Headava—Dirava Ena Harihari Gauna Matauraia
“Unai dainai tau ese tamana sinana do ia rakatania, iena adavana dekenai do ia noho, ruaosi be tauanina tamona do idia lao.”—GEN. 2:24.
1. Dahaka dainai Iehova ita matauraia be maoro?
IEHOVA DIRAVA, headava ia hamatamaia tauna ita matauraia be maoro. Ia be iseda Havaraia Tauna, Lohiabada, bona guba Tamana dainai Baibel ia gwau “gau namodia ibounai, bona harihari gaudia namodia momokani ibounai” be ia amo idia mai. (Iam. 1:17; Apok. 4:11) Unai ese iena lalokau hereadaena ia hahedinaraia. (1 Ioa. 4:8) Iehova ese ita ia hadibaia bona ia henia gaudia ibounai be iseda namo totona.—Isa. 48:17.
2. Iehova ese Adamu bona Heva dekenai dahaka hakaua herevadia ia henia?
2 Baibel ia gwau headava be Dirava ese ia henia harihari gauna namona ta. (Ruta 1:9; 2:12) Iehova ese Adamu bona Heva edia headava ia karaia neganai, idia moale totona hakaua herevadia haida ia henia. (Mataio 19:4-6 duahia.) Bema Dirava ena hereva idia badinaia, edia headava lalonai do idia moale hanaihanai. To, Dirava idia dadaraia dainai, dika bada idia davaria.—Gen. 3:6-13, 16-19, 23.
3, 4. (a) Hari inai negai edena dala ai momo ese headava bona Iehova Dirava idia matauraia lasi? (b) Inai stadi lalonai dahaka do ita herevalaia?
3 Adamu bona Heva hegeregerena hari inai negai, headava taudia momo be abia hidi idia karaia neganai, Dirava ena hakaua herevadia idia badinaia lasi. Momo be idia ura lasi headava to idia noho hebou kava, o tau o hahine idauidau ida idia sihari, o tatau be tatau (hahine be hahine) ida idia headava. (Roma 1:24-32; 2 Tim. 3:1-5) Idia abia dae lasi headava be Dirava ena harihari gauna, bona headava idia matauraia lasi dainai, Iehova Dirava idia matauraia lasi danu.
4 Nega haida, Iehova ena hesiai taudia haida danu ese Iehova ena taravatu headava dekenai idia laloaboio. Ena be tau o hahine be Baibel ena taravatu ia utua lasi, to headava taudia haida idia parara o edia headava idia hadokoa. Edena dala ai unai ita dadaraia diba? Edena dala ai Genese 2:24 ai ia noho hakaua herevana ese Keristani taudia ia durua edia headava idia hagoadaia totona? Bona headava idia lalohadailaia taudia be edena dala ai idia hegaegae diba? Baibel ese ia herevalaia ruma bese toi edia sivarai ese idia hahedinaraia headava ia noho daudau totona, Iehova matauraia karana be mai anina bada. Mani unai sivarai ta ta ita itaia.
Badinaia Heheni
5, 6. Sekaraia bona Elisabeta be dahaka hahetoho idia davaria, to dahaka hahenamo idia abia?
5 Sekaraia bona Elisabeta be abia hidi namodia idia karaia. Idia ruaosi be Iehova idia tomadiho henia taudia. Sekaraia be ena hahelaga gaukara ia karaia namonamo, bona ena adavana ida Iehova ena Taravatu idia badinaia. Edia mauri lalonai idia davaria hahenamo idauidau dainai Iehova idia tanikiu henia. To, bema Iuda dekenai idia oi vadivadi henia, do oi itaia idia be natudia lasi. Elisabeta be gabani, bona ia bona ena adavana be idia buruka vadaeni.—Luka 1:5-7.
6 Idaunegai Israela dekenai natuna havaraia karana be gau badana, bona ruma bese ta ta ai natudia be momo. (1 Sam. 1:2, 6, 10; Sal. 128:3, 4) Unai nega ai, bema hahine ta be natudia ia havaraia lasi, ena tau be koikoi dalanai ia do ia rakatania toho. To, Sekaraia be unai bamona ia karaia lasi; Elisabeta ia badinaia noho. Ena be natudia idia havaraia lasi dainai nega haida idia lalohisihisi, to Iehova idia hesiai henia noho. Hoa gauna be idia buruka momokani neganai, Iehova ese ia hanamodia bona natuna ta idia havaraia.—Luka 1:8-14.
7. Edena dala ma ta ai Elisabeta be ena adavana ia badinaia?
7 Elisabeta be dala ma ta ai adavana badinaia karana ia hahedinaraia. Edia natuna Ioane ia vara neganai, Sekaraia be ia hereva diba lasi badina ia ese Dirava ena aneru ena hereva ia hamomokania lasi. To, reana dala ma ta amo Sekaraia ese Elisabeta ia hadibaia aneru ena hereva hegeregerena mero ena ladana do idia atoa “Ioane.” Edia dekena taudia bona varavara idia ura mero be tamana ena ladana do idia henia. To Elisabeta be ena adavana ena hereva ia badinaia, ia gwau: “Lasi, iena ladana be Ioane.”—Luka 1:59-63.
8, 9. (a) Edena dala ai badinaia heheni karana ese headava ia hagoadaia? (b) Edena dala haida ai tau bona hahine be badinaia heheni karana idia hahedinaraia diba?
8 Sekaraia bona Elisabeta bamona, hari headava taudia momo be hekwakwanai bona lalohisihisi haida idia davaria. Bema headava lalonai tau bona hahine idia badinaia heheni lasi, edia headava do ia goada lasi. Tau o hahine ma ta hauraia kava karana, ponografi itaia karana, matabodaga bona kara dikadia ma haida ese tau bona hahine huanai hetura karana namona ia hadikaia bona edia headava ia dika diba. Bona unai hetura karana namona ia dika neganai, edia lalokau ia keru danu. Ita gwau diba, ta ta badinaia karana be magu ta bamona, taunimanima dikadia o hekwakwanai amo ruma bese ia gimaia. Unai dainai, bema tau bona hahine be ta ta idia badinaia, edia headava maurina do ia namo bona ta ta dekenai edia hemami bona lalohadai idia gwauraia hedinarai diba. Oibe, headava lalonai badinaia heheni karana be mai anina bada.
9 Iehova ese Adamu ia hamaoroa: “Unai dainai tau ese tamana sinana do ia rakatania, iena adavana dekenai do ia noho.” (Gen. 2:24) Unai hereva ena anina be dahaka? Headava matamata taudia ese edia hetura karana varavara bona turadia ida do idia haidaua. Namona be headava tau o hahine be ena adavana ena ura gaudia ia atoa guna. Edia turadia o varavara edia ura do idia atoa guna lasi, tama sina ese idia totona abia hidi do idia karaia lasi, bona edia hepapahuahu lalonai idia vareai lasi be namo. Iehova ena sisiba be tau bona hahine be do idia gaukara hebou bona sibodia edia abia hidi idia karaia. Bona ma haida ese edia headava maurina idia biagua lasi.
10. Dahaka ese headava taudia ia durua idia badinaia heheni totona?
10 Tomadiho dalanai idia parara ruma bese lalonai danu, badinaia heheni karana ia noho neganai ruma bese be do ia moale. Ena adavana be Witnes lasi taihu ta ia gwau: “Iehova lau tanikiu henia badina lau ia hadibaia egu adavana ena kwara dagina lau matauraia totona. Egu adavana lau badinaia dainai lagani 47 lalonai emai headava lalonai lalokau bona hemataurai ia noho.” (1 Kor. 7:10, 11; 1 Pet. 3:1, 2) Unai dainai emu adavana ia lalohekwarahi lasi totona, emu hereva bona kara amo oi hahedinaraia ia oi lalokau henia bona laloa bada. Namona be oi gaukara goada tau ta o gau ta ese emu headava ia hadikaia lasi totona. (Aonega Herevadia 5:18-20 duahia.) Ron bona Jeannette, lagani 35 mai kahana idia headava taudia, idia gwau: “Iehova ena taravatu ai badinaia dainai, emai headava maurina ai moalelaia.”
Lalotamona ese Headava Ia Hagoadaia
11, 12. Edena dala ai Akwila bona Prisikila be lalotamona idia hahedinaraia (a) ruma ai, (b) moni gaukara ai, bona (c) Keristani hesiai gaukara ai?
11 Nega momo Paulo ese ena tura namodia Prisikila bona ena adavana Akwila ia herevalaidia hebou. Dirava ena hereva hegeregerena, Prisikila bona Akwila ese idia hahedinaraia idia be “tauanina tamona.” (Gen. 2:24) Nega ibounai edia ruma ai, moni gaukara ai, bona Keristani hesiai gaukara idia karaia hebou. Hegeregere, nega ginigunana Paulo be Korinto dekenai ia lao neganai, Akwila bona Prisikila edia ruma ai ia noho, bona gabeai ia vadivadi lou negadiai, unuseni ia noho. Gabeai Efeso ai, Akwila bona Prisikila edia ruma ai kongrigeisen heboudia idia karaia, bona kamonai matamata taudia hegeregere, Apolo idia durua hereva momokani ia dibaia totona. (Kara 18:2, 18-26) Roma ai idia noho neganai, edia ruma dekenai kongrigeisen heboudia idia karaia danu, bona Efeso dekenai idia giroa neganai, edia tadikaka idia hagoadaia.—Roma 16:3-5.
12 Danu, Akwila bona Prisikila be Paulo ida palai turia gaukara idia karaia hebou. Unai nega ai danu, Akwila bona Prisikila be mai lalotamona ida idia gaukara. (Kara 18:3) Iehova ena hesiai gaukara idauidau idia karaia hebou dainai, edia headava maurina idia moalelaia. Korinto, Efeso o Roma ai idia noho neganai, momo idia diba idia be ‘Keriso Iesu ena hesiai gaukara lalonai idia gaukara hebou taudia.’ (Roma 16:3) Herevana edeseniai idia noho, ta ta idia durua Basileia harorolaia gaukarana idia karaia totona.
13, 14. (a) Dahaka gaudia ese headava taudia edia lalotamona ia hadikaia diba? (b) Headava taudia be “tauanina tamona” bamona idia gaukara hebou totona, dahaka idia karaia diba?
13 Oibe, bema tau bona hahine edia tahua gaudia be tamona bona idia gaukara hebou, edia headava do ia goada. (Had. 4:9, 10) To, hari headava taudia momo be ta ta idia bamoa lasi, badina edia moni gaukara gabudiai hora momo idia haorea. Haida be edia gaukara dainai gabu daudau o tano ma ta dekenai idia lao, bona ruma bese dekenai moni idia siaia. Ruma ai danu headava taudia haida idia mamia edia adavana amo idia daudau, badina TV, sibodia edia moale karadia, gadara idauidau, o Internet dekenai nega bada idia haorea. Emu headava maurina be unai bamona, a? Bema oibe, namona be gau haida oi haidaua, unai amo emu nega bada be emu adavana ida do oi herevahereva. Hegeregere, aniani umui hegaegaelaia, mereki umui huria bona uma gaukara umui karaia hebou. Eiava, emui natudia o tama sina burukadia umui naria hebou diba.
14 Gau badana be Iehova tomadiho henia gaukaradia umui karaia hebou. Hanaihanai dina ena siri umui herevalaia bona Ruma Bese ena Tomadiho umui karaia hebou neganai, unai ese lalotamona do ia havaraia. Danu, umui haroro hebou be namo. Bema hegeregere, hua ta o lagani ta lalonai umui painia hebou. (1 Korinto 15:58 duahia.) Ena adavana ida ia painia taihu ta ia gwau: “Ai haroro neganai, unai ese dala ia kehoa ai herevahereva hebou totona. Emai tahua gauna be ai davaria taudia be Baibel amo ai durua, bona unai dainai ai gaukara hebou namonamo. Lau mamia egu adavana be egu turana namona.” Mai anina bada gaudia umui karaia hebou neganai, emui tahua gaudia, umui laloa bada gaudia bona kara be do idia tamona. Unai amo umui be Akwila bona Prisikila bamona, “tauanina tamona” bamona do umui gaukara hebou.
Iehova Atoa Guna
15. Headava lalonai dahaka be mai anina bada?
15 Iesu ia diba headava lalonai Dirava atoa guna karana be mai anina bada. Iehova ese headava ginigunana ia karaia neganai, Iesu be unai ia itaia. Ia itaia Adamu bona Heva be Dirava ena oda idia badinaia neganai, idia moale; to Dirava idia gwau-edeede henia neganai, hekwakwanai momo idia davaria. Unai dainai, Iesu be ma haida ia hadibaia neganai, Genese 2:24 ena hereva ia gwauraia. Ma ia gwau: “Dirava ese ia hakapua taudia, be taunimanima ese do idia hapararaia lasi.” (Mat. 19:6) Unai dainai, headava maurina umui moalelaia totona, Iehova matauraia karana be mai anina bada. Iehova matauraia karana dekenai, Iosepa bona Maria be haheitalai namodia.
16. Edena dala ai Iosepa bona Maria be tomadiho karadia idia laloa bada?
16 Iosepa be Maria ia kara namo henia bona ia matauraia. Ia kamonai Maria be ia rogorogo, bona aneru ese ia do hereva henia lasi neganai, Iosepa “ia ura hehuni dalanai edia headava ia hadokoa.” (Mat. 1:18-20) Idia ruaosi be Kaisara ena taravatu bona Mose ena Taravatu idia badinaia danu. (Luka 2:1-5, 21, 22) Ena be Taravatu hegeregerena, tatau sibona be lagani ta ta ai tomadiho ariadia totona Ierusalema dekenai do idia lao, to Iosepa, Maria bona edia natudia be idia lao hebou. (Deu. 16:16; Luka 2:41) Unai bona dala ma haida ai idia hahedinaraia Iehova bona ena aria idauidau idia laloa bada. Unai dainai, Iehova ese idia ia abia hidi tanobada ai ena Natuna Iesu idia naria totona.
17, 18. (a) Edena dala ai headava taudia ese Iehova idia atoa guna diba? (b) Edena dala ai unai ese idia do ia durua?
17 Emu headava lalonai Iehova oi atoa guna, a? Hegeregere, abia hidi badadia umui karaia gwauraia neganai, Baibel ena hakaua herevadia umui tahua, umui guriguri bona lo Keristani taudia edia heduru umui tahua, a? Eiava sibona emui lalohadai, emui varavara o turadia edia sisiba umui badinaia? Umui hekwarahi hesiai tauna mai ena kamonai ese headava bona ruma bese maurina hanamoa totona ia henia sisiba umui badinaia, a? Eiava, tanobada taudia edia aonega herevadia o kastom umui badinaia sibona? Nega momo umui guriguri bona umui stadi hebou, tahua gaudia umui atoa bona mai anina bada gaudia umui herevalaia, a?
18 Ray bona ena adavana be lagani 50 lalonai edia headava maurina idia moalelaia. Ia gwau: “Emai headava lalonai ‘varo ihatoina,’ Iehova ia noho dainai, hekwakwanai idauidau ai hanaia diba.” (Hadibaia Tauna 4:12 duahia.) Danny bona Trina be lagani 34 mai kahana lalonai edia headava maurina idia moalelaia, idia gwau: “Iehova ai hesiai henia hebou dainai emai headava ia goada.” Oibe, bema nega ibounai emui headava lalonai Iehova umui atoa guna, ia ese umui do ia durua emui headava ia goada totona.—Sal. 127:1.
Headava Matauraia Noho
19. Dahaka dainai Dirava ese headava ia karaia?
19 Hari inai negai, momo be sibodia edia ura idia laloa bada. To, Iehova ia hesiai henia tauna ena lalohadai be idau. Ia diba Dirava ese ena ura ia hagugurua totona headava ia karaia. (Gen. 1:26-28) Bema Adamu bona Heva be unai harihari gauna idia matauraia, tanobada be paradaiso ai ia lao bona goevadae taudia be mai moale ida Iehova do idia hesiai henia.
20, 21. (a) Dahaka dainai headava be helaga? (b) Stadi gabena ai, edena harihari gauna ma ta do ita herevalaia?
20 Gau badana be, Dirava idia hesiai henia taudia idia ura edia headava lalonai Iehova idia hanamoa. (1 Korinto 10:31 duahia.) Inai stadi ese ia hahedinaraia badinaia heheni karana, lalotamona bona Dirava atoa guna karana ese headava ia hagoadaia. Unai dainai, bema headava totona ita hegaegae noho, ita ura eda headava ita hagoadaia, o ita ura hekwakwanai ita hamaoromaoroa, namona be inai ita laloatao: headava be Dirava ese ia karaia bona ia be helaga. Unai ese ita do ia durua Dirava ena Hereva hegeregerena abia hidi ita karaia totona. Unai amo ita be headava ia hamatamaia Tauna, Iehova Dirava ita matauraia bona ita hahedinaraia ena harihari gauna ita laloa bada.
21 To, headava sibona be Iehova ena harihari gauna lasi. Danu, headava sibona amo moale do ita davaria lasi. Stadi gabena ai, Iehova ena harihari gauna ma ta, headava lasi maurina unai, do ita herevalaia.
Edena Bamona Do Oi Haere?
• Edena dala ai badinaia heheni karana ese Keristani headava taudia ia durua diba?
• Dahaka dainai mai lalotamona ida gaukara hebou karana ese headava do ia hagoadaia?
• Edena dala haida ai headava taudia ese Iehova idia atoa guna diba?
• Edena dala ai headava ia Hamatamaia Tauna, Iehova ita matauraia diba?
[Pictures on page 15]
Tau bona hahine idia gaukara hebou neganai lalotamona ia noho