Iesu Edeseni amo Ia Mai?

“[Pilato be] pavapava rumana lalonai ia vareai lou bona Iesu dekenai ia gwau: ‘Oi be edeseni amo oi mai?’ To Iesu ese ia haere henia lasi.”​​—⁠IOANE 19:⁠9.

IESU idia kota henia neganai, Roma ena Gavana Pontio Pilato ese unai henanadai ia henia. Pilato ia diba Iesu be Israela ena tano ta amo ia mai. (Luka 23:​6, 7) Danu ia diba Iesu be taunimanima ma haida bamona lasi. Momokani Pilato ia ura diba Iesu be gunaguna ia noho, a? Unai lohia tauna, Dirava momokanina ia diba lasi tauna, ia ura hereva momokani ia abia dae bona badinaia, a? Herevana ena ura be dahaka, to Iesu ia haere lasi, bona gabeai ia hedinarai Pilato be ena dagi ia laloa bada, to hereva momokani bona hahemaoro maoromaoro ia laloa bada lasi.​​—⁠Mataio 27:​11-​26.

Ita moale badina haida idia ura dikadika idia diba Iesu be edeseni amo ia mai, bona unai idia dibaia be auka lasi. Baibel ese ia hahedinaraia Iesu Keriso be edeseni amo ia mai. Henunai herevadia oi laloa.

▪ Ia vara gabuna Nega duahia karana ese ia hahedinaraia Iesu be lagani 2 B.C.E. ai, Iudea ena hanua Betelehema ai ia vara. Kaisara Augusto be oda ia henia taunimanima be edia tano dekenai edia ladana do idia torea. Unai dainai Maria bona ena adavana, Iosepa, be Betelehema dekenai idia lao, Iosepa ena tubuna edia hanua unai. Unai negai Maria be “kahirakahira do ia mara.” Hanua ai hutuma dainai noho gabuna ta idia davaria lasi, unai dainai boromakau edia noho gabuna idia gaukaralaia, unuseniai Iesu ia vara bona boromakau edia aniani mauana dekenai idia hahekurea.​​—⁠Luka 2:​1-7.

Lagani handred momo gunanai, Baibel ese Iesu ena vara gabuna ia perovetalaia: “Betelehema Eparata e, oi be maragi herea Iuda taudia tausen tausen bogaragidiai, to oiemu amo ta be lau dekenai do ia mai, Israela ena lohia ai do ia lao.”a (Mika 5:​2, NW ) Iuda hanuadia huanai Betelehema be hanua maragina. To unai hanua maragina be hahenamo idauna ta do ia abia. Gwauhamata Mesiana, o Keriso, be Betelehema amo do ia mai.​​—⁠Mataio 2:​3-6; Ioane 7:​40-​42.

▪ Ia tubu daekau gabuna Iesu bona ena famili be Aigupito ai nega sisina idia noho murinai, Galilea ena hanua ta, Nasareta dekenai idia lao. Ia be Ierusalema ena not kahanai, bona ena daudau be kilomita 96. Unai negai, Iesu ena mauri lagani be rua mai kahana. Unai hanua dekenai biru taudia, mamoe naria taudia, bona haoda taudia be edia gaukara idia karaia. Iesu be ruma bese badana lalonai ia tubu daekau bona toana be idia be kohu momo lasi taudia.​—⁠Mataio 13:​55, 56.

Lagani handred momo gunanai, Baibel ese ia perovetalaia Mesia be “Nasareta Tauna.” Evanelia bukana ia torea tauna, Mataio, ia gwau, Iesu ena famili be “Nasareta dekenai idia noho, unai amo peroveta taudia edia hereva ia guguru, idia gwau: ‘Ia do idia gwauraia Nasareta Tauna.’ ” (Mataio 2:​19-23) Inai ladana Nasareta be Heberu hereva ta ida ia hegeregere, ena anina be “rigi.” Unai ese ia hahedinaraia, Mataio be Isaia ena peroveta herevana ia gwauraia, ia gwau Mesia be “rigi ta,” Iese amo do ia tubu, anina be Mesia be King Davida ena tamana, Iese, ena bese amo do ia vara. (Isaia 11:⁠1) Momokani, Iesu be Iese ena natuna Davida ena bese amo ia vara.​—⁠Mataio 1:​6, 16; Luka 3:​23, 31, 32.

▪ Guna ia noho gabuna Baibel ese ita ia hadibaia, Iesu be Betelehema ai ia do vara lasi neganai, ia be guna ia noho. Matamanai ai gwauraia Mika ena peroveta herevana be ma ia gwau, Iesu “ena matamana be guna negadia amo, matamana negana amo.” (Mika 5:​2, NW ) Ia be Dirava ena vara guna Natuna, bona tanobada ai ia do vara lasi neganai ia be lauma tauna ta, guba ai ia noho. Iesu ia gwau: “Guba amo lau diho mai.” (Ioane 6:38; 8:23) Edena bamona unai ia vara?

Lauma helaga amo, Iehova Dirava be hoa dalanai ena Natuna ena mauri be rami-hebou Iuda kekenina ena bogana lalonai ia atoa, unai amo ia vara neganai ia be taunimanima goevadaena.b Siahu Ibounai Diravana ese unai hoa karana ia karaia be auka lasi. Maria dekenai do idia vara gaudia ia herevalaia aneruna ena hereva bamona: “Dirava ia gwauraia hereva ibounai be do idia guguru.”​—⁠Luka 1:​30-35, 37.

Baibel ese Iesu ia mai gabuna ia herevalaia sibona lasi. To danu Evanelia bukadia foa​—⁠Mataio, Mareko, Luka, bona Ioane​—⁠ese Iesu ena mauri dalana idia herevalaia.

[Footnotes]