Emu Natuna Oi Durua Duahiduahi Bona Stadi Karana Ia Laloa Bada Totona

OI HEKWARAHI emu natuna ena vaira negana oi hanamoa totona, dala namona ta be ia dekenai duahiduahi bona stadi karana oi hadibaia. Unai ese moale ia havaraia diba! Haida idia laloatao idia do maragi neganai, edia tama sina be idia dekenai idia duahiduahi. Duahiduahi karana ese moale bona anina namona ia havaraia diba. Dirava ena hesiai taudia dekenai unai be mai anina bada, badina Baibel ita stadilaia neganai ita be Dirava ita tura henia namonamo diba. Keristani tama ta ia gwau, “Ai laloa bada gaudia be, duahiduahi bona stadi karana amo ai dibaia gaudia.”

Stadi namonamo karana ese emu natudia ia durua edia hetura karana Dirava ida idia hagoadaia totona. (Sal. 1:​1-3, 6) Ena be duahiduahi ita dibaia karana ese hahemauri do ia henia lasi, to Baibel ese ia hahedinaraia duahiduahi karana ese hahenamo momo ia mailaia diba. Hegeregere, Apokalupo 1:3 (NW ) ia gwau: “Inai peroveta herevana ia duahia badabada tauna be do ia moale.” Danu, stadi lalonai laloa dobu karana be mai anina bada, aposetolo Paulo ese Timoteo dekenai ia henia sisiba ese unai ia hahedinaraia, ia gwau: “Unai gaudia oi laloa dobu, idia dekenai emu lalona ibounai oi henia.” Dahaka dainai? “Taunimanima ibounai do idia itaia, oi be oi goada oi lao noho.”​​—⁠1 Tim. 4:​15, NW.

Momokani, ta be duahiduahi bona stadi karana ia dibaia sibona be hegeregere lasi. Momo be duahiduahi bona stadi karana idia diba, to nega idia atoa lasi unai gaudia idia karaia totona; edia nega bada be anina lasi gaudia dekenai idia haorea kava. Unai dainai, edena dala ai tama sina ese edia natudia idia durua duahiduahi bona stadi karana idia laloa bada totona?

Lalokau Bona Haheitalai Namona Hahedinaraia

Bema natudia idia mamia idia oi lalokau henia, stadi negadia do idia moalelaia. Owen bona Claudia be edia natudia rua idia herevalaia neganai, idia gwau: “Idia be mai ura bada ida stadi negana idia naria, badina unai be mai anina bada negana​​—⁠unai ese idia ia gimaia bona idia moale. Idia diba unai stadi negana ese ruma bese lalonai lalotamona ia havaraia.” Ena be natudia edia mauri lagani be 13 ia lao 19 neganai hekwakwanai idauidau idia davaria, to ruma bese stadi amo idia mamia lalokauna ese idia do ia durua stadi karana idia laloa bada totona. Owen bona Claudia edia natudia be hari painia gaukara idia karaia, bona edia tama sina ese idia durua duahiduahi bona stadi karana idia laloa bada dainai namo idia davaria.

Tama sina edia haheitalai ese natudia do ia durua danu. Natudia be nega momo idia itaia edia tama sina idia duahiduahi bona stadi neganai, idia danu be edia mauri lalonai unai bamona do idia karaia. To bema oi be tama o sina ta bona oi dekenai duahiduahi karana ia auka, edena dala ai haheitalai namona oi hahedinaraia diba? Reana emu lalohadai oi haidaua bona duahiduahi karana oi laloa bada. (Roma 2:​21) Bema dina ta ta ai oi duahiduahi, unai ese emu natudia do ia durua duahiduahi karana idia laloa bada totona. Bema oi hekwarahi Baibel oi duahia, hebou gaudia oi hegaegaelaia, bona ruma bese stadi oi karaia, vadaeni natudia do idia diba unai gaudia be mai anina bada.

Unai dainai, emu lalokau bona haheitalai namona ese emu natudia ia durua duahiduahi karana idia laloa bada totona. To, dahaka gaudia haida oi karaia emu natudia oi hagoadaia totona?

Natudia Durua Duahiduahi Karana Idia Ura Henia Bada Totona

Emu natudia ese duahiduahi karana idia moalelaia totona, dahaka mai anina bada gaudia haida oi karaia? Idia maragi neganai, idia totona buka haida oi abia be namo. Elda ta be ena tama sina ese idia durua duahiduahi karana ia laloa bada totona, ia gwau: “Namona be emu natudia oi durua buka gaukaralaia dalana idia manadalaia totona. Unai dala amo, edia mauri lalonai buka gaukaralaia karana do idia ura henia bada.” Natudia be duahiduahi idia do diba lasi neganai, idia be Baibel bukadia haida, hegeregere Hadibaia Tauna Badana amo Diba Abia bona Lauegu Baibel Sivarai Bukana idia ura henia bada. Unai bamona bukadia be emu natudia ida oi duahia neganai, idia be gado do idia dibaia sibona lasi, to “lauma helaga amo idia mai herevadia,” bona “Dirava ena gau idauidau” idia lalopararalaia diba.​​—⁠1 Kor. 2:​13, NW.

Hanaihanai oi duahiduahi badabada. Sediual oi karaia dina ta ta ai emu natuna ida oi duahiduahi totona. Unai bamona oi karaia neganai, emu natudia oi hadibaia hereva idia gwauraia maoromaoro bona duahiduahi karana idia hanamoa totona. Danu emu duahiduahi dalana be mai anina bada. Bema mai emu ura ida unai bamona oi karaia, idia danu be oi do idia tohotohoa. Momokani, reana emu natuna be oi do ia noia sivarai tamona oi duahia loulou totona. Idia noia gauna oi karaia! Gabeai do idia ura hereva matamatadia ma haida idia dibaia. To namona be oi naria namonamo, emu natuna oi doria lasi oi ida ia duahiduahi totona. Iesu be haheitalai namona ia hahedinaraia, iena kamonai taudia ese ena hereva “idia lalopararalaia diba hegeregerena” ai idia ia hadibaia. (Mar. 4:​33, NW ) Bema emu natudia oi doria lasi, idia be duahiduahi negadia ta ta ai do idia ura dikadika idia duahiduahi, unai amo idia oi durua duahiduahi karana idia laloa bada totona.

Idia umui hagoadaia idia duahiduahi, bona umui duahia gaudia umui herevalaia. Emu natuna be hereva momo ia dibaia, ia gwauraia namonamo, bona ia lalopararalaia neganai, do oi moale bada. Emu natudia ida umui duahia gaudia umui herevalaia neganai, unai ese idia ia durua edia duahiduahi karana idia hanamoa noho totona. Buka ta ese ia hahedinaraia edena dala ai natudia oi durua idia duahiduahi namonamo totona, ia gwau herevahereva karana ese natudia ia durua “gabeai idia duahiduahi neganai idia dibaia herevadia do idia lalopararalaia.” Unai buka ma ia gwau: “Idia hekwarahi duahiduahi bona toretore idia diba natudia dekenai mai anina bada gaudia umui herevalaia be gau badana.”

Emu natuna oi hamaoroa oi dekenai ia duahiduahi, bona oi hagoadaia henanadai ia henia totona. Reana oi sibona dekenai henanadai haida oi henia bona edia haere oi tahua. Unai dala amo, natudia do idia diba buka idauidau lalonai be hereva momo idia noho bona idia duahia herevadia edia anina idia hedinarai. Bema oi duahia herevadia be Baibel amo, unai ese oi do ia durua bada.​​—⁠Heb. 4:​12.

To, laloaboio lasi duahiduahi karana be mai ena hekwarahi. Nega bada oi atoa bona duahiduahi namonamo karana oi manadalaia.a Unai dainai, natudia oi durua duahiduahi karana idia ura henia bada bona idia dekenai hanamoa herevadia oi gwauraia. Unai amo idia oi hagoadaia duahiduahi karana idia moalelaia totona.

Duahiduahi be mai Anina Bada Bona Oi Moalelaia

Emu natudia dekenai stadi karaia dalana oi hadibaia neganai, unai ese idia ia durua duahiduahi ena anina idia dibaia totona. Stadi ena anina be, gau haida idia dibaia bona unai gaudia idia hahegeregerea dalana idia lalopararalaia. Unai bamona oi karaia totona, namona be oi hegaegae namonamo, oi stadilaia gaudia oi laloatao, bona oi dibaia gaudia oi gaukaralaia. Bema natu ta ese stadi dalana ia dibaia bona ia do ia durua dalana ia lalopararalaia, vadaeni ia dekenai duahiduahi bona stadi karana be mai anina bada bona do ia moalelaia.​​—⁠Had. 10:⁠10.

Stadi ai mai anina bada gaudia herevalaia. Ruma Bese Ena Tomadiho negana, dina iboudiai dina ena siri herevalaia negana, bona unai bamona negadia ma haida be nega namona emu natudia dekenai stadi karaia daladia haida oi hadibaia totona. Natudia idia helai namonamo bona nega sisina lalonai idia stadilaia gauna ta idia laloa bada neganai, unai ese idia dekenai laloa dobu karana ia hadibaia. Danu, emu natuna mero oi hagoadaia ia dibaia vadaeni gaudia bona hari ia dibaia gaudia ese ia ia durua dalana be oi dekenai ia herevalaia. Unai amo ia ese unai gaudia ia hahegeregerea daladia ia dibaia. Emu natuna kekeni oi noia ia duahia gauna ena hereva badadia be sibona ena hereva dalana amo ia gwauraia. Unai ese ia do ia durua unai hereva edia anina ia lalopararalaia bona laloatao totona. Umui stadilaia gaudia be emui natudia ese idia laloatao totona, dala ma ta be umui duahia gaudia edia hereva badadia umui riviulaia. Bona idia oi hadibaia stadi negadiai o kongrigeisen heboudia ai, hereva kwadogidia be edia noutbuk ai idia torea diba. Unai bamona laloa dobu karana amo namo idia davaria diba! Unai bamona hadibaia daladia ese oi bona emu natuna ia durua emui stadi karana umui moalelaia totona.

Stadi moalelaia totona, gau haida oi karaia. Stadi do umui karaia gabuna be mai ena diari bona hodahoda sisina ia vareai, regerege be lasi bona teibolo bona sea idia noho be namo, unai amo umui stadilaia gaudia umui laloa dobu diba. Momokani, tama sina ese stadi idia laloa dalana be mai anina bada. Sina ta ia gwau: “Hanaihanai oi stadi bona duahiduahi totona nega oi atoa be gau badana. Unai ese emu natudia do ia durua gau ibounai idia karaia namonamo totona. Do idia diba gaukara ta be ena nega korikori ai do idia karaia guguru be namo.” Tama sina momo be stadi negana ai gau ma haida idia karaia lasi. Diba bada tauna ta ia gwau, unai be dala namona ta natudia do oi durua stadi karaia dalana idia dibaia totona.

Stadi ena namo hahedinaraia. Emu natudia oi durua stadi amo idia dibaia gaudia idia gaukaralaia dalana idia itaia totona. Natudia ese idia dibaia gaudia idia gaukaralaia neganai, stadi ena badina do idia lalopararalaia namonamo. Tadikaka matamata ta ia gwau: “Bema lau stadilaia gauna ta ese lau ia durua lasi, vadaeni lau hekwarahi bada unai lau stadilaia namonamo totona. To bema lau stadilaia gauna ese lau ia durua diba, vadaeni lau ura unai lau stadilaia.” Matamata taudia idia itaia stadi karana amo mai anina bada gaudia idia dibaia neganai, idia be mai ura bada ida unai idia karaia. Idia be duahiduahi karana idia laloa bada hegeregerena, stadi karana do idia laloa bada.

Ena Hahenamo

Gau haida sibona ai torea, unai amo oi be emu natudia oi durua duahiduahi bona stadi karana idia laloa bada totona. Sikuli ai maka namodia oi abia, gaukara gabunai, ma haida oi tura henia, inai tanobada ai idia vara gaudia oi lalopararalaia, bona tama sina bona natudia huanai lalokau ia noho, danu duahiduahi bona stadi karana amo moale bada do oi abia.

To mai anina bada gauna be inai, stadi laloa bada karana ese natudia ia durua Dirava idia gari henia totona. Danu, unai ese edia lalona ia kehoa Baibel ena hereva momokani “ena lababa, bona ena lata, bona ena ataiai, bona ena dobu” idia lalopararalaia totona. (Efe. 3:​18) Momokani, Keristani tama sina be edia natudia dekenai gau momo idia hadibaia be namo. Bema tama sina be nega idia henia bona gau momo idia karaia edia natudia durua totona, natudia idia tubu daekau neganai, idia be Iehova tomadiho henia karana idia abia hidi diba. Emu natuna dekenai stadi karaia dala namodia oi hadibaia neganai, unai ese idia do ia durua edia hetura karana Dirava ida idia hagoadaia totona. Unai dainai, emu natudia oi durua duahiduahi bona stadi karana idia laloa bada totona, Iehova ena heduru oi noia be gau badana.​​—⁠Aon. 22:⁠6.

[Footnote]

[Box/Pictures on page 26]

Duahiduahi . . .

• Natudia totona buka haida oi abia be namo

• Oi duahiduahi badabada

• Idia oi hagoadaia idia duahiduahi totona

• Umui duahia gauna umui herevalaia

• Emu natuna oi noia oi dekenai ia duahiduahi

• Emu natuna oi hagoadaia henanadai ia henia

Stadi . . .

• Natuna dekenai haheitalai namona hahedinaraia

• Emu natuna oi hadibaia ia . . .

○ laloa dobu

○ dibaia gaudia ia hahegeregerea

○ duahia gauna ena hereva badadia ia gwauraia

○ stadilaia gaudia ia riviulaia

○ kamonai hereva kwadogidia ia torea

• Stadi moalelaia totona, gau haida karaia

• Stadi ena namo hahedinaraia