Lauma Helaga ese Ia Hakaua King be Oi Do Ia Hanamoa!

“Lohiabada ena Lauma ese, ia dekenai do ia kamokau.”​—ISA. 11:2.

1. Tanobada ena hekwakwanai dainai haida be dahaka idia gwau?

SAIENS tauna Stephen Hawking ia gwau: “Tanobada ai politikol, taunimanima edia noho dalana, bona hodahoda o tano be idia dika idia lao dainai, edena dala ai taunimanima be ma lagani 100 idia mauri diba?” Niuspepa ta, New Statesman ia gwau: “Ita be ogogami ita haorea lasi bona tanobada ai maino ita havaraia lasi. To, toana be ogogami ia bada ia lao bona tuari momo idia vara. Toana be hekwakwanai haorea daladia idauidau ita tohoa vadaeni, hegeregere gavamani idauidau bona bisinesi dala matamatadia; taunimanima idia tuari lasi totona League of Nations ita haginia, ipidi bona bomu momo karaia karana ia koua totona. Bona maino havaraia totona tano haida ita tuari henidia, to unai ese namo ta ia havaraia lasi.”

2. Edena dala ai Iehova be ena lohia siahuna ena maoro do ia hamomokania?

² Iehova ena hesiai taudia be unai gaudia dekenai idia hoa lasi. Baibel ese ita ia hadibaia taunimanima be sibodia edia mauri idia biagua diba lasi. (Ier. 10:23) Iehova sibona be iseda Siahu Ibounai Diravana. Unai dainai, ia be mai ena maoro taravatu ia atoa, ita ia hadibaia edena gaudia be mai anina bada, bona ita ia durua unai gaudia ita hagugurua totona. Kahirakahira ia ese inai tanobada ena gavamani idauidau do ia haoredia. Unai sibona lasi, to ia ese iena lohia siahuna idia dadaraia taudia do ia hadikaia ore, badina idia ese ma haida idia hakaua kerere idia kara dika bona “inai tanobada ena dirava,” Satani Diabolo idia hesiai henia.​—2 Kor. 4:4.

3. Isaia ese Mesia be edena bamona ia perovetalaia?

³ Paradaiso ai, Mesia Basileiana amo Iehova ese taunimanima dekenai iena lalokau do ia hahedinaraia. (Dan. 7:​13, 14) Isaia ese Basileia ena King ia perovetalaia ia gwau: “Iese ena bese taudia, be au ena badina, idia utua diho gauna bamona. Inai badina dekena amo, herahera matamata do ia tubu, bona Iese ena ramu dekena amo, Rigi ta do ia tubu, King matamatana ta unai. Lohiabada ena Lauma ese, ia dekenai do ia kamokau, bona inai bamona do ia hanamoa: Aonega bona laloa kehoa ena Lauma do ia henia. Sisiba namona henia dalana, bona siahu ena Lauma do ia henia, Diba maorona, bona Lohiabada gari henia kara, ena Lauma be do ia henia.” (Isa. 11:​1, 2) Edena dala ai Iehova ese Iesu Keriso​—‘Iese ena ramu dekena amo ia tubu Rigina’​—dekenai siahu ia henia taunimanima ia lohiaia totona? Iena lohia dalana henunai taunimanima be dahaka hahenamo do idia abia? Dahaka ita karaia be namo unai hahenamo ita abia totona?

Iesu be mai Ena Siahu Ia Lohia Totona

4-6. Dahaka ese Iesu ia durua King, Hahelagaia Tauna bona Hahemaoro Tauna ai ia lao totona?

⁴ Iehova ia ura aonega bona hebogahisi bada King, Hahelagaia Tauna bona Hahemaoro Tauna ta ese ena taunimanima ia lohiaia bona ia durudia goevadae taudia ai do idia lao. Unai dainai, ia ese ena lauma helaga amo Iesu Keriso ia horoa unai mai anina bada gaukara ia karaia totona. Iesu ese unai gaukara idauidau ia karaia namonamo diba ena badina haida mani ita itaia.

⁵ Iesu be Dirava ia diba namonamo. Iesu be lagani bilioni momo ena Tamana ida ia noho, unai dainai ena kara bona lalohadai ia dibaia namonamo. Baibel ia gwau ia be “Dirava ena toana hegeregerena.” (Kol. 1:15) Iesu ia gwau: “Lau ia itaia tauna ese egu Tamana danu ia itaia.”​—Ioa. 14:9.

⁶ Guba bona tanobada ai idia noho gaudia, bona taunimanima edia vara dalana ia diba namonamo. Kolose 1:​16, 17 ia gwau: “Ia dekena amo Dirava ese gau ibounai ia karaia, guba dekenai bona tanobada dekenai. Ita itaia diba gaudia bona ita itaia diba lasi gaudia, . . . be Dirava ese ia karaia Keriso dekena amo. . . . Gau ibounai idia do noho lasi neganai Keriso be ia noho. Iena siahu dekena amo, gau ibounai be edia gabu edia gabu dekenai idia noho, ia ese idia ia naria noho.” Unai be hoa gauna! Iehova be guba bona tanobada ia karaia neganai, Iesu be iena “gaukara karaia tauna” bona ena Tamana ia durua. Unai dainai, guba bona tanobada ai idia noho gau maragimaragidia amo ela bona taunimanima edia harana ia gaukara dalana ia diba goevagoeva. Momokani, Baibel ia gwau Keriso be aonega!​—Aon. 8:​12, 22, 30, 31.

7, 8. Edena dala ai Dirava ese ena lauma amo Iesu ena haroro gaukara ia durua?

⁷ Dirava ena lauma helaga amo Iesu ia horoa. Iesu ia gwau: “Lohiabada ena Lauma ese lau ia hahonua. Ia ese lau ia abia hidi vadaeni, Sivarai Namona ogogami taudia dekenai do lau haroro henia. Lau ia siaia vadaeni, idia guia taudia do lau ruhaia totona, bona matakepulu taudia edia matana kehoa hereva do lau gwauraia, bona mai edia bero taudia dekenai mauri do lau henia. Ma danu Lohiabada ese iena taunimanima do ia hamauria, ena nega do lau harorolaia.” (Luka 4:​18, 19) Iesu ia bapatiso neganai, lauma helaga ena heduru amo guba dekenai ena Tamana ida lagani milioni momo ia noho neganai idia karaia gaudia ia laloatao, bona Mesia ai do ia lao bona tanobada ai do ia karaia gaudia ia lalopararalaia.​—Isaia 42:1; Luka 3:​21, 22; Ioane 12:50 duahia.

⁸ Iesu be lauma helaga ese ia hasiahua dainai, ena tauanina bona lalona be goevadae, unai dainai ia be Hadibaia Tauna hereadaena. Iena hereva idia kamonai taudia be “iena hadibaia hereva dekenai idia hoa bada.” (Mat. 7:28) Ma danu, Iesu ese ia hahedinaraia taunimanima be idia goevadae lasi, kara dika idia karaia, bona Dirava idia diba lasi dainai hekwakwanai idia davaria. Danu, taunimanima edia lalona ia diba dainai idia laloa gaudia hegeregerena ia kara henidia.​—Mat. 9:4; Ioa. 1:47.

9. Edena dala ai Iesu ia karaia gaudia ese oi ia durua iena lohia dalana oi abidadama henia totona?

⁹ Iesu be tanobada ai taunimanima ta bamona ia noho. Iesu be taunimanima ai ia lao bona goevadae lasi taudia ida ia noho bona edia hemami ia diba dainai, ia be hegeregere King ai ia lao totona. Aposetolo Paulo ia gwau: “Iesu be kara ibounai dekenai, iena tadina taudia hegeregerena momokani ia lao. Badina unai dala dekena amo Iesu be Hahelagaia Tauna Badana do ia lao, bona Dirava ena hesiai gaukara, mai momokani bona mai bogahisihisi danu do ia karaia. Bona unai dala dekena amo danu, taunimanima edia kara dika be Dirava ese ia gwauatao diba. Iesu ese dibagani bona hisihisi ena mamina ia abia dainai, ia ese taunimanima ia durua diba, edia dibagani neganai.” (Heb. 2:​17, 18) Iesu be “dibagani bona hisihisi edia mamina ia abia dainai,” hahetoho idia davaria taudia edia hemami ia diba bona ia ura ia durudia. Ena haroro gaukara lalonai hebogahisi ia hahedinaraia. Gorere taudia, aena bona imana dika taudia, lalohisihisi taudia bona natu maragidia be mai gari lasi ida Iesu idia hereva henia. (Mar. 5:​22-24, 38-42; 10:​14-16) Manau taudia bona idia ura Dirava do idia diba taudia be Iesu dekenai idia lao. To, hekokoroku taudia bona Dirava idia lalokau henia lasi taudia be Iesu idia ura henia lasi, ia idia inai henia, bona idia dagedage henia.​—Ioa. 5:​40-42; 11:​47-53.

10. Edena dala ai Iesu ese ita totona ena lalokau ia hahedinaraia?

¹⁰ Iesu ena mauri be ita totona ia bouboulaia. Iesu be Lohia tauna namona badina ia sibona ese ena mauri be ita totona ia bouboulaia. (Salamo 40:​6-10 duahia.) Ia gwau: “Lalokau namo herea momokani be inai, tau ta ese ena mauri do ia atoa diho, iena turana totona.” (Ioa. 15:13) Oibe, Iesu be tanobada ena lohia taudia bamona lasi, idia be taga maurina idia noholaia, to idia lohiaia taudia idia laloa bada lasi. To, Iesu be sibona ena mauri ia henia taunimanima momo ia hamauria totona.​—Mat. 20:28.

Boubou Gauna Ena Hahenamo

11. Dahaka dainai Iesu ita abidadama henia diba?

¹¹ Unai dainai, ita moale badina Iehova ese Hahelaga Tauna Badana Iesu ia abia hidi, ena boubou gauna amo ita dekenai hahenamo idauidau ia henia totona! Tanobada ai ia noho neganai, ia karaia hoa karadia ese ena Lagani 1,000 Lohia Negana ai do ia karaia gaudia idia hahedinaraia. Unai gaudia ita moalelaia diba bema Dirava ita badinaia ela bona dokona. Ia ese gorere taudia, aena bona imana dika taudia ia hanamodia, mase taudia ia hatorea isi, hutuma ia ubua bona lai bona hurehure bada ia koua. (Mat. 8:26; 14:​14-21; Luka 7:​14, 15) Unai hoa karadia ia karaia badina taunimanima ia hebogahisi bona ia lalokau henidia. Lepera tauna ta ese Iesu ia noia do ia hanamoa neganai, Iesu ia gwau: “Lau ura.” (Mar. 1:​40, 41) Iesu ena Lagani 1,000 Lohia Negana ai, tanobada hegegemadai unai bamona lalokau do ia hahedinaraia.

12. Edena dala ai Isaia 11:9 ena peroveta herevana do ia guguru?

¹² Iesu ese lagani 2,000 gunanai, taunimanima dekenai Dirava ena hereva hadibaia gaukarana ia hamatamaia, bona Lagani 1,000 lalonai ia ida do idia lohia taudia be unai gaukara do idia gunalaia noho. Unai nega ai Isaia 11:9 ena hereva do ia guguru, ia gwau: “Tanobada ibounai, be Lohiabada ena diba maoro dekena amo do ia honu momokani, davara be ranu dekenai ia honu bamona.” Unai hadibaia gaukarana lalonai tanobada bona animal idauidau naria dalana do ita dibaia; unai gaukara be guna Dirava ese Adamu dekenai ia henia. Lagani 1,000 idia ore murinai, Dirava ena palani Genese 1:28 dekenai be do ia guguru, bona Iesu ena mauri davalaia boubouna ena gaukara ibounai be do ia guguru danu.

Hahemaoro Tauna ai Do Ia Lao

13. Edena dala ai Iesu ese ia hahedinaraia ia be kara maoromaoro tauna?

¹³ “Dirava ese inai Tau [Keriso] ia abia hidi vadaeni, mauri taudia bona mase taudia edia kota biaguna gaukara do ia karaia totona.” (Kara 10:42) Ita moale badina Iesu be goevadae tauna dainai, mai maoromaoro bona momokani ida taunimanima do ia lohiaia! (Isa. 11:5) Iesu ia hahedinaraia ia be mataganigani, hereva koikoi taudia bona kara dika taudia ia inai henidia bona hebogahisi lasi taudia ia badu henidia. (Mat. 23:​1-8, 25-28; Mar. 3:5) Ma danu, Iesu be taunimanima ese idia koia diba lasi “badina taunimanima edia laloa, be ia diba momokani vadaeni.”​—Ioa. 2:25.

14. Hari inai negai, edena dala ai Iesu ese ena lalokau bona hahemaoro maoromaoro karana ia hahedinaraia, bona edena henanadai ita laloa be namo?

¹⁴ Iesu ese iena lalokau bona hahemaoro maoromaoro karana ia hahedinaraia noho, badina tanobada hegegemadai idia karaia haroro bona hahediba gaukarana ia gunalaia noho. Tau ta, gavamani ta, eiava lauma dikana ta ese Dirava ena gaukara ia koua diba lasi. Unai dainai, ita gwau diba Aramagedono ia ore neganai, Dirava ese ena hahemaoro goevagoeva ia hahedinaraia unai. (Isaia 11:4; Mataio 16:27 duahia.) Sibona oi nanadaia: Haroro gaukara ai Iesu ena kara lau hahedinaraia, a? Ena be lau gorere o gau haida dainai hora momo lau haroro lasi, to mai egu goada ibounai ida Iehova lau hesiai henia, a?

15. Dahaka ese ita do ia durua mai iseda lalona ibounai ida Dirava ita hesiai henia totona?

¹⁵ Bema ita laloatao haroro gaukara be Iehova ena gaukara, unai ese ita do ia durua mai eda lalona ibounai ida eda haroro gaukara ita karaia totona. Unai gaukara be Iehova ese ita ia henia, iena Natuna ese ia gunalaia, bona unai gaukara idia karaia taudia be ena lauma helaga amo ia durudia. Oi be Dirava bona ena lauma helaga ese ia hakaua Natuna ida oi gaukara hebou ena hahenamo oi laloa bada, a? Tano 236 ai, Iehova ese taunimanima 7 milioni mai kahana ia durua Basileia ena sivarai namona idia harorolaia totona, ena be idia momo be “sikuli bada lasi bona aonega bada lasi taudia.”​—Kara 4:13.

Keriso Ena Hahenamo Abia Totona, Gaukara Goada!

16. Genese 22:18 be dahaka hahenamo ia herevalaia?

¹⁶ Iehova ese Aberahamo ia hamaoroa: “Tanobada besedia ibounai ese lau dekenai do idia noinoi, idia do lau hanamoa, oiemu tubuna lau hanamodia vadaeni hegeregerena. Inai bamona do idia noinoi, badina be oi ese lauegu oda oi kamonai henia dainai.” (Gen. 22:18) Unai siri ese ia hahedinaraia mai moale ida Iehova bona iena Natuna idia hesiai henia taudia be Mesia Garana amo hahenamo do idia davaria. Hari inai negai unai taudia be unai hahenamo idia laloa bona Dirava ena hesiai gaukara idia karaia goadagoada.

17, 18. Deutoronomi 28:2 ai Iehova ena gwauhamata be dahaka, bona ita dekenai ena anina be dahaka?

¹⁷ Dirava be Aberahamo ena natudia, Israela taudia dekenai ia gwau: “Io, bema Lohiabada, emui Dirava umui kamonai henia neganai, inai hanamoa ibounai be emui latanai do idia diho bona umui dekenai do ia kamokau.” (Deu. 28:​2, BHğ) Hari inai negai Iehova ena hesiai taudia dekenai unai bamona ia vara diba. Bema oi ura Iehova ena hahenamo oi abia, namona be iena hereva “oi kamonai.” Bena iena hahenamo be ‘oiemu latanai do ia diho bona oi dekenai do ia kamokau.’ To, edena dala ai “kamonai” karana ita hahedinaraia diba?

¹⁸ Kamonai karana ita hahedinaraia dalana ta be, Baibel ese ia gwauraia gaudia ita badinaia bona Iehova ena heduru herevadia ita laloa bada. (Mat. 24:45) Danu, namona be Dirava bona ena Natuna ita kamonai henidia. Iesu ia gwau: “Guba Basileia do idia vareai taudia be daika? ‘Lohiabada e, Lohiabada e,’ idia gwau taudia ibounai, a? Lasi momokani. Idia gwau, ‘Lohiabada e, Lohiabada e,’ taudia momo be Guba Basileia lalonai do idia raka vareai lasi. To lauegu Tamana, guba dekenai ia noho ena ura idia karaia taudia, idia sibona do idia vareai.” (Mat. 7:21) Danu, Keristani kongrigeisen ai Dirava ese ia abia hidi “harihari gaudia,” elda taudia unai, ita kamonai henidia bona matauraidia be namo.​—Efe. 4:8.

19. Hahenamo ita abia totona dahaka ita karaia be namo?

¹⁹ Unai “harihari gaudia” o elda taudia haida be Hakaua Oreana ena memba taudia, bona idia be Keristani kongrigeisen ibounai idia gunalaia noho. (Kara 15:​2, 6) Hari inai negai, Keriso ena horoa tadikaka ita kara henia dalana be mai anina bada, badina hisihisi badana ia vara neganai Iehova ese iseda kara hegeregerena ita do ia hahemaoro henia. (Mat. 25:​34-40) Unai dainai, hahenamo ita abia dalana ma ta be Dirava ese ia horoa taudia ita durudia.

20. (a) Elda taudia edia gaukara badana be dahaka? (b) Edena dala ai ita hahedinaraia horoa taudia edia gaukara ita laloa bada?

²⁰ Unai “harihari gaudia,” be Brens Komiti taudia, loaloa naria taudia, bona kongrigeisen elda taudia, idia ibounai be lauma helaga ese ia abia hidi. (Kara 20:28) Unai tadikaka edia gaukara badana be Dirava ena taunimanima do idia hagoadaia “unai dekena amo ita ibounai iseda abidadama do ia tamona, bona iseda diba Dirava ena Natuna dekenai danu be tamona. Bona ita be tau badadia do ita halaoa, oibe, Keriso ena bada hegeregerena danu do ita abia gwauraia.” (Efe. 4:13) Momokani, idia be goevade lasi taudia ita bamona. To edia hakaua dalana ita badinaia neganai hahenamo do ita abia.​—Heb. 13:​7, 17.

21. Dahaka dainai Dirava ena Natuna ita kamonai henia be gau badana?

²¹ Kahirakahira Keriso ese Satani ena tanobada dikana do ia haorea. Unai ia vara neganai, Iesu ese ita ta ta do ia hahemaoro henia, badina Dirava ese ia dekenai maoro ia henia “hutuma bada” be “mauri ranuna, ia lohilohi gauna, dekenai do ia hakaudia lao.” (Apok. 7:​9, 16, 17) Unai dainai, namona be mai iseda lalona ibounai ida Iehova ena lauma helaga ese ia hakaua King ita matauraia.

Inai Baibel Siridia amo Dahaka Oi Dibaia . . .

• Isaia 11:​1-5?

• Mareko 1:​40, 41?

• Kara 10:42?

• Genese 22:18?

[Picture on page 17]

Iesu ese Iairo ena natuna ia hatorea isi lou karana ese iena hebogahisi ia hahedinaraia

[Picture on page 18]

Iesu be tanobada hegegemadai ita karaia haroro gaukarana ia gunalaia noho