Iehova Ena Lauma Helaga Oi Hahisia Lasi
“Dirava ena Lauma Helaga . . . do umui hisihisi henia lasi. Badina Lauma Helaga be Dirava ena toana umui emui latanai.”—EFE. 4:30.
1. Iehova be taunimanima milioni totona dahaka ia karaia, bona idia ese dahaka idia karaia be namo?
INAI tanobada dikana lalonai idia noho taudia milioni momo totona, Iehova be gau hereadaena ta ia karaia. Iehova ese iena Natuna, Iesu Keriso amo dala ia kehoa idia be ia kahirakahira idia lao totona. (Ioa. 6:44) Bema oi be Dirava oi gwauhamata henia vadaeni bona ena ura oi karaia noho, oi be idia ta. Oi be lauma helaga ena ladana ai bapatiso oi abia dainai, emu mauri ibounai lalonai lauma helaga ena hakaua dalana do oi badinaia.—Mat. 28:19.
2. Edena henanadai edia haere do ita tahua?
2 ‘Dirava ena lauma hegeregerena ita hadoa taudia’ be mauri matamata ita atoa vadaeni. (Gal. 6:8; Efe. 4:17-24.) To, aposetolo Paulo ese ita ia sisiba henia Dirava ena lauma helaga ita hahisia lasi totona. (Efeso 4:25-32 duahia.) Hari, mani Paulo ena sisiba edia anina ita tahua. Paulo ena hereva, ‘Dirava ena Lauma Helaga do umui hisihisi henia lasi,’ ena anina be dahaka? Edena dala ai Iehova ia gwauhamata henia vadaeni tauna be lauma helaga ia hahisia diba? Bona edena dala ai Iehova ena lauma helaga hahisia karana ita dadaraia diba?
Paulo Ena Hereva Ena Anina
3. Efeso 4:30 ena anina mani oi gwauraia hedinarai.
3 Mani Paulo ena hereva Efeso 4:30 dekenai ita duahia guna, ia gwau: “Dirava ena Lauma Helaga ena lalona do umui hisihisi henia lasi. Badina Lauma Helaga be Dirava ena toana umui emui latanai, bona do ia noho ela bona hamauria Dinana dekenai. Inai toana ena anina be, Dirava ese iena gwauhamata gauna, emui hamauria, do ia badinaia momokani.” Paulo ia ura lasi iena tadikaka ese edia hetura karana Iehova ida idia hadikaia. Iehova ena lauma helaga ‘ena toana be edia latanai, bona do ia noho ela bona hamauria Dinana dekenai.’ Idaunegai ema bona hari, Dirava ena lauma helaga be toana ta horoa taudia latanai, eiava edia ‘latanai ia atoa maka,’ bona unai toana o maka be gabeai dohore idia abia gwauhamatana ia laulaulaia. (2 Kor. 1:22) Unai toana ese ia hahedinaraia Dirava ese idia ia abia hidi guba maurina idia abia totona. Unai toana idia abia taudia ibounai be 144,000.—Apok. 7:2-4.
4. Dahaka dainai Dirava ena lauma helaga hahisia karadia ita dadaraia be namo?
4 Bema Keristani tauna ta be ena kara amo lauma helaga ia hahisia, unai ese ia hahedinaraia iena mauri lalonai lauma helaga ia haboioa diba. Davida be Bataseba ida ia kara dika murinai ia gwauraia herevana ese unai ia hamomokania. Davida ia helalo-kerehai bona Iehova ia noia, ia gwau: “Oiemu vairana dekena amo lau do oi lulua lao lasi, bona oiemu Lauma Helaga, be lau dekena amo do oi kokia lasi.” (Sal. 51:11) Dirava idia “badinaia noho ela bona mase” horoa taudia sibona ese guba dekenai mauri hanaihanai ena “kwalimu ahuna” idia abia diba. (Apok. 2:10; 1 Kor. 15:53) Tanobada ena helaro idia abia Keristani taudia be Dirava do idia badinaia noho, bona Keriso ena mauri davalaia boubouna dainai mauri hanaihanai idia abia totona, gau badana be lauma helaga idia abia danu. (Ioa. 3:36; Roma 5:8; 6:23) Unai dainai, namona be ita ibounai ita naria namonamo, ita ura lasi Iehova ena lauma helaga do ita hahisia.
Edena Dala ai Keristani Tauna ese Lauma Helaga Ia Hahisia Diba?
5, 6. Edena dala ai Keristani tauna be Iehova ena lauma helaga ia hahisia diba?
5 Ita Keristani taudia be Dirava ena lauma helaga hahisia karadia ita dadaraia diba. Unai ita karaia diba bema “lauma helaga ena hakaua dalana hegeregerena ita noho,” bona “ena hakaua hegeregerena ita kara.” Unai amo ita be tauanina ena ura dikadia bona kara dikadia ita dadaraia diba. (Gal. 5:16, 25, 26, NW ) To, Keristani tauna ta ese unai kara namodia ia haboio diba. Bema ita naria namonamo lasi bona Baibel—lauma helaga ena siahu amo idia torea bukana—ese ia taravatua karadia ita karaia, lauma helaga ita hahisia diba.
6 Bema hanaihanai lauma helaga ena hakaua dalana ita dadaraia, bona sibona iseda ura dalana ita badinaia, ita be lauma helaga bona Iehova Dirava do ita hahisia. Efeso 4:25-32 ita stadilaia neganai ita ia hadibaia edena bamona do ita kara, bona ita do ia durua Dirava ena lauma helaga do ita hahisia lasi totona.
Lauma Helaga Hahisia Karadia Dadaraia Dalana
7, 8. Dahaka dainai koikoi karadia bona herevadia ita dadaraia be namo?
7 Hereva momokani sibona do ita gwauraia. Efeso 4:25 ai Paulo ia gwau: “Hereva koikoi do umui hadokoa momokani. Umui ibounai ta ta dekenai hereva momokani do umui gwauraia, badina ita ibounai be Keriso ena tauanina tamona ena kahana taudia.” Ita be “tauanina tamona ena kahana taudia” dainai, namo lasi eda kara eiava hereva koikoi amo eda tadikaka ita hakaudia kerere. Bema ta be unai bamona koikoi karadia ia karaia loulou, iena hetura karana Iehova ida ia haboioa diba.—Aonega Herevadia 3:32 duahia.
8 Koikoi karadia bona herevadia ese kongrigeisen ena lalotamona ia hadikaia diba. Unai dainai, kara maoromaoro peroveta tauna Daniela ena kara ita tohotohoa be namo, ia dekenai kerere ta idia davaria diba lasi. (Dan. 6:4) Paulo ia gwau, guba helarona idia abia Keristani taudia ta ta be “Keriso ena tauanina tamona ena kahana,” unai dainai unai horoa taudia ibounai be mai lalotamona ida do idia gaukara bona Keriso murinai do idia raka hebou. (Efe. 4:11, 12) Bema ita ura tanobada Paradaisona lalonai ita noho, namona be hereva momokani ita gwauraia, unai amo tanobada hegegemadai tadikaka oreana lalonai mai lalotamona ida do ita noho.
9. Dahaka dainai Efeso 4:26, 27 ena hereva ita badinaia be gau badana?
9 Satani ita inai henia bona dala ita kehoa lasi iseda hetura karana Iehova ida ia hadikaia totona. (Iam. 4:7) Lauma helaga ese ita ia durua Satani ita dadaraia totona. Hegeregere, badu dikadika karana ita koua neganai, Satani ita dadaraia unai. Paulo ia gwau: “Umui badu neganai, kara dika do umui karaia lasi. Bona dina do ia diho lasi neganai, emui badu do umui haorea. Satani ena dala do umui kehoa lasi.” (Efe. 4:26, 27) Ena be badina maorona ta dainai ita badu diba, to guriguri karana ese ita do ia durua eda badu ita biagua totona, unai amo Dirava ena lauma helaga do ita hahisia lasi. (Aon. 17:27) Unai dainai, namo lasi ita badu noho bona Satani dekenai dala ita kehoa ita ia veria kara dika ita karaia totona. (Sal. 37:8, 9) Satani ita dadaraia dalana ta be, Iesu ena sisiba hegeregerena hepapahuahu do ita hamaoromaoroa haraga.—Mat. 5:23, 24; 18:15-17.
10, 11. Dahaka dainai do ita henaohenao lasi o koikoi karadia ita karaia lasi?
10 Henaohenao o koikoi karadia ma haida ita karaia lasi. Henaohenao karana dekenai Paulo ia gwau: “Henaoa tauna be do ia henaoa lou lasi. To gaukara namona iena imana dekena amo do ia karaia, vadaeni ia ese ogogami taudia do ia durua diba.” (Efe. 4:28) Bema bapatiso Keristani tauna ta be ia henaohenao, ia be ‘Dirava ena ladana dekenai hemarai’ ia havaraia. (Aon. 30:7-9) Namo lasi oi laloa oi be ogogami dainai, oi henaohenao be kerere lasi. Dirava bona edia dekena taudia idia lalokau henia taudia idia diba, herevana edia mauri dalana be edena bamona, to henaohenao karana be kerere.—Mar. 12:28-31.
11 Paulo be ita dadaraia gaudia sibona ia herevalaia lasi, to ita ia hadibaia danu edena gaudia ita karaia be namo. Bema lauma helaga ena hakaua hegeregerena ita noho bona ita raka, do ita gaukara goada iseda ruma bese ita naria totona bona ‘ogogami taudia ita durua.’ (1 Tim. 5:8) Iesu bona iena aposetolo taudia be ogogami taudia durua totona moni idia haboua, to Iuda Iskariote be unai moni haida ia henaoa. (Ioa. 12:4-6) Ia be lauma helaga ena hakaua dalana ia badinaia lasi. Paulo hegeregerena, Dirava ena lauma helaga ena hakaua dalana ita badinaia taudia ita ‘ura nega ibounai kara maoromaoro do ita karaia.’ (Heb. 13:18) Unai amo Iehova ena lauma helaga hahisia karana ita dadaraia.
Lauma Helaga Hahisia Karadia Dadaraia Daladia Ma Haida
12, 13. (a) Efeso 4:29 ena hereva hegeregerena edena bamona hereva ita dadaraia be namo? (b) Edena bamona hereva ita gwauraia be namo?
12 Iseda hereva dalana ita naria namonamo. Aposetolo Paulo ia gwau: “Namo lasi hereva bodagadia umui gwauraia, to hereva namodia umui gwauraia, unai amo emui hereva idia kamonai taudia do umui hagoadaia.” (Efe. 4:29, NW ) Inai siri lalonai Paulo be ita dadaraia gaudia ia herevalaia sibona lasi, to do ita karaia gaudia ia herevalaia danu. Dirava ena lauma helaga ena siahu ese ita do ia durua ‘hereva namodia ita gwauraia totona, unai amo iseda hereva idia kamonai taudia ita hagoadaia’ diba. Ma danu, namo lasi “hereva bodagadia” ita gwauraia. Greek gado herevana idia hahanaia “bodagadia” be ia bodaga au huahua, gwarume o vamu ia herevalaia. Unai bamona aniani bodagana ita ura henia lasi hegeregerena, namona be Iehova ese ia ura henia lasi herevadia ita inai henia.
13 Namona be mai hemataurai bona mai gado namo ida ita hereva, hegeregere ‘damena ita atoa bamona.’ (Kol. 3:8-10; 4:6, NW ) Taunimanima be ita gwauraia herevadia idia kamonai neganai, namona be idia laloparara ita be idau. Unai dainai, namona be “hereva namodia” ita gwauraia haida ita durua totona. Bona salamo torea tauna bamona do ita gwau: “Lohiabada e, oi be lauegu Nadi Gini Gabuna, bona egu Hamauria Tauna. Mani lau do oi durua, vadaeni lauegu uduna ena hereva, bona lauegu kudouna ena laloa, be do idia namo, oiemu vairana dekenai.”—Sal. 19:14.
14. Efeso 4:30, 31 ena hereva hegeregerena, dahaka kara ita rakatania be namo?
14 Heai, dagedage, badu, hereva dika bona dika gaudia ibounai do ita rakatania. Paulo be Dirava ena lauma helaga do ita hahisia lasi karana ia herevalaia murinai, ia gwau: “Heai, dagedage, bona badu do umui koua. Hereva dika, laloa dika, bona samania koikoi hereva ibounai do umui hadokoa.” (Efe. 4:30, 31) Ita be goevadae lasi taudia dainai, do ita hekwarahi iseda lalohadai bona kara ita biagua totona. Bema ita “heai, dagedage, bona badu” momo, Dirava ena lauma helaga ita hahisia unai. Danu, bema ita ia kara dika henia tauna ena kerere ita laloatao noho, ita badu henia noho bona ita ura lasi ia ida maino ita karaia, vadaeni ita be Dirava ena lauma helaga ita hahisia unai. Bema ita be Baibel ena sisiba ita dadaraia, reana lauma helaga hahisia karadia ita manadalaia diba, bona unai amo dika ita davaria diba.
15. Bema ta ese ita dekenai kerere ta ia karaia, dahaka ita karaia be maoro?
15 Ta ta ita durua, hebogahisi henia bona kara dika ita gwauatao. Paulo ia gwau: “Umui ibounai ta ta do umui durua, bona ibounai ta ta do umui bogahisihisi henia. Bona ibounai ta ta edia kara dika do umui gwauatao, Dirava ese Keriso dainai emui dika ia gwauatao hegeregerena.” (Efe. 4:32) Ena be ta ese ita dekenai kerere ta ia karaia bona ita lalohisihisi bada, to namona be Dirava ena kara ita tohotohoa bona iena dika ita gwauatao. (Luka 11:4) Reana, tadikaka o taihu ta be udu mauri herevana ta amo iseda ladana ia hadikaia. Unai hekwakwanai hamaoromaoroa totona, namona be ia dekenai ita lao bona ita hereva henia. Reana ia be sori herevana do ia gwauraia bona ita ia noia iena kerere ita gwauatao totona. Ita ese iena kerere ita gwauatao, to gau ma ta ita karaia danu be namo. Levitiko 19:18 ia gwau: “Kara dika ena davana do umui haloua lasi, bona unai tau do umui badu henia noho lasi. To emui badibadinai tauna do umui lalokau henia, umui sibona umui lalokau henia hegeregerena. Lau inai Lohiabada, emui Dirava.”
Ita Naria Namonamo
16. Mani haheitalai ta oi gwauraia, bona oi hahedinaraia edena dala ai iseda kara ita haidaua be namo Iehova ena lauma helaga ita hahisia lasi totona.
16 Ita sibona ita noho neganai, Iehova habadua karana ta ita karaia diba. Hegeregere, tadikaka ta be miusiki dikadia ia kamonai henia momo. Gabeai, iena lalomamina ese ia kota henia badina ia be “hesiai tauna mai ena kamonai, bona mai ena kara maoromaoro” ese iseda buka bona magasin lalonai idia atoa Baibel ena sisiba ia badinaia lasi. (Mat. 24:45) Reana Dirava ia guriguri henia bona Paulo ena hereva Efeso 4:30 ai ia laloa dobu. Ia ura lasi Dirava ena lauma helaga ia hahisia dainai, ena lalona ia hadaia miusiki dikadia do ia kamonai lou lasi. Iehova ese unai tadikaka ena hekwarahi do ia hanamoa. Unai dainai, namona be hanaihanai do ita hekwarahi noho Dirava ena lauma helaga ita hahisia lasi totona.
17. Dahaka ia vara diba bema ita guriguri lasi bona ita naria namonamo lasi?
17 Bema ita guriguri lasi bona ita naria namonamo lasi, ita be lauma helaga ese ia inai henia kara dikana o kara mirona ta ita karaia diba, bona unai amo Iehova ena lalona ita hahisia diba. Ita ura lasi unai bamona ita karaia. (Efe. 4:30.) Iesu ena nega ai idia noho Iuda taravatu hadibaia taudia idia kerere bada, badina idia gwau Iesu be Satani ena siahu amo hoa karadia ia karaia. (Mareko 3:22-30 duahia.) Keriso idia inai henia taudia be lauma helaga idia gwauraia dika, bona Dirava ese ia gwauatao diba lasi kara dikana idia karaia unai. Namo lasi ita be unai bamona ita karaia!
18. Edena bamona do ita diba, bema ita be Dirava ese ia gwauatao lasi kara dikana ta ita karaia o lasi?
18 Ita ura lasi Dirava ese do ia gwauatao lasi kara dikana ta ita karaia dainai, namona be Paulo ese ia gwauraia sisiba ita laloatao. To, bema ita be kara dika badana ta ita karaia vadaeni be edena bamona? Bema ita helalo-kerehai bona elda taudia ese ita idia durua, ita gwau diba Dirava ese iseda kara dika ia gwauatao vadaeni, bona ita be lauma helaga ita hahisia lasi. Dirava ena heduru amo ita ese lauma helaga hahisia karana ma ta do ita karaia lou lasi.
19, 20. (a) Edena gau haida ita dadaraia be namo? (b) Eda lalona ita hadaia dahaka ita karaia totona?
19 Lauma helaga amo Dirava ese iena taunimanima edia lalokau, moale bona lalotamona ia habadaia. (Sal. 133:1-3) Unai dainai, lauma helaga ese ia abia hidi elda taudia dekenai udu mauri herevadia do ita gwauraia lasi, o hemataurai lasi herevadia do ita gwauraia lasi. Unai bamona kara amo lauma helaga ita hahisia diba. (Kara 20:28; Iuda 8) To, ita ura kongrigeisen lalonai ita hemataurai heheni bona lalotamona ai ita noho. Oibe, ita ura lasi kongrigeisen lalonai orea maragidia ita karaia bona tadikaka taihu ma haida sibona ita bamoa, to haida ita dadaraia. Paulo ia gwau: “Lauegu varavara taudia e, iseda Lohiabada Iesu Keriso ena ladana dainai umui lau noia, umui parara lasi. Hereva tamona do umui gwauraia, bona do umui gaukara hebou mai lalona tamona danu.”—1 Kor. 1:10.
20 Iehova ia ura ita ia durua iena lauma helaga ita hahisia lasi totona. Namona be lauma helaga totona do ita guriguri bona ita hekwarahi ita hahisia lasi totona. Namona be ‘Dirava ena lauma hegeregerena ita hadoa’ bona ita hekwarahi iena hakaua dalana do ita badinaia noho ela bona hanaihanai.
Edena Bamona Do Oi Haere?
• Dirava ena lauma helaga hahisia karana ena anina be dahaka?
• Edena dala ai bapatiso Keristani tauna be Iehova ena lauma helaga ia hahisia diba?
• Edena dala ai lauma helaga hahisia karadia ita dadaraia diba?
[Picture on page 30]
Hepapahuahu hamaoromaoroa haraga
[Picture on page 31]
Oi gwauraia herevadia be edena huahua bamona?