Natudia Durua Iehova Ena Orea Idia Dibaia Namonamo

NATUDIA idia ura gau momo idia dibaia. Aigupito ai Israela natudia be Pasova ginigunana ena hanuaboi ai idia henia henanadai mani ita laloa: ‘Dahaka dainai mamoe ena natuna ia mase?’ ‘Dahaka dainai egu Tamana be iduara ai rara ia atoa?’ ‘Ita be edeseni do ita lao?’ Israela tama ese unai bamona henanadai idia haerelaia karana amo Iehova ia henia hahegani idia hamomokania. Nega vairai Pasova idia badinaia totona, Iehova be idia dekenai ia gwau: “Umui emui natudia do idia nanadaia umui dekenai, do idia gwau, ‘Inai tomadiho karana ena anina be dahaka?’ Do umui haere, umui gwau, ‘Inai be Lohiabada ena Pasova boubou ena kara, Aigupito dekenai ia ese Israela taudia edia ruma ia raka hanaia lao, Aigupito taudia sibona mo ia alaia mase, bona iseda taudia ibounai ia hamauria.” (Eso. 12:​24-27) Gabeai, Iehova ese Israela tama sina ia hadibaia, edia natudia be Iehova ena “taravatu bona oda” totona idia henanadai neganai, haere maorodia idia henia be mai anina bada.​—⁠Deu. 6:​20-25.

Iehova ia ura natudia be tomadiho momokani totona idia henia henanadai edia haere maorodia idia diba​—⁠unai haere maorodia ese idia do ia durua Iehova, edia Dirava bona Hamauria Tauna idia lalokau henia totona. Hari inai negai, Iehova ia ura iseda natudia be unai bamona idia karaia. Tama sina ese natudia dekenai Dirava bona ena taunimanima lalokau henia karana idia hadibaia goada totona, dala ta be idia durudia Iehova ena orea idia dibaia namonamo bona unai orea ese ita ia durua dalana idia lalopararalaia. Natudia be Dirava ena orea amo diba ma haida idia abia totona, ita durua daladia haida ita laloa.

Kongrigeisen

Natudia ese umui lao henia kongrigeisen ai idia noho taudia idia dibaia be namo. Unai idia karaia totona, umui tama sina ese emui natudia be hebou dekenai umui abia lao. Unai dala amo, umui be Iehova ese Israela taudia dekenai ia henia haheitalai umui tohotohoa, ia gwau: “Taunimanima ibounai do umui haboua, tau bona hahine, memero bona kekeni . . . Vadaeni do idia kamonai, edia lalona be do idia kehoa, bona Lohiabada emui Dirava do idia gari henia. Bona inai Taravatu ena hereva ibounai do idia badinaia, bona edia kara do idia karaia. Edia natudia be inai Taravatu idia do diba lasi. Vadaeni do idia kamonai, bona do idia diba. Unai neganai Lohiabada, emui Dirava do idia gari henia, bona ia do idia kamonai henia.”​—⁠Deu. 31:​12, 13.

Natudia idia do maragi neganai, Iehova ena Hereva do umui hadibaia matamaia. Aposetolo Paulo ese Timoteo be inai bamona ia herevalaia: “Oi be mero maragi neganai, Buka Helagadia dekenai oi manada momokani.” (2 Tim. 3:15) Kingdom Hall dekenai, natudia be hebou ai idia kamonai gaudia idia lalopararalaia bona Basileia anedia idia dibaia, Baibel bona Baibel bukadia gaukaralaia dalana idia dibaia bona matauraia. Danu, natudia be Keriso murinai idia raka taudia momokanidia edia kara badana, lalokau idia dibaia. Iesu ia gwau: “Taravatu matamatana lau henia umui dekenai, inai bamona: Umui ta ta dekenai umui lalokau henia. Lau ese umui dekenai lau lalokau henia hegeregerena, umui danu ta ta dekenai umui lalokau henia. Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioa. 13:​34, 35) Kingdom Hall lalonai natudia be lalokau bona noho namona idia mamia neganai, unai ese idia do ia durua hebou lao henia hanaihanai karana be edia mauri lalonai idia manadalaia totona.

Bema Kingdom Hall ai oi ginidae haraga bona hebou ia ore murinai nega sisina oi noho, emu natudia be mai edia dala ma haida idia hebamo henia totona. Namo lasi natudia be edia mauri lagani tamona taudia sibona idia bamoa, to mauri lagani idauidau tadikaka taihu idia hedavari henia be namo. Idaunegai, Sekaraia be Iuda ena king, Usaia, ia durua totona ‘Dirava gari henia dalana ia hadibaia.’ Unai hegeregerena, hari inai negai lagani momo lalodiai Iehova idia hesiai henia taudia ese natudia idia hagoadaia bada. (2 Siv. 26:​1, 4, 5) Kingdom Hall lalonai, laiberi, notisbod bona ma gau haida be natudia dekenai oi herevalaia diba.

Tanobada Hegegemadai Oreana

Namona be natudia idia laloparara, edia kongrigeisen be tanobada hegegemadai oreana ena kongrigeisen 100,000 mai kahana lalonai ia noho. Unai orea ena heau dalana, ena gaukara bona natudia be dahaka do idia karaia unai orea ena gaukara idia durua totona oi herevalaia. Oi hahedinaraia dahaka dainai sekit hebouhebou, distrik hebouhebou bona sekit naria tauna ena vadivadi oi moalelaia.​—⁠Maua ladana “Ruma Bese Ena Tomadiho Lalonai Umui Herevalaia Gaudia Haida,” ena rau 28 itaia.

Bema oi dekenai dala ia noho, loaloa naria taudia, misinari, Betele bona ful-taim hesiai gaukara idia karaia taudia ma haida oi boiria emu ruma ai umui aniani hebou totona. Namo lasi oi laloa edia nega be hegeregere lasi natudia idia durua totona. Unai ful-taim hesiai gaukara idia karaia taudia be Iesu idia tohotohoa, hanaihanai natudia idia abia dae bona idia hereva henia. (Mar. 10:​13-16) Natudia be Iehova hesiai henia taudia edia ekspiriens idia kamonai bona idia itaia unai taudia be hesiai gaukara idia moalelaia neganai, idia danu ese ful-taim hesiai gaukara be edia tahua gauna ai do idia halaoa.

Ruma bese lalonai dahaka gau ma haida oi karaia, unai amo emu natuna oi durua Iehova ena orea ia dibaia namonamo totona? Dala haida be inai: Ruma bese ida Jehovah’s Witnesses​​—⁠Proclaimers of God’s Kingdom bukana umui herevalaia. Iehova ena hesiai taudia ese idia hahedinaraia manau bona Dirava badinaia karana be natudia dekenai oi herevalaia. Oi hahedinaraia Iehova be edena dala ai unai taudia ia gaukaralaia tanobada hegegemadai sivarai namona idia harorolaia totona. Iehova ena orea ese ia halasia vidio idauidau oi gaukaralaia, orea ena heau dalana​—⁠gunaguna amo ema bona hari​—⁠be natudia dekenai oi hadibaia. Bema hegeregere, emu tano eiava tano ma haida dekenai brens opesi bona Betele rumana umui vadivadi henia. Unai bamona vadivadi karana amo natudia do idia itaia, tanobada ai Iehova ena orea be hesiai tauna mai ena kamonai oreana ena hakaua henunai, lauma aniani ia henia bona tadikaka taihu ia gunalaia, aposetolo edia negai bamona.​—⁠Mat. 24:​45-47; Kara 15:​22-31.

Natudia Ta Ta Edia Laloparara Hegeregerena ai Hadibadia

Emu natudia oi hadibaia neganai, namona be Iesu ese ena aposetolo taudia ia hadibaia dalana oi laloatao. Ia gwau: “Lauegu hereva momo idia noho, lau ura hereva henia umui dekenai, to harihari umui be inai hereva do umui abia dae diba lasi.” (Ioa. 16:12) Iesu ese hahediba taudia dekenai gau ibounai be nega tamona ia gwauraia lasi. To, edia laloparara hegeregerena ai mai anina bada hereva momokanidia ia hadibaia namonamo. Unai hegeregerena, emu natudia be edia laloparara hegeregerena ai oi hadibadia be namo. Idia dekenai hanaihanai Iehova ena orea ena heau dalana oi hadibaia namonamo neganai, edia ura oi habadaia bona kongrigeisen dibaia karana do idia moalelaia. Natudia edia ura ia idau neganai, idia dibaia vadaeni gaudia oi gwauraia lou bona edia diba oi habadaia.

Kongrigeisen ese ita ia durua eda hetura karana Dirava ida ita hagoadaia, bona kongrigeisen ena gaukara idauidau idia durua natudia be idia hegeregere Satani ena tanobada ena lalona veria gaudia idia dadaraia totona. (Roma 12:⁠2) Ai diba momokani emu natudia oi durua Iehova ena orea idia dibaia namonamo karana amo moale bada do oi davaria. Iehova amo ia mai hahenamo dainai, namona be Ia idia badinaia bona hesiai henia noho.

[Box/​Picture on page 28]

Ruma Bese Ena Tomadiho Lalonai Umui Herevalaia Gaudia Haida

Emui Ruma Bese Ena Tomadiho negana ai Iehova ena orea ia herevalaia gaudia haida umui kikilaia. Unai gaudia haida be henunai idia noho:

▪ Kongrigeisen ia matamaia ena sivarai riviulaia. Edena negai bona edena dala ai ia matamaia? Kongrigeisen ese idia gaukaralaia Kingdom Hall be edena bamona? Unai umui herevalaia totona, namona be kongrigeisen ai lagani daudau ia noho tadikaka o taihu ta be emui ruma dekenai umui boiria bona emui natudia edia henanadai ia haerelaia diba.

▪ Hebouhebou badadia bona maragidia edia badina bona natudia be unai hebou amo namo do idia davaria dalana oi gwauraia hedinarai.

▪ Iehova ena orea ese sikuli idauidau ia haginia edia badina umui laloa namonamo. Unai sikuli idia haorea taudia ese idia havaraia anina namodia herevalaia.

▪ Natudia durua sivarai namona harorolaia hanaihanai taudia ai idia lao be gau badana. Natudia dekenai oi hahedinaraia edena dala ai idia be Yearbook of Jehovah’s Witnesses lalonai tanobada hegegemadai ena ripoti idia durua diba.

▪ Iehova ena orea lalonai natudia ese idia karaia diba ful-taim hesiai gaukara idauidau herevalaia. Iehova Ena Ura Ia Karaia Orea bukana ena karoa 10 ai heduru hereva namodia idia noho.

▪ Natudia durua kongrigeisen ena gaukara idauidau edia badina idia lalopararalaia totona. Iehova ena orea ena heau dalana​—⁠dala maragidiai danu​—⁠idia badinaia ena badina oi herevalaia. Natudia ese elda taudia edia hakaua dalana idia badinaia karana amo kongrigeisen ena gaukara idia durua dalana oi hahedinaraia.

[Picture]

Emu natudia be lagani momo lalodiai hesiai gaukara idia karaia taudia idia bamoa karana amo namo idia davaria

[Pictures on page 26]

Idaunegai Israela tama sina bamona, hari inai negai tama sina idia hekwarahi natudia be Iehova ena orea totona idia henia henanadai edia haere maorodia idia henia