Duahia Taudia Edia Henanadai

Ena be Iehova ese kaivakuku tomadiho henia karana ia taravatua, to dahaka dainai Arona be golo boromakau tau ia karaia neganai ia panisia lasi?

Esodo karoa 32 ena sivarai hegeregerena, Arona be golo boromakau tau ia karaia neganai, ia be Dirava ena taravatu​—kaivakuku tomadiho henia karana​—ia makohia. (Eso. 20:​3-5) Unai dainai, “Lohiabada ese Arona danu ia badu henia, bona do ia alaia mase gwauraia. Ia dainai danu [Mose ia] guriguri.” (Deu. 9:​19, 20) Kara maoromaoro tauna Mose ena guriguri Arona dainai be “mai ena siahu,” a? (Iam. 5:​16) Oibe, unai bamona guriguri karana bona badina ma rua dainai, toana be Iehova be unai guriguri ia haerelaia bena Arona ia panisia lasi.

Badina ginigunana be inai: Arona be Dirava ia abidadama henia. Iehova ese Mose ia hamaoroa Farao dekenai idia lao bona Israela taudia be Aigupito amo do ia hakaua siri neganai, Iehova ese Arona ia abia hidi Mose ia bamoa bona Mose ena hereva do ia gwauraia. (Eso. 4:​10-​16) Idia ruaosi be Dirava idia kamonai henia bona Farao, Aigupito ena king dekenai idia lao loulou, bona Farao ena kara auka idia haheaukalaia. Unai dainai, Israela taudia be Aigupito ai idia do noho neganai, Arona be Iehova ia badinaia bona Iena hesiai gaukara ia karaia goadagoada.​​—Eso. 4:​21.

Danu, Arona ese golo boromakau tau ia karaia ena badina iharuana mani oi laloa. Mose be Sinai Ororona ai dina 40 ia noho. Vadaeni “Israela taudia idia itaia, Mose be ororo dekenai ia noho daudau herea, bona ia giroa mai haraga lasi” dainai, Arona idia doria edia kaivakuku ta ia karaia totona. Arona be edia hereva ia kamonai bona golo kaivakuku ta ia karaia. (Eso. 32:​1-6) To, Arona ena kara ese idia hahedinaraia ia diba kaivakuku tomadiho henia karana be maoro lasi. Toana be, haida ese idia doria dainai unai golo boromakau tau ia karaia. Mose ese kaivakuku idia tomadiho henia taudia haorea karana ia gwauraia neganai, Levi taudia ibounai​​—Arona danu​​—be Iehova ena kahanai idia gini. To taunimanima 3,000 bamona be kaivakuku idia tomadiho dainai idia mase.​​—Eso. 32:​25-​29.

Unai murinai Mose ese Israela taudia ia hamaoroa: “Umui emui kara dika be bada herea.” (Eso. 32:30) Unai dainai, Arona sibona lasi to ma haida danu be unai kerere idia karaia. To, Iehova ena hebogahisi dainai, Arona bona ma haida idia mase lasi.

Unai ia vara bena lagani haida murinai, Iehova ese oda ia henia Arona be hahelaga tauna ena gaukara ia karaia totona. Dirava ese Mose ia hamaoroa: “Hahelagaia tauna ena dabua be Arona dekenai do oi atoa, bona dehoro helagana be iena kwarana dekenai do oi bubua. Inai bamona do oi hahelagaia, ia ese lauegu hahelagaia tauna ena gaukara do ia karaia totona.” (Eso. 40:​12, 13) Unai ese ia hahedinaraia goevagoeva, ena be Arona ia kerere, to Iehova ese ena dika ia gwauatao. Arona be mai ena kudouna ibounai ida tomadiho momokanina ia badinaia dainai, kaivakuku ia tomadiho henia lasi bona Iehova ia gwau-edeede henia lasi.