Dahaka Dainai Buruka Taudia Ita Matauraia?
U.S.A., California ena kone kahana ai au ta ia noho, bona taunimanima be nega momo unai au ena laulau idia abia. Unai au ena ladana be Lone Cypress. Taunimanima idia gwau unai au be lagani 250 mai kahana lalonai ia noho vadaeni. Idia diba unai au be lagani momo lalonai ia noho, bona mai ena hairai dainai idia naria namonamo. Hegeregere, au ia gini goada totona, ena gabana be uaea amo idia hagegea bona ena badinai nadi idia atoa.
Lone Cypress auna ese ita ia hadibaia, ita huanai idia noho Keristani buruka taudia be lagani momo lalonai idia gini goada bona metau idauidau idia haheaukalaia. Unai idia karaia dala badana ta be, sivarai namona idia harorolaia. Peroveta tauna Ioela ia gwau, “buruka” taudia be Baibel ena sivarai do idia harorolaia. (Ioe. 2:28-32; Kara 2:16-21) Mani oi laloa, unai buruka taudia be hora momo idia gaukaralaia ma haida idia durua “Basileia ena Sivarai Namona” idia dibaia totona! (Mat. 24:14) Basileia sivaraina idia harorolaia buruka taudia haida be lagani momo lalonai dagedage karadia o hekwakwanai ma haida idia haheaukalaia. Cypress auna be lagani momo lalonai ia noho bona ia gini goada totona ena gabana be uaea amo idia hagegea bona ena badinai nadi idia atoa. Unai hegeregerena eda huanai idia noho buruka taudia ita laloa bada bona matauraia be gau badana!
Iehova Dirava be idaunegai ena taunimanima ia oda henia: “Tau buruka edia vairanai do umui toreisi, bona buruka taudia ibounai do umui matauraia.” (Lev. 19:32) Hari inai negai Iehova ena hesiai taudia huanai, haheitalai namona idia hahedinaraia abidadama taudia momo be lagani momo lalonai ‘Dirava danu idia raka.’ (Mika 6:8) Buruka taudia be Baibel ena hakaua herevadia idia badinaia noho lalonai, edia huina kurokuro ese ia hahedinaraia idia ita “matauraia” be namo.—Aon. 16:31.
Aposetolo Paulo be Timoteo ia hadibaia: “Tau badana do oi gwau henia lasi. To mai manau danu do oi hereva henia, ia be oiemu tamana bamona.” Bona “hahine badadia do oi hereva henia, idia be oiemu sinana bamona.” (1 Tim. 5:1, 2) Oibe, Timoteo ese buruka taudia do ia matauraia be namo. Ia hedinarai goevagoeva, Iehova ia ura eda hereva dalana amo ita hahedinaraia buruka taudia ita matauraia.
Roma 12:10 ia gwau: “Umui ta ta dekenai danu do umui matauraia.” Kongrigeisen ena elda taudia be Keristani buruka taudia idia matauraia. To namona be ita ibounai ese ta ta dekenai hemataurai karana ita hahedinaraia.
Momokani, ruma bese taudia edia maduna badana be edia tama sina bona tubudia do idia naria. Mani Lone Cypress auna oi laloa, taunimanima be dala idauidau idia tahua unai au idia naria, ia noho daudau totona. Ita danu be dala idauidau ita tahua eda buruka tama sina bona tubudia ita naria bona matauraia totona. Hegeregere, edia hereva ita kamonai namonamo neganai, ita be sibona eda ura gaudia ita laloa o karaia lasi, to edia hemami ita laloa bada.—Aon. 23:22; 1 Tim. 5:4.
Ita huanai idia noho buruka taudia be dava bada gaudia bamona Iehova ena vairanai. Ia ese idia ia rakatania lasi. (Sal. 71:18) Dirava momokanina ese idia ia hagoadaia, Ia idia hesiai henia noho totona. Namona be ita danu ese buruka taudia ita durua bona matauraia noho.
[Pictures on page 7]
Lone Cypress auna ia gini goada totona heduru ia abia hegeregerena, ita ese buruka taudia ita laloa bada bona matauraia be gau badana
[Credit Line]
American Spirit Images/age fotostock