Dirava Ena Hakaua Dalana Oi Itaia, A?
ISRAELA taudia ese Aigupito idia rakatania neganai, dina ai ori ta be edia ataiai ia noho, to hanuaboi ai unai ori be lahi ai ia lao. Israela taudia bona Aigupito taudia be guna unai bamona gauna ta idia itaia lasi, unai be hoa gauna! Unai ori bona lahi be edeseni amo idia mai? Dahaka dainai Israela taudia edia ataiai ia noho? Israela taudia ese unai “lahi bona ori” be edena bamona idia laloa? Bona lagani 3,500 murinai, ita be edia haheitalai amo dahaka ita dibaia?—Eso. 14:24.
Baibel ese unai lahi bona ori edia badina ia hahedinaraia, ia gwau: “Dina neganai Lohiabada be ori lalonai ia noho, bona idia edia vairana dekenai ia lao, edia dala ia hedinaraia totona. Hanuaboi neganai Lohiabada be lahi lalonai ia noho, bona idia edia vairanai ia lao, edia dala hadiaria totona. Unai dainai, dina neganai, bona hanuaboi neganai danu, idia laolao diba.” (Eso. 13:21, 22) Iehova Dirava ese ena taunimanima be Aigupito amo ia ruhaia bona tano gagaena ai idia raka neganai, lahi bona ori amo ia hakaudia. Unai ori idia badinaia totona idia noho hegaegae be namo. Aigupito tuari taudia ese Israela taudia idia lulua neganai, ori be Israela taudia ia gimaia totona edia murina dekenai ia noho, bona Aigupito taudia edia dala ia koua. (Eso. 14:19, 20) Ena be ori ese dalana idauna amo Israela taudia ia hakaua, to Gwauhamata Tanona ai idia ginidae totona, ori idia badinaia be gau badana.
Unai ori ese Israela taudia ia hadibaia Iehova be idia danu ia noho. Ori ese Iehova ia laulaulaia, bona nega haida ia be unai ori amo idia ia hereva henia. (Num. 14:14; Sal. 99:7) Ori ese ia hahedinaraia Mose be Iehova ese ia abia hidi iena bese do ia gunalaia. (Eso. 33:9) Unai hegeregerena, Iosua be Mose ena gabu ia abia neganai, Iehova be ori amo ia hahedinaraia Iosua ia abia dae. Unai be nega ginigabena Baibel ese ori ia herevalaia. (Deu. 31:14, 15) Oibe, Israela taudia be Gwauhamata Tanona ai idia ginidae totona, namona be idia ese Dirava ena hakaua dalana idia itaia bona idia badinaia be gau badana.
Lahi Bona Ori Idia Itaia Lasi
Israela taudia be nega ginigunana ori idia itaia neganai, idia hoa. To, ena be unai lahi bona ori be nega ibounai idia itaia, idia ese Iehova idia gwau-edeede henia. Nega momo idia ese Dirava ena hakaua dalana idia maumauraia. Aigupito tuari taudia be Israela taudia murinai idia lao neganai, Israela taudia be idia gari bona idia laloaboio Iehova ese idia ia hamauria diba. Unai dainai, idia ese Dirava ena hesiai tauna, Mose, idia gwau henia. (Eso. 14:10-12) Davara Kakakakana idia hanaia murinai, aniani bona ranu be lasi dainai, Mose, Arona bona Iehova dekenai idia maumau. (Eso. 15:22-24; 16:1-3; 17:1-3, 7) Wiki haida murinai, Arona idia doria, golo kaivakuku ta ia karaia totona. Mani oi piksaia! Edia kamepa ena kahana ta dekenai, Israela taudia ese ori bona lahi idia itaia—Aigupito amo idia ia hakaua siahu Diravana ia laulaulaia—to kamepa ena kahana ma ta dekenai idia be mauri lasi kaivakuku idia tomadiho henia, bona idia gwau: “Israela taudia e, iseda dirava be inai, Aigupito dekena amo ita ia hakaua vadaeni!” Unai be hemataurai lasi karana momokani!—Eso. 32:4; Neh. 9:18.
Israela taudia edia gwau-edeede karana ese ia hahedinaraia, idia ese Iehova ena hakaua dalana idia dadaraia. Idia be idia matakepulu lasi, badina lahi bona ori idia itaia diba, to Iehova ena hakaua dalana idia laloaboio. Ena be edia kara amo “edia Helaga Dirava idia habadua,” to Iehova be mai hebogahisi ida unai lahi bona ori amo idia ia hakaua noho ela bona Gwauhamata Tanona dekenai idia ginidae.—Sal. 78:40-42, 52-54; Neh. 9:19.
Iehova ese Ita Ia Hakaua Dalana Itaia
Iseda negai danu, Iehova be ena taunimanima ia hakaua noho. Iehova be Israela taudia ia rakatania lasi to ia hakaudia hegeregerena, hari danu tanobada matamatana ai ita ginidae totona, Iehova ese ita do ia hakaua. Ia ese Iesu Keriso be kongrigeisen ena Hakaua Tauna ai ia halaoa. (Mat. 23:10; Efe. 5:23) Iesu ese igui hesiai tauna mai ena kamonai dekenai gaukara haida ia henia, unai orea be lauma helaga ese ia horoa Keristani taudia. Bona unai orea ese Keristani kongrigeisen lalonai elda taudia ia abia hidi.—Mat. 24:45-47; Tito 1:5-9.
Igui hesiai tauna mai ena kamonai eiava kohu naria tauna be daika? Iesu ia gwau: “Kohu naria tauna mai ena kamonai bona mai ena kara maoromaoro, ena Biaguna ese ia abia hidi ena hesiai taudia do ia naria bona nega korikori ai edia aniani do ia henia tauna be daika? Unai igui hesiai tauna do ia moale, bema ena Biaguna ia mai bona ia itaia ia be unai bamona ia karaia noho!”—Luka 12:42, 43.
Kohu naria tauna “mai ena kamonai” be Iehova, Iesu, Baibel ena hereva momokanidia, bona Dirava ena taunimanima ia badinaia. Ia be “mai ena kara maoromaoro,” badina “basileia ena sivarai namona” harorolaia bona ‘bese ibounai taudia be hahediba taudia ai halaoa’ gaukarana be mai aonega ida ia gunalaia noho. (Mat. 24:14; 28:19, 20) Kohu naria tauna be “nega korikori ai” Baibel ena hagoadaia hereva namodia ia halasia. Ita itaia Iehova ese ena taunimanima ia hanamoa, badina ena hesiai taudia edia namba ia bada ia lao, mai anina bada abia hidi idia karaia neganai ia durudia, Baibel ena hereva momokani idia lalopararalaia, inai taudia amo ia gimadia, bona lalomaino ia henidia.—Isa. 54:17; Fili. 4:7.
Dirava Ena Hakaua Dalana Badinaia
Edena dala ai ita hahedinaraia Dirava ena hakaua dalana ita badinaia? Aposetolo Paulo ia gwau: “Umui idia hakaua taudia do umui kamonai henia, bona idia henunai do umui noho.” (Heb. 13:17) Nega haida unai ita karaia be auka. Mani inai haheitalai oi laloa: Oi be Israela tauna ta bona Mose ena nega ai oi noho. Dina haida lalonai ori oi badinaia murinai, ori ia stopu. Unai gabu dekenai dina hida do ia noho? Dina ta, wiki ta, eiava hua haida, a? Bona oi laloa, ‘Egu kohu ibounai do lau kokia, eiava?’ Matamanai, reana do oi gaukaralaia kohu sibona oi kokia. To, dina haida murinai oi hesiku emu kohu oi tahua totona, bona emu kohu ibounai oi kokia. To, kohu ibounai oi kokia murinai, oi itaia ori ia marere, vadaeni ma kohu oi udaia haragaharaga! Do oi hekwarahi bada, ani? To ori ia marere neganai, Israela taudia “idia toreisi, edia kamepa idia rakatania.”—Num. 9:17-22.
Dirava ena hakaua herevana ita abia neganai, dahaka ita karaia? Maoromaoro ita badinaia, a? Eiava, eda kara gunadia ita do karaia noho? Hegeregere, Baibel stadi karaia daladia, idau tano taudia haroro henia daladia, hanaihanai ruma bese tomadiho karaia, Hospital Liesen Komiti ida gaukara hebou daladia bona hebouhebou negadiai iseda toana bona kara do ita naria namonamo edia hakaua herevadia be kongrigeisen hebou ai ita kamonai neganai ita badinaia, a? Bema ita idia henia sisiba ita abia dae, ita hahedinaraia Dirava ena hakaua dalana ita laloa bada. Abia hidi badadia ita ura karaia neganai, namo lasi sibona eda aonega dekenai ita tabekau, to namona be Iehova bona ena orea ese idia henia hakaua herevadia ita badinaia. Natu ta be lai gubana ia toa neganai, ena tama sina ia heau henia bona ia idia gimaia, unai hegeregerena lai gubana bamona hekwakwanai ita davaria neganai, namona be Iehova ena orea ita heau henia bona ita do ia gimaia.
Momokani, tanobada ai Dirava ena orea idia hakaua taudia be goevadae lasi, Mose bamona. To, lahi bona ori idia hedinarai karana ese idia hamomokania Dirava ese Mose ia lalonamo henia bona ia abia hidi. Ita laloatao danu, edena nega ai do idia raka matamaia be Israela taudia ta ta ese idia abia hidi lasi. To, idia ese “Lohiabada ena oda idia badinaia, Lohiabada ese Mose ia hamaoroa hegeregerena.” (Num. 9:23) Mose be Dirava ena gwaukau tauna dainai, ia ese oda ia henia.
Hari, kohu naria tauna mai ena kamonai oreana be Iehova ese ia gaukaralaia ita dekenai hakaua herevadia idia henia totona. Edena dala ai? Gima Kohorona bona Iseda Basileia Gaukara, buka bona magasin matamatadia, hebou badadia bona maragidia dekenai idia henia tok idauidau amo unai idia karaia. Danu, loaloa naria taudia, revareva bona maduna idia huaia tadikaka edia sikuli amo hadibaia hereva ma haida be kongrigeisen dekenai idia henia.
Oi laloparara unai be Dirava ese ita ia hakaua dalana, a? Inai nega dokona lalonai, ita be “tano kaukau” dekenai ita raka bamona, bona Iehova be ena orea ia gaukaralaia ita ia hakaua totona. Unai dainai, ita be mai maino, lalokau bona lalotamona ai ita noho.
Israela taudia be Gwauhamata Tanona dekenai idia ginidae neganai, Iosua ia gwau: “Nega daudau lasi lalonai lau be taunimanima ibounai edia dalana hegeregerena do lau mase. Umui ibounai be emui lalona, bona emui laumana dekenai umui diba, Lohiabada, emui Dirava, ese iena gwauhamata namodia ibounai umui dekenai ia hamomokania vadaeni, idia ta ia reaia lasi.” (Ios. 23:14) Hari danu, Dirava ese ena hesiai taudia be ia gwauhamatalaia tanobada matamata dekenai do ia hakaudia vareai. To, unuseniai ita noho totona, ita manau bona Dirava ena hakaua dalana ita badinaia be gau badana. Unai dainai, Iehova ena hakaua dalana ita itaia bona badinaia noho be gau badana!
[Pictures on page 5]
Iehova ena orea ese ita ia hakaua noho
Buka matamatadia
Tiokratik sikuli idauidau
Haroro grup ai haroro daladia ita dibaia