“Do Umui Gari Lasi, Lau ese Umui Do Lau Durua”

IESU ese ia murinai idia raka taudia ia hadibaia: “Satani ese umui haida dibura ruma dekenai do ia koua, umui do ia dibagania.” To, unai hadibaia herevana ia do gwauraia lasi neganai, Iesu ia gwau: “Hisihisi do oi abia, to do oi gari henia lasi.” Satani ese Basileia harorolaia gaukarana ia koua totona, Dirava ena hesiai taudia be dibura ruma ai ia atodia. Hari inai negai ita itaia gavamani haida ese Keristani taudia momokanidia idia dagedage henia. (Apok. 2:​10; 12:17) Unai dainai, dahaka ese ita do ia durua Satani ena tarapu idauidau ita hanaia bona Iesu ia hereva bamona, ‘do ita gari lasi’?

Momokani, ita momo be nega haida ita gari. To Baibel ese ita ia hagoadaia, Iehova ena heduru amo gari karana do ita hanaia diba. Edena dala ai? Hahetoho idia vara neganai Iehova ese ita ia durua dalana ta be, Satani bona ena taunimanima ese idia gaukaralaia koikoi karadia be ita dekenai ia hahedinaraia. (2 Kor. 2:​11) Unai ia vara dalana ita diba totona, namona be Baibel negadiai ia vara sivaraina ta ita laloa. Danu hari idia noho abidadama hesiai taudia haida edia sivarai do ita itaia, ena be hahetoho idauidau idia davaria, to ‘idia goada, Satani ena koikoi karadia idia koua.’​​—⁠Efe. 6:​11-​13.

King Dikana Ta be Dirava Gari Henia King Ta Ia Tohoa

Lagani 700 B.C.E. ai, Asuria ena king dikana, Senakeriba be tuari lalonai bese momo ia halusia. Unai dainai, ena lalona ia hadaia Israela taudia bona edia hanua badana, Ierusalema, Dirava gari henia king Hesekaia ia lohia gabuna unai, ia tuari henia totona. (2 Kin. 18:​1-3, 13) Momokani, Satani be Senakeriba ena lalohadai ia diba dainai, ia gaukaralaia iena palani ia hagugurua totona, unai amo tanobada ai tomadiho momokani be do ia ore.​​—⁠Gen. 3:​15.

Senakeriba ese ena tuari orea ta ia siaia Israela taudia idia oda henia bona Ierusalema ena siti be idia ese do idia abia. King Senakeriba ena hereva gwauraia tauna, Rabesake be unai tuari oreana ida ia lao.a (2 Kin. 18:17) Rabesake ia ura Iuda taudia ia hagaria, unai amo do idia tuari lasi. Rabesake be dahaka ia gaukaralaia Iuda taudia ia hagaria totona?

Ena be Sibona Ita Noho, To Iehova Ita Abidadama Henia

Rabesake ese Hesekaia ena gwaukau taudia ia hamaoroa: “King badana, Asuria ena king be inai bamona ia gwau: ‘Dahaka dainai lau dekenai oi gari lasi, daika oi abidadama henia, oi laloa oi do ia durua? Kamonai, oi be Aigupito dekenai oi abidadama henia, to ia be siriho, makohia gauna bamona, ia ese ia dekenai ia abidadama tauna ena imana do ia gwadaia.’ ” (2 Kin. 18:​19, 21) Rabesake ese ia gwauraia herevadia be koikoi, badina Hesekaia be Aigupito taudia ia tura henidia lasi. To, Rabesake ena hereva ese ia hahedinaraia, ia ura Iuda taudia do idia laloatao gauna be inai: Ta ese umui do ia durua lasi. Umui be sibona umui noho.

Vanegai lagani lalodiai, tomadiho momokani idia inai henia taudia be unai bamona idia karaia, idia ese Keristani momokani taudia idia hagaria unai amo do idia mamia idia be sibona idia noho. Taihu ta be ena abidadama dainai dibura ruma ai idia atoa bona lagani momo lalonai ia be sibona ia noho. Unai taihu be ia gari lasi ena badina ia laloa lou neganai, ia gwau: “Guriguri karana ese lau ia durua Iehova kahirakahira lau lao totona . . . Lau be Isaia 66:2 ena hereva lau laloatao, Dirava ese ‘ia laloa manau noho tauna, bona iena dika dainai iena lalona ia giroa tauna’ ia laloa bada. Unai siri ese hanaihanai lau ia hagoadaia bada.” Unai hegeregerena, lagani momo lalonai dibura ruma ai ia noho tadikaka ta ia gwau: “Ena be lau be daiutu maragina ta lalonai lau noho, to unai ese lau ia koua lasi egu hetura karana Dirava ida lau hagoadaia noho totona.” Momokani, Iehova tura henia karana ese unai Keristani taudia rua ia hagoadaia sibona idia noho neganai, idia haheauka totona. (Sal. 9:​9, 10) Ena be dibura ruma ai idia noho Witnes taudia be edia ruma bese, turadia, bona tadikaka taihu amo edia inai taudia ese idia abia siri, to Iehova ena amo idia abia siri diba lasi.​​—⁠Roma 8:​35-​39.

Mai anina bada gauna be inai: Dala idauidau ita tahua eda hetura karana Iehova ida ita hagoadaia noho totona! (Iam. 4:⁠8) Namona be hanaihanai ita sibona ita nanadaia: ‘Lau abia dae Iehova be momokani ia noho, a? Dina ta ta maurina lalonai abia hidi badadia bona maragidia lau karaia neganai, Iehova ena hereva ese lau ia hakaua, a?’ (Luka 16:10) Bema ita hekwarahi Dirava ida eda hetura karana ita hagoadaia, vadaeni gau ta ese ita do ia hagaria diba lasi. Peroveta tauna Ieremia be hisihisi idia abia Iuda taudia totona ia hereva neganai, ia gwau: “Lohiabada e, guri dobuna dekena amo, oi dekenai lau boiboi, . . . Oi ese lau dekenai oi haere, bona oi gwau, ‘Oi gari lasi.’ ”​​—⁠Lal. 3:​55-​57.

Daradara Idia Havaraia, To Idia Kwalimu Lasi

Rabesake ese lalohadai koikoidia ia herevalaia, unai amo taunimanima edia lalona dekenai daradara ia havaraia toho. Ia gwau: “Hesekaia ese [Iehova] ena ataiai gabudia bona boubou patadia ia kokia vadaeni, . . . Lohiabada . . . ese lau dekenai maoro ia henia, ia gwau, ‘Unai tano dekenai do oi raka lao, oi tuari henia, bona do oi hadikaia ore.’ ” (2 Kin. 18:​22, 25) Rabesake ia gwau Iehova be ena taunimanima dekenai ia moale lasi dainai, idia totona do ia tuari lasi. To iena hereva be koikoi. Iehova be Hesekaia bona Iuda taudia​​—⁠tomadiho momokani haginia lou totona idia giroa lou taudia​​—⁠dekenai ia moale.​​—⁠2 Kin. 18:​3-7.

Hari inai negai, dagedage taudia haida be koikoi dalanai sivarai momokanidia idia gwauraia, idia ida ita lalotamona totona. To unai idia karaia neganai, hereva koikoidia idia gwauraia danu, badina idia ura ita daradara. Hegeregere, nega haida dagedage taudia be dibura ruma ai idia noho tadikaka taihu idia hamaoroa, edia tano ai gaukara ia hakaua tadikaka ta be ena abidadama ia rakatania dainai, idia danu ese edia abidadama idia rakatania be maoro. To, idia laloa maoromaoro Keristani taudia be unai bamona lalohadai dekenai idia daradara lasi.

Tanobada Tuarina Iharuana ai, Keristani taihu ta dekenai ia vara gauna mani oi laloa. Ia be dibura ruma ai ia noho neganai, tau ta ese ia dekenai pepa haida ia hahedinaraia bona unai pepa lalonai be tadikaka ta ese ena abidadama ia rakatania ena sivarai ia noho. Unai tau be taihu ia nanadaia: “Oi be unai tadikaka oi abidadama henia eiava lasi?” Taihu ia haere: “[Ia] be goevadae lasi tauna ta sibona.” Taihu ma ia gwau: “Guna unai tadikaka be Baibel ena hakaua herevadia ia badinaia dainai, Dirava ese ia gaukaralaia. To inai pepa ese ia hahedinaraia ia be Baibel ena hereva ia dadaraia dainai, hari ia be egu tadikaka lasi.” Unai abidadama taihu be mai aonega ida Baibel ena sisiba ia badinaia: “King taudia do umui abidadama henia lasi, badina taunimanima ese umui do idia hamauria diba lasi.”​​—⁠Sal. 146:⁠3.

Baibel amo diba maorona ita abia bona ena sisiba ita badinaia karana ese ita do ia durua lalohadai kereredia ita dadaraia bona ita haheauka noho totona. (Efe. 4:​13, 14; Heb. 6:​19) Unai dainai, metau idia vara neganai ita laloa namonamo totona, dina ta ta ai Baibel duahiduahi bona sibona eda stadi ita karaia be mai anina bada. (Heb. 4:​12) Oibe, hari be nega namona iseda diba ita habadaia bona eda abidadama ita hagoadaia totona. Lagani momo lalonai dibura ruma ai ia noho tadikaka ta ia gwau: “Lau ura umui ibounai lau hagoadaia Dirava ese ita dekenai ia henia hakaua herevadia ibounai umui laloa bada be namo, badina nega ta hahetoho ita davaria neganai unai hakaua herevadia ese ita do idia durua.” Momokani, bema Baibel bona hesiai tauna oreana ese ia halasia buka bona magasin idauidau ita stadilaia namonamo, vadaeni hahetoho idauidau do ita davaria to lauma helaga be “[iseda] lalona dekenai do ia hedinaraia lou” bona ita dibaia gaudia do ita laloa lou.​​—⁠Ioa. 14:⁠26.

Idia Gari Lasi

Rabesake ia ura Iuda taudia ia hagaria. Ia gwau: “Lauegu biaguna, Asuria ena king danu do umui gwauhamata, vadaeni lau ese Iuda taudia edia king dekenai hosi 2000 do lau henia, bema ia ese hosi guia taudia 2000 ia davaria diba! Asuria king ena hesiai tauna maragina ta ese umui ia halusia diba!” (2 Kin. 18:​23, 24) Taunimanima idia laloa, Hesekaia bona ena taunimanima be hegeregere lasi Asuria taudia idia tuari henia totona.

Hari inai negai, ita idia inai henia taudia be gavamani ida idia gaukara hebou dainai edia dagedage karadia idia habadaia. Tanobada Tuarina Iharuana lalonai Nazi taudia be Keristani momokani taudia idia dagedage henia bada. Idia ura Dirava ena hesiai taudia momo idia hagaria. Iseda tadikaka ta​​—⁠lagani momo lalonai dibura ruma ai ia noho​​—⁠be gabeai ia idia hahisia dalana ia herevalaia. Nega ta opesa tauna ta ese unai tadikaka ia nanadaia: “Emu tadina idia pidia dalana oi itaia, a? Unai amo dahaka oi dibaia?” Tadikaka ena haere be: “Lau be Iehova ena Witnes tauna ta, bona egu tomadiho do lau haidaua lasi.” Bena opesa tauna ese ia hagaria toho, ia gwau: “Vadaeni oi danu do ai pidia.” To, iseda tadikaka be ia gini goada dainai ami tauna ese ia rakatania. Tadikaka be unai bamona hahetoho ia davaria neganai, dahaka ese ia durua ia gini goada totona? Ia haere: “Lau be Iehova lau abidadama henia.”​​—⁠Aon. 18:⁠10.

Ena be Satani ese eda hetura karana Dirava ida ia hadikaia totona gau idauidau ia gaukaralaia, to Iehova ita abidadama henia karana be kesi badana ta bamona ita ia gimaia. (Efe. 6:​16) Unai dainai, namona be guriguri amo Iehova ita noia ita do ia durua eda abidadama ia goada noho totona. (Luka 17:⁠5) Danu, hesiai tauna mai ena kamonai oreana ese ia henia gaudia ita gaukaralaia namonamo, unai amo eda abidadama do ia goada noho. Haida ese ita idia hagaria neganai, namona be Iehova ese peroveta tauna Esekiela​​—⁠kara auka taudia dekenai Iehova ena hereva do ia gwauraia tauna unai​​—⁠dekenai ia gwauraia herevana ita laloa lou. Iehova ia gwau: “To hari lau ese oiemu lalona do lau ha-aukaia, idia edia lalona auka hegeregerena. Idia edia goada ese oiemu goada do ia hereaia lasi. Oiemu goada be do lau habadaia, oi be do nadi auka herea bamona, daiamono bamona.” (Ese. 3:​8, 9) Bema Iehova ia ura, vadaeni Esekiela ia durua hegeregerena ita do ia durua, bena do ita gini goada daimon nadi auka herea bamona.

Hahetoho Idauidau Dadaraia

Dagedage taudia idia diba, bema idia gaukaralaia tarapu ta dekenai idia kwalimu lasi, vadaeni idia be dala ma haida idia gaukaralaia ta ena abidadama karana idia hadikaia totona. Rabesake be unai bamona ia karaia danu. Ierusalema ai idia noho taudia ia hamaoroa: “Asuria ena king be inai bamona ia hereva: Umui be lau danu maino do umui karaia. Emui hanua dekena amo do umui raka mai . . . ela bona Asuria ena king ese tano namona ta dekenai umui do ia abia lao. Inai tano be umui emui tano hegeregere, uiti bona uaina ena tano, paraoa bona vain umadia tanona, olive audia bona hani tanona. Unuseni do umui mauri noho, do umui mase lasi.’ ” (2 Kin. 18:​31, 32) Magu lalonai idia noho Iuda taudia be reana paraoa namona do idia ania bona wain matamatana do idia inua karana ese edia lalona ia veria!

Haida be unai bamona idia karaia, unai amo dibura ruma ai ia noho misinari tadikaka ta ena abidadama idia hadikaia toho. Ia idia hamaoroa uma gabu mai hairaina ta dekenai do idia abia lao bona unuseni ai hua siks do ia noho, unai amo ia laloa namonamo diba. To, unai tadikaka be Dirava ia abidadama henia noho bona Keristani hakaua herevadia ia badinaia. Dahaka ese unai tadikaka ia durua? Unai tadikaka be gabeai ia gwau: “Lau diba Basileia helarona be gau korikori ta. . . . Dirava ena Basileia lau dibaia bona abia dae karana ese lau ia hagoadaia, bona Dirava lau abidadama henia.”

Ita dekenai Dirava ena Basileia be gau korikorina ta, a? Aberahamo, aposetolo Paulo, bona Iesu dekenai Basileia be gau korikorina ta dainai, idia davaria hahetoho idauidau idia haheaukalaia. (Fili. 3:​13, 14; Heb. 11:​8-​10; 12:⁠2) Bema iseda mauri lalonai Basileia ita tahua guna bona do ia mailaia hahenamodia ita laloa loulou, ita danu be hahetoho idauidau do ita hanaia diba.​​—⁠2 Kor. 4:​16-​18.

Iehova ese Ita Do Ia Rakatania Lasi

Ena be Rabesake ese Iuda taudia hagaria totona dala idauidau ia gaukaralaia, to Hesekaia bona ena taunimanima be Iehova idia abidadama henia noho. (2 Kin. 19:​15, 19; Isa. 37:​5-7) Danu, Iehova ese edia guriguri ia haerelaia, badina aneru ta ia siaia bona hanuaboi tamona ai Asuria tuari taudia 185,000 ia hamasea. Daba ia rere neganai, Senakeriba ia hemarai bada bona ena ami taudia oredia ia haboua bena iena hanua, Nineva dekenai idia giroa lou.​​—⁠2 Kin. 19:​35, 36.

Unai ese ia hahedinaraia goevagoeva, Iehova be ia idia abidadama henia taudia ia rakatania diba lasi. Hari inai negai, iseda tadikaka taihu be hahetoho lalodiai idia gini goada karana ese ia hahedinaraia, Iehova be ena abidadama hesiai taudia ia rakatania lasi. Badina namona dainai iseda guba Tamana ese ita ia hagoadaia: “Lau be Lohiabada, emui Dirava. Lau ese umui lau hagoadaia noho, lau gwau, ‘Do umui gari lasi, lau ese umui do lau durua.’ ”​​—⁠Isa. 41:⁠13.

[Footnote]

[Blurb on page 13]

Iehova ese ena hesiai taudia ia hamaoroa: “Do umui gari lasi” Baibel ai unai hereva be nega 30 bamona ia noho

[Picture on page 12]

Edena dala ai Rabesake ese ia gaukaralaia daladia bona hari Dirava ena taunimanima idia inai henia taudia ese idia gaukaralaia daladia be hegeregere?

[Pictures on page 15]

Iehova tura henia karana ese ita do ia hagoadaia hahetoho negadiai Ia ita badinaia noho totona