Matamata Taudia E—⁠Edena Dala Do Umui Abia Hidi?

“Lau be boksini tauna bamona lau paisi goadagoada. . . . Hodahoda lau paisia lasi.”​—⁠1 KOR. 9:⁠26.

1, 2. Oi bada oi lao neganai, dahaka gaudia ese oi do idia durua emu mauri oi moalelaia totona?

OI DIBA lasi dalana ta dekenai oi raka lao bona gabu ia dibura neganai, dahaka ese oi do ia durua dala oi itaia namonamo totona? Mapu bona tosi. Mapu amo do oi diba oi be edena gabu ai oi noho bona oi lao henia gabuna oi davaria totona. Tosi ese dala do ia hadiaria unai amo do oi boio lasi. To bema oi lao henia gabuna oi diba lasi, vadaeni mapu bona tosi be anina lasi. Oi boio lasi totona, oi lao henia gabuna oi diba be namo.

² Oi bada oi lao negana danu be unai bamona. Oi dekenai be mapu namona ta bona tosi ia noho be namo. Baibel be mapu ta bamona, bona oi ia durua diba mauri dala maorona oi abia hidi totona. (Aon. 3:​5, 6) Emu lalomamina be tosi ta bamona. Bema oi hadibaia namonamo oi do ia durua dala maorona oi badinaia totona. (Roma 2:15) Emu mauri lalonai moale korikorina oi davaria totona, tahua gaudia oi atoa be namo.

3. Paulo be tahua gaudia ia herevalaia neganai, 1 Korinto 9:26 ai dahaka ia gwau?

³ Aposetolo Paulo ia gwau: “Lau heau maoromaoro, mai laloa tamona danu, lauegu heau dokona dekenai do lau ginidae totona. Lau be boksini tauna bamona lau paisi goadagoada, do lau uini totona. Hodahoda lau paisia lasi.” (1 Kor. 9:26) Unai siri amo Paulo ese ia hahedinaraia, tahua gaudia oi atoa bona oi gaukara goada unai gaudia oi hagugurua neganai, emu mauri do ia namo. Kahirakahira emu mauri lalonai mai anina bada abia hidi haida do oi karaia, hegeregere tomadiho, moni gaukara, headava bona natudia do oi havaraia eiava lasi. Momokani, abia hidi gaudia be idauidau dainai, nega haida do ia auka abia hidi maorona oi karaia totona. To nega bada ia do noho lalonai, Baibel ena hakaua herevadia hegeregerena abia hidi oi karaia neganai, unai ese oi do ia durua dala kererena oi dadaraia totona.​—⁠2 Tim. 4:​4, 5.

4, 5. (a) Dahaka ia vara diba bema tahua gaudia oi atoa lasi? (b) Dahaka dainai oi abia hidi gaudia ese Iehova ia hamoalea be namo?

⁴ Bema tahua gaudia oi atoa lasi, emu turadia bona tisa be oi do idia doria edia lalohadai hegeregerena, abia hidi oi karaia totona. Danu, ena be emu tahua gaudia oi diba, to haida ese edia lalohadai do idia gwauraia. Edia lalohadai idia gwauraia neganai, namona be sibona oi nanadaia, ‘Idia gwauraia tahua gaudia ese lau do idia durua egu Havaraia Tauna lau laloa totona, eiava lasi?’​—⁠Hadibaia Tauna 12:1 duahia.

⁵ Oi ura Dirava oi hamoalea dainai tahua gaudia haida oi atoa be namo. Dahaka dainai? Badina ita abia gau namodia ibounai be Iehova amo idia mai. (Iam. 1:17) Unai dainai, ia ita tanikiu henia bona hanamoa be gau badana. (Apok. 4:11) Emu tahua gaudia oi atoa neganai, namona be Iehova ena ura oi atoa guna, unai amo oi hahedinaraia ia oi laloa bada. Vadaeni, edena tahua gaudia do oi atoa bona oi hagugurua diba daladia mani ita itaia.

Edena Tahua Gaudia Do Oi Atoa?

6. Mai anina bada tahua gauna ta be dahaka, bona dahaka dainai?

⁶ Pura gunana ena stadi ese ia hahedinaraia, mai anina bada tahua gauna ta be Baibel oi stadilaia namonamo, unai amo do oi diba Baibel ena hereva be momokani eiava lasi. (Roma 12:2; 2 Kor. 13:⁠5) Reana emu turadia be evolusen lalohadaina eiava tomadiho koikoi ena hahediba herevadia idia abia dae, badina haida ese idia hamaoroa unai idia abia dae be maoro. To, namo lasi ma haida ese oi idia doria dainai, edia lalohadai oi abia dae sibona. Namona be oi laloatao, Iehova ia ura ia do oi hesiai henia mai emu lalona ibounai ida. (Mataio 22:​36, 37 duahia.) Iseda guba Tamana ia ura Baibel ese ia hamomokania gaudia sibona ita abia dae.​—⁠Heb. 11:⁠1.

7, 8. (a) Nega kwadogi lalonai oi hagugurua diba tahua gaudia be dahaka? (b) Unai tahua gaudia oi hagugurua neganai, dahaka namo do oi davaria?

⁷ Emu abidadama ia goada totona, nega kwadogi lalonai oi hagugurua diba tahua gaudia oi atoa be namo. Tahua gauna ta be dina ta ta ai Iehova oi guriguri henia. Gau tamona oi gwauraia loulou lasi totona, reana dina lalonai idia vara gaudia oi laloatao, o pepa ta dekenai oi torea, unai amo emu guriguri lalonai oi gwauraia diba. Oi davaria hahetoho sibona oi gwauraia lasi, to oi moalelaia gaudia oi gwauraia danu. (Fili. 4:⁠6) Tahua gauna iharuana be dina ta ta ai Baibel oi duahia. Bema dina ta ta ai rau hani oi duahia, lagani tamona lalonai Baibel ibounai oi duahia diba.a Salamo 1:​1, 2 ia gwau: “Inai bamona taudia be idia moale momokani: . . . Lohiabada ena Taravatu dekenai idia moale, bona Lohiabada ena Taravatu idia laloa, dina bona hanuaboi ibounai lalonai.”

⁸ Tahua gauna ihatoina be oi hegaegae kongrigeisen heboudia ai haere ta oi henia totona. Reana matamanai, buka eiava magasin amo emu haere oi duahia, o Baibel siri ta oi duahia diba. Bena gabeai, sibona emu hereva dalana amo oi haere diba. Haere oi henia karana be hegeregere Iehova dekenai harihari gauna oi henia bamona. (Heb. 13:15) Unai tahua gaudia oi hagugurua neganai, emu abidadama bona lalokau Iehova dekenai do ia goada. Unai murinai, oi hegeregere nega daudau lalonai oi hagugurua diba tahua gaudia oi atoa totona.

9. Bema oi be pablisa ta ai oi do lao lasi, dahaka tahua gaudia oi atoa diba?

⁹ Nega daudau lalonai oi hagugurua diba tahua gaudia be dahaka? Bema oi be Basileia ena sivarai namona oi do harorolaia lasi, reana unai be emu tahua gauna ai oi halaoa diba. Bapatiso lasi pablisa ai oi lao neganai, namona be hua ta ta ai oi haroro bona emu haroro daladia oi hanamoa. Danu, haroro gaukara ai Baibel gaukaralaia namonamo daladia oi dibaia be namo. Unai oi karaia neganai, haroro gaukara do oi moalelaia. Bena emu haroro horadia oi habadaia diba, eiava oi gaukara goada Baibel stadi ta oi davaria totona. Bema oi be bapatiso lasi pablisa ta, namona be emu mauri oi gwauhamatalaia bona bapatiso oi abia.

10, 11. Idia bapatiso vadaeni matamata taudia ese dahaka tahua gaudia idia atoa diba?

¹⁰ Bema oi bapatiso vadaeni inai tahua gaudia oi atoa diba. Hegeregere, kongrigeisen ma haida oi durua bona idia haroro henia momo lasi teritori ai umui haroro diba. Emu tauanina ia namo bona ia goada noho dainai, heduru o regula painia gaukara oi karaia diba. Painia taudia tausen momo ese oi do idia hamaoroa, ful-taim hesiai gaukara be dala hereadaena emu matamata neganai emu Havaraia Tauna oi hamoalea totona. Emu tama sina ida oi do noho lalonai, unai tahua gaudia oi hagugurua diba. Unai tahua gaudia oi hagugurua dainai, emu kongrigeisen be hahenamo do ia davaria danu.

¹¹ Tahua gaudia ma haida be kongrigeisen ma haida oi durua diba. Hegeregere, palani oi karaia diba pablisa be momo lasi gabudia o tanodia ai oi haroro totona. Eiava tano ma haida ai Kingdom Hall o brens opesi haginia gaukarana oi durua diba. Bona Betele o misinari gaukara oi karaia diba. To, unai tahua gaudia ibounai oi hagugurua totona, gau ginigunana be oi bapatiso be namo. Bema oi do bapatiso lasi, namona be oi gaukara goada bapatiso oi abia totona.

Bapatiso Oi Abia

12. Dahaka dainai matamata taudia haida idia bapatiso, to dahaka dainai unai be maoro lasi?

¹² Dahaka dainai ta be bapatiso ia abia? Haida idia laloa idia bapatiso neganai, unai ese idia ia gimaia do idia kara dika lasi totona. Eiava idia laloa edia turadia idia bapatiso dainai, idia danu idia bapatiso be namo. Bona matamata taudia ma haida idia bapatiso badina idia ura edia tama sina idia hamoalea. Namo lasi oi laloa emu bapatiso karana ese oi karaia kara dika do ia hunia. Namo lasi haida ese oi idia doria dainai bapatiso oi abia. Bapatiso oi abia totona, namona be Iehova ena Witnes tauna ta ai oi lao ena maduna oi lalopararalaia, bona oi hegeregere unai maduna do oi huaia.​—⁠Had. 5:​4, 5.

13. Dahaka dainai oi bapatiso be namo?

¹³ Bapatiso ita abia ena badina ta be Iesu ese ena murinai idia raka taudia ia hamaoroa ‘bese ibounai be diba tahua taudia do idia halaoa, bona do idia bapatisoa.’ Iesu danu be bapatiso ia abia. (Mataio 28:​19, 20; Mareko 1:9 duahia.) Danu, idia ura roho mauri taudia dekenai bapatiso be mai anina bada. Aposetolo Petero ese Noa be lagatoi ia karaia bona ia bona iena ruma bese be Abata amo idia roho mauri karana ia herevalaia murinai, ia gwau: “Unai ranu [abata] be bapatiso ena toana bamona, bona bapatiso ese harihari umui ia hamauria noho. . . . Iesu Keriso ese mase dekena amo ia toreisi lou dainai.” (1 Pet. 3:​20, 21) Namo lasi oi laloa bapatiso oi abia ena badina be gau dikana ta amo oi do ia gimaia. To, oi bapatiso badina be Iehova oi lalokau henia bona oi ura mai emu kudouna, lauma, lalona bona goada ibounai ida ia oi hesiai henia.​—⁠Mar. 12:​29, 30.

14. Dahaka dainai haida idia ura lasi idia bapatiso, to dahaka hagoadaia hereva idia noho?

¹⁴ Haida idia ura lasi idia bapatiso badina idia gari gabeai orea amo do idia atoa siri. Oi be unai bamona oi laloa, a? Unai bamona hemami oi abia be mai ena namo, badina unai ese ia hahedinaraia oi be Iehova ena Witnes tauna ta ai oi lao ena maduna oi laloa bada. To, badina ma ta dainai unai bamona oi laloa, a? Reana oi do abia dae lasi Dirava ena kara maoromaoro taravatudia badinaia karana be mauri dalana hereadaena. Bema unai bamona oi laloa, namona be Baibel ena hakaua herevadia idia badinaia lasi taudia ese idia davaria hekwakwanai oi laloa, badina unai ese oi do ia durua abia hidi maorona oi karaia totona. Eiava, oi be Dirava ena taravatu oi laloa bada, to reana oi laloa oi hegeregere lasi unai taravatu ibounai oi badinaia totona. Unai bamona oi laloa be kerere lasi; unai ese ia hahedinaraia oi be manau tauna. Danu, Baibel ia gwau goevadae lasi taudia edia kudouna be ia koikoi diba. (Ier. 17:⁠9) To, oi kwalimu diba bema hanaihanai oi be Dirava ena ‘taravatu oi kamonai henia.’ (Salamo 119:9 duahia.) Herevana, oi do bapatiso lasi ena badina be dahaka, to namona be unai gaudia oi hamaoromaoroa.b

15, 16. Edena dala ai oi diba oi be hegeregere bapatiso oi abia totona?

¹⁵ To, edena bamona do oi diba bema oi be hegeregere bapatiso oi abia totona? Dala ta be sibona oi nanadaia: ‘Baibel ena hahediba hereva badadia be ma haida dekenai lau herevalaia diba, a? Haroro gaukara lau lao ena be nega haida egu tama sina idia haroro lasi, a? Lau hekwarahi kongrigeisen hebou ibounai lau lao totona, a? Lau be egu turadia edia laloani karadia haida lau dadaraia vadaeni, a? Bema egu tama sina bona turadia be Iehova idia rakatania, lau be Iehova do lau hesiai henia noho, a? Egu guriguri lalonai Iehova lau hamaoroa egu hetura karana ia ida lau laloa bada, a? Bona Iehova dekenai lau gwauhamata vadaeni iena ura do lau karaia totona, a?

¹⁶ Bapatiso karana be mai anina bada ta ena mauri lalonai. Oi hegeregere bapatiso oi abia totona, a? Namo lasi oi laloa tok namodia oi henia o hebou ai haere namodia oi henia dainai, oi be hegeregere. To, Baibel ena hakaua herevadia oi badinaia bona abia hidi oi karaia neganai, unai ese ia hahedinaraia oi be lo tauna ai oi lao. (Heberu 5:14 duahia.) Bema oi laloa oi be hegeregere bapatiso oi abia totona, unai be hahenamo badana. Unai ese ia hamomokania oi ura mai emu kudouna ibounai ida Iehova oi hesiai henia bona emu mauri lalonai iena ura oi atoa guna.

17. Bapatiso murinai oi davaria hahetoho oi hanaia totona, daidia ese oi idia durua diba?

¹⁷ Oi bapatiso murinai, do oi mamia oi ura Dirava oi hesiai henia goadagoada. To, oiemu abidadama bona goada do idia tohoa gaudia do oi davaria danu. (2 Tim. 3:12) Namo lasi oi laloa oi sibona emu goada amo unai gaudia oi hanaia diba. Emu tama sina amo heduru oi tahua be namo. Kongrigeisen ai idia noho lo Keristani taudia edia heduru oi tahua danu. Oi idia hagoadaia turadia oi bamoa be namo. Laloaboio lasi, Iehova be oi ia laloa bada bona oi dekenai goada do ia henia unai hahetoho idauidau oi hanaia totona.​—⁠1 Pet. 5:​6, 7.

Edena Dala ai Emu Tahua Gaudia Oi Hagugurua Diba?

18, 19. Mai anina bada gaudia atoa guna karana ena namo be dahaka?

¹⁸ Emu ura gaudia oi hagugurua totona oi davaria nega be lasi, a? Bema oibe, mai anina bada gaudia oi atoa guna be namo. Mani inai haheitalai oi laloa: Baketi ta lalonai nadi haida oi udaia bena miri be nadi latanai oi bubua. Emu baketi be nadi bona miri ese idia hahonua. Unai murinai, miri bona nadi be baketi amo oi kokia. Bena baketi be miri amo oi hahonua guna, bona nadi haida be miri latanai oi atoa. Nadi ibounai oi udaia diba lasi, ani? Unai ia vara badina baketi lalonai miri oi udaia guna.

¹⁹ Unai haheitalai bamona, reana oi hekwarahi emu nega oi gaukaralaia namonamo totona, ani? Bema moale karadia oi atoa guna, do oi davaria emu mauri lalonai nega be lasi Dirava ena hesiai gaukara oi karaia totona. To, bema Baibel ena sisiba oi badinaia bona “mai anina bada gaudia” oi atoa guna, emu nega be hegeregere Iehova oi hesiai henia bona moale karadia oi karaia totona.​—⁠Fili. 1:​10, NW.

20. Emu tahua gaudia oi hagugurua totona oi daradara o lalohekwarahi neganai, dahaka oi karaia be namo?

²⁰ Emu tahua gaudia haida oi ura hagugurua neganai, reana do oi daradara bona lalohekwarahi. Hegeregere, bapatiso oi ura abia neganai, unai bamona hemami oi abia diba. Unai ia vara neganai, “oiemu laloa hekwarahi be Lohiabada dekenai do oi henia, bona ia ese idia dekena amo oi do ia durua.” (Sal. 55:22) Hari, nega ia noho tanobada hegegemadai idia karaia haroro bona hadibaia gaukarana oi karaia totona. (Kara 1:⁠8) To dala be rua: Oi helai bona ma haida be haroro gaukara idia karaia oi raraia sibona, eiava oi danu be unai gaukara lalonai oi vareai. Namona be emu diba oi gaukaralaia Iehova oi hesiai henia bona ena Basileia ena gaukara idauidau oi durua. ‘Emu eregabe neganai, oi ia karaia Diravana oi laloa’ dainai, do oi moale.​—⁠Had. 12:⁠1.

[Footnotes]

Edena Bamona Do Oi Haere?

• Dahaka dainai tahua gaudia oi atoa be namo?

• Oi hagugurua diba tahua gaudia be dahaka?

• Bapatiso oi abia totona dahaka oi karaia be namo?

• Mai anina bada gaudia atoa guna karana ena namo be dahaka?

[Picture on page 13]

Dina ta ta ai Baibel oi duahia be emu tahua gauna ta, a?

[Picture on page 15]

Dahaka ese oi do ia durua bapatiso oi abia totona?

[Picture on page 16]

Inai haheitalai amo dahaka oi dibaia?