Duahia Taudia Edia Henanadai

Genese 6:3 ia gwau: “Egu lauma be nega ibounai taunimanima edia lalonai do ia noho lasi, badina idia be hidio sibona. Hari ia lao, edia mauri lagani be dohore lagani 120 sibona.” Iehova ena hereva anina be taunimanima be lagani 120 sibona do idia mauri, a? Bona Noa be lagani 120 lalonai Abata do ia mai herevana ia harorolaia, a?

Unai henanadai rua edia haere be, lasi.

Abata ia do ginidae lasi neganai, taunimanima edia mauri lagani be handred momo ia hanaia. Noa ena mauri lagani be 600 neganai abata ia mai, bona ena mauri lagani be 950 neganai ia mase. (Gen. 7:6; 9:29) Abata murinai idia vara taudia haida danu edia mauri lagani be 120 ia hanaia. Hegeregere, Apakasada ena mauri lagani be 438 bona Sela ena mauri lagani be 433. (Gen. 11:​10-15) To Mose ena negai, taunimanima edia mauri lagani be 70 o 80 sibona. (Sal. 90:10) Unai dainai, ita diba Genese 6:3 ia gwau lasi taunimanima be lagani 120 sibona do idia mauri.

Vadaeni, unai siri lalonai Dirava be Noa ia hamaoroa taunimanima do ia hadibaia Abata be lagani 120 murinai do ia vara, a? Lasi. To momokani nega haida Dirava be Noa ia hereva henia danu. Hegeregere Genese 6:13 ia gwau: “Dirava ese Noa dekenai ia hereva, ia gwau: ‘Mauri gaudia ibounai do lau haorea. Ibounai do lau hamasea haorea, badina tanobada be edia kara dika dekenai ia honu momokani.’ ” Baibel ia gwau lagani haida murinai, Noa be lagatoi ia haorea neganai, “Lohiabada ese Noa dekenai ia hereva, ia gwau, ‘Lagatoi lalonai oi guia, oi bona oiemu ruma taudia ibounai.’ ” (Gen. 7:1) Siri ma haida ese idia hahedinaraia Dirava ese Noa dekenai gau ma haida ia hadibaia.​—Gen. 8:15; 9:​1, 8, 17.

Genese 6:3 ena hereva be idau. Unai siri be Noa ia herevalaia lasi, bona ia gwau lasi Iehova ese Noa ia hereva henia, to unai siri be Dirava ena lalohadai ia hahedinaraia. (Genese 8:21 hahegeregerea.) Baibel be Adamu ia do vara lasi neganai idia vara gaudia ia herevalaia neganai, inai bamona hereva ia gaukaralaia: “Ma Dirava ia gwau.” (Gen. 1:​6, 9, 14, 20, 24) Unai dainai, ita gwau diba Iehova be taunimanima ta ia hereva henia lasi, badina unai negai taunimanima ia do karaia lasi.

Unai dainai ita gwau diba Genese 6:3 dekenai Dirava ese inai tanobada dikana do ia haorea lalohadaina ia hahedinaraia. Dirava ese ena lalona ia hadaia lagani 120 murinai kara dika taudia do ia haorea, to Noa be unai ia diba lasi. Dahaka dainai Dirava be unai bamona ia karaia? Dahaka dainai lagani 120 lalonai ia haheauka?

Aposetolo Petero ese unai ia haerelaia, ia gwau: “Dirava ese davana ia henidia haraga lasi. Lasi, to mai haheauka danu idia ia naria noho, Noa ese lagatoi ia karaia neganai. Lagatoi lalonai idia noho taudia, ibounai 8 sibona be ranu dekena amo idia mauri.” (1 Pet. 3:20) Oibe, Dirava ese ena lalona ia hadaia kara dika taudia be lagani 120 murinai do ia hadikaia ore, to gau haida ia karaia guna be namo. Lagani 20 murinai, Noa bona ena adavana be natudia idia havaraia. (Gen. 5:32; 7:6) Edia natudia memerodia toi be idia tubu daekau bona idia headava, unai dainai edia ruma bese taudia “ibounai be 8.” Ena be idia be momo lasi, to idia ese lagatoi badana idia haginia. Oibe, unai gaudia ibounai idia vara totona Iehova be lagani 120 lalonai ia haheauka, unai amo Noa mai ena natudia bona edia adavadia “be ranu dekena amo idia mauri.”

Baibel ese ia hahedinaraia lasi edena lagani ai Iehova ese Noa ia hadibaia Abata do ia vara. To iena natudia idia vara, idia bada bona idia headava murinai, reana lagani 40 o 50 idia do noho bena Abata ia vara. Bena Iehova be Noa ia hamaoroa: “Mauri gaudia ibounai do lau haorea.” Unai dainai Noa ia hagania lagatoi do ia karaia bona ena ruma bese ida unai lagatoi lalonai do idia vareai. (Gen. 6:​13-18) Lagani momo lalodiai Noa be kara maoromaoro ia badinaia sibona lasi, to Baibel ia gwau ia be “kara maoromaoro ia harorolaia tauna.” Bona taunimanima ia hadibaia Dirava ese ena taravatu idia badinaia lasi taudia do ia hamasedia. Noa ia diba lasi edena lagani ai Abata do ia mai, to ia diba do ia vara momokani. Bona oi diba unai ia vara momokani.​—2 Pet. 2:5.