Iehova Dekenai Ane Abia!
“Ane dekenai, Lohiabada do lau hanamoa egu mauri dinadia ibounai lalonai.”—SAL. 146:2.
1. Dahaka ese Davida ena lalona ia veria ane haida ia torea totona?
DAVIDA be mero maragi neganai, hora momo lalodiai Betelehema ai iena tamana ena mamoe ia naridia. Mamoe ia naria lalonai, Davida be Iehova ese ia karaia guba hisiudia, “uda boroma ibounai” bona “ataiai manudia” ia itaia bona ia laloa dobu. Gau ibounai ia Havaria Tauna ese ia karaia gaudia ia itaia dainai, unai ese ena kudouna ia hamarerea Dirava hanamoa anedia ia torea totona. Davida ese ia torea anedia be Salamo bukana ai idia noho.a—Salamo 8:3, 4, 7-9 duahia.
2. (a) Edena dala ai miusiki ese ta ena lalona ia hanamoa diba? Haheitalai ta gwauraia. (b) Salamo 34:7, 8 bona Salamo 139:2-8 amo Dirava bona Davida edia hetura karana dekenai dahaka ita dibaia?
2 Mamoe ia naria negadia ai, Davida be ane ia toredia bona gita gadaralaia dalana ia dibaia. Miusiki ia gadaralaia namonamo dainai, King Saulo ese ia boiria ia totona gita do ia gadaralaia. (Aon. 22:29) Hari inai negai taunimanima be miusiki namona ta idia kamonai neganai idia moale hegeregerena, Davida ese ena gita ia gadaralaia neganai, “Saulo ena lalona ia namo lou.” (1 Sam. 16:23) Idaunega amo ema bona hari, Dirava ia gari henia tauna Davida ese ia torea anedia be mai anina bada. Mani inai oi laloa: Lagani 3,000 idia hanaia vadaeni, to Davida ese ia torea anedia be tanobada hegegemadai taunimanima milioni momo ese Salamo bukana ai idia duahia loulou bona edia lalona ia hagoadaia.—2 Siv. 7:6; Salamo 34:7, 8; 139:2-8 duahia; Amo. 6:5.
Tomadiho Momokani Lalonai Ane be mai Anina Bada
3, 4. Davida ese palai dubuna ai Levi taudia haida dekenai dahaka gaukara ia henia?
3 Davida be ane ia torea bona gita gadaralaia namonamo tauna, bona ena diba ia gaukaralaia Iehova ia hanamoa totona. Davida be Israela ena pavapava ai ia lao murinai, ane abia karana be palai dubuna ena gaukara ta ai ia halaoa. Levi taudia ibounai be 38,000, to idia amo 4,000 be palai dubuna ai miusiki bona ane amo Iehova idia hanamoa. Unai tatau 4,000 huanai, 288 be “Lohiabada ena ane abia dekenai idia manada vadaeni” bona idia ese ma haida idia hadibaia.—1 Siv. 23:3, 5; 25:7.
4 Levi taudia ese idia gadaralaia miusiki bona idia abia ane momo be Davida ese ia torea. Unai ane idia abia neganai, Israela taudia edia kudouna ia hamarerea bona idia moalelaia bada. Gabeai, taravatu mauana be Ierusalema ai idia abia lao neganai, “Davida ese danu Levi lohia taudia ia oda henia, edia varavara haida do idia abia hidi, ane do idia abia, bona miusiki gaudia idauidau, gita maragidia bona badadia, bona auri laboralabora botaia gaudia do idia gadaralaia dekena amo moale bada ena regena do idia karaia.”—1 Siv. 15:16.
5, 6. (a) Davida ena negai, dahaka dainai ane bona miusiki idia laloa bada? (b) Edena dala ai ita diba guna Israela besena ena tomadiho lalonai, ane bona miusiki be mai anina bada?
5 Dahaka dainai Davida ena negai miusiki bona ane abia karana idia laloa bada? King Davida be ane torea tauna bona miusiki gadaralaia namonamo tauna dainai, a? Lasi, to badina ma ta ia noho. Lagani handred haida murinai, King Hesekaia ese dubu helaga ai gaukara ia hamatamaia lou neganai, unai ia hedinarai. Sivarai Iharuana 29:25 ia gwau: “Hesekaia ese Levi taudia be Lohiabada ena Dubu dekenai ia atodia, mai edia botaia auridia, bona gita badadia bona maragidia danu, Davida, bona king ena peroveta tauna Gadi, bona peroveta tauna Natana edia oda hegeregerena. Badina guna unai oda hereva be Lohiabada dekena amo ia mai, iena peroveta taudia ese idia gwauraia.”
6 Oibe, Iehova ese iena peroveta taudia amo ia idia tomadiho henia taudia ia oda henidia ane amo ia do idia hanamoa. Ane idia abia bona miusiki gaudia idauidau idia gadaralaia hahelaga taudia haida be dubu helaga ena gaukara ma haida idia karaia lasi. Unai amo edia nega bada be ane bona miusiki idia torea, bona idia tohoa loulou.—1 Siv. 9:33.
7, 8. Basileia anedia ita abia neganai, dahaka be mai anina bada?
7 Reana do oi gwau: “Lau be hegeregere lasi dubu helaga ai ane diba momo taudia ida ane lau abia totona!” To, Levi taudia ibounai be ane abia bona miusiki gadaralaia karana idia diba namonamo lasi. Sivarai Ginigunana 25:8 ai ia hahedinaraia haida be ane abia bona miusiki gadaralaia karana idia do dibaia noho. Bona mani inai oi laloa: Reana, Israela taudia ma haida huanai ane abia bona miusiki gadaralaia karana idia diba namonamo taudia idia noho, to Iehova be Levi taudia sibona ia abia hidi unai idia karaia totona. Namona be ita laloatao, herevana Levi taudia be ane abia dalana idia diba momo o lasi, to idia be mai edia kudouna ibounai ida ane amo Dirava idia hanamoa!
8 Davida be ane abia karana ia ura henia bada bona miusiki ia gadaralaia namonamo tauna. To, Dirava be ta ena diba sibona ia laloa bada, a? Salamo 33:3 ai Davida ia gwau: “Gita do umui gadaralaia namonamo, miusiki namo herea do umui karaia, bona ane do umui abia mai goada danu.” Mai anina bada gauna be inai: Namona be mai iseda lalona bona goada ibounai ida ane amo Iehova ita hanamoa.
Davida Ena Nega Murinai Ane be mai Anina Bada
9. Bema oi be dubu helaga idia hahelagaia negana ai oi noho, dahaka do oi itaia bona kamonai?
9 Solomona ena lohia neganai miusiki bona ane abia karana be tomadiho momokani ena kahana badana ta. Dubu helaga idia hahelagaia neganai, miusiki gaudia idauidau bona kibi 120 idia gadaralaia. (2 Sivarai 5:12 duahia.) Baibel ia gwau: “Inai kibi hiriria taudia bona ane abia taudia ese Lohiabada idia hanamoa hebou mai regena namona, gado tamona bamona. . . . ‘Lohiabada do ita hanamoa bada, badina iena kara be namo herea ita dekenai, bona iena lalokau be ia noho hanaihanai.’ ” Ane idia abia ore murinai, maoromaoro “Lohiabada ena Dubu Helaga be ori ta ese ia hahonua,” unai ese ia hamomokania Iehova be Dubu Helaga ia abia dae. Unai miusiki bona ane idia kamonai taudia be reana edia kudouna ia hamarerea bada.—2 Siv. 5:13.
10, 11. Dahaka ese ia hahedinaraia Keristani ginigunadia ese edia tomadiho lalonai ane bona miusiki idia gaukaralaia?
10 Keristani taudia ginigunadia ese edia tomadiho lalonai ane idia abia bona miusiki idia gadaralaia danu. Idia be dubu helaga dekenai idia hebou lasi, to haida edia ruma dekenai hebou idia karaia. Ena be dagedage bona hekwakwanai ma haida idia davaria, to idia ese ane amo Iehova idia hanamoa.
11 Aposetolo Paulo ese Kolose tadikaka ia hagoadaia ia gwau: “Umui ese Keristani varavara taudia ibounai do umui hadibaia . . . Salamo bona guriguri ane, bona lauma anedia do umui abia, Dirava do umui hanamoa totona.” (Kol. 3:16) Paulo bona Sila be dibura ruma ai idia noho neganai, “idia guriguri noho bona ane dekenai Dirava idia hanamoa,” ena be idia dekenai ane buka be lasi. (Kara 16:25) Bema dibura ruma dekenai oi noho, iseda Basileia anedia hida oi laloatao diba?
12. Edena dala ai ita hahedinaraia Basileia anedia ita laloa bada?
12 Iseda tomadiho lalonai miusiki be mai anina bada dainai, namona be sibona ita nanadaia: ‘Lau ese hebou dekenai ane abia karana lau laloa bada, a? Lau hekwarahi hebou badadia bona maragidia ai nega korikori ai lau ginidae, unai amo mai egu lalona ibounai ida egu tadikaka taihu ida Iehova hanamoa anedia lau abia, a? Egu natudia lau hadibaia Tiokratik Haroro Sikuli bona Pablik Tok ena koua anena idia abia negana ai, idia loaloa kava lasi totona, a? Ane abia karana be iseda tomadiho ena kahana badana ta. Oibe, ena be ane ita abia namonamo diba o lasi, to namona be mai iseda lalotamona ida ane amo Iehova ita hanamoa.—Deuteronomi 16:17 hahegeregerea.
Ane Matamatadia
13, 14. Dahaka dainai kongrigeisen heboudia ai mai iseda lalona ibounai ida ane ita abia be mai anina bada? Haheitalai gwauraia.
13 Lagani 100 mai kahana gunanai, Zion’s Watch Tower ese Basileia anedia ita abia ena badina ta ia hahedinaraia. Ia gwau: “Dirava ena taunimanima dekenai, ane abia karana be hereva momokani dibaia dalana ta.” Unai ane edia hereva momo be Baibel siridia amo idia abia, unai dainai Basileia anedia edia hereva ita dibaia neganai, Baibel ena hereva momokani do ita laloatao diba. Nega momo iseda hebou dekenai nega ginigunana idia mai taudia be Basileia anedia idia kamonai neganai, edia kudouna ia hamarerea.
14 Tadikaka C.T. Russell ia laloa Dirava ena hereva momokani be do ia davaria lasi, unai dainai ena lalona ia hadaia ena bisinesi do ia habadaia. Badina ia laloa bema Dirava ena hereva amo taunimanima ia durua lasi, ena moni bona kohu amo taunimanima ia durua diba. To, adorahi ta lagani 1869 ai, Tadikaka Russell be gaukara amo ena ruma dekenai ia giroa lou neganai, ruma ta amo haida edia ane regena ia kamonai. Tadikaka Russell be unai ruma dekenai ia vareai bona ia itaia haida be tomadiho hebou ta idia karaia noho. Ia helai bona edia hereva ia kamonai. Gabeai ia gwau, “unai hanuaboi lau kamonai herevadia ese egu abidadama ia hagoadaia bona unai amo lau hamomokania Baibel be Dirava ena Hereva.” Ita itaia Tadikaka Russell be ane ese ena lalona ia veria unai hebou dekenai ia vareai totona.
15. Dahaka dainai ane buka matamatana idia halasia?
15 Lagani haida idia hanaia lalonai, Baibel ena hahediba herevadia haida dekenai diba matamata idia hedinarai. Aonega Herevadia 4:18 ia gwau: “Kara maoromaoro taudia idia raka noho dalana, be daba rere bamona. Edia dala ena diari be ia bada lao noho, ela bona dina tubua momokani ia hedinarai.” Baibel ena hahediba herevadia matamata idia hedinarai dainai, iseda ane haida ita haidaua danu be namo. Lagani 25 lalonai tano momo ai Iehova ena Witnes taudia ese ane buka ladana, Ane amo Iehova Hanamoa idia gaukaralaia.b Unai buka idia halasia negana amo ema bona hari, Baibel ena hahediba herevadia haida dekenai diba matamata idia hedinarai, unai dainai iseda ane buka lalonai hereva haida idia haidaua be namo.
16. Edena dala ai Paulo ena hereva Efeso 5:19 ai ita badinaia diba?
16 Hakaua oreana ese gwaumaoro ia henia ane buka matamata ladana Iehova Dekenai Ane Abia idia halasia totona. Inai ane buka lalonai ane ibounai be 135. Inai ane matamatadia be momo lasi dainai, edia hereva ita laloatao diba. Unai be Paulo ena hereva bamona, ia gwau: “Umui ese salamo, Dirava hanamoa anedia, bona tomadiho anedia do umui abia. Emui kudouna ai Iehova hanamoa anedia umui abia.”—Efe. 5:19, NW.
Mai Emu Lalona Ibounai ida Ane Oi Abia
17. Dahaka ese ita do ia durua kongrigeisen heboudia ai ane ita abia namonamo totona?
17 Namo lasi ita hemarai dainai, Keristani heboudia dekenai ane ita abia lasi. Mani inai oi laloa: Iseda hereva amo “ita ibounai ese nega momo kerere ita karaia,” ani? (Iam. 3:2) To unai ese ita ia koua lasi ruma-ta-ruma-ta haroro gaukara amo Iehova ita hanamoa totona. Oibe, ena be nega haida ane ita abia neganai hereva haida do ita gwauraia kerere, to namo lasi unai ese ita ia koua ane amo Iehova ita hanamoa totona. Taunimanima edia uduna be Iehova ese ia karaia, unai dainai ane amo ia ita hanamoa neganai, ia moale bada.—Eso. 4:11.
18. Edena dala ai tadikaka taihu momo be ane matamatadia idia dibaia haraga diba?
18 Miusiki CD ladana Sing to Jehovah—Piano Accompaniment ese tadikaka taihu momo ia durua ane matamatadia idia dibaia totona. Miusiki ita kamonai neganai do ita moale bada. Bema emu ruma dekenai oi kamonai loulou, unai ese oi do ia durua ane buka matamata oi abia neganai, ena miusiki oi diba vadaeni dainai, ane do oi diba haraga.
19. Basileia anedia idia hegaegaelaia totona, iseda tadikaka be dahaka idia karaia?
19 Dina tamona hebouhebou, sekit bona distrik hebouhebou ai program ia do matamaia lasi neganai, miniti 10 lalonai ita hakala henia miusiki ita laloa bada, eiava? Unai miusiki karaia totona tadikaka taihu be idia hekwarahi bada. Basileia anena ta idia abia hidi murinai, miusiki ena kahana idauidau idia torea, bona tadikaka taihu 64 ese unai kahana idauidau idia gadaralaia. Unai tadikaka taihu be hora momo lalonai unai idia karaia loulou. Unai murinai Patterson, New York dekenai idia rekodia. Unai tadikaka taihu 64 amo, 10 be United States ai idia noho lasi. Idia ibounai idia laloa tiokratik heboudia totona miusiki idia rekodia be hahenamo badana ta. Edena dala ai ita hahedinaraia edia gaukara ita laloa bada? Hebouhebou negadiai, seamani ese ita ia noia ita helai bona miusiki ita kamonai neganai, namona be ita badinaia bona unai miusiki namodia do ita moalelaia.
20. Emu lalona oi hadaia dahaka oi karaia totona?
20 Iehova be ia totona ita abia hanamoa anedia ia kamonai. Ia dekenai unai be mai anina bada. Namona be hebou negadiai, mai eda kudouna ibounai ida ane ita abia Iehova ita hanamoa totona. Oibe, herevana ita be ane abia karana ita diba namonamo eiava lasi, to namona be ‘Iehova dekenai ane ita abia’!—Sal. 104:33.
[Footnotes]
a Hoa gauna be, Davida ia mase bona lagani 1,000 murinai, Betelehema ai mamoe naria taudia be mamoe idia naria noho lalonai aneru haida ese idia dekenai Mesia ena vara sivaraina idia gwauraia.—Luka 2:4, 8, 13, 14.
b Ane buka lalonai ane ibounai be 225, bona idia be gado 100 mai kahana ai idia hahanaia.
Dahaka Oi Laloa?
• Edena Baibel sivaraidia ese idia hahedinaraia iseda tomadiho lalonai ane abia karana be mai anina bada?
• Edena dala ai Mataio 22:37 ena hereva ita badinaia diba, bona Basileia anedia be mai iseda lalona ibounai ida ita abia?
• Edena dala ai ita hahedinaraia Basileia anedia ita laloa bada?
[Picture on page 23]
Emu natudia oi hamaoroa ane abia negana ai, idia raka loaloa kava lasi totona, a?
[Picture on page 24]
Emu ruma ai Basileia anedia oi abia loulou, a?