Umui Noho Hegaegae!

“Do umui noho hegaegae, badina umui laloa lasi horana ai, taunimanima ena Natuna do ia mai.”​—⁠MAT. 24:⁠44.

1, 2. (a) Taiga ese ena hadibaia tauna ia koria sivaraina be edena peroveta herevana ida ita hahegeregerea diba? (b) Hari, dahaka oi karaia be namo?

LAGANI momo lalonai taunimanima be idia lao taiga danu ia gadara tauna idia itaia totona. Unai tauna ia gwau: “Animal ta be oi dekenai ia manada neganai, unai be hemami namo hereana.” To October 3, 2003 ai taiga kurokurona ta, ena metau be kilogram 172, ese unai tauna ia koria. Ia gima lasi dainai unai ia vara.

² Baibel danu be “dagedage animal” ese ta ia koria ena sivarai ia herevalaia. (Apokalupo 17:​15-18 duahia.) Unai “dagedage animal” be daika? Daika do ia koria? Unai dagedage animal be United Nations, ia be tanobada ena gavamani ibounai ia laulaulaia. Ia ese Babulonia Badana, unai be tomadiho koikoi oreadia ibounai, do ia koria bona hadikaia ore. Taunimanima momo be do idia hoa, badina dagedage animal bona Babulonia Badana be tura namodia. Idia ruaosi be Satani ena tanobada ena kahana badana. To, dagedage animal ese edena negai Babulonia Badana do ia hadikaia ore? Unai do ia vara dina bona hora be ita diba lasi. (Mat. 24:36) To, Baibel ia gwau, ita laloa lasi horana ai unai do ia vara, bona unai nega be ia kwadogi vadaeni. (Mat. 24:44; 1 Kor. 7:29) Unai dainai gau badana be ita noho hegaegae, vadaeni dagedage animal ese Babulonia Badana ia hadikaia ore bona Keriso, Davana Henia Tauna, ia ginidae neganai, ita do ia hamauria! (Luka 21:28) Ita noho hegaegae totona, namona be idaunegai Dirava ena gwauhamata ia guguru idia itaia taudia edia kara ita tohotohoa. Edena dala ai edia sivarai ese ita do ia durua? Mani edia sivarai ita herevalaia.

Noa Bamona Oi Noho Hegaegae

3. Dahaka hekwakwanai ese Noa ena abidadama ia tohoa?

³ Ena be Noa ena negai kara dika be bada herea, to ia noho hegaegae Dirava ena gwauhamata ia guguru negana ia itaia totona. Noa ena negai hekwakwanai idauidau idia vara, badina gwau-edeede anerudia be taunimanima ai idia lao bona tanobada ai hahine hairaidia ida idia mahuta hebou! Idia havaraia natudia be “tatau badadia badadia” bona taunimanima idia dagedage henia bona edia kohu idia dadia. (Gen. 6:⁠4) Mani oi laloa, unai tatau badadia be gabu ibounai dekenai taunimanima idia dagedage henia bona mauri idia hadikaia. Taunimanima edia lalohadai bona kara be ia dika sibona dainai kara dika ia bada. Unai dainai, Siahu Ibounai Lohiabada Iehova ese nega ia makaia unai tanobada dikana ia haorea totona.​—⁠Genese 6:​3, 5, 11, 12 duahia.a

4, 5. Edena dala ai iseda nega be Noa ena nega hegeregerena?

⁴ Iesu ia gwau, iseda nega ai do idia vara gaudia be Noa ena nega hegeregerena. (Mat. 24:37) Hari iseda negai danu, lauma dikadia be taunimanima idia hakaua kerere noho. (Apok. 12:​7-9, 12) Noa ena negai, unai aneru dikadia be taunimanima ai idia lao, to hari unai idia karaia diba lasi. To, idia hekwarahi matamata bona buruka taudia edia kara bona lalohadai idia biagua totona. Bona ena be taunimanima idia diba lasi, to demoni ese idia biagudia dainai, matabodaga karadia idia karaia, bona demoni be unai kara mirodia idia moalelaia.​—⁠Efe. 6:​11, 12.

⁵ Baibel ia gwau Diabolo be “ala-ala tauna” bona “mase ia havaraia diba.” (Ioa. 8:44; Heb. 2:14) To, Satani sibona ese maoromaoro taunimanima ia hamasea diba lasi. Ia be mai aonega ida taunimanima ia koia iena ura idia karaia totona. Ia ese edia kudouna bona lalona dekenai ala-ala urana ia atoa. Hegeregere, United States dekenai idia vara natudia 142 amo tamona be ala-ala taudia ese do idia hamasea. Hari inai negai dagedage karadia be bada herea dainai, oi laloa Iehova be Noa ena nega ai ia karaia bamona, kara dika taudia do ia hadikaia ore eiava lasi?

6, 7. Edena dala ai Noa bona ena ruma bese be Dirava idia abidadama henia bona idia gari henia?

⁶ Dirava ese Noa ia hadibaia abata badana amo taunimanima ibounai do ia hamasea. (Gen. 6:​13, 17) Bona ia hamaoroa lagatoi badana ta do ia haginia. Dirava ena hereva hegeregerena, Noa bona ena ruma bese ese lagatoi idia haginia matamaia. Dahaka ese idia ia durua Dirava ena hereva idia badinaia bona ena hahemaoro negana idia naria totona?

⁷ Dirava abidadama henia bona gari henia karana ese Noa bona ena ruma bese ia durua Dirava ena oda ibounai idia badinaia totona. (Gen. 6:22; Heb. 11:⁠7) Noa be ruma bese kwarana dainai, Iehova kahirakahira ia noho bona tanobada taudia edia kara dika ia dadaraia. (Gen. 6:10) Ia diba iena ruma bese ese unai taudia edia dagedage bona Dirava kamonai henia lasi karana idia dadaraia be namo. Gau badana be dina ta ta ena lalohekwarahi gaudia do idia laloa momo lasi. Dirava be idia dekenai gaukara badana ta ia henia, bona unai idia atoa guna be namo.​—⁠Genese 6:​14, 18 duahia.

Noa Bona Ena Ruma Bese Idia Noho Hegaegae

8. Dahaka ese ia hahedinaraia Noa ena adavana, natudia bona edia adavadia be Dirava idia abidadama henia?

⁸ Nega momo Baibel be Noa sibona ia herevalaia, to ena adavana, edia natudia bona edia adavadia be Iehova idia tomadiho henia danu. Peroveta tauna Esekiela ese unai ia hamomokania. Esekiela ia gwau, bema Noa be iena nega ai idia noho, ena natudia be do idia roho mauri lasi. Badina idia be taunimanima badadia bona sibodia edia abia hidi do idia karaia. To, edia kara amo idia hahedinaraia idia be Dirava idia lalokau henia bona ena taravatu idia badinaia. (Ese. 14:​19, 20) Noa ena ruma bese be ena hereva idia kamonai, Dirava idia abidadama henia, bona Dirava ese ia henia gaukarana idia karaia totona, gau ta ese idia ia koua lasi.

9. Hari inai negai daidia be Noa ena kara idia tohotohoa?

⁹ Hari, tanobada hegegemadai iseda tadikaka oreana lalonai, ruma bese kwaradia momo ese Noa ena kara idia tohotohoa! Idia laloparara edia natudia dekenai aniani, dabua, ruma bona edukeisen sibona idia henia be hegeregere lasi. Namona be edia ruma bese taudia ta ta idia durua Iehova idia tura henia noho totona. Unai idia karaia neganai, idia be Iehova ena dina badana totona idia noho hegaegae.

10, 11. (a) Noa bona ena ruma bese idia roho mauri dainai, edia hemami be edena bamona? (b) Ita ta ta be edena henanadai ita laloa be namo?

¹⁰ Noa, ena adavana, ena natuna memero toi bona edia adavadia be lagani 50 bamona lalonai lagatoi badana idia haginia. Reana nega momo lagatoi lalonai idia vareai bona raka-lasi, matu ibounai idia koua namonamo ranu ia vareai lasi totona, aniani idia haboua, bena animal idia hakaudia vareai. Mani inai oi piksaia: Hari dina be lagani 2370 B.C.E. ena hua iharuana ena dina namba 17, Noa bona ena ruma bese be lagatoi lalonai idia vareai. Iehova ese iduara ia koua bona medu ia diho matamaia. To, ia be medu maragina lasi, Dirava ese guba ia kehoa bona medu bada herea ia diho. (Gen. 7:​11, 16) Lagatoi murimurinai idia noho taudia be idia mase, to lagatoi lalonai idia noho taudia be idia mauri. Noa bona ena ruma bese edia hemami be edena bamona? Oibe, Iehova idia tanikiu henia bada bona idia moale badina ‘Dirava momokanina ida idia raka bona idia noho hegaegae!’ (Gen. 6:10) Mani oi laloa: Oi be Aramagedono amo oi roho mauri dainai, Noa bona ena ruma bese idia karaia bamona mai emu kudouna ibounai ida Iehova do oi tanikiu henia, ani?

¹¹ Siahu Ibounai Diravana ia gwauhamata Satani ena tanobada dikana do ia hadikaia ore, bona gau ta ese unai do ia koua lasi. Sibona oi nanadaia: ‘Lau be Dirava ena gwauhamata ibounai lau abidadama henia, bona lau abia dae momokani ia makaia negana ai do ia hagugurudia, a?’ Bema oibe, namona be oi noho hegaegae bona oi laloatao “Iehova ena dina” be ia mai haraga noho.​—⁠2 Pet. 3:⁠12.

Mose Ia Gima Noho

12. Dahaka gaudia ese Mose ena abidadama idia hadikaia diba?

¹² Mani haheitalai ma ta ita laloa. Mose be Farao ena natuna kekeni ese ia naria dainai, Aigupito ai ia be taunimanima ese idia matauraia. Danu, ruma namona ai ia noho, dabua hairaidia ia karaia, aniani namodia ia ania, bona sikuli badana dekenai ia lao. Taunimanima edia lalohadai dekenai, Mose be mauri namona ia moalelaia. (Kara 7:​20-22 duahia.) Toana be gabeai Mose ese ruma bona kohu momo ia abia diba.

13. Edena dala ai Mose ese Dirava ena gwauhamata ia laloa dobu?

¹³ Mose ia maragi neganai, ena tama sina ese idia hadibaia namonamo dainai, ia diba Aigupito taudia edia kaivakuku ia tomadiho henia be maoro lasi. (Eso. 32:⁠8) Aigupito edia sikuli badadia bona kohu hairaidia ese Mose ena lalona idia veria lasi. To, Dirava ese iena tubudia dekenai ia henia gwauhamata ia laloa dobu, bona ia noho hegaegae Dirava ena ura ia karaia totona. Mose ese Israela taudia ia hamaoroa: “[Iehova] . . . Aberahamo ena Dirava, Isako ena Dirava, Iakobo ena Dirava ese ia siaia lau umui dekenai.”​—⁠Esodo 3:​15-17 duahia.

14. Dahaka dainai Mose ia gari lasi bona Dirava ia abidadama henia be namo?

¹⁴ Mose ia diba Iehova be Dirava momokanina bona Aigupito ena kaivakuku idauidau ia dadaraia. Iena mauri dalana amo ia hahedinaraia ia be “ita itaia diba lasi Tauna ia itaia bamona.” Mose ia abia dae momokani Dirava ese ena taunimanima do ia ruhaia, to ia diba lasi edena negai unai do ia karaia. (Heb. 11:​24, 25, 27) Aigupito tauna ta ese Israela igui hesiai tauna ta ia botaia neganai, Mose ese Israela tauna ia durua karana amo ia hahedinaraia, ia ura dikadika Israela taudia be Aigupito amo ia ruhaia. (Eso. 2:​11, 12) To, unai be Iehova ese ia makaia negana lasi. Unai dainai, Mose be tano daudauna ta dekenai ia heau lao bona unuseniai ia noho. Mose be guna mauri namona ia moalelaia, to hari ia be tano gagaena ai ia noho bona ena mauri ia auka. To, Mose ia noho hegaegae bona ia gima noho bona Iehova ena hereva ibounai ia badinaia. Midiana ai lagani 40 ia noho murinai, Dirava ese Mose ia abia hidi iena tadikaka ia durudia totona. Dirava ena hereva hegeregerena, Aigupito dekenai ia giroa lou. Oibe, Dirava ese ia makaia negana ia ginidae, bona ia ese Mose ia siaia Israela taudia be Aigupito amo do ia hakaudia siri. (Eso. 3:​2, 7, 8, 10) Mose, “manau herea” tauna be Farao ia hereva henia totona, do ia gari lasi bona Dirava ia abidadama henia be gau badana. (Num. 12:⁠3) Oibe, Mose ese Farao be nega tamona sibona ia hereva henia lasi, to hisihisi ta ta murinai Dirava ese Mose ia siaia loulou.

15. Ena be Mose ia lalohisihisi, to dahaka dainai ena guba Tamana ia hanamoa?

¹⁵ Lagani 40 lalonai, Israela taudia be tano gagaena ai idia loaloa neganai, Mose be gau haida dainai ia lalohisihisi. To, ia be nega ibounai Iehova ia hanamoa bona Israela taudia ia hagoadaia unai bamona idia karaia totona. (Deu. 31:​1-8) Dahaka dainai? Badina ia be sibona ena ladana ia laloa bada lasi, to Iehova ena ladana bona iena lohia siahuna ia abia isi. (Eso. 32:​10-13; Num. 14:​11-16) Herevana gau haida dainai ita lalohisihisi, to namona be Dirava ena lohia dalana ita abia isi bona ita abia dae momokani ia karaia gaudia ibounai be hereadae. (Isa. 55:​8-11; Ier. 10:23) Oi be unai oi abia dae, a?

Umui Noga Noho!

16, 17. Dahaka dainai ita ta ta dekenai Mareko 13:​35-37 ena hereva be mai anina bada?

¹⁶ “Umui gima noho bona umui noga noho, badina Dirava ese ia abia hidi negana be umui diba lasi.” (Mar. 13:33) Iesu be inai tanobada dokona ena toana ia herevalaia neganai, unai ia gwauraia. Ena peroveta herevana dokonai, ia gwau: “Umui gima noho, badina umui diba lasi negana ai ruma Biaguna do ia mai. Ia be reana adorahi momokani ai eiava malokihi ai eiava kokoroku ia tai negana ai eiava daba maragi ai do ia mai. Vadaeni ia ginidae haraga neganai, namo lasi umui ia davaria umui mahuta noho. To umui lau hamaoroa gauna be ibounai dekenai lau gwauraia, gima noho.”​—⁠Mar. 13:​35-37.

¹⁷ Iesu ena peroveta herevana ese ita ia hagoadaia do ita noga noho. Ia ese hanuaboi ai gima negadia foa ia herevalaia. Gima negana ihahanina be daba 3 oklok amo ela bona dina ia daekau, bona unai nega ai ta ia noga noho be auka. Tuari biagudia idia gwau unai be nega namona edia inai taudia idia tuari henia totona, badina unai nega ai edia inai taudia be idia do “mahuta noho.” Unai hegeregerena, hari taunimanima momo be Dirava tomadiho henia karadia idia laloa bada lasi, unai dainai namona be ita naria namonamo, dika ita be idia bamona ita mahuta. Vadaeni, ita be tanobada ena dokona bona iseda hahemauri negana ita naria noho lalonai, “noga noho” bona “gima noho” karana ita laloa bada, a?

18. Ita Iehova ena Witnes taudia, eda hahenamo badana be dahaka?

¹⁸ Matamanai ita herevalaia taiga ese ia koria tauna be ia mase lasi. To, Baibel ena peroveta herevadia ese idia hahedinaraia tomadiho koikoi oreadia bona tanobada dikana be Iehova ena hahemaoro negana ai do ia hadikaia ore. (Apok. 18:​4-8) Namona be ita, Dirava ena hesiai taudia ibounai, matamata eiava buruka be inai do ita laloatao: Iehova ena dina badana totona do ita noho hegaegae, Noa bona ena ruma bese taudia idia karaia bamona. Hari, ita be Dirava idia matauraia lasi taudia huanai ita noho. Haida be idia daradara Dirava ia noho o lasi, bona ma haida idia gwau Dirava be lasi. Unai taudia edia hahediba hereva koikoidia amo iseda Havaraia Tauna idia gwauraia dika. Ita ura lasi edia lalohadai ese ita idia hakaua kerere. Namona be Mose bona Noa edia sivarai ita laloatao, ita noga noho, nega bona dala idauidau ai Iehova ita hanamoa, badina Iehova “ese dirava ibounai ia hereaia, . . . Ia be Dirava badana, ia be mai ena siahu bada, bona ia be taunimanima ese idia gari henia Diravana.”​—⁠Deu. 10:⁠17.

[Footnote]

Oi Laloatao, A?

• Dahaka dainai Noa ia hekwarahi ena ruma bese edia abidadama ia goada totona?

• Edena dala ai Noa ena nega be iseda nega bamona?

• Ena be Mose ia lalohisihisi, to dahaka dainai Iehova ena gwauhamata ia abidadama henia noho?

• Edena peroveta herevadia ese oi idia durua oi noga noho totona?

[Picture on page 25]

Noa bona ena ruma bese be Iehova ena gaukara idia atoa guna

[Picture on page 26]

Mose be Dirava ena gwauhamata ia abidadama henia dainai, ia gima noho