Dirava Ena Hereva Amo Diba Abia

Dirava Ena Ura Tanobada Totona be Dahaka?

Inai atikol ese reana emu henanadai haida ia hahedinaraia bona edia haere be Baibel lalonai oi davaria diba. Iehova ena Witnes taudia be mai moale ida oi do idia durua haere oi diba totona.

1. Dirava ena ura tanobada totona be dahaka?

Tanobada be taunimanima edia noho gabuna. Dirava ese aneru ia karaia guba dekenai idia noho totona, unai murinai taunimanima ia karaia tanobada idia noholaia mai moale ida totona. (Iobu 38:​4, 7) Unai dainai, Iehova ese tau ginigunana be paradaiso ladana Eden ai ia atoa, danu Ia ese unai tau bona do ia havaraia natudia dekenai mauri hanaihanai helarona ia henidia.​​—⁠Genese 2:​15-​17; Salamo 115:16 duahia.

Eden umana be tanobada ena kahana maragina ta sibona. Adamu bona Heva be natudia idia havaraia diba. Edia ruma bese ia bada ia lao neganai, idia ese tanobada do idia biagua bona paradaiso ai idia halaoa diba. (Genese 1:​28) Tanobada be ta ese do ia hadikaia diba lasi.​​—⁠Salamo 104:5 duahia.

2. Dahaka dainai hari tanobada be paradaiso lasi?

Adamu bona Heva be Dirava idia kamonai henia lasi, unai dainai Eden amo ia luludia. Paradaiso idia haboioa, bona ta ia hegeregere lasi paradaiso ia havaraia lou totona. Baibel ia gwau: “Dirava ese inai tanobada, be kara dika taudia edia imadia dekenai ia atoa.”​​—⁠Iobu 9:24; Genese 3:​23, 24 duahia.

To Iehova be iena ura ginigunana taunimanima totona ia laloaboio lasi, bona Dirava ia koikoi diba lasi. (Isaia 45:18) Ia ese taunimanima edia noho dalana do ia hanamoa lou, guna ia palanilaia hegeregerena.​​—⁠Salamo 37:11 duahia.

3. Edena dala ai Dirava ese tanobada ai maino do ia havaraia lou?

Taunimanima ese maino bona moale idia davaria totona, Dirava ese kara dika taudia do ia kokia guna. Aramagedono tuarina ai Dirava ena aneru ese Ia idia inai henia taudia ibounai do idia hadikaia ore. Satani be lagani 1,000 lalonai do idia hadiburaia, to Dirava idia lalokau henia taudia be do idia roho mauri bona tanobada matamatana lalonai gau namodia do idia moalelaia.​​—⁠Apokalupo 16:​14, 16; 20:​1-3; 21:​3, 4 duahia.

4. Edena negai hisihisi do idia ore?

Lagani 1,000 lalonai, Iesu be guba amo tanobada do ia lohiaia bona paradaiso ai do ia halaoa lou. Danu, ia ese Dirava idia lalokau henia taudia edia kara dika do ia gwauatao. Bena Iesu ese gorere, buruka bona mase do ia haorea.​​—⁠Isaia 11:9; 25:8; 33:24; 35:1 duahia.

Edena negai Dirava ese kara dika do ia haorea? Iesu be “toa” ta ia herevalaia, unai ese ia hahedinaraia dokona be kahirakahira. Hari tanobada dekenai idia vara dika gaudia dainai taunimanima idia gari bada, bona unai ese ia hahedinaraia ita be “inai nega oromana ena dokona”ai ita noho.​​—⁠Mataio 24:​3, 7-14, 21, 22; 2 Timoteo 3:​1-5 duahia.

5. Vaira negana ai, daidia be Paradaiso ai do idia noho?

Iesu be ena hahediba taudia ia hagania, taunimanima be hahediba taudia ai do idia halaoa bona idia dekenai Dirava ena lalokau daladia idia hadibaia. (Mataio 28:​19, 20) Tanobada hegegemadai, Iehova be taunimanima milioni momo ia durua noho nega matamata lalonai idia noho totona. (Sepanaia 2:⁠3) Iehova ena Witnes taudia edia Kingdom Hall ai, taunimanima ese adavana, tamana, o sinana namona ai lao dalana idia dibaia. Natudia bona tama sina be vaira negana ena noho namona idia dibaia.​​—⁠Mika 4:​1-4 duahia.

Kingdom Hall dekenai, Dirava idia lalokau henia bona idia ura Ia idia hamoalea taudia oi hedavari henia diba.​​—⁠Heberu 10:​24, 25 duahia.

Diba ma haida oi abia totona, inai buka ena karoa 3 oi itaia. Iehova ena Witnes taudia ese idia karaia. Baibel be Dahaka ia Hadibaia?