! Unai namba lalonai hahine idia noho danu. (Gal. 3:26-29) Momokani, Iehova ese hahine dekenai gaukara haida ia henia danu.
12, 13. Hahine idia peroveta ena haheitalai ta oi gwauraia.
12 Baibel negadiai, hahine haida be peroveta gaukara idia karaia. Ioela 2:28, 29 ia peroveta: “Nega gabeai lau ese egu Lauma, be taunimanima ibounai dekenai do lau bubua diho. Bona emui natuna tau bona natuna hahine ese, egu peroveta hereva do idia gwauraia hedinarai. . . . Unai neganai danu egu Lauma, be hesiai taudia bona hesiai hahinedia danu, edia latanai do lau bubua diho.”
13 Pentekoste 33 C.E. ai, Ierusalema ai Iesu ena hahediba taudia 120—hahine bona tatau—be ruma ta ena atai daiutuna ai idia hebou. Dirava ena lauma helaga be idia ibounai dekenai ia diho. Unai dainai, Petero ese peroveta tauna Ioela ena hereva ia gwauraia lou, bona ia gwau tatau bona hahine dekenai unai be mai anina bada. Ia gwau: “Inai be Ioela, peroveta tauna ia gwauraia guna ena hereva gauna, ia gwau: ‘Dirava ia gwau: Inai nega do kahirakahira ia doko neganai, lauegu laumana dohore lau bubua diho, taunimanima ibounai dekenai. Vadaeni umui emui natudia tau bona hahine, be dohore idia peroveta karaia, . . . Inai danu, unai dinadia dekenai, lauegu hesiai taudia bona hesiai hahine dekenai, egu Laumana do lau bubua diho, bona dohore idia peroveta karaia.’ ”—Kara 2:16-18.
14. Hahine be dahaka gaukara idia karaia dainai kongrigeisen ia tubu?
14 Aposetolo edia negai, hahine edia gaukara namona dainai, kongrigeisen ia tubu. Idia ese ma haida dekenai Dirava ena Basileia idia harorolaia bona gaukara ma haida idia durua. (Luka 8:1-3) Hegeregere, Paulo ia gwau Fibi be “Kenekrea ai ia noho kongrigeisen ena hesiai hahinena ta.” Danu, Paulo ese ena turana haida dekenai hanamoa hereva ia siaia neganai, lo hahine haida edia ladana ia gwauraia, hegeregere ia gwau “Trupena bona Truposa . . . be Lohiabada totona idia hekwarahi bada.” Ma ia gwau, “Lauegu turana lalokau Peresi dekenai danu egu hanamoa do umui henia. Gaukara bada ia karaia vadaeni Lohiabada totona.”—Roma 16:1, 12; NW.
15. Hari inai negai, taihu be dahaka idia karaia dainai kongrigeisen ia tubu?
15 Hari inai negai, tanobada hegegemadai, taunimanima 7 milioni mai kahana be Dirava ena Basileia ena sivarai namona idia harorolaia, idia momo be taihu. (Mat. 24:14) Idia momo be regula painia gaukara, misinari gaukara bona Betele gaukara idia karaia. Salamo torea tauna Davida ia gwau: “Lohiabada ese iena oda ia gwauraia, vadaeni taunimanima momo [“hahine momo,” NW ] ese, unai hereva [“sivarai namona,” NW ] idia gwauraia hedinarai.” (Sal. 68:11) Unai hereva ena anina be ia guguru noho! Iehova ese taihu ia lalodia bada, badina idia ese sivarai namona idia harorolaia bona Iena ura idia hagugurua. Momokani, ena be Iehova ia ura hahine ese ena kwara, tau ena henunai ia noho, to danu Dirava ia ura nega haida hahine idia hereva be maoro.
Hahine Rua be Edia Lalohadai Idia Herevalaia
16, 17. Edena dala ai Sara ena haheitalai ese ia hahedinaraia headava lalonai hahine ia hereva be maoro?
16 Bema Iehova ese hahine dekenai hahenamo momo ia henia, vadaeni namona be tau ese abia hidi badadia ia do karaia lasi neganai, ena adavana ida idia herevahereva guna be gau badana, ani? Unai be aonega karana. Baibel ena sivarai haida ese idia hahedinaraia hahine haida be idia hereva o kara haida idia karaia, herevana edia adavana ena lalohadai idia tahua guna lasi. Haheitalai rua mani ita itaia.
17 Sara, Aberahamo ena adavana be ena tau ia hamaoroa loulou, namona be adavana iharuana bona natuna ia lulua lao badina idia hemataurai lasi. Unai hereva dekenai “Aberahamo ena lalona be [ia] hisihisi bada,”—to Dirava ia lalohisihisi lasi. Ia ese Aberahamo ia hamaoroa: “Unai mero bona oiemu hesiai hahine Hagara dekenai oi laloa momo lasi. Sara ena ura do oi karaia.” (Gen. 21:8-12) Iehova ena oda hegeregerena, Aberahamo ese Sara ia kamonai henia, bona Sara ena ura gauna ia karaia.
18. Abigaila be dahaka kara namona ia karaia?
18 Abigaila, Nabala ena adavana mani oi laloa danu. Davida be King Saulo ena mama karana dainai ia heau, bona nega sisina lalonai Nabala ena mamoe oreana badinai idia kamepa. Davida bona ena orea taudia be unai bisinesi tauna ena kohu idia henaoa lasi to idia gimaia. To, Nabala ia “dagedage, bona kara dika,” bona Davida bona ena orea taudia “ia hereva dika henia.” Ia be “dagedage tauna” bona “kava tauna.” Davida ena orea taudia be mai hemataurai ida aniani haida idia noia neganai, Nabala ia ura lasi. Abigaila be unai ia kamonai neganai, dahaka ia karaia? Nabala ia hamaoroa lasi, to karaharaga “ia ese inai aniani ia haboua: Paraoa beredi 200, bona uaina kopina rua, bona mamoe 5, idia gabua vadaeni gaudia, bona uiti kaukau bosea 5, bona vain huahuadia, idia kaukau vadaeni gaudia, ikumi 100, bona fig huahua, kaukau gaudia ikumi 200” bena Davida bona ena orea taudia dekenai ia henia. Abigaila ia karaia karana be maoro, a? Baibel ia gwau, “Lohiabada ese Nabala ia alaia, ia mase.” Gabeai, Davida ese Abigaila ia adavaia.—1 Sam. 25:3, 14-19, 23-25, 38-42.
Idia Hanamoa Hahinena
19, 20. Dahaka dainai hahine ita hanamoa bada be namo?
19 Baibel ese Iehova ena ura ia badinaia hahinena ia hanamoa. Baibel bukana Aonega Herevadia ia gwau: “Hahine namona . . . iena namo ese davana bada herahera nadi, edia namo ia hereaia noho. Iena adavana ese ia dekenai ia abidadama henia noho, bona unai tau ese ogogami do ia davaria lasi. Unai bamona hahine ese iena tau ia hanamoa noho, ia hadikaia lasi, bona inai bamona ia karaia noho iena mauri dinadia ibounai.” Ma ia gwau: “Ia be mai aonega danu ia hereva noho, bona iena hadibaia hereva be maoromaoro, bona mai momokani danu. Ia be nega ibounai ia gaukara noho, bona iena famili ia naridia namonamo noho. Iena natuna ese ia idia tanikiu henia noho, bona iena adavana ese, ia dekenai ia hanamoa henia noho.”—Aon. 31:10-12, 26-28.
20 Dahaka dainai hahine ita hanamoa be namo? Aonega Herevadia 31:30 ia gwau: “Hahine momo edia hereva namodia be koikoi bamona, bona edia hairaina be do ia ore haraga. To Lohiabada dekenai ia gari hahinena, be do idia matauraia [“be do idia hanamoa,” NW ].” Iehova ia gari henia hahinena ena kara ta be inai: Mai ena ura ida Iehova ese ia haginia kwara dagina ia matauraia be namo. “Hahine edia kwarana be edia tau,” unai hegeregerena “tatau ibounai edia kwarana be Keriso,” bona “Keriso ena kwarana be Dirava.”—1 Kor. 11:3.
Dirava Ena Harihari Gauna Dainai, Ia Oi Tanikiu Henia
21, 22. (a) Dahaka dainai Keristani headava taudia be Dirava ena harihari gauna, headava karana dainai Ia idia tanikiu henia? (b) Dahaka dainai Dirava ese ia atoa kwara dagina ita matauraia be namo? (Rau 17 ai maua itaia.)
21 Headava taudia ese Dirava idia tanikiu henia ena badina be momo! Ena badina ta be, mai moale ida idia gaukara hebou. To iena badina badana be, Dirava ena harihari gauna namo hereana, headava karana, ese dala ia kehoa idia be Iehova ida idia raka hebou totona. (Ruta 1:9; Mika 6:8) Headava ia Hamatamaia Tauna ia diba namonamo dahaka ese headava taudia huanai moale ia havaraia diba. Ena be inai tanobada dikana ai oi noho, to nega ibounai Iehova ena dala oi badinaia, bona Ia ‘dainai oi moale neganai, goada do oi abia.’—Neh. 8:10.
22 Bema Keristani tau ese adavana ia lalokau henia, ia sibona ia lalokau henia hegeregerena, ia be ruma bese ena kwarana namona. Unai tau be adavana, Dirava ia gari henia hahinena ese do ia durua bona matauraia. Gau badana be inai: Edia headava maurina ia namo dainai, unai ese iseda Dirava, Iehova, ena ladana do ia hanamoa.
Oi Laloatao, A?
• Iehova ese kwara dagina dekenai dahaka taravatu ia atoa?
• Dahaka dainai headava taudia idia matauraia heheni be namo?
• Bema tau be Dirava ena hesiai tauna lasi, taihu ese dahaka ia karaia be namo?
• Dahaka dainai tau ese abia hidi badadia ia do karaia lasi neganai, ena adavana ida idia herevahereva guna be namo?
[Box on page 17]
Dahaka Dainai Kwara Dagina Ita Matauraia be Namo?
Iehova ese guba bona tanobada taudia haida be kwarana taudia ai ia halaoa. Unai ese aneru bona taunimanima ia durua bada. Danu, unai ese dala ia kehoa edia ura kwalimu idia gaukaralaia bona mai lalotamona ida edia hesiai gaukara amo idia hahedinaraia idia be Dirava idia matauraia.—Sal. 133:1.
Horoa taudia ibounai be Iesu Keriso ena kwara dagina idia matauraia. (Efe. 1:22, 23) Iesu be Iehova ena kwara dagina ia matauraia dainai, gabeai ia sibona be “Dirava ena henunai do ia atoa, Oibe, Dirava, gau ibounai Keriso henunai ia atoa Diravana, be unai neganai gau ibounai edia biaguna momokani do ia lao.” (1 Kor. 15:27, 28) Unai dainai, Dirava idia gwauhamata henia taudia ese kongrigeisen bona ruma bese ai kwara dagina idia matauraia be maoro. (1 Kor. 11:3; Heb. 13:17) Unai bamona ita karaia neganai, Iehova ese ita do ia lalonamo henia bona hanamoa bada.—Isa. 48:17.
[Picture on page 13]
Guriguri ese taihu ia durua diba kara namodia ia hahedinaraia totona
[Pictures on page 15]
Iehova be Basileia gaudia idia durua taihudia ia laloa bada