Baibel ese Mauri Ia Haidaua

DAHAKA ese gavamani ia tuari henia tauna bona henaohenao tauna ia durua ena mauri ia haidaua totona? Dahaka dainai tae kwon do gadara ia diba momo hahinena ese ena tahua gaudia ia haidaua? Edena dala ai tama ta ese ena natuna ia abidadama henia karana amo namo ia davaria? Henunai idia noho sivaraidia oi duahia unai henanadai edia haere oi abia totona.

“Ena be guna egu mauri be ia dika, to hari lau moale.”​—⁠GARRY P. AMBROCIO

MAURI LAGANI: 47

TANO: PHILIPPINES

GUNA: GAVAMANI IA TUARI HENIA

EGU MAURI GUNANA: Lau be taoni maragina ta Vintar dekenai lau tubu daekau. Ai noho gabuna be ororo ese ia gegea, sinavai be ia goeva, bona hodahoda namona ai abia. Ena be unai gabu be namo herea, to mauri be ia auka. Taunimanima ese emai animal idia henaoa bona emai ruma idia makohia.

Lauegu mauri lagani be 13 bamona neganai, egu turadia ida lau inuinu momo, kuku lau ania, bona moni lau henaoa, kekero muramura bona kuku lau hoia totona. Lauegu tubuna hahinena ena herahera gaudia lau henaoa danu. Ami taudia idia laloa lau be gavamani ia tuari henia oreana ladana, New People’s Army (NPA) lau bamoa, bona nega momo lau idia botaia dikadika. Unai dainai, lau be gavamani tuari henia oreana lalonai lau vareai. Lagani 5 lalonai, NPA tuari oreana ida ororo dekenai ai noho. Mauri be ia auka. Ai be nega momo ami taudia amo ai komu. Gabeai, ororo dekenai komu karana lau hesikulaia dainai, Ilocos Norte edia gavana dekenai sibona lau henia. Ia ese lau ia kara namo henia, bona lau ia durua gaukara namona ta lau davaria totona. To, lau ese egu kara gunadia lau badinaia noho, ruma gaudia lau henaoa bona taunimanima lau hagaridia.

BAIBEL ESE EGU MAURI IA HAIDAUA DALANA: Lauegu gaukara gabunai, hahine ta ladana, Loida, be Iehova ena Witnes hahinena. Iena amo, Jovencio, lau hedavari henia, bona ia be lau ida Baibel ia stadilaia matamaia. To egu mauri gunana lau haidaua be ia auka. Baibel stadi totona Jovencio ia do mai lasi neganai, lau be kuku lau ania, bona taravatu utua karadia lau do karaia noho. Dokonai, taravatu ta lau utua dainai pulisi ese lau idia dogoatao bona hua 11 dibura rumana dekenai lau noho. Unai negai, Iehova lau guriguri henia, bona lau noia goadagoada lau ia durua totona. Ia lau noia egu kara dika do ia gwauatao bona lauma helaga amo lau do ia hakaua bona hagoadaia.

Dibura rumana ai, Iehova ena Witnes tauna ta ese lau ia vadivadi henia bona lau dekenai Baibel ta ia henia. Unai lau duahia neganai, lau davaria Iehova be hebogahisi, lalokau, bona dika ia gwauatao Diravana. Unai amo lau diba Iehova ese lau ia hebogahisi henia bona dala ia kehoa ia lau dibaia totona. Iehova lau noia lau dekenai goada do ia henia, unai amo egu kara gunadia lau dadaraia diba. Aonega Herevadia 27:11 ena hereva ese lau ia hagoadaia. Unai be hegeregere Iehova be lau ia hereva henia noho. Ia gwau: “Egu natuna e, do oi aonega, vadaeni do lau moale, bona unai dainai, bema tau ta ese lau ia gwauraia kerere neganai, lau ese iena hereva do lau halusia diba.”

Dibura rumana lau rakatania murinai, Witnes taudia ida Baibel stadi lau matamaia lou, edia hebou dekenai lau lao, bona egu mauri lalonai Baibel ena hakaua herevadia lau badinaia matamaia. Dokonai, Iehova ena heduru amo, egu kara gunadia lau dadaraia. Bena Iehova Dirava dekenai egu mauri lau gwauhamatalaia.

NAMO LAU DAVARIA DALANA: Ena be guna egu mauri be ia dika, to hari lau moale. Herevana guna kara mirodia momo lau karaia, hari lau be tau matamata. (Kolose 3:​9, 10) Hari, lau moale badina Iehova ena taunimanima goevadia lau bamoa, bona ma haida lau durua iseda Siahu Ibounai Diravana, Iehova, idia dibaia totona.

“Lau ura Brazil totona lau gadara.”​—⁠JULIANA APARECIDA SANTANA ESCUDEIRO

MAURI LAGANI: 31

TANO: BRAZIL

GUNA: TAE KWON DO GADARA IA DIBA MOMO

EGU MAURI GUNANA: Lau be Londrina dekenai lau tubu daekau. Ena be unuseniai idia noho taudia momo be idia ogogami, to gabu be ia goeva bona taunimanima be maino ai idia noho. Lauegu mauri lagani be 10 neganai, egu kakana ese lau ia hagoadaia tae kwon do gadara dekenai lau vareai, unai hereva ena anina be “imana bona aena amo heatu.” Lauegu tamana be unai gadara dekenai ia moale lasi, to gabeai ia abia dae.

Lau treinini goadagoada bona Parana dekenai, tae kwon do gadarana lalonai lau kwalimu. Unai murinai, gadara ma haida lalonai lau kwalimu danu, bona lagani 1993 ai, lau idia gwauraia Brazil ena tae kwon do kwalimu hahinena. Lau ura tae kwon do ena gadara badadia lalonai lau vareai. To egu ruma bese be idia ogogami bona idia hegeregere lasi egu dala idia karaia.

Lauegu ura badana be tae kwon do be Olympic Gadara lalonai idia atoa bona unai bamona ia vara. Lau ura Brazil totona Olympic Gadara dekenai do lau lao, unai dainai lau treinini goadagoada bona haida ese lau idia durua dainai France, Vietnam, South Korea, Japan, bona Saut America Gadara dekenai lau lao. Lauegu tahua gauna ma ta be Pan America Gadara lalonai do lau vareai, lau gadara namonamo dainai lau bona ma rua idia abia hidi lagani 2003 ai, Santo Domingo, Dominican Republic, dekenai do lau gadara.

BAIBEL ESE EGU MAURI IA HAIDAUA DALANA: Lagani 2001 ai, lau bona egu turana mero ese Iehova ena Witnes taudia ai hedavari henia, bona ai ida Baibel idia stadilaia matamaia. Matamanai, lau ura momokani lasi. Stadi negadiai, nega momo lau hesiku bona lau kamonai namonamo lasi, bona lau mahuta. To herevana unai ia vara, lau dibaia gaudia lau mamia momokani​—⁠unai be egu gadara badana dekenai ia hedinarai.

Pan America Gadara dekenai lau do lao lasi neganai, tae kwon do hadibaia taudia ese lau idia abia hidi ma haida ida lau heatu totona. Lauegu nega ia ginidae neganai, lau gini sibona bona lau ura lasi do lau heatu. Karaharaga lau laloatao, Keristani tauna be ma ta ida do ia heatu lasi​—⁠gadara lalonai danu! Baibel ena hereva lau laloatao, ia gwau, “oiemu badibadinai tauna dekenai oi lalokau henia, oi sibona dekenai oi lalokau henia bamona.” (Mataio 19:19) Heatu gabuna lau rakatania bona lau lalorua lasi. Taunimanima be mai hoa bada ida lau idia raraia.

Ruma dekenai lau giroa neganai, lau helai bona egu mauri dekenai do lau karaia gauna lau laloa. Iehova ena Witnes taudia ese idia halasia buklet ta lau abia, ia ese Dirava ia ura ita karaia gaudia ia herevalaia. Unai buklet lalonai Salamo 11:5 (BHğ) lau itaia, unai siri ese Iehova be inai bamona ia herevalaia: “Iena lauma ese dagedage karadia ia ura henia tauna be ia inai henia.” Salamo torea tauna ena hereva lau mamia momokani, bona tae kwon do gadarana lau rakatania.

Tae kwon do gadara hadibaia taudia be idia moale lasi. Lauegu lalona idia haidaua toho, idia gwau egu tano dekenai lau be hegeregere momokani, bona kahirakahira Olympic Gadara lalonai do lau vareai. To egu lalona be lau hadaia vadaeni.

Unai nega ai, lau bona egu turana mero be ai headava vadaeni. Ia be Iehova ena Witnes taudia ida ia haroro matamaia. Ruma dekenai ia giroa neganai, mai moale ida lau dekenai taunimanima ida ia herevalaia gaudia ia gwauraia. Lau diba bema lau ura haroro gaukara lau karaia, namona be egu mauri lalonai gau haida lau haidaua. Lauegu tomadiho gunana lau rakatania bona gabeai bapatiso Witnes hahinena ai lau lao.

NAMO LAU DAVARIA DALANA: Lau bona egu adavana ai moale bada bona ai lalotamona, badina ai hekwarahi emai headava lalonai Baibel ena hakaua herevadia ai badinaia totona. Lauegu adavana be kongrigeisen ena maduna idauidau ia huaia neganai, mai moale ida ia lau durua. Lau gaukara goada diba golo medolo bona ladana bada lau abia totona. To lau mamia inai kara gageva tanobadana ai, gau ta ese Iehova Dirava hesiai henia hahenamona ia hereaia lasi.

“Lauegu tamana ia hesiku lasi.”​—⁠INGO ZIMMERMANN

MAURI LAGANI: 44

TANO: GERMANY

GUNA: MAVARU KLAB ENA SEKURITI

EGU MAURI GUNANA: Lau be tomadiho dalanai ia parara ruma besena amo bona taoni, ladana Gelsenkirchen dekenai lau vara. Lauegu tamana be Iehova ena Witnes tauna ta. To egu sinana ia ura lasi emai tamana ese ena tomadiho karadia be lau, egu kakana, bona taihudia rua dekenai ia hadibaia. Dina tamona lalonai ia be hora 10 mai kahana ia gaukara bona motuka ia taria. Nega momo ia be daba 2 o 3 oklok ai ena gaukara ia matamaia. To, nega momo ai ia durua emai hetura karana Dirava ida ai hagoadaia totona. To, iena hekwarahi lau laloa bada lasi.

Lauegu mauri lagani be 15 neganai, tomadiho heboudia lao henia karana lau hesikulaia, bona lau gwau-edeede. Lagani ta murinai, boksini klab ta dekenai lau vareai. Lagani rua murinai, lau karaia karadia ese egu tamana ena lalona ia hahisia bada. Lauegu mauri lagani be 18 neganai, ruma lau rakatania.

Spot gadara lau ura henia bada dainai, wiki ta lalonai nega 6 lau treinini​—⁠boksini murinai, auri metaudia lau abia isi. Wikeni ai, lau bona egu turadia be mavaru klab dekenai ai lao. Nega ta ai, klab taudia ia hagaria tauna ta ida lau heatu, bona lau ese ia lau dadabaia. Unai klab ena biaguna be unai ia itaia neganai, maoromaoro lau dekenai sekuriti gaukarana ia henia. Ena davana be namo dainai, unai gaukara lau abia dae.

Wikeni ta ta ai, klab ena iduara dekenai lau gini bona lau itaia daika do ia vareai bona daika be lasi. Unai klab lalonai taunimanima 1,000 bamona idia vareai diba, unai dainai lau bisi bada. Vaia taunimanima idia heatu momo. Nega momo lau be ipidi bona kavabu amo idia hagaria. Maoro lau henia lasi klab ai idia vareai totona eiava klab amo lau negea raka-lasi taudia be murimuri dekenai idia naria, lau idia heatu henia totona. Unai neganai egu mauri lagani be 20 bona lau laloa ta ese lau ia halusia diba lasi. To momokani, egu kara lau biagua diba lasi​—⁠lau badu haraga, hekokoroku, sibona lau abia isi, bona lau laloauka.

BAIBEL ESE EGU MAURI IA HAIDAUA DALANA: Lauegu tamana ia hesiku lasi. Ia ese dala ia karaia Watchtower bona Awake! magasina be lau noho gabuna dekenai idia siaia totona. Unai magasin lau duahidia lasi, to egu daiutu dekenai lau haboudia. Bena nega ta lau be unai magasin haida lau duahia matamaia. Lau duahia atikol haida ese idia hahedinaraia politikol gavamani, moni ena hekwakwanai, bona tomadiho oreana be do idia ore, unai ese egu lalona ia hamarerea dainai, egu taihuna lau rini henia. Ia bona ena adavana be Iehova ena Witnes taudia. Lau idia nanadaia idia ida Baibel do lau stadilaia, bona unai lau abia dae.

Galatia 6:7 ena hakaua herevana ese egu lalona ia veria dainai, egu mauri lalonai gau haida lau haidaua. Lau dekenai ia vara gauna amo lau diba, hari dahaka lau karaia, hereva, o abia hidi, unai ese egu vaira nega maurina do ia haidaua. Isaia 1:18 ena hereva ese lau ia hagoadaia bada danu, ia gwau: “Lohiabada ma ia hereva, ia gwau, ‘Harihari umui mai, ita hereva hebou. Momokani, umui emui dika be bada, rara ia kakakaka momokani bamona, to lau ese umui do lau huria, vadaeni do umui goeva, sinou ia kurokuro bamona.’ ” Lauegu stadi ena matamana amo, unai siri ese lau ia durua bena lau diba egu mauri be mai anina bada bona dala ia noho Iehova lau tura henia totona.

Hua 6 lalonai, lau hekwarahi bada egu mauri lalonai gau haida lau haidaua totona. Guna lau lao henia gabudia bona hebamo dikadia lau dadaraia matamaia. Lauegu turadia lau hamaoroa lau be Baibel lau stadilaia bona idia dekenai lau dibaia gaudia lau herevalaia. Lau idia dadaraia matamaia bona idia gwauraia pris tauna. Lauegu taihuna ena heduru amo gaukara namona ma ta lau davaria.

Lauegu taihuna bona ena adavana ese idia lao henia Kingdom Hall ena hebou dekenai lau lao matamaia, herevana ena daudau be kilomita 30 bamona. Lauegu ruma badinai Kingdom Hall ta ia noho, to lau hemarai lau maragi negana amo lau idia dibaia taudia lau hedavari henia totona. Danu lau gari egu noho gabunai ruma-ta-ruma-ta dekenai lau haroro totona. Dahaka do ia vara bema lau davaria taudia be guna klab amo lau negea raka-lasi, o idia ta dekenai drag lau henia? To, egu treinini amo gau ta lau dibaia​—⁠idia auka eksasais be mai anina bada iseda mauri lalonai. Unai dainai lau haroro matamaia neganai, mai goada ida unai gaukara lau karaia.

To, egu hekwakwanai ma ta be, lau ese duahiduahi eiava stadi karana lau ura henia lasi. To, lau diba egu abidadama ia goada totona, namona be Baibel ena hereva momokani lau stadilaia goadagoada. Lau davaria gauna ma ta be, auri metauna abia isi karana hegeregerena, bema oi ura oi goada, namona be oi hekwarahi.

NAMO LAU DAVARIA DALANA: Lau mauri noho! Bona egu manoka gaudia lau sekea noho, unai dala amo sibona lau naria namonamo. To, hari lau bona egu adavana be emai ruma bese maurina ai moalelaia, ia be mai ena Keristani kara namodia. Iehova ena Witnes taudia huanai, lau abidadama henia diba tura namodia lau davaria. Lagani 5 gunanai egu tamana ia mase, to ia do mase lasi neganai, ia be mai moale ida ena natuna ia abia dae.

[Footnote]